Vavelegi, phasani sanana sanu gu dandra khu liphuvboni gasi si bhapatiswa

1. Ginani egi vavelegi nya maKristo va vbwetago gu tiyisega khigyo na gi si gu bhapatiswe gyanana gyawe?

“GU VBINDRIDE migima nyo khaguri na nyi gu embeya Papayi ni Mamayi gu kheni nyo vbweta gu bhapatiswa, avo va di gu oloveya gu bhula khiso ni eni. Va di gu vbweta gu tiyisega gu khavo ina nyi di gu li wona lisima nya esi nyi nga ba nyi vbweta gu si hunga gani. Khu 31 nya Dezembro nya 1934, li di vboha litshigu nya gigiro gegi nyo hathege womini wangu.” Khidzo Blossom Brandt a tshamuseyago khidzo esi si giregidego tepo a nga vbweta gu bhapatiswa. Muhuno nugo, vavelegi vo vbweta gu phasa sanana sawe gu hunga silo khu wugengeyi. Gyanana gyo thindreka gu bhapatiswa nya mba na gighelo nyo pwale, isoso si nga ghoha wupari wagyo ni Jehovha. (Jakobe 4:17) Vavelegi nyo gengeye, vo vbweta gu tiyisega gu khavo ina gyanana gyawe gi dongide gu khala mupizane wa Kristo gani.

2. a) Gigaradzo muni gi wonwago khu vawoneleyi nyo khaguri nya gipandre? b) Ginani hi na ganeyago khigyo avba nya ndrima yeyi?

² Vawoneleyi nyo khaguri nya gipandre va ngu wona vaphya nya vangi va gomogo omu nya gipimo nya 20 myaga va si gu bhapatiswigo, ambari olu va dandreyago lisineni. Gu tala nya dzitepo, vaphya vovo va ngu hongola mitshanganoni, va hongola thumoni nyo tshumayele, va bwe va dzi wona na vari Dzifakazi dza Jehovha. Ambari ulolo, khu sighelo nyo khaguri va si gu dzi hendzeledzi ga Jehovha ni gu bhapatiswa. Yimbe tepo, isoso so girega khu gu vavelegi va pimisa gu khavo sanana sawe si si gu dongi gu bhapatiswa. Avba nya ndrima yeyi, hi na ganeya khu sighelo siraru si tandregisago vavelegi gu kutsa sanana sawe gu bhapatiswa.

INA GYANANA GYANGU GI NA NI TANGA NYO NINGANE GU BHAPATISWA?

3. Vavelegi va Blossom va di gu garadzega khu ginani?

³ Vavelegi va Blossom va khumbugidwego avba nya ndrimana nyo pheye, va di gu garadzega khu gu khavo ina Blossom a diri ni tanga nyo ningane gu pwisisa lisima ni tshamuselo nyo bhapatiswe gani. Vavelegi va nga dziti kharini gu khavo gyanana gyawe gi dongide gu dzi hendzeledza ga Jehovha mwendro ne?

4. Gileletelo gya Jesu gi gomogo ga Matewu 28:19, 20 gi nga phasa kharini vavelegi muhuno?

⁴ Leri Matewu 28:19, 20. Bhibhiliya kha yi ganeyi gu khiyo muthu a yede gu bhapatiswa na ari ni tanga nyo khaguri. Ganiolu si na ni lisima gu vavelegi va dundrugeya gwadi gu khavo so thula ginani gu khala mupizane. Khu giGreki, lito li vbindrugedzedwego pwani gu “hevbudza mwendro gu gira vapizane” li gomogo omu ga Matewu 28:19 lo thula gu hevbudza muthu ni makungo nyo mu phase gu khala gihevbuli mwendro mupizane. Mupizane muthu a hevbulago ni gu pwisisa esi Jesu a hevbudzidego a bwe a dzi emiseya gu mu engisa. Khu kharato gukhugeya tepo sanana sawe si velegwago, vavelegi gu vbwetega va si hevbudza na vari ni makungo nyo si phase gu dzi hendzeledza ga Jehovha ni gu khala vapizane va Kristo. Lisine gu sanana nya sidugwana ngudzu kha si ninganedwi gu bhapatiswa. Ambari ulolo, Bhibhiliya yo yeyedza gu khiyo sanana niso si ngu kodza gu pwisisa ni gu gola lisine nya Bhibhiliya.

5, 6. a) Matimo nya Bhibhiliya ma ganeyago khu Thimoti mo hi gira hi dundrugeya gu khethu bhapatisidwe na ari ni tanga muni? b) Khu yevbini ndziya nya yadi eyi vavelegi nyo gengeye va nga yi thumisago gasi gu phasa sanana sawe?

⁵ Thimoti a diri mupizane a nga ba a dzi emisede gu thumeya Jehovha na ngari muphya. Mupostoli Pawulo ganede gu khuye Thimoti phede gu hevbula lisine nya Lito la Nungungulu ‘gukhugela wananani’ waye. Papayi wa Thimoti kha nga ba a thumeya Jehovha, khu kharato Thimoti phasidwe khu kokwe waye ni mamayi waye gu gola Lito la Nungungulu. Kha nga handro wakone, uye a diri ni gukhodwa nyo tiye. (2 Thimoti 1:5; 3:14, 15) Si nga gira na ninganedwe khu gu hakha malungelo nyo hathege libandlani na ari ni gipimo nya 20 myaga. — Mithumo 16:1-3.

⁶ Gyanana ni gyanana gi hambanide ni gimbe. Khandri satshavbo si vidzwago khu liphuvboni khu tanga mweyo. Simbe sanana si ngu vbiredza gu pwisisa lisine si hunga makungo khu wugengeyi, si bwe si bhapatiswa na si ngari sanana. Simbe kha si vbiredzi gu pwisisa lisine gasi si bhapatiswa; kala si dandranyana. Vavelegi va gengedego kha va gurumedzi sanana sawe gu bhapatiswa. Wulangani nya isoso, avo vo phasa sanana sawe khu gimwegyo ni gimwegyo gu dandra khu liphuvboni khu guya khu mapwisiselo yagyo. Vavelegi va ngu tsaka tepo gyanana gyawe gi engisago lowo wa Mavingu 27:11. (Leri.) Ganiolu gu vbwetega va dundruga gu khavo makungo yawe gu phasa sanana sawe gu khala vapizane. Na va gu dundrugeya khisoso, va yede gu dzi wudzisa gu khavo, ‘Ina gyanana gyangu gi na ni guti nyo eneye gasi gu gi dzi hendzeledza ga Nungungulu ni gu bhapatiswa?’

INA GYANANA GYANGU GI NA NI GUTI NYO ENEYE GASI GU BHAPATISWA?

7. Ina muthu yede guti gimwegyo khu gimwegyo nya sihevbudzo satshavbo nya Bhibhiliya na a si gu bhapatiswe? Tshamuseya.

⁷ Tepo vavelegi va hevbudzago sanana sawe, va gu si phasa guti gwadi lisine. Guti gogo gu na kutsa sanana gu dzi hendzeledza ga Nungungulu. Ganiolu isoso kha si thuli gu khiso gyanana gi yede guti satshavbo sihevbudzo si gomogo omu nya Bhibhiliya khu gimwegyo ni gimwegyo na gi si gu dzi hendzeledzi ni gu bhapatiswa. Watshavbo mupizane wa Kristo gu vbwetega gu a simama gu hevbula ambari hwane nyo ba a bhapatisidwe. (Leri Vakolosi 1:9, 10.) Ganiolu guti nya pimo muni ogu muthu a yedego gu manega nago na a si gu bhapatiswe?

8, 9. Ginani gi dugeledego ghadhi mweyo nya lipaso ya dhoropani ga Filipi, nigu ginani hi nga gi hevbulago avba nya giyeyedzo gyayo?

⁸ Giyeyedzo nya ndranga mweyo ya matshiguni ya gale gi nga phasa vavelegi muhuno. (Mithumo 16:25-33) Khu mwaga nya 50, Pawulo a di hongola dhoropani ga Filipi khu lipfhumba laye nya wuvili nya wumisiyonariyo. Tepo a nga ba ari iyoyo, uye ni Silasi va di singedzwa nya mba na nandru, va modwa, va bwe va khothedwa pasoni. Vbakari nya wutshigu, gu di manega girevareva nya gikhongolo gi nga tula madimba yatshavbo nya lipaso. Ghadhi nya lipaso yi di pimisa gu khiyo sibotshwa satshavbo si tutumide, yi vbweta gu dzi songa. Ganiolu, Pawulo a di yi himbedzeya. Khavbovbo, Pawulo ni Silasi va di hevbudza ghadi yile nya lipaso ni ndranga yayo lisine maningano ni Jesu. Avo va di khodwa esi va nga si hevbula maningano ni Jesu va bwe va wona lisima nyo mu engise. Khu kharato avo va di bhapatiswa nya mba hweya. Hi nga hevbula ginani avba nya giyeyedzo gyawe?

⁹ Si nga gira ghadi yile nya lipaso na yi thumide kha nga lisotshwa nya muRoma gale gakona. Iyo kha ya nga ba yi liti Lito la Nungungulu. Khu kharato gasi gu ghadhi yile yi khala muKristo, yi di yede gu hevbula matshina nya lisine nya Bhibhiliya, yi pwisisa esi Jehovha a si vbwetago ga sithumi saye, yi bwe yi engisa sihevbudzo sa Jesu. Esi yi si hevbudego khu gitepwana gile nya gidugwana si phaside ghadhi yile gu vbweta gu bhapatiswa. Kha si kanakanisi gu khiso yi simamide gu hevbula simbe hwane nyo ba na yi bhapatisidwe. Khu kharato, gyanana gyago gyo gu embeya gu khigyo gyo vbweta gu bhapatiswa kholu gi haladzago Jehovha ni gu vbweta gu mu engisa, u na gira ginani? Gi dige gi ya ganeya gyabune ga madhota gasi gu ayo ma hunga gu khayo gi ngu ninganedwa gu bhapatiswa mwendro ne.a (Wona tshamuselo wa vbavbatshi.) Kha nga maKristo yatshavbo ma bhapatisidwego, igyo gi na simama gu hevbula simbe maningano ni Jehovha womini wagyo watshavbo kala gupindruga. — Varoma 11:33, 34.

KHU SEVBINI SIHEVBULO ESI GYANANA GYANGU GI YEDEGO GU SI THANGISA?

10, 11. a) Ginani egi vavelegi nyo khaguri va pimisago? b) Ginani egi khu lisine gi vhikeyago sanana?

¹⁰ Vavelegi nyo khaguri vo si wona na siri tshukwana gu khavo gyanana gyawe gi bhapatiswa hwane nyo ba gi manide sihevbulo nyo khugege ni thumo nya wadi. Si nga gira nari vo gi suveya silo nya sadi, ganiolu va yede gu dzi wudzisa gu khavo: ‘Ina silo sesi si na phasa gyanana gyangu gu dugeleya khu lisine? Ina si ngu pwanana ni esi hi si hevbulago omu nya Bhibhiliya? Jehovha o vbweta gu khuye hi wu thumisa kharini womi wathu?’ — Leri Muhevbudzi 12:1.

¹¹ Gwadi gu dundruga gu khethu litigo ni silo salo kha si pwanani ni esi Jehovha a si vbwetago ni esi a si pimisago. (Jakobe 4:7, 8; 1 Johane 2:15-17; 5:19) Ndziya nya yadi ga dzatshavbo nyo vhikeye khiyo sanana ga Sathane, ni ga litigo, ni ga mapimo nyo vivbe nya litigo leli khu gu si manega ni wupari nyo tiye ni Jehovha. Vavelegi vo thangisa sihevbulo nya mafu ni thumo nya wadi womini wawe, sanana sawe si nga pimisa gu khiso silo nya litigo si na ni lisima ngudzu guvbindra gu manega ni wupari nya wukhongolo ni Jehovha. Iyoyo mhango nya yikhongolo. Kha nga vavelegi nya lihaladzo, ina mo vbweta gu khenu litigo leli li hevbudza sanana sanu esi ilo li si wonago na siri iso si na si phasago gu mana gutsaka? Gu thangisa Jehovha womini wathu khiyo basi ndziya nyo mane gutsaka ni gudugeleya nya lisine. — Leri Ndzimo 1:2, 3.

AHATI GYANANA GYANGU GYO TSHUKA GI GHOHA KE?

12. Khu ginani vavelegi nyo khaguri va gu khavo tshukwana gu gyanana gi vireya gasi gu bhapatiswa?

¹² Mamayi moyo tshamusede egi gi nga ba gi mu gira a si vbweti gu khuye gyanana gyaye gi bhapatiswa. A di khuye: “Nyo khala dzitshoni ni gu ganeya gu kheni gighelo nya gikhongolo ngudzu, gu diri malulamiselo nyo duswe libandlani.” Kha nga ndriyathu yoyu, vavelegi nyo khaguri vari khavo tshukwana gu gyanana gyawe gi vireya gi ta bhapatiswa na gi dandride gasi gi si giri sihoso. (Genesi 8:21; Mavingu 22:15) Vavelegi va nga dzi embeya gu khavo gyanana gyawe gyo ba gya sa bhapatiswa, kha gi na nga duswa libandlani. Ganiolu, ina gyomo gi hosegidego avba nya mapimo yoyo? — Jakobe 1:22.

13. Gu ba muthu nyo khaguri a sa bhapatiswa, so thula gu khiso kha dzi hlamuleyi ga Jehovha? Tshamuseya.

¹³ Lisine gu vavelegi kha va vbweti gu khavo gyanana gyawe gi bhapatiswa na gi si gu dongi gu dzi hendzeledza ga Jehovha. Ganiolu hi na ba hi hosiside ho pimisa gu khethu gyanana nyo ba gi si gu bhapatiswe kha gi dzi hlamuleyi ga Jehovha. Gyanana gyo pheya gu dzi hlamuleya ga Nungungulu tepo gi pheyago guti esi Jehovha a gu khuye khyadi ni esi nyo vivbe. (Leri Jakobe 4:17.) Vavelegi nyo gengeye kha va digisi sanana sawe gu bhapatiswa. Ambari gyo ba gi ngari gidugwana ngudzu, vavelegi vo gi hevbudza gu gola esi Jehovha a gu khuye khiso si gu sadi ni gu venga esi Uye a gu khuye si vivbide, kha nga edzi avo va girago. (Luka 6:40) Lihaladzo eli gyanana gyago gi gu nalo khu Jehovha li na gi vhikeya gu gira sighoho nya sikhongolo, kholu gi na vbweta gu gira esi Jehovha a gu khuye khiso si gu sadi.

EDZI VAMBE VA NGA PHASAGO KHIDZO

14. Madhota ma nga phasedzeya kharini esi si girwago khu vavelegi?

¹⁴ Madhota ma nga phasedzeya esi si girwago khu vavelegi khu gu ganeya gwadi khu misuwo nya liphuvbo. Moyo nya ndriyathu nya nyamayi a di dundruga tepo Ndriyathu Russell a nga bhula naye na ngari ni 6 myaga. A di khuye: “Vbedzide 15 dzimeneti na gu bhula ni eni khu misuwo yangu nya liphuvbo.” Khu yevbini mihandro yakona? Khu gu gimbiya nya tepo, ndriyathu wule a di khala piyonero, nigu thumide nga piyonero khu 70 myaga ni guvbindra! Khu kharato, malito nya yadi ma tiyisago ma nga khuha womi watshavbo nya muthu. (Mavingu 25:11) Madhota ma nga rana gambe vavelegi ni sanana sawe gasi va ta phasedzeya mithumo nyo khaguri Salawuni nya Mufumo. Va nga lomba sanana gu si gira silo si ninganago tanga ni makodzelo yaso.

15. Vambe libandlani va nga phasa kharini vaphya?

¹⁵ Vambe libandlani va nga phasa kharini? Khu gu yeyedza gukhathala khu muphya moyo ni moyo. Khu giyeyedzo, u nga vega gupima avba nya silo si yeyedzago gu khiso vaphya va ngu dandra khu liphuvboni. Gyanana gyo ba gi hlamude gwadi mitshanganoni, mwendro gyo ba gi manegide ni gipandre avba nya longoloko nya tshangano wa vbakari nya semana. Gyo ba gi tshumayede muthu xikwatunu, mwendro gu gira silo nya sadi tepo gi nga lingwa gu gira silo nyo vivbe. U nga giri mihuni gu gi embeya gu khuwe gi giride gwadi! Hi nga dzi vegeya misuwo nyo bhule ni vaphya na yi si gu pheyi mitshangano ni hwane nya mitshangano. Ho gira isoso, sanana si na dzipwa na si gu gira gipandre nya libandla nya likhongolo. — Ndzimo 35:18.

PHASA GYANANA GYAGO GU DANDRA KHU LIPHUVBONI GASI GI BHAPATISWA

16, 17. a) Khu ginani si gu na ni lisima gu sanana si bhapatiswa? b) Gutsaka muni ogu vavelegi nya maKristo va nga gu manago? (Wona foto gupheyani nya ndrima.)

¹⁶ Limwedo nya mathomo nya makhongolo ngudzu aya vavelegi va gu nawo, gu hevbudza sanana sawe gu haladza Jehovha. (Ndzimo 127:3; Vaefeso 6:4) Va na Israyeli, va di gu hendzeledza sanana sawe ga Jehovha na si ngari gu velegwa. Ganiolu si hambanide ni ethu muhuno. Kha nga olu vavelegi va haladzago Jehovha ni gu gola lisine, kha si thuli gu khiso sanana sawe niso. Gukhugeya litshigu gi velegwago khilo gyanana, vavelegi va yede gu manega ni misuwo nyo gi phase gu khala mupizane, gu dzi hendzeledza ga Nungungulu ni gu bhapatiswa. Ginani gi gu gya lisima ngudzu? Muthu o dzi hendzeledza, a bhapatiswa, a bwe a thumeya Jehovha khu gutumbega si na mu tuleya dzindziya nyo vbulugiswe ndrani nya tshanisa nya yikhongolo. — Matewu 24:13.

¹⁷ Tepo Blossom Brandt a nga vbweta gu bhapatiswa, vavelegi vaye va di vbweta gu tiyisega gu khavo dongide gani. Tepo va nga tiyisega gu khavo a di dongide, va di seketeya makungo yaye. Blossom tshamusede esi papayi waye a giridego wutshigu hwane nyo ba na a si gu bhapatiswe: “A di lomba gu khuye hatshavbo hi khidzima, gasi gu a gombeya. A di embeya Jehovha khuye a di tsakide ngudzu kholu nyamahegyane waye a hungidego gu hendzeledza womi waye Gwaye.” Hwane nyo ba gu vbindride 60 myaga, Blossom a di khuye: “Tiyisega gu khuwe myaga yatshavbo yi na landreyago, gima kha nyi na nga wu divala wutshigu wule!” Vavelegi, tsakani nenu tepo mu wonago sanana sanu na si gu khala sithumi sa Jehovha si dzi hendzeledzidego si bwe si bhapatiswa.