Tshamuselo wa vbavbatshi

a U di ngapwa muthu nyo khaguri a thumedego Jehovha khu tepo nyo laphe na gu ganeya gu khuye: ‘Nyi di si vireyi gu kheni nyi na gira tanga yeyi ga litigo leli nyo vivbe.’ Hatshavbo hi ngu dzina gu khethu Jehovha a fuvisa litigo leli nyo vivbe, ngudzungudzu ga matshigu yaya nya sigaradzo. Ambari ulolo, hi yede gu hevbuleya gu laphisa monyo. Omu nya ndrima yeyi hi na wona matshina nya milayo nya Bhibhiliya ma na hi phasago gu vireya Jehovha kala a gira gilogyo. Hi na wona gambe siemo sivili si vbwetago gu hi laphisa monyo, hi vireya Jehovha gu a gira gilogyo. Khu gu hegisa, hi na wona makategwa ma na manwago khu ava va dziemisedego gu vireya Jehovha.