Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
2-8 nya Maio
DZITHOMBA NYA LITO LA NUNGUNGULU | 1 SAMUWELI 27–29
“Mano a nga ba a ma thumisa Dhavhidhe nyimbini“
it-1 dzipaj. 164, 165
Akisi
Dhavhidhe manide wuthavelo guvili ndrangani ga Pfhumu Akisi tepo a nga ba a tutuma Sawule. Khu tepo nyo pheye, va nga mu kanakaneya gu khavo nala Dhavhidhe a di dzi gira gu khatshi muthu nyo handruge, nigu Akisi a di mu dzumeleya gu khuye a hongola na gu pimisa gu khuye muthu nya gu handruge. (1Sa 21:10-15; Ndz 34) khu tepo nya wuvili Dhavhidhe a di hongola ni 600 masotshwa ni dzindranga dzawe, ganiolu Akisi a di va embeya gasi va ya khala tigoni ga Zikalagi. Ndrane nya mwaga mowo ni 4 migima va nga ba va romo iyoyo, Akisi a di gu khodwa gu khuye Dhavhidhe ni vathu vaye va di gu wugeya dzisidhadhi dza Judha, nari gu khu lisine a di gu phanga Vagesuri, Vageresi ni Vaamaleki. (1Sa 27:1-12) Mano ya Dhavhidhe ma dugelede gwadi nyo bwe Akisi a gira Dhavhidhe ghadhi yaye tepo Vafilistiya va nga vbweta gu wugeya Pfhumu Sawule, ni gu khu gu gurumedzwa khu dzimbe ‘dzipfhumu’ dza Vafilistiya Dhavhidhe ni vama vaye va di embedwa gu va bweleya Zikalagi. (1Sa 28:2; 29:1-11) Tepo Dhavhidhe a nga khala Pfhumu, a ya dwana ni Ghati so wonega gu khatshi Akisi kha nga songwa. Uye vbanyide kala ga tepo Solomoni a nga ba a ri Pfhumu. — 1Dzf 2:39-41.
Madzaha — mu nga gira kharini gasi va mi tumba libandlani?
8 Wona gimbe gigaradzo egi Dhavhidhe a tshanganidego nagyo. Hwane nyo todzwe gasi a khala pfhumu, Dhavhidhe virede myaga nya yingi gasi a pheya gu fuma kha nga pfhumu ya Judha. (1 Sam. 16:13; 2 Sam. 2:3, 4) Ndrani nya tepo yoyo yi vbindridego na vireya gu fuma, ginani gi mu phasidego gu timiseya? Wulangani nyo vbeye tshivba, Dhavhidhe a di vega gupima ga esi a nga ba a si kodza gu gira. Khu giyeyedzo, tepo Dhavhidhe a nga ba a khaleya gu tutumatutuma Sawule a gimbileya gipandreni ga Vafilistiya, a di gu londrola tepo yoyo gasi gu dwana ni valala va Israyeli. Khu gu gira isoso, a di gu vhikeya mivbingano nya litigo la Judha. — 1 Sam. 27:1-12.
Kemba dzithomba nya liphuvbo
w10 1/1 paj. 20, dzindri. 5-6
Si nga kodzega gu ava va fudego va phasa ava va vbanyago?
Dundrugeya khesi. Bhibhiliya yari khiyo mutho a gufa ‘a gu wuya a khala kudzudzwane’ ni gu ‘ma gu hegisa guralo makungo yaye.’ (Ndzimo 146:4) Sawule ni Samuweli va di gu dziti gu khavo Nungungulu a di gu himbedzeya gu va vbwetedzeya dzinyanga. Nigu Sawule a di gu dzi emisede gu fuvisa vatshavbo vathu va nga ba va gira silo si nga ba si gimbileyana ni madhemoni. — Levhi 19:31.
Nga Dundrugeya gambe khesi. Nari khatshi Muprofeti Samuweli a di ba a vbanya khu liphuvbo, a di hadzi gu fanya nayo wa Nungungulu a gira pwanano ni nyanga gasi a manana ni Sawule? Jehovha a di bombide gu ganeya ni Sawule. Ina nyanga yoyo yi di hadzi gu gurumedza Nungungulu oyu a khugegidego, gu ganeya ni Sawule khu gu thumisa Samuweli oyu a nga ba a fude? Ahihi. Khu lisine a di siri “Samuweli” muprofeti nyo tumbege wa Nungungulu. Li diri lidhemoni li nga ba li dzi gira Samuweli.
9-15 nya Maio
DZITHOMBA NYA LITO LA NUNGUNGULU | 1 SAMUWELI 30–31
“Vbwetedzeya tshivba ga Jehovha Nungungulu wago”
w06 1/8 paj. 28, ndri. 12
Thava Jehovha u bwe u tsaka
12 Githawo egi Dhavhidhe a nga ba a ri nagyo khu Jehovha, kha gya mu gira gu a thava gu gira silo nya guvivbe basi. Gi mu tiyiside gu gira silo nya sadi ni gu gira silo khu wugengeyi tepo a nga ba a manana ni sigaradzo. Dhavhidhe ni vathu vaye, va di sihaleya Sawule tigoni ga Zikalagi gipandreni gya Vafilistiya khu mwaga ni 4 migima. (1 Samuweli 27:5-7) Litshigu limwedo, tepo sithumi sa Dhavhidhe si nga ba si ri mwalo, vaphangi nya Vaamaleki va di vbisa dzisidhadhi va bwe va dzega sanana, vanyamayi ni tshambi wawe. Tepo va nga wuya va bwe va wona esi si nga girega Dhavhidhe ni sithumi saye va di liya. Isoso si giride sithumi sa Dhavhidhe si goroga ngudzu avbo nyo bwe si vbweta gu mu songa. Ambari olu Dhavhidhe a nga ba a garadzegide ngudzu, uye kha vbeya tshivba. (Mavingu 24:10) Lihaladzo laye khu Jehovha li mu giride adzi “tiyisela khu tshivba ya Pfhumu Nungungulu.” Khu gu phaswa khu Nungungulu, Dhavhidhe ni sithumi saye va si kodzide gu landra Vaamaleki va bwe va ya dzega satshavbo si nga ba si va lumba.— 1 Samuweli 30:1-20.
Kemba dzithomba nya liphuvbo
w05 15/3 paj. 24, ndri. 8
Gukhanyiswa ga libhuku la 1 Samuweli
30:23, 24. Esi si gomogo omu ga Mitengo 31:27 so yeyedza gu khiso Jehovha a ngu ninga lisima vale va phasedzeyago mithumo libandlani. Khu kharato ni gevbini hi girago hi yede ‘gu gira khu monyo wathu watshavbo khwatshi ha gu thumela Pfhumu nasiri vathu’ — Vakolosi 3:23.
16-22 nya Maio
DZITHOMBA NYA LITO LA NUNGUNGULU | 2 SAMUWELI 1–3
“Wulahu” wa gu hi hevbudza ginani?
w00 15/6 dzipaj. 13, 14, ndri. 9
Ninga githawo avo va gu thangeyago
9 Ina Dhavhidhe garadzegide tepo a nga ba a tshaniswa? Dhavhidhe garadzegide ngudzu nyo bwe a embeya Jehovha khuye: “avo . . . va nya wurena va ngu vbweta gu nyi songa.” (Ndzimo 54:3) A di gombeya ga Jehovha Khuye: “Uwe Nungungulu wangu nyi vbulugise ga valala vangu . . . Va wugele hefemulo wangu va nya dzitshivba va gu nyi wugela nya sa ghoha gilo. Ambari nyi ngamba ghoha gilo, avo va gu nyi tela khu gututuma ni matshari mandzani; delu u ta wona, u nyi phasa.” (Ndzimo 59:1-4) U di nga garadzega khu kotani nya muthangeyi nyo khaguri a gu gireyago wuvivbi na wa sa mu gira gilo? Dhavhidhe simamide gu yeyedza githawo ga Sawule. Tepo Sawule a ngafa, vbavbandze nyo tsake Dhavhidhe a di embeleya ndzimo nya gililo “Sawule ni Jonatani va di gu godwa ni gu haladzwa, guvbanyani ni gufani . . . Va di gu vbuvba gu vbindra maghama, ni tshivba gu vbindra dzinghala. Enu vanyamahegyane va na Israyeli, lilani Sawule, a nga bani a mi ambagisa khu myendra nya siwunguwungu, a nga bani a mburisa dzingandzuni gwanu khu ndralama.” (2 Samuweli 1:23, 24) Dhavhidhe hi ningide giyeyedzo nya gyadi khu gu a yeyedza githawo ga Sawule oyu a nga ba a todzidwe khu Jehovha ambari olu a nga ba a mu phara khu ndziya nya mba yadi.
Kemba dzithomba nya liphuvbo
it-1 paj. 1248, ndri. 1
Ndriyathu
Lito “ndruye” li nga thumisedwa ga ava va gu ni makungo ni misuwo ya yimweyo. Khu giyeyedzo, Pfhumu Hirami mufumeli wa Tire a di rana Pfhumu solomoni khuye: “ndriyangu” nasiri basi kholu va nga ba vari ni sikhalo nya gu fane, ganiolu adzina kholu va nga ba vari ni makungo ya mamowo nyo phasedzeye khu madhera ni simbe silo gasi gu vbaha tempele. (1Dzf 9:13; 5:1-12) “Nga pwani gutshamba ni gu tsakisa valongo va gu vbanya dangamwedo khu gu pwanana” Dhavhidhe lovide esi gasi gu hi phasa gu pwisisa gu, khandri va na ndruyi ni ndruyi khu nyamani basi va gu ni gurula. (Ndz 133:1) Dhavhidhe ranide Jonatani gu khuye ndriyangu nasiri kholu va nga ba vari valongo va vbafuvbi, ganiolu kholu va nga ba va golana ni gu va diri ni makungo ya mamowo. (2Sa 1:26) Vathu va gu ni makhalelo ya mamowo ni gu dzi emiseya nyo fane ambari makhalelo yoyo mo ba ma vivbide va nga ranana khavo vandruyi. — Mav 18:9.
23-29 nya Maio
DZITHOMBA NYA LITO LA NUNGUNGULU | 2 SAMUWELI 4–6
“Simama gu thava gu mba engisa Jehovha”
w05 15/5 paj. 17, ndri. 7
Gukhanyiswa ga libhuku la 2 Samuweli
6:1-7. Ambari olu Dhavhidhe a nga ba ari ni misuwo nya yadi khu ngasa nya gidzumeledzwano, ganiolu gu yi rwala khu kareta si di gu fanya nayo wa Nungungulu, khu kharato gu gira isoso si reside libango. (Ekisodha 25:13, 14; Mitengo 4:15, 19; 7:7-9) Esi si nga dugeleya Uza hwane nya gu ba a mode ngasa nya gidzumeledwano, so yeyedza gu khiso misuwo nya yadi kha yi vbindrugedzi sileletelo sa Nungungulu.
Kemba dzithomba nya liphuvbo
w96 1/4 paj. 29, ndri. 1
Vega gu garadzega gwago ga Jehovha
Dhavhidhe kha nga Pfhumu, a nuye a diri nawo nandru khu gufa ga Uza. Edzi Dhavhidhe a nga dzipwa khidzo go yeyedza gu ambari oyu a gu ni wupari nyo tiye ni Jehovha a nga garadzega a gu ba a emisana ni sigaradzo. Nyo pheye, Dhavhidhe a di goroga a bwe a thava Nungungulu. (2 Samuweli 6:8, 9) Gu tumba ogu Dhavhidhe a nga ba ari nago khu Jehovha gu di lingwa. Khu gu ba a sa landrisa sileletelo saye, so wonegisa gu khatshi Dhavhidhe kha embeya sigaradzo saye Jehovha. Ina esi si ngu tshuka si hi dugeleya? Ina hi ngu ninga nandru Jehovha khu sigaradzo hi si manago khu gu ba hi si landrisi sileletelo saye? — Mavingu 19:3.
30 nya Maio–5 nya Junho
DZITHOMBA NYA LITO LA NUNGUNGULU | 2 SAMUWELI 7–8
“Gidzumeledzwano Jehovha a nga gira ni Dhavhidhe”
w10 1/4 paj. 20, ndri. 3
“Wufumo wago wu na tiya”
Jehovha kuhidwe khu misuwo eyi Dhavhidhe a nga ba ari nayo. Gasi gu yeyedza gu tsaka khu makungo aya Dhavhidhe a nga ba ari nawo, Nungungulu a di mu tumbisa gu khuye khu ga melego wago a na manega mufumeli oyu a na fumago kala gupindruga. Natani a di embeya Dhavhidhe gitumbiso gya Nungungulu: “Ndranga ni mufumo wago, si na simama kala gupindruga mbeIi gwangu. Ni gikhalo nya wufumu wago gi na simama kala gupindruga.” (Livhesi 16) Khu mani mufumeli yoyo a na fumago kala gupindruga? — Ndzimo 89:20, 29, 34-36.
Kemba dzithomba nya liphuvbo
it-2 paj. 1165, ndri. 1
Matshigu nyo hegise
Giprofeto gya Bhalahama. Vaisrayeli na va si gu beyi tigoni nya gitumbiso, Muprofeti Bhalahama adi embeya Bhalaki Pfhumu ya Mowabhi khuye: “Aholu delu nyita gu embela iso si na girwago khu vathu vava omu tigoni gwago khu matshigu ma nga gutago. . . . Aholu nasiri khu vbafuvbi; gu na duga nyeledzi khavbo ga Jakobe ni ndronga nya wufumu khavbo ga Israyeli. Yi na khungumula mihungo ya va na Mowabhi, yi mbembisa sanana satshavbo sa Seti.” (Mit 24:14-17) Gupheyani nya gutadzisege nya giprofeto gegi gu di wonega “nyeledzi” a nga ba ari Pfhumu Dhavhidhe oyu a nga pala Vamowabhi. (2Sa 8:2) Si ngu wonega gwadi gu gutadzisega nya giprofeto gegi, matshigu nya gu hegise ma phede tepo Dhavhidhe a nga khala Pfhumu. Kha nga olu Dhavhidhe a nga ba a emeya Jesu nga Pfhumu nya Wumesiya, giprofeto gegi gi di hadzi thuma gambe ga Jesu tepo a na fuvisago valala vaye. — Isa 9:7; Ndz 2:8, 9.
6-12 nya Junho
DZITHOMBA NYA LITO LA NUNGUNGULU | 2 SAMUWELI 9–10
“Dhavhidhe yeyedzide lihaladzo nyo tumbege”
w06 15/6 paj. 14, ndri. 6
U nga si kodza gu mana litsako
Dhavhidhe a di khuye: “Kategide oyu a alakanyago gisiwana.” A bwe a simama khuye: “litshigu nya sigaradzo a na vbanyiswa khu PFHUMU Nungungulu. PFHUMU Nungungulu a ngu mu sayisa, a mu ninga guvbanya ni gunengela mafuni.” (Ndzimo 41:1, 2) Wuwadi owu Dhavhidhe a nga yeyedza Mefibhoseti gyanana gya Jonatane pari ya Dhavhidhe, giyeyedzo gegi gyo hi hevbudza gu hi yede gu phara gwadi sisiwana. — 2 Samuweli 9:1-13.
w05 15/5 paj. 17, ndri. 11
Gukhanyiswa ga libhuku la 2 Samuweli
9:1, 6, 7. Dhavhidhe tadziside gitumbiso gyaye. Anethu hi yede gu dzi garadzeya gu tadzisa situmbiso sathu.
Kemba dzithomba nya liphuvbo
it-1 paj. 291
Giledzu
Ga vathu va khuga dambo gupata ni Vaisrayeli, giledzu gi diri ni lisima kholu gi di gu ninga wuzundzu vama. Nayo owu Nungungulu a ningidego Vaisrayeli, wu di gu himbedzeya gupiya ‘ndzudzu mahegiso nya hungo.’ (Le 19:27; 21:5) Ndzudzu wu gomogo vbafuvbi ni maho ni dzindzeve (midhera) ni bambe nya giledzu.
13-19 nya Junho
DZITHOMBA NYA LITO LA NUNGUNGULU | 2 SAMUWELI 11–12
“U nga digi gudogoreya nya guvibe gu gufuma”
w21.06 dzipaj. 17, 18, ndri. 10
U nga gira ginani gasi u vbuluga avba nya milaphwi ya Sathane?
10 Gu mba eneledwa khesi hi gu naso gu giride Pfhumu Dhavhidhe a divaledwa khu satshavbo esi Jehovha a nga ba a mu ningide, nya nga dzithomba, ndruma ni gu pala dzinyimbitunu. Dhavhidhe a di gu dziti gu khuye siningwa sa Nungungulu si “tade ngudzu nyamba kodza ni gu sayedwa” nigu uye a di gu bonga ngudzu khu isoso. (Ndzi. 40:5) Ganiolu, ga tepo nyo khaguri Dhavhidhe divade satshavbo esi Jehovha a nga ba a mu ningide. Uye kha nga ba a eneledwa gambe khesi a nga ba ari naso. A di gu vbweta nya singi. Ambari olu a nga ba ari ni vagadzi nya vangi, Dhavhidhe a di pheya gu dogoreya ngadza vane. Nyamayi yoyu a diri Bheti-Sebha nigu mwama waye gu diri Uriya, Muhiti. Dhavhidhe a di hengeya malawu ni Bheti-Sebha nigu Bheti-Sebha a di khura mimba. Esi Dhavhidhe a giridego si di vivbide ngudzu, ganiolu giride gambe gimbe gilo nyo vivbe. Uye a di gira gu Uriya a songwa. (2 Sam. 11:2-15) Dhavhidhe a di gu pimisa ginani? Ina a di gu pimisa gu khuye Jehovha kha mu woni? Ambari olu Dhavhidhe a nga ba a thumeya Jehovha khu myaga nya yingi, uye thegede omu nya naphwi nyo mba eneledwa khesi a gu naso a bwe a dzi vangeya sigaradzo. Ganiolu, egi gi tsakisago khu gu Dhavhidhe dzumede sighoho saye a bwe a dzi laya. Nya mba kanakana uye bongide ngudzu khu ba a divaledwe khu Jehovha.— 2 Sam. 12:7-13.
w19.09 dzipaj. 17, 18, ndri. 15
Dzi emiseye gu thangedwa khu Jehovha— Khu ginani nigu khu ndziya muni?
15 Jehovha hathide Dhavhidhe kha nga hungo nasiri basi nya ndranga yaye ganiolu wa vatshavbo vaIsrayeli. Kha nga Pfhumu, Dhavhidhe a diri ni makodzelo nya mangi. Dzimbe dzitepo uye thumiside wufumu wowo gasi gu gira sighoho nya sikhongolo ngudzu. (2 Sam. 11:14, 15) Ganiolu uye yeyedzide gu khuye a ngu engisa Jehovha khu gu dzumeya gu laywa khuye. Tepo a nga gombeya ga Jeovha, uye a di mu embeya edzi a nga ba adzipwa khidzo a bwe a dzi garadzeya gu engisa wusingalagadzi wa Jehovha. (Ndzi. 51:1-4) Gasi gu engedzeya, uye yeyedzide gu dzi nogisa a bwe a dzumeya wusingalagadzi a ningidwego nasiri basi khu vama ganiolu khu vanyamayi gambe. (1 Sam. 19:11, 12; 25:32, 33) Dhavhidhe hevbude khu sighoho saye a bwe a vega gupima gwaye gwatshavbo avba nyo thumeye Jehovha.
Diga milayo ni matshina nya milayo ya Nungungulu ma thangeya livhalo lago
7 Kha si lombi gu kala hi tshaniseka khu mihandro yi manwago khu gu ndraga milayo ya Nungungulu gasi guti iso nya sadi ni esi nyo vivbe. Hi nga hevbula khu sihoso si giridwego khu vambe teponi ya gale. Siyeyedzo soso si lovidwe omu nya Bhibhiliya. Mavingu 1:5 wari khuye: ‘Muthu nya guti a gupwa, a gu engedzela mapimo.’ Mapimo mwendro sihevbudzo soso sa guta khiyo ga Nungungulu nigu khiso sihevbudzo nya lisima ngudzu ga satshavbo! Khu giyeyedzo, nga dundrugeya khedzi Dhavhidhe a nga tshaniseka khidzo hwane nyo ba a ndragide nayo wa Jehovha a gira wubhayi ni Bheti-Sebha. (2 Samuweli 12:7-14) Tepo u lerigo matimo yoyo, dzi wudzise gu khuwe: ‘Dhavhidhe na si potside kharini sigaradzo soso? Nari khatshi kheni nyi gomogo ga giemo nya nga igyogyo, nyi di hadzi gira kharini? Nari khatshi nyo lingwa gu gira wubhayi, ina nyi di hadzi gira nga Dhavhidhe mwendro nga Josefa? (Genesi 39:11-15) Ha gu dundrugeya gwadi khu mihandro nyo vivbe nya gighoho, hi na ‘nyenya guvivba’ gambe ni gambe.
Kemba dzithomba nya liphuvbo
it-1 paj. 653, ndri. 3
Dhavhidhe
Jehovha wonide satshavbo ni gu kha siha esi si nga girega. Nari khatshi Jehovha a di dzumede gu gighoho egi Dhavhidhe ni Bheti-Sebha va nga gira gi lamudwa khu valamuli, khu guya khu nayo wa Mosi avo vavavili na va songidwe, ni gu gyanana gi nga hadzi velegwa khu kotani nya wubhayi wule gi di hadzi gufa gumogo ni mamayi wagyo. (Dhet 5:18; 22:22) Khu kharato khu Jehovha a nga lamula mahungu yoyo, ni gu yeyedzide wuhindzi Dhavhidhe khu kotani nya gidzumeledwano nya Mufumo. (2Sa 7:11-16) Nya mba kanakana, a nuye Dhavhidhe yeyedzide wuhindzi. (1Sa 24:4-7; fananisa isoso ni Jak 2:13) Ni gu khu kotani nya olu Jehovha a nga ba a wona gu dzi sola nya sighohi. (Ndz 51:1-4) Ganiolu avo kha va vbuluga gu tsayiswa. Jehovha a di embeya Muprofeti Natani khuye: “Nyi na wusa libango nya likhongolo nyumbani gwago” — 2Sa 12:1-12.
20-26 nya Junho
DZITHOMBA NYA LITO LA NUNGUNGULU | 2 SAMUWELI 13-14
“Gu gundreya gu giride Amoni a thegeya gighohoni”
it-1 paj. 31
Abhisalamo
Gu songwa ga Amoni. Kha nga olu Tamari ndriyi wa Abhisalamu a nga ba a mburide a dogoredwe khu ndriyaye nya koma Amoni. Amoni a di dzigirisa khatshi o dwala gasi Tamari aya mu phuleya, khu kharato a hegisa khu gu mupfinya. Lihaladzo nyo pfhadzedzeye a nga ba ari nado Amoni, li di vbindrugedza li khala lidiwo nyo bwe a tutumisa Tamari. A di pferula sombo saye nya mavalavala si nga ba si yeyedza gu a diri nyamayi nya gu gima a di si gu hengeyi malawu ni mwama a bwe a baga nguma a dzi phorodza hungoni a gimbiya a manana ni Abisalamo. Abhisalamo a di dzegeya gu tugula esi Amoni a nga gira na dundrugeya khu gu dogoreya ogu Amoni a nga ba a ri nago khu ndriyaye Tamari, khavbovbo Abhisalamo a di embeya ndriyaye khuye a nga mu thuledzi a bwe a mu dzega a ya khala naye gaya gwaye. — 2Sa 13:1-20.
it-1 dzipaj. 31, 32, ndri. 6
Abhisalamo
Guvbindride myaga mivili. Gu di vbohide tepo nya gu gaye dzinvuta ni gu Abhisalamo a di gira festa tigoni ga Bhahali Azuri gu nga ba guri tanga nya 22 dzikilometro ga NNE (nor-nordeste) ga Jerusalema, a bwe a rana Pfhumo Dhavhidhe ni sanana saye. Tepo papayi waye a nga bomba gu patega, Abhisalamo a di mu gurumedza gu rumeya Amoni gyanana gyaye nya koma. (Mav 10:18) Tepo monyo wa Amoni wu nga ba wu “tsakide khu wadwa” Abhisalamo a di ruma sithumi saye gasi siya mu songa. Simbe sanana sa Dhavhidhe si di bweleya Jerusalema, ni gu Abhisalamo a di hongola wugumbini gumgo ni vhovho waye nya Musiriya tigoni ga Gesuri leste tigoni ga Galileya. (2Sa 13:23-38) Sigaradzo si nga thudwa khu Muprofeti Natani si di phede ndrangani ga Dhavhidhe ni gu si di hadzi simama kala afa. — 2Sa 12:10.
27 nya Junho– 3 nya Julho
DZITHOMBA NYA LITO LA NUNGUNGULU | 2 SAMUWELI 15-17
“Abhisalamo khu gu dzi khusedza a di dzi vbweteya wuzundzu”
it-2 paj. 692, ndri. 2
Muhuweleyi
Si di gu olovelegide gu, masotshwa ma thangeya kareta ya Pfhumu gasi va dongiseya gu vboha gwaye va bwe va mu phasa ni ga gevbini gi nga ba gi vbwetega. (1Sa 8:11) Abhisalamo ni Adhoniya, va di dzi vbweteya wuzundzu va bwe va rumeleya 50 vama gasi va ya tutuma mbeli nya dzikareta dzawe.— 2Sa 15:1; 1Dzf 1:5. Wona coredores (batedores).
it-1 paj. 1138, ndri. 1
Hebroni
Abhisalamo gyanana gya Dhavhidhe, hwane nya myaga nyo khaguri a di bweleya Hebroni a bwe a ya pheya gu wugeya wufumu wa papayi waye. (2Sa 15:7-10) Adzina kholu Hebroni a nga ba ari ni matimu nya lisima ni gu yi diri sidhadhi yaye nya mavelego, Abhisalamo a di hatha sidhadhi yeyi gasi gu wandra wufumo wa papayi waye. Khu gu gimbiya nya tepo, tugulu wa Dhavhidhe Pfhumo Robhowamu a di vbahedza litigo la Hebroni. (2Dzik 11:5-10) Hwane nya gu ba Judha a tshungunudwe khu Vabhabhuloni ni gu Vajudha na va wide khu wugumbini, vambe gwawe va di bweleya vaya khala tigoni ga Hebroni. (Kiriyati-Aribha) — Ne 11:25.
Kemba dzithomba nya liphuvbo
Ina u ngu siti satshavbo si pategago?
11 Dzimbe dzitepo vathu va na tshuka va swayela mahungu khethu ganiolu na ma si ganeyi lisine latshavbo. Khiso si dugeledego Mefibhoseti. Pfhumu Dhavhidhe a di ninga Mefibhoseti gipeto gyatshavbo gi nga ba gi lumba kokwe waye Sawule. (2 Samuweli 9:6, 7) Ganiolu khu hwane nya isoso Dhavhidhe a dipwa mahungu nyo vivbe maningano ni Mefibhoseti. Uye kha vbweta guti gu khuye esi a si pwidego lisine mwendro ne, a di wandra gyatshavbo gipeto gya Mefibhoseti. (2 Samuweli 16:1-4) Hwane nya gu ba Dhavhidhe a bhude ni Mefibhoseti, a di tugula gu khuye hosiside. A bweledzeya Mefibhoseti gipandre nya gipeto gile. (2 Samuweli 19:24-29) Nari khatshi Dhavhidhe a di dzi ningide tepo nyo landriseye satshavbo si nga ba si patega wulangani nyo tutumeye gu lamula, Mefibhoseti na sa giredwa guvivba gwatshavbo gule.