Khu ginani Jesu a ranwago gupwani Gyanana gya Nungungulu?

Hlamulo nya Bhibhiliya

Bhibhiliya yi ngu ganeya dzitepo nya dzingi khu Jesu kha nga “Gyanana gya Nungungulu.” (Johane 1:49) Lito “Gyanana gya Nungungulu” la gu yeyedza gu khilo Nungungulu Muvangi nya silo satshavbo mwendro gifefe nya womi watshavbo, gu pata ni womi wa Jesu. (Ndzimo 36:9; Gutuledwa 4:11) Bhibhiliya kha yi hevbudzi gu khiyo Nungungulu a diri Papayi gu fana ni edzi vathu va khalago khidzo vapapayi muhuno.

Bhibhiliya yi ngu rana gambe Dzingilozi kha nga “sanana sa Nungungulu.” (Joba 1:6) Yi ngu ganeya gambe gu khiyo Adhamu, mwama nya gupheye, a diri “Gyanana gya Nungungulu.” (Luka 3:38) Ganiolu, kha nga olu Jesu a gu givangwa nya gupheye gya Nungungulu khu gu kongoma, Bhibhiliya yi ngu tshamuseya Jesu kha nga Gyanana gya Nungungulu nya lisima ngudzu.

• Ina Jesu a vbanyide ndzadzini na si velegwe mafuni?

• Ginani egi Jesu a giridego na si guti mafuni?

Ina Jesu a vbanyide ndzadzini na si velegwe mafuni?

Ina. Jesu a diri givangwa nya liphuvbo na a si gu velegwe mafuni kha nga muthu nya nyama. Jesu a ganede gu khuye: “Nyi tshigide khu ndzadzini” — Johane 6:38; 8:23.

Nungungulu a vangide Jesu na nga si gu vangi silo satshavbo. Bhibhiliya yo ganeya esi khu Jesu:

• “Uye khuye . . . matewula nya sivangwa satshavbo.” — Vakolosi 1:15.

• Uye khuye “givangwa nya gupheye gya Nungungulu.” — Gutuledwa 3:14.

Jesu a tadziside giprofeto egi gi ganeyago khu “uye a nga bani ari gitugulwana gukhugela gikhatini gya gale, gukhugela matshiguni ma si vbeligo.” — Mikeya 5:2; Matewu 2:4-6.

Ginani egi Jesu a giridego na si guti mafuni?

Jesu a diri ga wulanga nya gu khugege ndzadzini. Jesu a ganede khu wulanga wowo tepo a nga gombeya gu khuye: “Papayi nyi vege khu bambe gwago u bwe u nyi ninga wuzundzu nyi nga ba nyiri nawo khu bambe gwago litigo na li nga si vangwi.” — Johane 17:5.

Jesu a phasedzede Papayi waye gu vanga silo satshavbo. Jesu a thumide ni Papayi waye kha nga “muthu a wutigo thumo.” (Mavingu 8:30) Bhibhiliya yo ganeya esi khu Jesu: “Silo satshavbo sa ndzadzini ni mafuni si vangidwe khu gu thumiswa uye.” — Vakolosi 1:16.

Nungungulu a thumiside Jesu gasi gu vanga silo satshavbo. Silo soso a si vangidego, sa gu pata sivangwa nya liphuvbo ni satshavbo esi si gomogo ndzadzini ni Mafuni. (Gutuledwa 5:11) Ndziya eyi Nungungulu ni Jesu va thumisanago khiyo, yi ngu fana ni edzi muvbahi ni arkitetu va thumisanago khidzo. Arkitetu a gu dhezenyari projetu, ganiolu muvbahi a gira esi si gu romo avba nya projetu.

Jesu a diri lito. Tepo Bhibhiliya yi ganeyago khu Jesu na si guti mafuni, yo ganeya gu khiyo uye a diri “Lito.” (Johane 1:1) Si ngu wonega nga khatsi Nungungulu a thumiside Jesu gasi gu ganeya mahungu ni sileletelo ga simbe sivangwa.

Si ngu wonega gambe gu khatsi Jesu a di gu thuma kha nga Muganeli wa Nungungulu tepo a nga ba a ganeya ni vathu mafuni. Si nga gira nari gu Nungungulu a di gu thumisa Jesu kha nga Lito gasi a ninga sileletelo Adhamu ni Evha tepo va nga ba vari thembweni ga Edheni. (Genesi 2:16, 17) Nigu Jesu si nga gira nari Ngilozi yi nga kongomisa Vaisrayeli tepo va nga ba vari giwulani, nigu avo va di yede gu yi engisa.  — Ekisodha 23:20-23.a