Mavili, 2 nya Setembro
Liphuvbo li ngu gevisisa silo satshavbo ambari silo si etidego ngudzu sa Nungungulu. — 1 Kor. 2:10.
Abari gu wo tshangana ga libandla gu gu na ni vahuweleyi nya vangi u nga dzipwa nga khatshi gutala nya dzitepo uwe kha wu ningedzwi, adzina u nga pimisa gu khuwe tshukwana nyi si ningeyi gambe mihlamulo, ganiolu simama gu zama gu ningeya mihlamulo. Zama gu dongiseya mihlamulo nya yingi. Khu kharato, ambari wa gu mba ningedzwa gupheyani nya gihevbulo, u na ba uri ni mathomo nya mangi nyo ningeye mihlamulo. Tepo u dongiseyago gihevbulo nya Mukhedziseyi, dundrugeya khedzi dziparagarafu dzi pwananago khidzo ni hungo nya mahungu nya ndrima yoyo. Wa gu gira isoso, u na ba uri ni mihlamulo nya yadi gasi gu ningeya mitshanganoni. Gu diga isoso, u nga dongiseya mihlamulo nya dziparagarafu dzi ganeyago khu sihevbudzo nya Bhibhiliya si garadzago gu tshamuseya. Khu ginani? Kholu adzina saye ga dziparagrafu dzodzo, gu na ba guri mwalo vathu nya vangi nyo khusedze libogo. Ambari hwane nyo ba u thumiside dzindziya dzedzi, ganiolu u simama gu mba ningedzwa gasi gu hlamula mitshanganoni, ginani u nga girago? Bhula ni mugimbidzisi nya Mukhedziseyi u mu embeya gu khuwe, wa gu tsakeya gu hlamula ga paragarafu nyo khaguri. Mukhedziseyi 04/23 dzipaj. 21-22 dzipar. 9-10
Mararu, 3 nya Setembro
Josefa a di khendzuga khu muligovbeni, a gira satshavbo a nga embedwa khu ngilozi ya Jehovha, a dzega mwangadzi waye a hongola naye gaya. — Mat. 1:24.
Josefa a dzumede gu gimbidziswa khu Jehovha, nigu isoso si mu giride a khala mwama nya wadi. Khu gipimo nya dzitepo dziraru, uye a hakhide sileletelo sitago khiyo ga Nungungulu maningano ni ndranga yaye. Ga dzitepo dzatshavbo dzedzi, uye a di dzegeya gu engisa Jehovha ambari si nga ba si mu garadzeya. (Mat. 1:20; 2:13-15, 19-21) Khu gu landra gileletelo gya Nungungulu, Josefa a vhikede Mariya, a mu phasa ni gu mu tiyisa. Nga dundrugeya esi Josefa a giridego gasi Mariya a engedzeya gu mu haladza ni gu mu ninga githawo. Vama, mu nga pimedzeya giyeyedzo gya Josefa, khu gu mu vbweta wusingalagadzi omu nya Bhibhiliya gasi mu khathaleya dzindranga dzanu. Tepo u thumisago wusingalagadzi wowo ambari na si gu garadza, uwe u na yeyedza gu khuwe u ngu haladza mwangadzi wago, nigu mutshadhu wanu wu na tiya. Ndriyathu moyo nya nyamayi wa Vanuatu, a gu na ni 20 myaga ni gu vbindra na tshadhide, wari khuye: “Tepo mwama wangu a vbwetago gu thumisa wusingalagadzi wa Jehovha, nya gu engedzeya gu mu ninga githawo nyi bwe nyi dzipwa na nyi vhikelegide ni gu tumba makungo a hungago.” Mukhedziseyi 05/23 paj. 21 par. 5
Mana, 4 nya Setembro
Gu na manega avbovbo ndzila nya yikhongolo nya likondro, yi na ranwago pwani Ndzila nya Guage. — Isa. 35:8.
Vajudha va nga duga khu Bhabhiloni va di yede gu khala “vathu va agisedwego” ga Nungungulu wawe. (Dhet. 7:6) Isoso so thula gu khiso va di yede gu vbindrugedza silo nyo khaguri gasi gu tsakisa Jehovha. Vajudha nya vangi va di gu velegedwe Bhabhiloni, va di gu olovede mapimiselo ni magirelo nya silo ya Bhabhiloni. Hwane nya myaga nyo khaguri Vajudha na va bwelede Israyeli, Mufumeli Nehemiya tugude gu khuye sanana si velegidwego Israyeli kha sa nga ba si hevbudzidwe lidimi nya Vajudha. (Dhet. 6:6, 7; Neh. 13:23, 24) Sanana sesi si hevbude kharini gu haladza ni gu khozeya Jehovha, nya mba si kodza gu pwisisa Gihebheru, a gu lidimi li nga ba li thumisidwe gasi gu lova Lito la Nungungulu? (Ezira 10:3, 44) Khu kharato, Vajudha va diri ni silo nya singi nya lisima gasi gu vbindrugedza. Ganiolu, si di hadzi gu va vbevbugeya gu gira isoso Israyeli, kholu khiyo wu nga ba wu romo wukhozeyi nya guage wu nga ba wu wusedzidwe. — Neh. 8:8, 9. Mukhedziseyi 05/23 paj. 15 dzipar. 6-7