Mavingu 16:3—“Tumba PFHUMU Nungungulu ga mithumo yago yatshavbo”

“Tumba Jehovha ga mithumo yago yatshavbo nigu makungo yago ma na dugeleya.” — Mavingu 16:3, Tradução do Novo Mundo.

“Tumba PFHUMU Nungungulu ga mithumo yago yatshavbo, gasi makungo yago ma na mana gudugelela.” — Mavingu 16:3, Nova Versão Internacional.

Tshamuselo nya libhuku la Mavingu 16:3

Livingu leli la gu tiyisegisa vale va khozeyago Nungungulu nya lisine gu khilo makungo yawe ma na dugeleya va gu tumba ni gu landrisa sileletelo saye.

“Tumba Jehovha ga satshavbo u girago.” Na va si hungi makungo, vakhozeyi va Jehovhaa khu gu dzi nogisa va ngu vbwetedzeya sileletelo saye. (Jakobe 1:5) Khu ginani? Gimwegyo nya gighelo khu gu vathu kha va si kodzi gu woneleya satshavbo si giregago womini gwawe. (Muhevbudzi 9:11; Jakobe 4:13-15) Gu diga isoso, adzina saye va mwalo guti gu vbwetegago gasi gu tadzisa makungo yawe. Khu sighelo sesi, vathu nya vangi va ngu diga sigaradzo sawe mandzani ga Nungungulu. Avo va gu gira isoso khu gu lomba sileletelo saye ni gu gira silo si gimbileyanago ni gugola gwaye gu lovidwego omu nya Lito laye, Bhibhiliya. — Mavingu 3:5, 6; 2 Thimoti 3:16, 17.

Malito ma gu khayo “tumba PFHUMU Nungungulub ga mithumo yago yatshavbo” ma gu tshamuseya gu khayo “ningeya mithumo yago ga PFHUMU.” Guya khu referensiya nyo khaguri, malito yaya ma gu tshamuseya “muthu a rulago rwalo a gu nawo magatani gwawe a ningeya mumbe a tiyidego, a na wu kodzago gu wu rwala.” Vale va tumbago Nungungulu khu gu dzi nogisa, va nga tiyisega gu khavo uye a na va phasa ni gu va khathaleya. — Ndzimo 37:5; 55:22.

Malito ma gu khayo “ga satshavbo u girago” kha ma tshamuseyi gu khayo Nungungulu a na dzumeleya ni gu kategisa yatshavbo makungo muthu a manegago nawo. Gasi gu a kategiswa khu Jehovha, makungo yaye ma yede gu gimbileyana ni milayo ni gugola gwaye. (Ndzimo 127:1; 1 Johane 5:14) Nungungulu kha kategisi vale va gu mba engisa. Khu lisine, uye “a ngu segela dzindzila va nya guvivba.” (Ndzimo 146:9) Ganiolu, uye a ngu seketeya vale va mu engisago ni gu ninga githawo milayo yaye yi gomogo omu nya Bhibhiliya. — Ndzimo 37:23.

“Nigu makungo yago ma na dugeleya.” Dzimbe Dzibhibhiliya dza gu vbindrugedzeya lito leli khu malito ma gu khayo “makungo yago ma na emiswa.” Omu nya Milowo nya Gihebheru, yi tidwago kha nga Testamenta ya gale, lito “gu emiswa” li vbindrugedzidwego la gu tshamuseya gu gira gilo khu maphelo yakone, dzitepo nya dzingi si thulago maphelo nya esi Nungungulu a si vangidego. (Mavingu 3:19; Jeremiya 10:12) Khu ndziya nyo fane, Nungungulu a na tadzisa makungo ya vale va girago esi nya sadi mahoni gwaye nigu isoso si na va phasa gu dzipwa na va vhikelegide, na va tsakide ni gu manega ni womi nyo khadzisege. — Ndzimo 20:4; Mavingu 12:3.

Mongo nya libhuku la Mavingu 16:3

Livingu leli li lovidwe khu Pfhumu Solomoni, nigu lovide gipandre nya gikhongolo nya libhuku la Mavingu. Uye a si kodzide gu ganeya mavingu nya mangi na gu phaswa khu guti a ningidwego khu Nungungulu. — 1 Dzipfhumu 4:29, 32; 10:23, 24.

Omu nya gipimo 16, Solomoni a gu pheya khu gu dhumisa Nungungulu a bwe a yeyedza gu khuye a ngu nyenya vale va dzi khusedzago. (Mavingu 16:1-5) Gipimo gegi gya gu gira muleri a vboheya mahegiso nya lisima, a gu hungo nya mahungu wu gu romo ga libhuku la Mavingu wu gu khuwo: Vathu va nga mana guti nya lisine va bwe va dugeleya va gu dzi nogisa va bwe va dzumeleya Nungungulu a gimbidzisa dzindziya dzawe. (Mavingu 16:3, 6-8, 18-23) Lisine leli nya gisekelo li ngu phindra-phindra dzitepo nya dzingi omu nya Bhibhiliya. — Ndzimo 1:1-3; Isaya 26:3; Jeremiya 17:7, 8; 1 Johane 3:22.

Wona vhidhyu nyo role gasi gu pwisisa gwadi libhuku la Mavingu.