Ina sirengo si ngu hongola ndzadzini?
Hlamulo nya Bhibhiliya
Bhibhiliya ya gu ganeya gu khiyo ga satshavbo sivangwa si gu romo mafuni i tengo nyo khaguri basi nya vathu va hongolago ndzadzini. (Gutuledwa 14:1, 3) Avo va na fuma kha nga dzipfhumu ni gu thuma kha nga vaprista gumogo ni Jesu. (Luka 22:28-30; Gutuledwa 5:9, 10) Vathu nya vangi va na wuswa va vbanya paradhesini mafuni. — Ndzimo 37:11, 29.
Omu nya Bhibhiliya, gumwalo gu nga lowa gupwani dzimbwa ni simbe sirengo si na hongola ndzadzini, ganiolu khu kotani nya gighelo nyo pwale. Sirengo simwalo makodzelo nyo gire esi si vbwetegago gasi si ninganedwa khu gu ‘ranwa si hongola ndzadzini.’ (Vahebheru 3:1) Silo soso sa gu pata gu manega ni guti, gu yeyedza gukhodwa ni gu engisa sileletelo sa Nungungulu. (Matewu 19:17; Johane 3:16; 17:3) Vathu basi va nga vangwa ni lithomo nya gu vbanye kala gupindruga. — Genesi 2:16, 17; 3:22, 23.
Gasi gu hongola ndzadzini, sivangwa si gu romo mafuni si yede gu wuswa si vbanya gambe. (1 Vakorinto 15:42) Bhibhiliya yi ngu ganeya khu vathu nya vangi va nga wuswa khu gufani. (1 Dzipfhumu 17:17-24; 2 Dzipfhumu 4:32-37; 13:20, 21; Luka 7:11-15; 8:41, 42, 49-56; Johane 11:38-44; Mithumo 9:36-42; 20:7-12) Khu kharato, satshavbo sivangwa si nga wuswa khu gufani, gu diri vathu nasiri sirengo.
Sirengo si na ni hefemulo?
Ahihi. Bhibhiliya ya gu ganeya gu khiyo sirengo gumogo ni vathu i hefemulo. (Mitengo 31:28) Tepo mwama nyo pheye Adhamu a nga vangwa, uye kha hakha hefemulo, ganiolu uye a di “khala givangwa nya guvbanye.” (Genesi 2:7) Hefemulo wa gu wumbwa khu silo sivili: “kudzudzwani nya mafu” ni “liphuvbo hi hefemulago khilo.”
Hefemulo wu ngufa?
Ina. Bhibhiliya yi ngu hevbudza gu khiyo hefemulo wu ngafa. (Levhi 21:11, Ezekiyeli 18:20) Tepo khiyo sirengo ni vathu vafago, avo va gu bweleya va khala kudzudzwani. (Muhevbudzi 3:19, 20) Khu mambe malito, avo kha va manegi gambe.a
Ina sirengo si ngu ghoha?
Ahihi. Gughoha so thula gu pimisa, gu dzipwa mwendro gu gira gilo gi fanyago milayo ya Nungungulu. Givangwa gyo ghoha basi gya gu ba giri ni makodzelo nya gu hunge makungo ma gimbileyanago ni esi nya sadi, ganiolu sirengo simwalo makodzelo yoyo. Iso sa gu gira silo guya khedzi si nga girwa khidzo womini gwaso watshavbo, nigu iso si na ni gitepwana gasi guvbanya. (2 Pedro 2:12) Tepo yi vbohago tepo nya gu womi waso wu vbeya, iso sa gufa ambari olu nya gu kha si ghohi.
Ina si ngu dzumelega gu tshanisa sirengo?
Ahihi. Nungungulu a di ninga thumo vathu nya gu woneleye sirengo, ganiolu kha hi embeya gasi gu si tshanisa. (Genesi 1:28; Ndzimo 8:6-8) Jehovha a ngu garadzega khu gu khadzisega nya sirengo ambari na siri sidugwana, nya nga sinyoni. (Jona 4:11; Matewu 10:29) Uye a di ruma sithumi saye gasi gu phara gwadi sirengo. — Ekisodha 23:12; Dhewuteronome 25:4; Mavingu 12:10.