GIHEVBULO 1

Pheya mabhulo khu ndziya yi na ndrindrago gupima

Mithumo 17:22

ESI U YEDEGO GU GIRA: Pheya mabhulo khu ndziya yi na ndrindrago gupima, yi na tshingisago mahungu u vbwetago gu ganeya khayo, yi bwe yi yeyedza lisima nya mahungu yoyo.

MAGIRELO YAKONA:

Ganeya khu ndziya yi na ndrindrago gupima. Hatha giwudziso, malito, matimo nya muthu, mwendro mahungu ma na tsakisago vaengiseyi vago.

Na gu ngari ni tepo, dundrugeya khesi si tsakisago ni sigaradzo sa vaengiseyi vago, khavbovbo u pwananisa malito yago nyo pheye ni siemo sawe.
Tshingisa mahungu u vbwetago gu ganeya khayo. Tiyisega gu khuwe malito yago nyo pheye ma ngu phasa vaengiseyi gu pwisisa khu guvbevbuga gighelo ni makungo nya ganelo yago.
Yeyedza lisima nya mahungu yago. Pwananisa malito yago ni esi si vbwetegago gu khathaledwa ga vaengiseyi vago. Gu vbwetega va pwisisa gwadi edzi mahungu yoyo ma na va phasago khidzo.

Tepo u dongiseyago ganelo yago, dzi wudzise gu khuwe: ‘Sigaradzo muni va tshanganago naso vandriyangu libandlani?’ Khavbovbo, pwananisa malito yago nyo pheye ni sigaradzo sawe.