Madhota — Hevbulane khu giyeyedzo gya Gidheyoni

1. Guya khu 1 Pedro 5:2, khu wevbini thumo nya lisima wu girwago khu madhota?

MADHOTA nya Makristo, ma ningidwe thumo nya gu khathaleye dzinvuta dza Jehovha. Ayo ma ngu bonga ngudzu Jehovha kholu a ma hathidego gasi gu thumeya vandriyawe ni gu thuma kha nga “vahavisi.” (Jer. 23:4; leri 1 Pedro 5:2.) Ethu hi ngu bonga ngudzu khu gu manega ni vama vava libandlani gwathu.

2. Sigaradzo muni madhota ma tshanganago naso?

² Madhota tepo ma dzi garadzeyago gu gira mithumo yawe, ayo ma ngu tshangana ni sigaradzo nya singi. Khu kharato, va yede gu dzi garadza gasi gu khathaleya libandla. Tony, lidhota limwedo la Estados Unidos, a hevbude gu khala muthu nya gudzinogise tepo a nga ba a ningwa mithumo nya yingi Libandlani. Uye wari khuye: “Tepo wu nga pheya tungu nya COVID-19, eni nyi di pheya gu gira mithumo nya yingi mitshanganoni gwathu ni gu thuma ngudzu thumoni nyo tshumayele. Ganiolu, ambari olu nyi nga ba nyi dzi garadzeya gu gira mithumo nya yingi, si di nga gu romo silo nya singi gasi gu girwa. Nyi di gu khala na nyi pharegide ngudzu nyo bwe nyi hamuga tepo nya gu leri Bhibhiliya, nyo gire gihebulo nya muthu enga ni gu gombeya.” Ilir, lidhota limwedo la Kosovo, li tshanganide ni gigaradzo nyo hambane. Tepo yi nga manega nyimbi omu a nga ba a khala, si mu garadzede gu engisa sileletelo nya hengeledzano. Uye a di khuye: “Gutiya-hwambo gwangu gu lingidwe tepo bheteli yi nga nyi ninga thumo nyo phase vandriyathu va nga ba va romo omu nyimpi yi nga ba yi khudzugide khu tshivba. Nyi di khala hwanga, nyo bwe nyi wona gu kheni thumo nyi ningidwego kha wu na nga phasa.” Tim, misiyonariyu moyo wa Ásia si mu garadzede gu gira esi a nga ba a si vbweta tshigu ni tshigu. Uye wari khuye: “Dzimbe dzitepo, si di gu nyi garadzeya gu khathaleya vandriyathu.” Ginani gi nga phasago madhota ma tshanganago ni sigaradzo nya nga esi?

3. Hi nga wuyedwa kharini khu gu hevbula khu giyeyedzo gya Ghidheyoni?

³ Madhota ma nga hevbula khu giyeyedzo gya Ghidheyoni. (Hebh. 6:12; 11:32) Uye khade muvhikeyi ni muhavisi nya vathu va Nungungulu khu tepo ya yimweyo. (Val. 2:16; 1 Dzik. 17:6) Gufana ni Ghidheyoni, madhota ma hathidwe gasi gu khathaleya vathu va Nungungulu ga dzitepo dzedzi nyo garadze. (Mith. 20:28; 2 Thim. 3:1) Hi nga hevbula khu giyeyedzo gya Ghidheyoni khu gu ninganiseya, gu dzi nogisa ni gu engisa. Gutimiseya gwaye gu lingidwe tepo a nga ba gira mithumo yaye. Gani ha gu thuma kha nga madhota mwendro ne, ethu hi nga hevbuleya gu bonga madhota yathu. Hi nga seketeya vama vava va thumago khu gu dzigaradza gasi gu khathaleya libandla. — Hebh. 13:17.

TEPO SI HI GARADZEYAGO GU DZI NOGISA

4. Ghidheyoni a yeyedzide kharini gu khuye a di gu dzi nogisa ni gu ninganiseya?

⁴ Ghidheyoni a di gu dzi nogisa ni gu ninganiseya.b Ngilozi ya Jehovha yi di embeya Ghidheyoni gu khiyo a di hathidwi gasi gu vbulugisa Vaisrayeli ga Vamedhiyani. Khu gu dzi nogisa uye a di khuye: “Ndranga yangu a gu iyo nya wusiwana ngudzu ga lihundzu [a] gu ilo nya lidugwane ga Manasi, eni kheni nya dugwane wakone wa ndrangani ga babe wangu.” (Val. 6:15) Uye a di dzi wona na si ninganedwe khu gu gira thumo wowu, ganiolu Jehovha a di gu dziti gu khuye a di hadzi gu wu kodza gu gira gwadi. Khu gu phaswa khu Jehovha, Ghidheyoni a si kodzide gu gira gwadi thumo waye.

5. Si nga garadzeya madhota gu yeyedza gu dzi nogisa ni gu ninganiseya khu ndziya muni?

⁵ Madhota ma ngu gira satshavbo ma si kodzago gasi gu yeyedza gu ninganiseya ni gu dzi nogisa ga satshavbo ma girago. (Mik. 6:8; Mith. 20:18, 19) Ayo kha ma dzi khusedzi khesi ma giredego ni esi ma si girago. Nigu kha ma dzipwi nandru khu kotani nya gu mba vbeleya gwawo mwendro sihoso ma giridego. Ambari ulolo, dzimbe dzitepo si nga garadzeya lidhota gu yeyedza gu dzi nogisa ni gu ninganiseya. Khu giyeyedzo, ilo li nga dzumeya mithumo nya yingi, ganiolu li si kodzi gu yi gira yatshavbo. Adzina ilo li nga zundzwa mwendro gu poyidwa khu ndziya yi girago khiyo thumo walo. Ginani egi madhota ma nga gi hevbulago khu giyeyedzo gya Ghidheyoni ma gu tshangana ni siemo nya nga esi?

6. Madhota ma nga hevbula ginani khu gu ninganiseya ga Ghidheyoni? (Wona fotu.)

⁶ Lomba giphaso. Muthu nyo ninganiseye a ngu dziti gu khuye gu na ni silo a gu mba yela gu gira. Ghidheyoni yeyedzide gu khuye a di gu ninganiseya khu gu dzi emiseya gu lomba giphaso vambe. (Val. 6:27, 35; 7:24) Madhota nya guti ma ngu gira sasimweso. Tony, a khumbugidwego gupheyani wari khuye: “Khu kotani nya sihevbudzo nyi si manidego tepo nyi nga ba nyiri gyanana, nyi di gu dzumeya mithumo nyi nga ma nyi si yi kodzi gu yi gira yatshavbo. Khu kharato, nyi di hunga gu pata mahungu ma ganeyago khu gu ninganiseya avba nya wukhozeyi wathu nya ndranga, nyi bwe nyi lomba mawonelo mwagandzi wangu. Nyi di wona gambe vhidhiyu omu nya jw.org yi gu khiyo Imite Jesus no Modo de Treinar, Confiar e Delegar.” Tony a di pheya gu rana vambe gasi vaya mu phasa gu gira mithumo yaye. Khu wevbini handro wakone? Tony wari khuye: “Thumo libandlani wu ngu gimbiya gwadi nigu nyi na ni tepo nya yingi gasi gu tiyisa wupari wangu ni Jehovha.”

7. Madhota ma nga pimedzeya kharini Ghidheyoni ma gu podidwa? (Jakobe 3:13)

⁷ U nga gorogi wa gu poyidwa khu muthu nyo khaguri. Gimbe gigaradzo va tshanganago nagyo madhota khu tepo va poyidwago. Giyeyedzo gya Ghidheyoni gi na va pasa gambe ga giemo gegi. Uye a di gu dziti gu khuye kha nga ba a vbelede, khu kharato kha goroga tepo Vaefrayimi va nga mu poyila. (Val. 8:1-3) Ghidheyoni kha va hlamula khu ndziya nya mba yadi. Uye a yeyedzide gu khuye a di gu dzi nogisa khu gu engiseya gwadi esi va nga ba va ganeya, nigu isoso si va giride va rula. Madhota ma gu na ni guti, ma gu pimedzeya giyeyedzo gya Ghidheyoni khu gu engiseya gwadi ni gu hlamula khu ndziya nya yadi ma gu poyidwa. (Leri Jakobe 3:13.) Khu kharato, avo va gu phasa gu andrisa gurula libandlani.

8. Madhota ginani ma yedego gu gira ma gu hakha wuzundzu? Ninga giyeyedzo.

⁸ Zundza Jehovha. Tepo Ghidheyoni a nga zundzwa kholu a nga pala Vamedhiyani, uye a di yisa watshavbo wuzundzu ga Jehovha. (Val. 8:22, 23) Madhota ma nga pimedzeya kharini giyeyedzo gya Ghidheyoni? Ayo ma nga zundza Jehovha khu satshavbo ma si kodzago gu gira. (1 Kor. 4:6, 7) Khu giyeyedzo, lidhota la gu tshuka li zundzwa khu makodzelo yalo nyo hevbudze, li nga ganeya gu khilo si kodzegide khu gu phaswa khu sihevbudzo hi si manago omu nya Lito la Nungungulu ni sileletelo hi ningwago khu hengeledzano ya Jehovha. Madhota ma yede gu dzi wudzisa gu khayo ndziya ma hevbudzago khiyo, ya gu yisa wuzundzu ga Jehovha mwendro gwavo. Wona giyeyedzo gya lidhota limwedo nyo pwani khu Timothy. Tepo Timothy a nga pheya gu thuma kha nga lidhota, uye a di gu gola gu vega dziganelo dza vbaguagani. Uye wari khuye: “Eni nyi di pheya ganelo khu gu thumisa siyeyedzo nyo laphe ni gu garadza gu si pwisisa. Esi si di gu gira vandriyathu nyo khaguri va nyi zundza. Ganiolu, nya mba tsakisa khu gu avo va di gu vega gupima gwawe avbo gwangu nasiri avba nya Bhibhiliya mwendro ga Jehovha.” Khu gu gimbiya nya tepo, Timothy a tugude gu khuye a di yede gu vbindrugedza edzi a nga ba a hevbudza khidzo gasi vandriyathu va potsa gu vega ngudzu gupima avbo gwaye. (Mav. 27:21) Khu wevbini handro wu manegidego? Uye wari khuye: “Vandriyathu va ngu nyi embeya edzi ganelo yangu yi va phasidego khidzo gu pala ni gu timiseya sigaradzo mwendro gu hidzimeya vbafuvbi ga Jehovha. Eni nyi ngu tsaka ngudzu gupwa malito nya nga aya, guvbindra edzi nyi nga ba nyi dzipwa khidzo tepo vathu va nga ba va nyi zundza myaga hwane.”

TEPO SI HI GARADZEYAGO GU ENGISA NI GUTIYA-HWAMBO

9. Ghidheyoni, yeyedzide kharini gu engisa ni gutiya-hwambo? (Wona fotu avba nya kapa.)

⁹ Hwane nya gu ba Ghidheyoni a ningidwe thumo nya guthangeye Vaisrayeli, uye a di yede gu engisa ni gutiya-hwambo. Uye a di gu ningidwe thumo nyo garadze nya gu tshungunule giluvelo gya Bhahali, a nga ba ari Nungungulu wa papayi waye. (Val. 6:25, 26) Hwane nya gu ba tshanganiside libuthu, Jehovha a di embeya Ghidheyoni gasi gu vbungula libuthu laye guvili. (Val. 7:2-7) Khu gu hegisa embedwe gasi gu wugeya valala vawe vbakari nya wutshigu. — Val. 7:9-11.

10. Si nga garadzeya lidhota gu engisa khu ndziya muni?

¹⁰ Madhota ma yede gu dzi emiseya “gu engisa.” (Jak. 3:17) Lidhota nya gu engise, la gu khala na li dzi dongisede gu engisa esi Milowo yi ganeyago ni sileletelo hi si manago hengeledzanoni ya Nungungulu. Khavbovbo, ilo la gu ninga giyeyedzo nya gyadi ga vambe. Ambari ulolo, si nga li garadzeya gu engisa. Khu giyeyedzo, adzina saye si nga li garadzeya gu engisa sileletelo li ningidwego. Dzimbe dzitepo, li nga dzi wudzisa gu khilo gileletelo gyogyo gi nga phasa mwendro ne. Mwendro ilo li nga lombwa gu gira thumo nyo khaguri wu vegago mhangoni gutshulega gwalo. Ganiolu, madhota ma nga pimedzeya kharini giyeyedzo nya gu engise ga Ghidheyoni ga siemo nya nga esi?

11. Ginani gi nga phasago madhota gu engisa?

¹¹ Engiseya gwadi gileletelo u bwe u gi thumisa. Nungungulu embede Ghidheyoni edzi a nga ba a yede gu tshungula khidzo giluvelo gya Nungungulu wa papayi waye, avba a nga ba yede gu vbaha avbo giluvelo nya giphya gya Jehovha ni girengo a nga ba yede gu gi thumisa gasi gu gira khigyo muphaso. Ghidheyoni kha wudzisa Jehovha gu khuye khu ginani a nga ba yede gu gira silo soso, wulangani nya isoso uye a di landrisa gileletelo a ningidwego. Muhuno, madhota ma ngu hakha sileletelo sitago khu hengeledzanoni ya Jehovha, khu gu thumisa malangaliya, sitiviso ni simbe sileletelo si hi phasago gu vbulugisa womi wathu ni gu tiyisa wupari wathu ni Jehovha. Ethu hi ngu haladza madhota yathu, kholu ayo ma gu landrisa khu gu tumbega sileletelo hi ningwago khu hengeledzano. Khu kharato, isoso so gira gu mabandla yatshavbo ma wuyedwa. — Ndzi. 119:112.

12. Madhota ma nga thumisa kharini Vahebheru 13:17, ya gu tshuka hengeledzano yi gira guvbindrugedza nyo khaguri?

¹² Dzi emiseye gu dzi pwananisa ni giemo. Dundruga gu khuwe Jehovha a di embeya Ghidheyoni gu bweledza masotshwa nya mangi gaya gwawe. (Val. 7:8) Adzina saye adzi wudziside khuye: ‘Ina si ngu vbwetega gu nyi gira gu vbindrugedza gogu? Ina si na phasa?’ Ambari ulolo, Ghidheyoni a engiside. Muhuno, madhota ma gu pimedzeya giyeyedzo gya Ghidheyoni khu gu dzumeya guvbindrugedza gu girwago ndrani nya hengeledzano ya Jehovha. (Leri Vahebheru 13:17.) Khu giyeyedzo, gale hengeledzano yi di gu ninga dzitsapawu mabandla gasi gu vbaha Dzisalawu nya Mufumo, khu hwane mabandla ma di yede gu bweledza dzitsapawu nya hengeledzano. (2 Kor. 8:12-14) Ganiolu, muhuno hengeledzano ya gu thumisa miningelo yi girwago umo nya mabandla mafuni gwatshavbo gasi gu vbaha Dzisalawu nya Mufumo ni Dzisalawu nya Dziasembleya, ambari miningelo nya libandla nyo khaguri na yiri yidugwana. Tepo José a nga tugula guvbindrugedza gogu, uye a di kanakana gu khuye ‘yimwalo Salawu yi nga hadzi gu vbahwa, nigu tigoni momu silo kha si girwi kharato.’ Ginani gi phasidego José gu seketeya guvbindrugedza gogu? Uye wari khuye: “Malito ya Mavingu 3:5, 6 ma nyi dundrugiside gu nyi yede gu tumba Jehovha. Nigu handro wakone wu ngu tsakisa ngudzu. Vbavbandze nya gu vbahe Dzisalawu nya dzingi nya Mufumo, nyi hevbude gu seketeya khu dzindziya nya gu hambane-hambane gasi silo si gimbiya gwadi.”

13. a) Ginani Ghidheyoni a nga tiyisega khigyo? b) Madhota ma nga pimedzeya kharini Ghidheyoni? (Wona fotu.)

¹³ Gira gugola ga Jehovha khu gutiya-hwambo. Ghidheyoni engiside Jehovha ambari olu a nga ba apwa hwanga ni olu thumo waye wu nga ba wu vega womi waye mhangoni. (Val. 9:17) Hwane nya gu ba a hakhide gitumbiso gya Jehovha, Ghidheyoni a di tiyisega gu khuye Nungungulu a di hadzi gu mu phasa ni gu vhikeya vathu vaye. Madhota ma vbanyago omu thumo wathu wu himbedzedwago, ayo ma ngu pimedzeya giyeyedzo gya Ghidheyoni. Ayo khu gutiya-hwambo ma ngu thangeya thumo nyo tshumayele ni gu gimbidzisa mitshangano ambari na ma gu dziti gu khayo ma na khothedwa, gu thethisedwa, gu vbeledwa khu thumo mwendro gu tshaniswa.c Ndrani nya tshanisa nya yikhongolo, gu na vbwetega gu madhota ma yeyedza gutiya-hwambo gasi ma engisa sileletelo ma na hakhago, ambari na si thula gu vega womi wavo mhangoni. Adzina si na lomba gu hi huweleya mahungu ma fanago ni maralala ma ganeyago khu gu tshungunudwa wa Gogi wa Magogi.— Ezek. 38:18; Gutu. 16:21.

TEPO SI HI GARADZEYAGO GU TIMISEYA

14. Gigaradzo muni Ghidheyoni a nga ba a yede gu gi timiseya?

¹⁴ Ghidheyoni a di gu dzi garadza gu gira thumo waye nya guthangeye. Tepo Vamedhiyani va nga thava khu nyimpituno ni wutshigu, Ghidheyoni a di va landra gukhugeya gitsongwanatuno gya Jezireyeli kala tsongoni wa Joridhani. (Val. 7:22) Ina Ghidheyoni a di va landra basi kala tsongoni ga Joridhani? Ahihi. Ambari olu uye ni 300 vama a nga ba ari navo va nga ba va garade, uye a di simama gu va landra kala ava mana. Khu gu hegisa, avo va di pala Vamedhiyani. — Val. 8:4-12.

15. Khu ginani dzimbe dzitepo si garadzago gu lidhota li timiseya?

¹⁵ Dzimbe dzitepo, lidhota li nga dzipwa na li garade ngudzu khu gu khathaleya libandla ni ndranga yalo. Ga siemo sesi, madhota ma nga pimedzeya kharini giyeyedzo gya Ghidheyoni?

16-17. Ginani gi phasidego Ghidheyoni gu timiseya, nigu madhota ma nga tiyisega khu ginani? (Isaya 40:28-31) (Wona fotu.)

¹⁶ Tumba gu khuwe Jehovha a na gu tiyisa. Ghidheyoni a di gu tiyisega gu khuye Jehovha a di hadzi gu mu tiyisa, nigu Jehovha a giride kamo isoso. (Val. 6:14, 34) Khu tepo nyo khaguri, Ghidheyoni ni vama a nga ba ari navo va tutumiside dzipfhumu dzimbili nya Vamedhiyani khu mawundru, ganiolu idzo na dzi khilede dzikamelo. (Val. 8:12, 21) Ganiolu, khu gu phaswa khu Nungungulu, avo va si kodzide gu mana dzipfhumu dzile va bwe va dzi pala. Khu ndziya nyo fane, madhota ma nga tumba Jehovha oyu a gu mba “garala.” Uye a na mi tiyisa tepo mu vbeyago tshivba. — Leri Isaya 40:28-31.

¹⁷ Wona giyeyedzo gya ndriyathu moyo nyo pwani khu Matthew, a girago gipandre nya Kometi yi bhudzisanago ni dziospitali. Ginani gi mu phasago gu timiseya? Uye wari khuye: “Eni nya gu dzipwa na nyi gu tiyiswa khu Jehovha khu malito ma gomogo umo ga Vafilipi 4:13. Tepo yatshavbo nyi dzipwago na nyi vbede tshivba, eni nya gu gombeya khu monyo wangu watshavbo nyi lomba Nungungulu gasi a nyi ninga tshivba nyi yi vbwetago gasi gu phasedzeya vandriyangu. Ga dzitepo dzedzi, Jehovha a nyi ningide tshivba, gasi nyi si kodza gu timiseya.” Gufana ni Ghidheyoni, madhota ma ngu dzi garadza gasi gu khathaleya vathu va Jehovha, ambari so ba si si vbevbuge. Khu lisine, avo va yede gu ninganiseya ni gu dziti gu khavo khandri tepo yatshavbo va na girago satshavbo va si vbwetago. Ambari ulolo, avo va nga tumba gu khavo Jehovha a na engiseya milombelo yawe ni gu va ninga tshivba gasi gu timiseya. — Ndzi. 116:1; Filp. 2:13.

18. Khu gu piya, madhota ma nga hevbula ginani khu giyeyedzo gya Ghidheyoni?

¹⁸ Madhota ma nga hevbula gilogyo khu giyeyedzo gya Ghidheyoni. Madhota ma yede gu ninganiseya ni gu dzinogisa tepo ma ningwago mithumo libandlani ni edzi ma hlamulago khidzo tepo ma zundzwago mwendro gu poyidwa. Ayo ma yede gu gutiya-hwambo ni gu engisa, ngudzu-ngudzu olu hi gomogo dzitshokani nya matshigu nyo hegise. Nigu ayo ma yede gu tumba gu khayo, ambari ma gu tshangana ni gevbini gigaradzo, Nungungulu a na ma tiyisa. Khu kharato, ethu hi ngu bonga gudzigaradza madhota ma gu girago, nigu hi ngu ‘simama gu ninga lisima vama nya nga ava.’ — Filp. 2:29.