Mitshamuselo yi gomogo omu nya mabhuku ma khumbugidwego omu nya gibhukwana nya mitshangano nya thumo ni mavbanyelo
1-7 NYA MARÇO
DZITHOMBA NYA LITO LA NUNGUNGULU | MITENGO 7-8
“Esi hi si hevbulago khu lizumbo la va na Israyeli”
it-1-T paj. 540, ndri. 7
Libandla
Ga liendro nya gugaradze la giwulani la vaIsrayeli, gu di ri ni “vathangeli nya tshangano, vambe va nga ba va ranedwe ga tshangano, ni vama va nga ba vari ni ndruma”, nigu 250 nya avo va dzi patide ni Kore, Dhatani, Abhiramo, ni Oni va wugeya Mosi ni Aroni. (Mit 16:1-3) Na gu thangedwa khu liphuvbo nya guage, Mosi a hathide 70 madhota ya Israyeli, va nga ba va kodza gu lamula mahungu gasi gu mu phasedzeya “gu rwala rwalo nya vathu”, owu uye a nga ba a si wu kodzi gu wu rwala enga. (Mit 11:16, 17, 24, 25) Levhi 4:15 li ngu khumbuga “madhota nya tshangano”, ni gu so wonega gu khatsi madhota ya Israyeli khayo ma nga ba ma ri ayo vaemeyi nya vathu vatshavbo, vathangeyi vawe, ni valamuli vawe. — Mit 1:4, 16; Jos 23:2; 24:1.
it-2-T paj. 467, ndri. 1
Rubheni
Eyi lizumbotunu la Israyeli, va na Rubheni va nga ba va randredwe khu situgulwana sa Simiyoni niso sa Gadhi, va di gu manega khu Sul nya tabhernakeli. Tepo va nga ba va beya ndziyani, mahundzu yaya ya mararu ma nga ba ma thangedwa khu Rubheni ma di gu landreya mahundzu mararu ya na Judha, Isakari ni Zebhuloni. (Mit 2:10-16; 10:14-20) Owu khuwo gambe sasamedzo mahundzu yaya ma wu thumisidego litshigu ma nga gira mibikelo nya miningelo yawe nya guagiswe nya tabernakeli. — Mit 7:1, 2, 10-47.
w04-T 1/8 paj. 25, ndri. 1
Gu khanyiswa ga libhuku la Mitengo
8:25, 26. Gasi gu tiyisega gu thumo owu vaLevhi va nga ba va gira wu na girwa khu ndziya nya yadi ni gu guya khu myaga va nga ba va ri nayo, gu di leletedwa gu vama va nga ba va dandride khu tanga va duswa khu thumoni va nga ba va wu gira. Ganiolu si di gu kodzega gu va phasedzeya vambe vaLevhi. Ambari gu muhuno wa tshigu vahuweleyi nya Mufumo kha va reformar thumoni gwawe, litshina leli nya nayo li ngu hi hevbudza silo nya lisima ngudzu. A gu tshuka muKristo nyo khaguri a si si kodzi gu khathaleya silo nyo khaguri khu kotani nya tanga yaye, a nga gira esi si gomogo tshivbani gwaye.
Dzithomba nya liphuvbo
it-3-T dzipaj. 327-328
Matewula, oyu a nga phedwa khuye gu velegwa
Kha nga olu nya gu matewula ya va na Israyeli ma diri ni tshivba khayo ma nga ba ma tshikedza wuthangeyi wa ndrangani gwawe, ayo ma di gu emeya vathu vatshavbo va Israyeli. Jehovha ranide litigo latshavbo la Israyeli nga “matewula” yaye, khu kharato va di khala litigo nya matewula khu kotani nya gidzumeledzwano a nga gira ni Abrahama. (Eks 4:22) Khu kotani nya olu a nga sayisa gwadi womi wawe, Jehovha a va embede gu khuye ‘yatshavbo matewula nya mwama ya na Israyeli nya vathu ni sirengo’ si di yede gu ningedwa gwaye. (Eks 13:2) Khu kharato, sanana nya sikhwathana nya matewula si di yede gu ningedwa ga Nungungulu.
8-14 nya Março
DZITHOMBA NYA LITO LA NUNGUNGULU | MITENGO 9-10
“Jehovha a gu thangeya kharini vathu vaye”
it-1-T paj. 39, ndri. 6
Lizumbo
Gu gimbiyagimbiya ga lizumbo leli nya likhongolo khu (tanga nya 40 nya mazumbo, ma dundrugedwe khu Mosi ga Mitengo 33) nigu gu diri giyeyedzo nya sasamedzo nyo samadzise ngudzu. Gikhati lipfhi li nga ba li khala vbatshani nya tabhernakeli, vaIsrayeli va di gu simama wulangani wowo. Tepo lipfhi li nga ba li khuga, vaIsrayeli va di gu khuga va li landreya. “Jehovha khuye a nga ba a va ruma gu va di yede gu zumba nigu va di yede gu khuga va hongola.” (Mit 9:15-23) Mipundru mivili nya parata, khiyo yi nga ba yi tivisa lizumbo latshavbo. (Mit 10:2, 5, 6) Gu di gu wombwa pundru khu mawombelo nyo hathege gasi gu yeyedza gu lizumbo li di yede gu khuga li hongola. Si giregide esi gikhati nyo pheye khu mwaga nya wuvili [1512 AEC], ga ngima nya wuvili khu litshigu nya wu 20.
w11-T 15/4 paj. 4-5
Ina u ngu wona giyeyedzo nya wuthangeyi wa Nungungulu?
Hi nga yeyedza kharini gu khethu hi ngu tsakeya wuthangeyi wa Jehovha? Mupostoli Pawulo a di khuye: “Yingelani vathangeli vanu, mu landrisa sileletelo sawe.” (Heb 13:17) Adzina khandri tepo yatshavbo si vbevbugago gu gira esi. Khu giyeyedzo: dzi vege wulangani ga muIsrayeli wa dziteponi dza Mosi. Nga dundrugeya gu, na wuvbedzide tepo nyo laphe na wu gimbide lipfhi li ema. Tepo muni li na vbedzago na li emide? Litshigo limwedo? Semana mweyo? Mwendro migima nyo khaguri? U dzi wudzisa gu: ‘Ina nyi nga tuleleya sombo satshavbo? Adzina gupheyani u nga dusa esi u si vbwetago ngudzu. Ganiolu hwane nya matshigwana u pheya gu dusa satshavbo. Hwane nya gu na wu duside satshavbo u bwe u pheya gu vegedzeya lipfhi li khuga li hongola, u yede gu vegedzeya satshavbo gasi u beya ndziyani! Isoso kha si vbevbugi. Ambari ulolo vaIsrayeli va di yede gu ‘khuga khu gu vbiredza’. — Mit 9:17-22.
Ahati ethu, ginani hi girago ha gu hakha sileletelo si tago khu vbatshani? Hi ngu si landrisa khu “guvbiredza”? Mwendro ha gu simama gu gira silo nga edzi hi nga si oloveya khidzo? Hi ngu gimbileyana ni sileletelo nya siphya nya nga esi si ganeyago khu gu gimbidzisa sihevbulo nya Bhibhiliya, gu tshumayela vathu nya limbe litigo va vbanyago gipandreni gwathu, gu manega tepo yatshavbo omu nya gihevbulo nya ndranga, gu dzumeleyana ni Comissão de Ligação Hospitalar, ni gu khadzisega ho ba hi romo kongresu? Yimbe ndziya nyo yeyedze gu khethu hi ngu tsakeya wuthangeyi wa Nungungulu khu gu dzumeya milayo. Ha gu vbweta gu hunga gilo nyo khaguri womini, kha hi yeli gu tumba guti gwathu, ganiolu hi yede gu vbwetedzeya gu gimbidziswa khu Jehovha ni hengeledzano yaye. Kha nga gyanana gi vbwetedzeyago gu vhikedwa khu papayi wagyo tepo gu giregago gingulu, anethu hi yede gu vbwetedzeya gu vhikedwa khu hengeledzano ya Jehovha tepo sigaradzo nya litigo leli si hi samago.
Dzithomba nya liphuvbo
it-1-T paj. 253, ndri. 5
Tshangano
Lisima nya gu tshangane. Lisima nya gu londrole malulamiselo ya Jehovha gasi gu tshangana hi hodziswa khu liphuvboni li ngu khanyiswa avbo nya gu patane ni phasika. Watshavbo mwama nya guage nigu na sa endra ganiolu a si theyi kota khu phasika a di yede gu songwa. (Mit 9:9-14) Tepo pfhumu Ezekiyeli a nga rana vavbanyi va Judha ni va Israyeli va hongola Jerusalema gasi gu ya hodza phasika a va embede esi: “Enu va na Israyeli, vbindrugedzani mavbanyelo mu wuya ga Pfhumu Nungungulu...mu nga bangisini myonyo yanu, kha nga idzo va giridego vababe vanu; pharani mandza ya PFHUMU Nungungulu, mu belani Nyumbani gwaye nya Guage, a yi agisedego kala gupindruga, mu thumela PFHUMU Nungungulu wanu, gasi a ndreyisa vbakari gwanu guvila nya likhulo laye...PFHUMU Nungungulu wanu tade khu gisiro ni wuhindzi. Gima kha na thendregedza a mi sihela khovbe yaye, mwa gu vbindrugedzani mu wuya gwaye.” (2 Dzik 30:6-9) Khu gu dzina gwawe va si manegi ga buzu wule si di gu yeyedza gu dzi hambanisa ni Jehovha. Ambari olu gu maKristo kha ma giri mibuzu nya nga phasika Paulo a va kutside gu mba hambana ni mitshangano ya vathu va Nungungulu khu gu va embeya esi: “Hongoleni hi tiyiselane khu gyathu, hi phasana gu gira mithumo nya wuhindzi ni mithumo yatshavbo nya yadi. Hi nga digi, kha nga edzi va nga girago vambe, giolovedzo nya gubele mitshanganoni nya Libandla lathu. Aholu, hongoleni hi tiyiselane khu gyathu, ngudzungudzu olu enu mu wonago gukhenu Litshigu la Pfhumu li ngu vboha.” — Heb 10:24, 25 wona LIBANDLA.
15-21 NYA MARÇO
DZITHOMBA NYA LITO LA NUNGUNGULU | MITENGO 11-12
“Khu ginani hi yedego gu potsa liphuvbo nya gusolasole?”
w01-T 15/6 paj. 17, ndri. 20
Mu nga khali vaengiseyi nyo divadwe
20 Makristo nya mangi gima kha ma dileyi khu wubhayi. Ganiolu hi yede gu dzi woneya gasi hi si landri mavbanyelo ma na hi girago hi khala khu gusolasola esi si nga tshuka si hi gira hi wonwa khu ndziya nya mba yadi khu Jehovha. Paulo a ngu hi gengedza: “Hi nga lingi Pfhumu kha nga edzi va nga girago vambe, va ngafa khu gukhodwa khu dzinyoga. Mu nga ganedzi, kha nga va nga gira vambe, va gu mbemba khu gufa.” (1 Vakorinto 10:9, 10) Vaisrayeli va di ngurangureya Mosi ni Aroni, va ngurangureya kamo ambari ni Nungungulu va ngurangura khu kotani nya manaha. (Mitengo 16:41; 21:5) Ina Jehovha kha goroga ngudzu khu gungurangura gwawe gu vbindra khu wubhayi va nga ba va gira? Bhibhiliya yi ngu yeyedza gu nya vangi va nga ngurangura va songidwe khu dzinyoga. (Mitengo 21:6) Ga gitepwana hwane, 14 700 vawugeyi ni gu vbindra va di songidwe khu gungurangura. (Mitengo 16:49) Khu kharato hi nga lingi Jehovha khu gu mba ninga githawo malulamiselo yaye.
w06-T 15/7 paj. 15, ndri. 7
‘Potsa gungurangura’
7 VaIsrayeli va di vbindrugedza! Tepo vaIsrayeli va nga duga khu Egiptu ni tepo va nga tshatuga yiphwa nya Gufuviye, va yeyedzide gubonga khu gu embeleya dzindzimo nya gu dhumise Jehovha. (Ekisodha 15:1-21) Gu mba manega ni gu khadzisega nya gwadi ni gu thava Vakhanani tepo va nga ba va romo giwulani si giride gu vathu va Jehovha va vbeledwa khu liphuvbo nya gubonge va haguleya eli nya gungurangure. Vbavbandze nyo bonge Jehovha khu gu ba na va tshude va di mu ninga nandru, va bwe va mu wona nga khatsi a di va himbedzeya silo nyo khaguri. Gungurangura gwawe gu di gu yeyedza gu mba na gu bonga ga malulamiselo ya Jehovha. Khiso si nga gira a ganeya esi: “Kala lini na nyi gu timisela tshangano yoyu nya guvivbe na wu gu nyi wugela?” — Mitengo 14:27; 21:5.
it-1-T paj. 100, ndri. 3
Mayunga
Gungurangura. Gungurangura gu ngu vbedza tshivba. Gitepwana hwane nya gu va dugide khu Egiptu, vaIsrayeli va ngurangurede wuthangeyi wa Jehovha a nga ba a wu emiside khu gu thumisa Mosi ni Aroni. (Eks 16:2, 7) Gungurangura gu nga khala mhango nya yikhongolo ga oyu a ngurangurago. Jehovha a dzegide esi vathu va nga ganeya na va ngurangureya Mosi nga khatshi va gu wugeya wuthangeyi waye nya guage. (Mit 14:26-30) Nya vangi va fude khu kotani nyo khaleye gungurangura.
Dzithomba nya liphuvbo
it-2-T paj. 748
Manaha
Tshamuselo. Manaha ma di gu “agide nga dzithanga nya tembura” nigu “ma di gu fana ni” dzitshege, gilo nyo wonegeye, na giri ni makhalelo nya perola. Ma di “gu lombeya nga wulombe” mwendro nga “dzifiyoso nya gu gadzingwe khu mafura”. Hwane nya gu na ma tshindridwe mwendro gu hindzwa ma di gu phudwa mwendro gu vborwa ma khala nga dzibholu ma vawudwa. — Eks 16:23, 31; Mit 11:7, 8.
22-28 NYA MARÇO
DZITHOMBA NYA LITO LA NUNGUNGULU | MITENGO 13-14
“Gukhodwa gu ngu hi gira hi tiya hwambo”
w06-T 1/10 dzipaj. 16-17, dzindri. 5-6
Va tiyide hwambo khu gu va khodwa ni gukhathala
5 Josuwa ni kalebi va di gu virede gu beya tigoni nya gitumbiso. Vakhanani ‘va na khala guhodza gwathu’, avo va di khavo. “Va mwalo wuthavelo kholu PFHUMU Nungungulu a na ni ethu. Mu nga va thavi!”. (Mitengo 14:9) Ina Josuwa ni kalebi va diri sipumbu khu va manega ni mawonelo nya yadi? Ne vbadugwana! Avo ni vambe vathu va di gu wonide Jehovha na gu vega vbavbatshi mufumeli wa Egiptu ni va nungungulu vawe khu kotani nya mitungu yile nya 10. Khu hwane va wona gambe Jehovha na gu mbembisa Faro ni masotshwa yaye Yiphwani nya Gufuviye. (Ndzimo 136:15) So wonega gu agani gu khiso guthava ga vasoli vale nya 10 ni vale va nga kutsedzedwa khavo va di ri mwalo gighelo nya gu dzi emeleye. Khu gu vbisega Jehovha a di khuye: “Kala lini na va bomba gu nyi tumba? Ambari na nyi giride sisamadziso nya singi vbakari gwawe?” — Mitengo 14:11.
6 Jehovha a di dzegeya gu kongoma ga egi gi nga vanga gigaradzo — Wupumbu owu va wu giridego wa gu yeyedza gu, va di gu keneledwa khu gukhodwa. Khidzo kamo, gukhodwa ni gu tiya hwambo so gimbiya gumogo, nigu khiso si giridego mupostoli Johane a lova maningano ni nyimbi nya liphuvbo eyi yi dwanago khu libandla nya wukristo: “khu gukhodwa gwathu hi pade litigo.” (1 Johane 5:4) Muhuno, gukhodwa nya nga ga Josuwa ni kalebi gu ngu resa mihandro nya yadi thumoni nyo tshumayele mafuni gwatshavbo khu gu vbindra 6 dzimiliyoni nya dzifakazi dza Jehovha, vaphya, ava va dandridego khu tanga, ava va gu ni tshivba ni ava va gu mwalo tshivba. Mwalo ni moyo a kodzago gu degudza libuthu leli nya tshivba ni gu tiya hwambo. — Varoma 8:31.
Dzithomba nya liphuvbo
it-1-T paj. 644
Litigo Nungungulu a ningidego vaIsrayeli
Litigo Nungungulu a ningidego vaIsrayeli khu lisine li diri litigo nya ladi. Tepo Mosi a nga rumeya vasoli gasi gu thangeya vathu vaye ni gu woneleya litigo nya gitumbiso va di dzega mihandro nya yidugwana gasi gu bweleya nayo, maroma ni gitsatsa nya gikhongolo nya dziuvha va gi rwala khu pingwi nari vama vavili! Ambari olu va nga bweleya na va gu thava khu gu keneledwa khu gukhodwa va di ganela khavo: “khu lisine litigo li gogago mahwe ni wulombe” — Mit 13:23, 27.
29 NYA MARÇO–4 NYA ABRIL
DZITHOMBA NYA LITO LA NUNGUNGULU | MITENGO 15-16
“Dziwoneye gu dzigugumugisa ni gu dzitumba”
w11-T 15/9 paj. 27, ndri. 12
Jehovha a ngu guti?
12 Ambari ulolo, tepo vaIsrayeli va nga ba va romo ndziyani nya gu hongole tigoni nya gitumbiso, Kora pimiside gu khuye gu di romo sihoso avbo nya malulamiselo ya Nungungulu, khavbovbo 250 vama nyo wonege va di patana naye gasi gu vbindrugedza silo nyo khaguri. Kora ni vambe va di gu pimisa gu khavo wupari wawe ni Jehovha wu di tiyide. Avo va embede Mosi ni Aroni khavo: “Hi garade khu enu! Tshangano watshavbo wu agide muthu ni muthu nya avo va agide, PFHUMU Nungungulu womo vbakari gwawe.” (Mit 16:1-3) Va di dzi khusedza ni gu dzi tumba! Mosi a di va hakha khuye: “PFHUMU Nungungulu a na va yeyedza avo va gu vaye.” (Leri Mitengo 16:5.) Ga siyambo nya litshigu li nga landreya, Kora ni vatshavbo va nga patana naye va wugeya Mosi va di gu fude. — Mit 16:31-35.
w11-T 15/9 paj. 27, ndri. 11
Jehovha a ngu guti?
11 Mosi ni Kora siyeyedzo nyo wonege nya gu hambane, avbo nyo yeyedze githawo khu malulamiselo ya Jehovha ni esi a hungago. Edzi va nga dziphara khidzo si kuhide edzi Jehovha a nga va wona khidzo. Kora a diri muLevhi nya muKhowati nigu a diri ni malungelo nya mangi. Malungelo yaya gu dzina ma di gu pata gu wona va na Israyeli na va gu tshudziswa Yiphwane nya Gufuviye, gu patana avbo nya gu tsayise vaIsrayeli nya mba engisa ga gigomoni gya Sinayi ni gu patana avbo nya gu rwale ngasa nya gidzumeledzwano. (Eks 32:26-29; Mit 3:30, 31) So wonega gu uye a di gu tumbegide khu myaga nyo khaguri, khu kharato nya vangi va di gu mu ninga githawo.
Dzithomba nya liphuvbo
w98-T 1/9 paj. 20, dzindri. 1-2
Tiyisega gu u ngu vega silo nya lisima gupheya womini gwago
Jehovha a di wona mahungu yale na mari makhongolo. “Khavbo avbo” Bhibhiliya yari khiyo, “PFHUMU Nungungulu a di embeya Mosi khuye: Muthu yoyo a ngu yela gu songwa.” (Mitengo 15:35) Khu ginani Jehovha a nga goroga khu kotani nya esi mwama wule a si giridego?
Vaisrayeli va diri ni 6 matshigu gasi gu vbwetedzeya dzikhuni, ambari gu khathaleya simbe nya nga gu vbwetedzeya gilo nyo hodze, sombo ni dzinyumba. Litshigu nya wu 7 li di yede gu thumiswa gasi gu khathaleya silo sa liphuvboni. Ambari olu nya gu kha sa nga ba si himbedzedwa gu vbwetedzeya dzikhuni, si di gu himbedzedwa gu gira soso khu litshigu li nga vegiswa gasi gu khozeya Jehovha. Ambari olu nya gu maKristo ma mwalo vbavbatshi nya nayo wa Mosi, muhuno wa litshigu, matimu yaya ma ngu hi hevbudza gu vega gupheya silo nya lisima. — Vafilipi 1:10.
5-11 NYA ABRIL
DZITHOMBA NYA LITO LA NUNGUNGULU | MITENGO 17-19
“Eni kheni thomba yanu”
w11-T 15/9 paj. 13, ndri. 9
Ina u ngu dzega Jehovha a khala thomba yago?
9 Dundruga vaLevhi va nga mba hakha gipandre nya litigo kha nga thomba. Khu gu vega nga gilo nyo pheye wukhozeyi wu agidego avo va di yede gutumba Jehovha gasi a va sayisa. Uye a di va embeya khuye: “Eni nyi na bani Nyiri thomba yago.” (Mite. 18:20) Ambari olu hi gu mba thuma omu nya tempele nga vaphasi nya mhamba ni vaLevhi, hi nga pimedzeya gu dzi ningedzeya gwawe, hi tumba gu Jehovha a na khathaleya esi hi si vbwetago. Gu tumba gu khethu Nungungulu a na hi khathaleya gu nguya gu vbwetega ngudzungudzu olu hi hidzimeyago ga matshigu nyo hegise. — Gutu. 13:17.
w11-T 15/9 dzipaj. 7-8, ndri. 4
Jehovha thomba yangu
4 Malulamiselo aya vaLevhi va nga ba vari nawo ma di gu tshamuseya ginani gwawe? Jehovha a di ganeya gu khuye uye a diri thomba yawe, si nga ba si thula gu, vbavbandze nya gu va hakha gipandre nya litigo nga thomba va di hadzi ningwa lithomo nya likhongolo nyo mu thumeye. Thomba yawe yi diri gu “phasa mhamba ya PFHUMU Nungungulu”. (Jos. 18:7) Libhuku la Mitengo 18:20 la gu yeyedza gu isoso kha sa va gira va khala sisiwana. (Leri Mitengo 18:19, 21, 24.) Valevhi va di gu lumbwa khu “mihengo yatshavbo nya likhumi yi duswago khu va na Israyeli, khu tshatshazelo nya mithumo yatshavbo va thumago”. Avo va di gu hakha 10% nya silo si nga ba si duswa khu mathembweni ya na Israyeli ni tepo sifuyu sa na Israyeli si nga ba si engedzeya gu velegeyana. Valevhi va di yede gu henga gipandre nya likhumi ga esi va nga ba va hakha “iso va si wonago na siri sadi” gasi gu phasedzeya wuphasi nya mhamba. (Mite. 18:25-29) Gu di gu ningedwa ga vaphasi nya mhamba “mihengo yatshavbo nya guage” eyi sanana sa Israyeli si nga ba si vbegedza ga Nungungulu wulangani va nga ba va mu khozeya iyo. Khu kharato, vatshavbo vaphasi nya mhamba va diri ni sighelo nya sadi gasi va khodwa gu khavo Jehovha a na va khathaleya.
Dzithomba nya liphuvbo
g02-T 8/6 paj. 14, ndri. 2
Munyu wu na ni lisima ngudzu
Munyu wu ngu thuma gambe gasi gu yeyedza gusayisega ni gupindruga nya silo. Khu kharato, omu nya Bhibhiliya gidzumeledzwano gi nga ba gi dzega tepo nyo laphe gi di gu ranwa pwani “gidzumeledzwano nya munyu.” Ava va nga ba va gira gidzumeledzwano gegi va di gu khala va hodza gumogo guhodza gu nga ba guri ni munyu gasi gu tiyisa gidzumeledzwano va giridego. (Mitengo 18:19) Nayo wa Mosi wu di gu ruma gu khuwo vathu va theya munyu omu nya miningelo yawe gasi si yeyedza gu khiso miningelo yawe kha ya nga ba yi hinide.
12-18 NYA ABRIL
DZITHOMBA NYA LITO LA NUNGUNGULU | MITENGO 20-21
“Simamani na mu rude tepo mu garadzegago”
w19.02-T paj. 12; ndri. 19
Khala muthu nya gurule u tsakisa Jehovha
19 Hi na potsa gu gira sighoho. Nga dundrugeya gambe khu Mosi. Khu myaga nya yingi, a diri muthu nya gurule a nga ba a tsakisa Jehovha. Khavbovbo, guvbeyani nya 40 myaga nyo garadze giwulani, Mosi tandregide gu yeyedza gurula. Hane waye, oyu adzina a mu vbulugusidego Egipito, a di ngari gufa a dzingwa Kadhesi. Avba gambe, vaIsrayeli va di gu ngurangura khu gu khavo kha va khathaledwi gwadi. Ga tepo yeyi va di “ganedzisana ni Mosi” khu gu vbweta mati. Ambari olu Jehovha a nga ba a ningide Mosi tshivba nyo gire silewugiso ni olu Mosi a va thangedego gwadi khu myaga nya yingi, avo va di mu ngurangureya. Avo kha va nga ba va ngurangura khu gu mba na mati basi, ganiolu va di gu ngurangureya Mosi nuye nga khatshi khuye a gu na ni nandru. — Mite. 20:1-5, 9-11.
w19.02-T paj. 13, dzindri. 20-21
Khala muthu nya gurule u tsakisa Jehovha
20 Mosi a di goroga ngudzu, gurula gwatshavbo hu gu bhi. Wulangani nyo ganeye khu gukhodwa ni giwindri gile gasi gi dusa mati, kha nga edzi Jehovha a mu rumidego khidzo, Mosi a di vbenyeya vathu a bwe a dzi ninga wuzundzo wulangani nyo ninge Jehovha. Khu kharato, a di veta giwindri guvili, ma duga mati nya mangi ngudzu. Gudzikhusedza ni zanga si mu yiside gighohoni nya gikhongolo. (Ndzi. 106:32, 33) Khu kotani basi nya olu a tshwatshwanyisidego a luza gurula khu gitepwana, Mosi kha dzumeledwa gu beya Tigoni nya Gitumbiso. — Mite. 20:12.
21 Hi ngu hevbula silo nya lisima ga giyeyedzo gegi. Nyo pheye, gu vbwetega hi dzi garadza tepo yatshavbo gasi hi simama na hiri vathu nya gurule. Ho pfhala, gudzikhusedza gu nga hi beleya, gu hi gira hi ganeya ni gu gira silo nyo vivbe. Nya wuvili, ha gu ba hi garadzega, si ngu garadza gurula, khu kharato gu vbwetega hi dzi garadza gasi hi simama gurula, ambari ho ba hi tshangana ni sigaradzo.
w09-T 1/9 paj. 19, ndri. 5
Mulamuli a emago ni silo nya sadi
Gilo nyo pheye, Nungungulu kha ruma Mosi gu ganeya ni vaIsrayeli, ne kha mu ruma gu va rana khuye vawugeyi. Nya wuvili, Mosi ni Aroni kha va dhumisa Nungungulu. Nungungulu a di khuye: ‘Kha mwa nyi agisa.’ (Livhesi 12) Tepo Mosi a nga ganeya khuye “hi ngu dzi kodza gu dusa mati” a di ganeya nga khatshi khuye ni Aroni va nga hadzi gira gilewugiso va dusa mati va ninga vaIsrayeli wulangani ga Nungungulu. Nya wuraru, Nungungulu a di hadzi va tsayisa khu ndziya nyo fane ni eyi a nga tsayisa khiyo vambe. Nungungulu kha dzumeleya vale vambe vawugeyi gu beya Khanani, a gu iso sasimweso a giridego ga Mosi ni Aroni. (Mitengo 14:22, 23) Nya wuna, Mosi ni Aroni va diri vathangeyi va Israyeli. Ava va gu na ni malungelo nya gu thangeye hengeledzanoni, Nungungulu a ngu vireya nya sikhongolo gwawe. — Luka 12:48.
Dzithomba nya liphuvbo
w14-T 15/6 paj. 26, ndri. 12
U ngu wona sihoso nya vathu kha nga edzi Jehovha a si wonago khidzo?
12 Avba nya gimwegyo ni gimwegyo nya siemo sesi, Jehovha na tsayiside Aroni khu guvbiredza. Ganiolu, Jehovha a di wona gu khuye Aroni khandri khatshi a diri gighohi mwendro gimwalo nya gyadi a nga ba a gira. So wonegisa gu khatshi Aroni a di gu dzumeleya silo mwendro vambe vathu va mu kalaveya a hambana ni gu gira silo nya sadi. Ganiolu, tepo a nga yeyedzwa omu a nga ba a phazama umo, a di dzegeya gu dzumeya sihoso saye a vbindrugedza a seketeya gugola ga Jehovha. (Ekiso. 32:26; Mite. 12:11; 20:23-27) Jehovha a di vega gupima avba nya gukhodwa gwaye ni esi a nga ba a gira gasi gu yeyedza gu khuye a ngu dzi laya khu sihoso saye. Hwane nya myaga nya yingi, Aroni a di nga gu dundrugwa khu kotani nya githawo a nga ba ari nagyo khu Jehovha. — Ndzi. 115:10-12; 135:19, 20.
19-25 NYA ABRIL
DZITHOMBA NYA LITO LA NUNGUNGULU | MITENGO 22-24
“Jehovha a ngu vbindrugedza libango li khala makategwa”
bt-T paj. 53, ndri. 5
Gufana ni dziteponi dza maKristo nya gupheye, vathu va Nungungulu muhuno va ngu tshaniswa ngudzu, ganiolu mwalo a si kodzago gu emisa thumo nyo tshumayele. Tepo ni tepo va zamago gu tutumisa maKristo ma ya khala wumbe wulanga mwendro va ma khotheya pasoni va gu ma tuleya dzindziya nya gu ma vbohiseya mahungu nya Mufumo ga vathu va wumbe wulanga. Khu giyeyedzo, teponi nya Nyimbi nya Wuvili nya Mafu, Dzifakazi dza Jehovha dzi si kodzide gu tshumayela ngudzu tepo dzi nga ba dzi modwe khu vaNazi. Mujudha nyo khaguri a nga manana ni Dzifakazi iyoyo, wari khuye: “Tshivba nya gu timiseye dzi nga ba dziri nayo Dzifakazi dza Jehovha yi nyi giride nyi khodwa gu kheni gukhodwa gwawe gu di gu tiyiswa khu Bhibhiliya, khavbovbo aneni nyi di khala Fakazi ya Jehovha.”
Dzithombo nya liphuvbo
w04-T 1/8 paj. 27, ndri. 2
Mitshamulo nyo khaguri nya libhuku la Mithumo
22:20-22 — Khu ginani Jehovha a nga zangareya Bhalahama? Jehovha a di embede muprofeti Bhalahama khuye a nga hongoli a ya valeteya vaIsrayeli. (Mitengo 22:12) Ganiolu, muprofeti Bhalahama a di hongola ni vama va Bhalaki na va hungide gu ya valeteya vaIsrayeli. Bhalahama a di gu vbweta gu tsakisa pfhumu ya Mowabhi ni gu kategiswa khiyo. (2 Pedro 2:15, 16; Judha 11) Ambari tepo a nga gurumedzwa khu Nungungulu gu kategisa vaIsrayeli vbavbandze nya gu va valeteye, Bhalahama a di vbweta gu tsakedwa khu pfhumu ya Mowabhi khu gu a dusa mawonelo nya gu khuye vanyamayi va nga ba va khozeya Bhahali va sengedzeya vama nya vaIsrayeli. (Mitengo 31:15, 16) Khu kharato, Nungungulu a di zangareya Bhahalama khu kotani nya wudogodogo waye.
26 NYA ABRIL–2 NYA MAIO
DZITHOMBA NYA LITO LA NUNGUNGULU | MITENGO 25-26
“Ina si nga kodzega gu muthu moyo a hambana ni vambe?”
lvs-T paj. 118, dzindri. 1-2
“Thavani wubhayi!”
MULOVI nya dzindzandzi a gu ya lova omu gu gu na ni lifumbo nya dzindzandzi a dzi vbwetago. Tepo a vbohago o vega nyambwa yi godwago ngudzu khu dzindzandzi avba nya gilowo gyaye a gi rinya matini. Khavbovbo a khala a vireya kala yi modwa ndzandzi, a vbedza a ndrindra gilowo gi duga vbavbandze.
2 Vathu navo vo modwa khu ndziya nyo fane. Khu giyeyedzo, tepo vaIsrayeli va nga ba vari Mikovani ya Mowabhi, vbafuvbi ni Tigoni nya Gitumbiso, pfhumu ya Mowabhi yi di tumbisa Bhalahama gu mu ninga dzitsapawu nya dzingi a gu si kodza gu vangeya sigaradzo vaIsrayeli. Khu guhegisa, Bhalahama a di mana ndziya nya gu vaIsrayeli va dzi vangeya sigaradzo vabune. A di vbweta nyambwa a nga yi wona gu khuye yi na thuma. Nyambwa yakona sagadzyana sa Mowabhi. A di rumeya sagadzyana sa Mowabhi omu vaIsrayeli va nga ba va romo umo gasi va ya sengedzeya vama va Israyeli va ghoheya Jehovha. — Mitengo 22:1-7; 31:15, 16; Gutuledwa 2:14.
lvs-T paj. 119, ndri. 4
“Thavani wubhayi!”
4 Khu ginani gu thegidego vaIsrayeli nya vangi avba nya nyambwa ya Bhalahama? Kholu va nga ba va dundrugeya gu dzi tsakisa basi, va divaledwa khu satshavbo nya sadi va nga ba va giredwe khu Jehovha. Vaisrayeli va diri ni sighelo nya singi nyo tumbege ga Nungungulu. Khu giyeyedzo, a di va tshudziside wugumbini wa Egipito, a va sayisa gwadi giwulani kala va vboha vbinganotunu wa Tigoni nya Gitumbiso. (Vahebheru 3:12) Ambari ulolo va di dzumeya gu sengedzedwa va gira wubhayi. Mupostoli Pawulo lovide gu khuye: “Hi nga dzi ningedzeli wubhayini, kha nga edzi va nga gira nya vangi vawe, va fa khu litshigu limwedo.” — 1 Vakorinto 10:8.
Dzithomba nya liphuvbo
it-3-T dzipaj. 694-695, dzindri. 8-9
Mivbingano
So wonegisa gu khatshi dziteponi dza vaIsrayeli sipeto si di gu kabanisedwa khu magirelo mavili: khu guya khu soriti ni tengo nya vathu va nga ba va wumba lihundzu lolo. Adzina saye dzisoriti dzi di gu vegedzedwa vbafuvbi ni sipeto gasi lihundzu ni lihundzu li hakha thomba li nga yi vireya, khidzo dzi nga ba dzi yeyedza sipandre nya thomba tigoni mule, nya nga Norte mwendro Sul, Leste mwendro Oeste, mwendro musigomoni. Esi si nga yeyedzwa khu dzisoriti si di guta khiyo ga Jehovha, khu kharato isoso si di gu gira gu gu si manegi lidiwo vbakari nya mahundzu. (Mav 16:33) Nungungulu a di gu gimbidzisa gambe silo khu ndziya nya gu lihundzu ni lihundzu li dzi pwananisa ni giprofeto, egi gi nga profetwa khu Jakobe na gu romo vbafuvbi ni gufa gi gomogo omu ga Genesi 49:1-33.
Hwane nya gu dzisoriti na dzi ganede gipandre gya lihundzu nyo khaguri, si di gu vbwetega gu tshamuseya mivbingano nya gipandre gyogyo na va thumisa gighelo nya wuvili: wukhongolo nya lihundzu. “Mu na kabanisela litigo khu gu lola dzisolo vbakari nya dzindranga dzanu; mu na ningela thomba nya yingi ga avo va gu vangi, mu ninga nya yidugwane ga avo va gu va vadugwana, muthu ni muthu a na hakha esi si mu lumbago kha nga edzi solo yi lolago khidzo.” (Mit 33:54) Esi si nga ba si hungwa khu dzisoriti mayelano ni gipandre nyo khaguri si di yede gu simama nari soso, ganiolu si di gu kodzega gu gira dziajusti mayelano ni wukhongolo nya thomba. Khu kharato, tepo si nga wonega gu gipandre gya Judha gi diri gikhongolo ngudzu, gi di vbungudwa, si dzegwa sipandri si nga vbungudwa si ningwa lihundzu la Simiyoni. — Jos 19:9.