Hevbudza lisine

1, 2. a) Wu diri wevbi thumo nya lisima ngudzu womini ga Jesu, nigu khu ginani? b) Hi yede gu gira ginani gasi hi dugeleya kha nga “sithumi [si] thumago gumogo ni Nungungulu”?

JESU KRISTO a diri muvati khu hwane a khala mutshumayeli. (Marko 6:3; Varoma 15:8) Uye hevbude gu gira gwadi sa sivili. Kha nga muvati, uye hevbude gu thumisa gwadi dziferameta dzaye avba nya madhera, gasi gu gira silo nya sadi. Nigu kha nga mutshumayeli, thumiside guti gwaye gu etidego nya milowo gasi gu phasa vathu gu pwisisa lisine nya Lito la Nungungulu. (Matewu 7:28; Luka 24:32, 45) Tepo a nga ba ari ni 30 myaga, Jesu emide wuvati, a pheya thumo nya gutshumayele kholu a di gu dziti gu khuye khuwo wu nga ba wuri wa lisima ngudzu a nga ba a yede gu gira. Uye a di khuye gu tshumayela mahungu nya yadi nya Mufumo wa Nungungulu gu diri gimwegyo nya sighelo si nga mu tisa mafuni. (Matewu 20:28; Luka 3:23; 4:43) Womini waye, Jesu vegide gupima avba nya gutshumayele mahungu nya yadi nigu a di gu vbweta gu khuye vambe va gira sasimweso. — Matewu 9:35-38.

² Nya vangi gwathu khandri va vati, ganiolu hatshavbo hi vatshumayeli hi hevbudzago vambe mahungu nya yadi. Thumo wowu khwa lisima ngudzu nyo bwe Nungungulu nuye a patega. Khu lisine, ho rawa pwani hi “sithumi [si] thumago gumogo ni Nungungulu.” (1 Vakorinto 3:9; 2 Vakorinto 6:4) Hi ngu dzumeleyana ni muembi nya dzindzimo a nga khuye: “Mahungu yago ma tiyide ma na ni lisine.” (Ndzimo 119:159, 160) Lito la Jehovha lisine. Khu kharato gu vbwetega gu hi tiyisega gu khethu ina hi ngu “ganela mahungu nya lisine, nya gululame” tepo hi tshumayelago gani. (Leri 2 Thimoti 2:15.) Khu kharato hi ngu simama gu zama gu kodza gu thumisa gwadi Bhibhiliya, ferameta yathu nya litshina hi hevbudzago khiyo vambe maningano ni Jehovha, Jesu, ni mufumo. Gasi gu hi phasa gu dugeleya gutshumayelani, hengeledzano ya Jehovha ya gu ninga dzimbe dziferameta nya dzadi ngudzu, nigu hi yede guti gu dzi thumisa gwadi nidzo. Dziferameta dzodzo dzo gira gipandre nya dziferameta hi hevbudzago khidzo.

3. Ho ba hi romo gutshumayelani hi yede gu vega gupima avba nya ginani, nigu Mithumo 13:48 a nga hi phasa kharini gu gira isoso?

³ Adzina u nga dzi wudzisa gu khuwe khu ginani hi dzi ranago gu khethu dziferameta hi hevbudzago khidzo wulangani nyo khethu dziferameta hi tshumayelago khidzo. Si ngu pwala kholu “gu tshumayela” so thula gu ganeya mahungu basi, ganiolu “gu hevbudza” so thula gu tshamuseya mahungu yoyo khu ndziya nya gu muthu a pwisisa esi a si pwidego, khavbovbo a gira gilogyo guya khesi a si hevbudego. Ga gitepwana gegi gi hi tshaledego mafuni momu, hi yede gu vega gupima gwathu avba nyo pheye sihevbulo nya Bhibhiliya ni gu hevbudza vathu lisine gasi gu va dzi emiseya gu khala vapizane va Kristo. Isoso so thula gu khiso hi yede gu manega ni sighinghi avbo nyo vbwete ava va dzi ‘emisedego gu hakha guvbanya nya gupindruge’ ni gu va phasa gu pheya gu thumeya Jehovha. — Leri Mithumo 13:44-48.

4. Hi nga va mana kharini ava va dzi ‘emisedego gu hakha guvbanya nya gupindruge’?

⁴ Hi nga va mana kharini ava va dzi ‘emisedego gu hakha guvbanya nya gupindruge’? Ga maKristo nyo pheye, gu tshumayela gu diri iyo yonga ndziya nyo mane khiyo vathu vovo. Jesu embede vapizane vaye khuye: “Ni levbi lidhoropa mwendro talala mu na gu belago, vbwetani guti mwendro womo muthu nya gutumbege a gu ni fanelo.” (Matewu 10:11) Gu vbwetega gu hi gira sasimweso muhuno. Khu lisine, vathu vo ba va si khathali khu gilo, va dzi khusedza, mwendro vo mba khathala khu Nungungulu, kha hi vireyi gukhethu vapwa mahungu nya yadi. Ho vbweta vathu nya myonyo nya yadi, va dzi nogisago, va vbwetago guti lisine kamo. Hi nga fananisa guvbweta gwathu vathu ni esi Jesu a nga ba a gira na ngari muvati. Gupheya a di yede gu mana madhera nya yadi na si gu pheyi gu gira gyombo nyo khaguri nya nga lidimba, pingwi, mwendro gimbe gilo. Khavbovbo a di gu dzega dziferameta dzaye, a thumisa makodzelo yaye, a gira gyombo gyogyo. Khu ndziya nyo fane, muhuno, gupheya hi yede gu mana vathu nya myonyo nya yadi, khavbovbo hi thumisa dziferameta dzathu ni makodzelo yathu gasi gu va phasa gu khala vapizane. — Matewu 28:19, 20.

5. Ginani gi vbwetegago gasi gu hiti gwadi dziferameta hi hevbudzago khidzo? Ninga giyeyedzo. (Wona foto gupheyani nya ndrima.)

⁵ Omu nya dziferameta hi hevbudzago khidzo, ferameta ni ferameta yi na ni thumo wayo. Khu giyeyedzo, nga dundrugeya khu dziferameta dzi thumisidwego khu Jesu na ngari muvati.a (Wona tshamuselo wa vbavbatshi.) A di gu vbweta dziferameta nyo pime khidzo, nyo love, nyo sarare, nyo pole, ni edzi nyo mburiseye khidzo madhera, ambari ni dziferameta nyo nivhilari ni edzi nyo pate khidzo madhera. Khu ndziya nyo fane, ferameta ni ferameta hi hevbudzago khiyo yi na ni thumo wayo. Khu kharato hongoleni hi wona edzi hi nga dzi thumisago khidzo dziferameta dzodzo nya lisima.

DZIFERAMETA HI DZI THUMISAGO GASI GU DZI TIVEGISA GA VATHU

6, 7. a) Wa gu si thumisa kharini sikartawana nya sayiti? b) Khu ginani hi thumisago gidangaliyana nyo raneye khigyo mitshangano nya libandla?

⁶ Sikartwana nya sayiti. Sikartawana nya sidugwana, ganiolu si phasago ngudzu gu hi tivegisa ga vathu si bwe si va yisa omu nya sayiti jw.org. Va nga hevbula nya singi khethu omu nya sayiti yathu, ambari gu lomba gihevbulo nya Bhibhiliya. Gu na ni vathu nyo vbindre 400 000 va lombidego gihevbulo nya Bhibhliya khomu nya sayiti yathu nya jw.org na va romo khu hwindzo, nigu guvbindra likhumi mazana nya vathu va ngu gira isoso tshigu ni tshigu! U nga phara sikartawana singaniyana nya sayiti yathu gasi gu si thumisa tepo u ganeyago ni vathu u mananago navo lidambo latshavbo.

⁷ Sidangaliyana nyo raneye khiso mitshangano. Gidangaliyana nyo raneye khigyo mitshangano nya libandla gyari khigyo: “Hi ngu gu rana gasi gu ta hevbula Bhibhiliya ni Dzifakazi dza Jehovha.” Gi bwe khigyo u nga gira isoso “mitshanganoni yathu” “mwendro ni muhevbudzi nya Bhibhiliya.” Khu kharato gidangaliyana gegi gya gu hi tivegisa ga vathu gi bwe gi rana vale va “khathalago khesi si va keneleyago khu liphuvboni” gasi guta hevbula Bhibhiliya nathu. (Matewu 5:3) Khu lisine, vathu vatshavbo va ngu hoyozedwa mitshanganoni yathu gani va ngu dzumeya gihevbulo nya Bhibhiliya mwendro ne. Tepo va tago mitshanganoni yathu, va nata wona edzi va nga hevbulago khidzo nya singi khu Bhibhiliya.

8. Khu ginani si gu na ni lisima gu vathu vata mitshanganoni ambari nari gumogo basi? Ninga giyeyedzo.

⁸ Gwadi ngudzu gu hi simama gu rana vathu vata wona mitshangano yathu ambari nari gumogo basi. Khu ginani? Kholu, va nata wona gu khavo Dzifakazi dza Jehovha dzo hevbudza lisine nya Bhibhiliya dzi bwe dzi phasa vathu guti Nungungulu, nari gu khandriso si girwago khu wukhongeyi nya malipha. (Isaya 65:13) Khu giyeyedzo, patwa nyo khaguri nyo pwani khu Ray ni Linda wa Esdados Unidos wu wonide guhambana gogo myaga nyo khaguri yi vbindridego. Avo va di gu khodwa ga Nungungulu nigu va di gu vbweta gu muti gwadi. Khu kharato va di hunga gu holeya dzitshetshe dzatshavbo dza gipandreni gyawe gasi gu wona silo sivili na va si gu hathi mweyo. Nyo pheye, va di gu vbweta gu wona gu khavo ina tshetshe yoyo yi ngu hevbudza gilogyo gani, nya wuvuli, va di gu vbweta gu wona gu khavo ina va ngu ambala nga vathu va thumeyago Nungungulu gani. Isoso si dzegide myaga nya yingi kholu gipandreni gyawe gu diri ni dzitshetshe nya dzingi. Ganiolu kha va tsaka khesi va si wonidego. Kha va hevbula gilo, nigu vathu vakone va di gu ambala khu ndziya nya mba na githawo. Tepo va nga beya tshetshe nyo hegise nya edzi dzi nga ba dzi romo avba nya sasamezo wawe, Linda a di hongola thumutunu, Ray a bweleya gaya. Na gu bweleya gaya, a di vbindra khu vbafuvbi ni Salawu nya Mufumo. A pimisa kharati, ‘Gwadi nyi beya omu gasi nyi ya wona esi si dugeleyago.’ Khu lisine, esi a si wonidego mule si diri tshukwana ga satshavbo va si wonidego gumbe! Vatshavbo Salawuni nya Mufumo va diri ni wuwadi, ni wupari nigu va di ambade gwadi. Ray a di khade khu mbeli nigu tsakisidwe ngudzu khesi a si hevbudego! Isoso so hi dundrugisa esi mupostoli Pawulo a ganedeyago khu muthu a tago mitshanganoni khu tepo nyo pheye, khuye: “Khu lisine, Nungungulu womo vbakari gwanu.” (1 Vakorinto 14:23-25) Hwane nya isoso, Ray a dita mitshanganoni dziDimingu dzatshavbo. Khu gu gimbiya nya tepo a pheya guta mitshanganoni yatshavbo nya semana. Linda nuye a di pheya guta mitshanganoni, ambari olu va nga ba vari ni gipimo nya 70 myaga, va di hevbula Bhibhiliya va bwe va bhapatiswa.

DZIFERAMETA NYO PHEYE KHIDZO MABHULO

9, 10. a) Khu ginani si vbevbugago gu thumisa sidangaliyana? b) Tshamuseya mathumiselo nya gidangaliyana Ginani Mufumo wa Nungungulu?

⁹ Sidangaliyana. Hi na ni 8 sidangaliyana omu nya dziferameta hi hevbudzago khidzo. Si vbevbugide gu si thumisa, nigu si ngu vbevbugisa gu pheya mabhulo. Gukhugeya gi duswa egi nyo pheye khu 2013, gu ghandlidwe tanga nya 5 dzibhiliyoni nya iso! Satshavbo sidangaliyana soso si na ni makhalelo nyo fane. Khu kharato wo hevbuleya gu thumisa gimwegyo, u na kodza gambe gu thumisa satshavbo! U nga thumisa kharini gidangaliyana gasi gu pheya mabhulo ni muthu?

¹⁰ Wo ba u vbweta gu thumisa gidangaliyana gi gu khigyo Ginani Mufumo wa Nungungulu? Yeyedza muthu giwudziso gi gomogo avba nya kapa u vbedza u mu wudzisa kharati: “U di nga dzi wudzisa gu khuwe ginani Mufumo wa Nungungulu? Wa gu wu wona kha nga . . . ?” Khavbovbo mu wudzise gu khuwe khu wevbini hlamulo a hathago avba nya mihlamulo yile ya miraru. Vbavbandze nyo ganeye gu khuwe hlamude gwadi mwendro ne, tula gidangaliyana avba nya gipandre gi gu khigyo “Nga wona esi Bhibhiliya yi si ganeyago” u leri lowo wu yeyedzwago avbovbo, Dhaniyeli 2:44 ni Isaya 9:6. Hegisa khu gu mu gira giwudziso gi gomogo khu hwane, vbavbatshi nya malito ma gu khayo “Nga dundrugeya”: “Mavbanyelo ma na khala kharini vbavbatshi nya Mufumo wa Nungungulu?” U nga hlamula giwudziso gyogyo ga liendro li landreyago. Tepo u bweleyago gambe, u nga ya thumisa gihevbulo 7 nya bruxura “Mahungu Nya Yadi Ya Nungungulu!” yi gu mweyo nya dziferameta nyo pheye khidzo sihevbulo nya Bhibhiliya.

DZIFERAMETA DZI ENGEDZEYAGO GUDOGOREYA GWATHU KHU BHIBHILIYA

11. Dzirevhista dzathu dzi giredwe ginani, nigu hi yede guti ginani khidzo?

¹¹ Dzirevhista. Mukhedziseyi ni Khindlimuka! dzirevhista dzi vbindrugedzedwago ni gu duswa ngudzu mafuni gwatshavbo! Kha nga olu dzirevhista dzedzi dzi lerwigo khu vathu va mayigoni nyo hambanehambane, mihungo nya mahungu yi gomogo avba nya kapa yo giredwa gu ndrindra gupima nya vathu vatshavbo. Gu vbwetega gu hi thumisa dzirevhista dzedzi gasi gu phasa vathu gu vega gupima avba nya silo si gu na ni lisima ngudzu guvbanyani muhuno. Ganiolu, gupheya gu vbwetega gu hiti gu khethu revhista ni revhista yi giredwe muthu muni.

12. a) Revhista Khindlimuka! yi giredwe vamani, nigu khu yavbini makungo yayo? b) Matshango muni nya yadi u ngarigo gu ma mana khu gu thumisa revhista yeyi?

¹² Khindlimuka! wu giredwe vathu va tigo sidugwana mwendro va gu mbati gilo khu Bhibhiliya. Adzina kha vati gilo khu sihevbudzo nya wuKristo, kha va wu tumbi wukhongeyi, mwendro saye kha va khodwi gu khavo Bhibhiliya yi nga va phasa guvbanyani gwawe. Makungo nya litshina nya Khindlimuka! gu phasa valeri gu khodwa gu khavo Nungungulu womo. (Varoma 1:20; Vahebheru 11:6) Uwo gambe wo zama gu phasa valeri gu khodwa gu khavo khu lisine Bhibhiliya “mahungu ya Nungungulu.” (1 Vatesalonika 2:13) Dzirevhista dza dziraru nya Khindlimuka! nya 2018 dzi na ni mihungo nya mahungu yi gu khiyo: “Ndziya nyo mane gutsaka”, “12 dzindziya dzi phasago ndranga gu mana gutsaka”, ni “Ginani gi nga phasago ava va fedwego khu muthu va mu golago?”b (Wona tshamuselo wa vbavbatshi.)

13. a) Mukhedziseyi nya vathu vatshavbo wu giredwe vamani? b) Matshango muni nya yadi u ngarigo gu ma mana khu gu thumisa revhista yeyi?

¹³ Makungo nya litshina nya Mukhedziseyi nya vathu vatshavbo gu tshamuseya sihevbudzo nya Bhibhiliya ga vathu va gu na ni githawo nyo khaguri khu Nungungulu ni Bhibhiliya. Adzina va nguti gilogyo khu Bhibhiliya, ganiolu kha va si pwisisi gwadi esi yi si hevbudzago. (Varoma 10:2; 1 Thimoti 2:3, 4) Mikhedziseyi ya miraru nya vathu vatshavbo nya 2018 yi ngu hlamula siwudziso sesi: “Ina Bhibhiliya yi ngari ni lisima muhuno?”, “Womi wu na ba wu khade kharini mindru wa tshigu?”, ni “Ina Nungungulu a ngu khathala khuwe?”c (Wona tshamuselo wa vbavbatshi.)

DZIFERAMETA DZI KUTSAGO

14. a) Khu dzevbini dzivhidhiyu nya dzina dza omu nya dziferameta dzi giredwego gu dzi thumisa? b) Matshango muni nya yadi u nga manega nawo khu gu yeyedza dzivhidhiyu dzodzo?

¹⁴ Dzivhidhiyu. Matshiguni ya Jesu, va vati va diri ni dziferameta dza mandzani basi. Ganiolu, muhuno va na ni dziferameta dzi thumago khu maghezi, nya nga dzisaroti, dzibherbheki ni mitshini nyo lixari khiyo. Tepo ni tshumayelago muhuno, vbavbandze nya mabhuku nyo ghandlwe basi, hi na ni dzivhidhiyu nyo mbure gasi gu yeyedza vathu. Omu nya dziferameta hi hevbudzago khidzo dzomo 4 nya idzo dzi gu edzi: Khu ginani u yedego gu hevbula Bhibhiliya?, Ginani gi girwago Salawuni nya Mufumo?, Gya gu girwa kharini gihevbulo nya Bhibhiliya? ni Quem São as Testemunhas de Jeová? Dzivhidhiyu nya dzidugwana dzi nga wombiswa khu tanga nya dzimeneti dzimbili nigu dzi ngu phasa ngudzu ga maendro nyo pheye. Edzi nyo laphe dzi nga thumiswa ga maendro nyo bweleleye mwendro ni ava va gu na ni tepo nya yingi. Dzivhidhiyu dzodzo dziferameta nya dzadi ngudzu kholu dzi ngu kutsa vathu gu hevbula Bhibhiliya ni guta mitshanganoni.

15. Vathu nyo khaguri va khuhidwe kharini khu gu wona dzivhidhiyu dzathu khu lidimi lawe? Ninga siyeyedzo.

¹⁵ Khu giyeyedzo: Ndriyathu moyo nya nyamayi mananide ni muthu nyo khaguri a fulugidego aya khala Micronesia nigu lidimi laye nya mavelego gu diri giYapese. Nriyathu yoyo a di mu yeyedza vhidhiyu yi gu khiyo Khu ginani u yedego gu hevbula Bhibhiliya? khu giYapese. Tepo vhidhiyu yi nga pheya, nyamayi wule a di khuye: “Lidimi langu eli! Kha nyi khodwi amanawe. Nyo dzegeya gupwa khu maganelelo yaye gu kheni muthu wa gidwani gwangu. O ganeya lidimi langu!” Hwane nya isoso, uye tumbiside gu leri ni gu wona satshavbo khu lidimi laye omu nya jw.org. (Fananisa ni Mithumo 2:8, 11.) Gimbe giyeyedzo khegi nya ndriyathu moyo wa Estados Unidos a gu ni wuhandzwana a vbanyago limbe litigo. A di mu rumeleya link nya vhidhiyu nyo khaguri khu lidimi laye. Hwane nyo wone vhidhiyu yoyo, a di mu rumeleya e-mail na gu khuye: “Gipandre gi ganeyago gu khigyo yomo tshivba nyo khaguri nyo vivbe yi woneleyago litigo gi nyi khuhide ngudzu. Nyi lovide nyi lomba gihevbulo nya Bhibhiliya.” Isoso si ngu tsakisa ngudzu kholu o vbanya tigoni thumo wathu wu himbedzedwago!

DZIFERAMETA HI DZI THUMISAGO GASI GU HEVBUDZA LISINE

16. Tshamuseya makungo nya dzibruxura dzedzi: a) Engisa Nungungulu gasi u vbanya kala gupindruga. b) Mahungu nya yadi ya Nungungulu! c) Khu vamani va girago gugola ga Jehovha muhuno?

¹⁶ Dzibruxura. Hi nga hevbudza kharini lisine muthu a gu mba kodza gu leri gwadi mwendro gu gu mwalo mabhuku khu lidimi laye? Hi nga thumisa bruxura yi gu khiyo Engisa Nungungulu gasi u vbanya kala gupindruga.d (Wona tshamuselo wa vbavbatshi.) Ferameta nya yadi ngudzu nyo pheye khiyo gihevbulo nya Bhibhiliya bruxura yi gu khiyo Mahungu nya yadi ya Nungungulu! U nga mu yeyedza 14 sihevbulo si gomogo khu hwane nya bruxura u bwe u mu wudzisa gu khuwe khu gevbini gi mu tsakisago ngudzu. Khavbovbo pheya gu hevbula naye khu gihevbulo gyogyo. U di nga gira isoso ga maendro yago nyo bweleleye? Bruxura nya wuraru nya dziferameta dzathu kheyi yi gu khiyo Khu vamani va girago gugola ga Jehovha muhuno? Iyo yi giredwe gu hevbudza sihevbulo sathu nya Bhibhiliya maningano ni hengeledzano yathu. Gasi guti mathumiselo nya bruxura yeyi ga gihevbulo gimwegyo ni gimwegyo nya Bhibhiliya, wona Gibhukwana nya mitshangano nya Thumo ni mavbanyelo yathu nya wuKristo nya Março nya 2017 khu giThwa.

17. a) Khu yavbini makungo nya mabhuku yaya ya mavili? b) Ginani va yedego gu gira vatshavbo va bhapatiswago, nigu khu ginani?

¹⁷ Mabhuku. Hwane nyo pheye gihevbulo ni muthu khu gu thumisa bruxura, khu gu gimbiya nya tepo u nga vbindrugedza u thumisa libhuku Ginani hi hevbudzwago khu Bhibhiliya? Ferameta yeyi yi nga phasa vathu gu hevbula nya singi maningano ni sihevbudzo nya litshina nya Bhibhiliya. Gihevbulo gyo ba gi yeyedza gu dandra khu liphuvboni na gi vbedzide libhuku leli, u nga simama gu hevbula nagyo khu libhuku Continue a Amar a Deus. Ferameta yeyi yi na phasa gihevbulo gu thumisa matshina nya milayo nya Bhibhiliya guvbanyani gwagyo ga tshigu ni tshigu. Dundruga gu khuwe ambari hwane nyo bhapatiswe, oyu a gu ngari muphya lisineni a yede gu simama gu hevbula kala a vbedza mabhuku yatshavbo ya mavili. Isoso si na mu phasa gu tiyisa gukhodwa gwaye ga Jehovha ni gu simama gu tumbega gwaye. — Leri Vakolosi 2:6, 7.

18. a) 1 Thimoti 4:16 a gu hi kutsa gu gira ginani kha nga vahevbudzi nya lisine, nigu khu yevbini mihandro yakone? b) Khu yavbini makungo yathu tepo hi thumisago dziferameta hi hevbudzago khidzo?

¹⁸ Kha nga Dzifakazi dza Jehovha, hi na ni thumo nyo hevbudze vathu ‘mahungu yadi nya lisine’ ma na va girago va mana womi nya pindrugedwa. (Vakolosi 1:5; leri 1 Thimoti 4:16.) Gasi gu hi phasa gu gira isoso, hi na ni dziferameta dzatshavbo dzi vbwetegago. (Wona kwadru “Dziferameta hi hevbudzago khidzo.”) Hongoleni hi thumisa gwadi dziferameta dzedzi khavba hi si kodzago khavbo. Moyo ni moyo wathu a nga hatha ferameta a na yi thumisago ni giemo a na yi thumisago gwagyo. Ganiolu dundruga gu khuwe makungo yathu khandri gu ningeya mabhuku basi, nigu kha hi ningeyi mabhuku yathu ga vathu va si khathaligo khu mahungu yathu. Makungo yathu gu gira vapizane vathu nya myonyo nya yadi, va dzinogisago ni ava va vbwetago guti Nungungulu khu lisine, vathu va dzi ‘emisedego gu hakha guvbanya nya gupindruge.’ — Mithumo 13:48; Matewu 28:19, 20.