GIHEVBULO 8

Thumisa sipimaniso si hevbudzago

Matewu 13:34, 35

ESI U YEDEGO GU GIRA: Engedzeya tshivba nya sihevbudzo sago khu gu thumisa sipimaniso nyo vbevbuge si na ndrindrago gupima ga vaengiseyi vago si bwe si hevbudza silo nya lisima.

MAGIRELO YAKONA:

Hatha sipimaniso nyo vbevbuge. Kha nga Jesu, thumisa silo nya sidugwana gasi gu tshamuseya silo nya sikhongolo, ni silo nyo vbevbuge gasi gu tshamuseya silo nyo garadze. U nga tadzeyi mahungu nya mba vbwetega ma na garadzisago gipimaniso. Tiyisega gu khuwe gipimaniso u gi thumisago gi ngu yelana ni esi u hevbudzago gasi gu vaengiseyi vago va si dzuwegi mapimo khu gu wona gu khavo gipimaniso gyago kha gi yelani ni esi u hevbudzago.

Khedzisa gwadi. Khedzisa gwadi esi si gu randredego, u hevbula mabhuku yathu, u bwe u engiseya vahevbudzi nyo vidzwe. Tepo u girago isoso, zama gu khedza sipimaniso u na si thumisago gasi gu tshukwadzisa mahevbudzelo yago. Sayisa sipimaniso soso.
Dundrugeya khesi si na phasago vaengiseyi vago. Hatha sipimaniso si ganeyago khu mithumo ni esi si tsakisago vaengiseyi vago. Dzi woneye gasi gu sipimaniso sago si si theyi dzitshoni vathu mwendro gu va gorosa.
Hevbudza litshina nya gisekelo. Avba nya gipimaniso gyago, dzi garadzeye gu tshingisa matshina nya gisekelo, nasiri silo nya mba phasa gilo. Dzi garadzeye gu vaengiseyi va si dundrugi gipimaniso gyago basi, ganiolu va dundruga gihevbudzo va gi manidego avba nya gipimaniso gyago.