GIHEVBULO 11

Ganeya khu guvbisega

Varoma 12:11

ESI U YEDEGO GU GIRA: Tiyisa ni gu kutsa vaengiseyi vago khu gu ganeya khu guvbisega.

Pheya khu gu yala monyoni gwago esi u vbwetago gu si hevbudza. Tepo u dzi dongiseyago gasi gu ya vega ganelo, dundrugeya khu lisima nya mahungu yago. Ma oloveye gwadi avba nya gu u ganeya na ma gu khugeya monyoni.
Dundrugeya khu vaengiseyi vago. Dundrugeya khedzi mahungu u na lerigo mwendro gu hevbudza ma na phasago khidzo vambe. Vbweta dzindziya nya gu u hevbudza mahungu yoyo khu ndziya yi na phasago vaengiseyi vago gu ma ninga lisima.
Ganeya khu ndziya nyo vbanye. Ganeya khu guvbisega. Thumisa dzizesto nyo olovelege u bwe u yeyedza khu khovbe edzi u dzipwago khidzo khu mahungu yoyo.

Dzi woneye gu tsolopeteya vaengiseyi vago khu gu wuyedzeya gu thumisa dzizesto dza dzimwedzo. Gu vbwetega gu dzizesto dzago dzi pwisisega gu khidzo dzo thula ginani. Ganeya khu guvbisega ngudzungudzu tepo u hevbudzago matshina nya gisekelo ni tepo u kutsago vaengiseyi vago gu gira gilogyo. U nga reri vaengiseyi vago khu gu ganeya khu guvbisega khu ndziya nyo vbindre pimo.