Mitshamuselo yi gomogo omu nya mabhuku ma khumbugidwego omu nya Gibhukwana nya mitshangano nya thumo ni mavbanyelo
© 2023 Watch Tower Bible and Tract Society of Pennsylvania
1-7 NYA MAIO
DZITHOMBA NYA LITO LA NUNGUNGULU | 2 DZIKORONIKA 17-19
“Wona vambe nga edzi Jehovha a va wonago khidzo”
w17.03 paj. 24, par. 7
Ina u na thumisa esi si lovidwego khu monyo wago watshavbo?
7Josafati gyanana gya Asa, gi diri ni makhalelo nya yadi nigu olu a nga ba a tumba Jehovha a giride silo nya sadi. Ganiolu, ga dzimbe dzitepo uye a hungide makungo nya mba pheya khu gu pimisa. Khu giyeyedzo, uye a giride gidzumeledzwano ni pfhumu nya yikhongolo Akabhi, nya gu gyanana gyaye gi tshadha ni gyanana gya pfhumu Akabhi. Khu gu landreya, Josafati a di phasa Akabhi gu dwana ni Asiriya. Muprofeti Mikeya a di embela Josafati gasi a si hongole nyimbituno, ganiolu uye a di hongola. Ambari ulolo, a vbulugide gu songwa. (2 Dzik. 18:1-32) Tepo a nga wuya Jerusalema, Muprofeti Jewu a di mu wudzisa gu khuye: “Ina u na ni fanelo nya guphasedzele muthu nya guvivbedwe khu monyo ni gu gola vale va nyenyago PFHUMU Nungungulu, gani?”— Leri 2 Dzikoronika 19:1-3.
w15 15/8 paj. 12, dzipar. 8-9
Dundrugeya khu lihaladzo la Jehovha
8Jehovha a gu vbweta gu khuye hi dziti gu khethu a ngu hi haladza ni gu kha khathali khu gu mba vbeleya gwathu, ganiolu uye a gu vbwetedzeya silo nya sadi ga moyo ni moyo wathu. (2 Dzik. 16:9) Giyeyedzo nya isoso khesi a giridego Josafati Pfhumu ya Judha. Ga giemo nyo khaguri, Josafati dzumede gu bangaladza Akabhi pfhumu ya Israyeli gasi guya dwana ni Vasiriya kala va dzega lidhoropa la Ramoti-gileyadhi. Khu kharato, 400 vaprofeti nya malipha va di tiyisegide gu khavo pfhumu Akabhi a di hadzi gupala, ganiolu muprofeti nya lisine wa Jehovha, Mikeya a di gu ganede gu khuye va di hadzi guya padwa nyimbituno. Akabhi fude nyimbituno, ganiolu Josafati vbulugide. Tepo a nga bweleya Jerusalema uye a kawukidwe kholu a nga ba a giride pwanano ni Akabhi. Ambari ulolo, Jewu embede Josafati gyanana gya Hanani khuye: “U thumide silo nya sadi.” — 2 Dzik. 18:4, 5, 18-22, 33, 34; 19:1-3.
9Gupheyani nya Mufumo waye, Josafati rumide vathangeyi, Valevhi ni Vaphasi nya mhamba gu hongola ga madhoropa ya Judha gasi guya hevbudza vathu vaye Nayo wa Jehovha. Isoso si dugelede kholu vathu va vbafuvbiyana mule va di pheya gu ninga githawo Jehovha. (2 Dzik. 17:3-10) Ambari olu Josafati a nga ba a giride silo nyo vivbe, Jehovha kha vega gupima avba nya silo soso, ganiolu uye a di vega gupima ga silo nya sadi a giridego. Matimo yaya nya Bhibhiliya, ma gu hi dundrugisa gu khayo ambari olu hi gu vathu nya mba vbeleya Jehovha a na yeyedza gu khuye a ngu hi haladza ha gu dzi garadzeya gu mu tsakisa khu monyo wathu watshavbo.
Kemba dzithomba nya liphuvbo
w17.03 paj. 20, par. 11
Khozeya Jehovha khu monyo wago watshavbo
11U nga pimedzeya kharini Jeosafati? Muhuno, Jehovha a ngu hevbudza vathu mafuni gwatshavbo khu gu thumisa thumo nyo tshumayele. Nigu ethu hi nga patega avba nya thumo wowu. Ina u ngu patega avba nya thumo nyo tshumayele ngima watshavbo? U ngu dzi garadzeya gu hevbudza vathu Bhibhiliya ni gu kuha myonyo yawe? Khu gu dzigaradza ni makategwa u ningwago khu Jehovha, uwe u na mana gihevbuli nya Bhibhiliya. Ganiolu, ina uwe u ngu gombeleya khu isoso? Ina u dzi emisede gu hevbula Bhibhiliya ni muthu nyo khaguri ga tepo u nga ne gu pharega? Gimbe gilo hi nga girago khu gu phasa ava va vbodego khu liphuvboni. Khiso sasimweso esi Josafati a giridego tepo a nga hongola gipandreni gya Efrayimi gasi guya phasa vathu gu wuya ga Jehovha. Vbavbandze nya isoso, madhota ma ngu wuseya ava va dusidwego libandlani ni gu phasa vale va nga diga gu gira sighoho nya sikhongolo
8-14 NYA MAIO
DZITHOMBA NYA LITO LA NUNGUNGULU | 2 DZIKORONIKA 20-21
“Khodwa ga Jehovha Nungungulu wago”
w14 15/12 paj. 23, par. 8
Hatshavbo hi nga emisana ni gu hegisa nya litigo leli
8 Matshigoni ya pfhumu Josafati, Vathu va Jehovha va wugedwe khu valala nya tshivba ngudzu va nga ba vari “gidzemo nya gikhongolo” gya mayigo ya vbafuvbyana mule. (2 Dzik. 20:1, 2) Sithumi sa Jehovha si giride gwadi khu gu mba zama gu emisana ni gigaradzo gile khu gu tumba tshivba yawe, ganiolu avo va di tumba Jehovha. (Leri 2 Dzikoronika 20:3, 4.) Kholu Bhibhiliya yari khiyo: “Va na Judha va di tshangana . . . gumogo gasi va Iomba giphaso ga PFHUMU Nungungulu.” (2 Dzik. 20:13) Sanana ni vale va dandridego khu tanga va di kutsana gasi gu tumba sileletelo va si hakhidego khiyo ga Jehovha, nigu Jehovha a va vhikede ga valala vawe. (2 Dzik. 20:20-27) Khu lisine, egi giyeyedzo nya gyadi hi nga gi pimedzeyago tepo hi tshanganago ni sigaradzo.
Mipatwa yi ngarigo gu tshadha — Vegani gupima avba nya gu thumeye Jehovha
7 Jehovha ganede ni Josafati khu gu thumisa Mulevhi nyo pwane khu Jahaziyeli. Jehovha a di khuye: “Folani mu eme mu na wona idzo PFHUMU Nungungulu a na gu mi vbanyisani khidzo.” (2 Dzik. 20:13-17) Khu lisine, eyi khandriyo ndziya nyo olovelege nya gu dwane khiyo nyimbi. Ambari ulolo, sileletelo sesi kha sa nga ba sita khiyo ga muthu, ganiolu si di guta khiyo ga Jehovha. Khu gu tumba Nungungulu, Josafati a di engisa sileletelo a ningidwego. Tepo a nga ya manana ni valala, uye a di thangisa vaembi nya dzindzimo va nga ba va mwalo siphisa nasiri masotshwa ma kodzago gwadi gu dwana. Jehovha a giride esi a nga tumbisa Josafati; Uye a di pala valala vaye. — 2 Dzik. 20:18-23.
Kemba dzithomba nya liphuvbo
it-2 paj. 35, par. 9
Jeyoramo
Jehovha dzumelede gu khuye Vaarabhiya ni Vafilistiya va dhumeya limbe litigo va bwe va dzega vagadzi ni sanana sa Jeyoramo. Nungungulu dzumelede gu khuye gi vbuluga basi gyanana gya Jeyoramu nyo pwani khu Jeyokazi gi nga ba gi tidwa gambe kha nga Akazi, khu kotani nya gidzumeledzwano nya Wufumu a nga ba a giride ni Dhavhidhe. “Khu hwane nya satshavbo sesi, Pfhumu Nungungulu a di veta [Jeyoramo] khu madwali nya ndrani nya mba hawuluga.” Hwane nya myaga mivili, “mahembe yaye ma di [vbalaga] vbavbandze” a bwe afa. Uye a di dzingwa Dhoropani ga Dhavhidhe “aholu kha dzingwa marowoni ya vafumeli.” Gyanana gyaye Akazi gi di khala pfhumu wulangani gwaye.— 2Dzik 21:7, 16-20; 22:1; 1Dzik 3:10, 11.
15-21 NYA MAIO
DZITHOMBA NYA LITO LA NUNGUNGULU | 2 DZIKORONIKA 22-24
“Jehovha a ngu tshatshazeya ava va yeyedzago gutiya-hwambo”
w09 1/4 paj. 24, dzipar. 1-2
Jowasi a di diga Jehovha kholu a nga ba ari ni dzipari nya mba dzadi
GU DIRI tepo nyo garadze Jerusalema, dhoropani gu nga ba yi romo tempele ya Nungungulu. Pfhumu Akazi a di ngari gu songwa. Esi a nga gira mamayi waye khu gu landreya si ngu garadza gu si kodwa. Uye a di ruma gu khuye situgulwana saye sisongwa. Khu ginani a nga gira isoso? Kholu uye a di gu vbweta gu fuma wulangani nya situgulwana saye.
Ambari ulolo, Jowasi gimwegyo nya situgulwana sa Ataliya gi di vbulugiswa. Ganiolu, igyo gi vbulugide kharini? Igyo gi di sihwa khu tiya wagyo Jeyosebha tempeleni ga Nungungulu. Uye a si kodzide kharini isoso? A si kodzide gu gira isoso, kholu mwama waye a diri Muprista nya khongolo Joyadha, vavavili va khathalede gwadi Jowasi.
w09 1/4 paj. 24, dzipar. 3-5
Jowasi a di diga Jehovha kholu a nga ba ari ni dzipari nya mba dzadi
Jowasi a di sihwa tempeleni khu 6 myaga. Tepo a nga ba a romo mule, uye a hevbude satshavbo maningano ni Jehovha ni Milayo yaye. Tepo Jowasi a nga enedza 7 myaga, Joyadha a di mu gira a khala pfhumu. Ina u ngu dzina guti edzi Joyadha a giridego khidzo isoso? Ni esi si giregidego ni vhovho wa Jowasi Pfhumugadzi Ataliya?
Joyadha khu gi sihaledza a di rana dzigwardha dzi nga ba dzi thumeya dzipfhumu dza Jerusalema ga tepo yoyo. A di ganeya edzi uye ni mwangadzi waye va nga vbulugisa khidzo gyanana gya Akazi. Joyadha a di yeyedza Jowasi ga dzigwardha dzile, idzo dzi nga ganeya gu khidzo uye a ngu yedwa khu gu khala pfhumu. Khavbovbo va hunga gu gira gilogyo.
Joyadha a di dzega Jowasi a hongola naye vbavbandze aya mu ambigisa gihugo nya wufumo, khavbovbo vathu va di “[veta] mandza khavo a na vbanye mufumeli.” Tepo Ataliya a ngapwa isoso, uye a di duga vbavbandze gasi guta himbedzeya ei si nga ba si girwa, ganiolu Jowasi a di vhikedwe khu dzigwardha. Ni gu gambe Joyadha a di ruma gu dzigwardha dzi songa Ataliya. — 2 Dzipf. 11:1-16.
it-1 paj. 118, par. 9
Malanga nya gu dzingwe vathu
Muprista nyo lulame Joyadha a di dzingwa “dhoropani ga Dhavhidhe gumogo ni vafumeli” ambari olu a nga ba a si giri gipandre nya ava va gu na ni fanelo yoyo. — 2Dzik 24:15, 16.
Kemba dzithomba nya liphuvbo
it-21221, par. 12
Zakariya
12. Gilombo gegi gi tadzisegide kholu Asiriya kha ghohetheya basi Judha, ganiolu Jowasi a di songwa khu gimwegyo nya sithumi saye khu kotani nya olu a nga songwa “mwamana nya muphasi nya mhamba Joyadha.”
22-28 NYA MAIO
DZITHOMBA NYA LITO LA NUNGUNGULU | 2 DZIKORONIKA 25-27
“Jehovha a na gu ninga nya singi guvbindra esi u gu naso”
it-2 paj. 32, par. 1
Jowasi a di lugarisa 100 mil masotswa ga pfhumu ya Judha gasi yi ya dwana ni Vaedhomi. Khu gu landrisa wusingalagadzi wa “[muprofeti] wa Nungungulu”, avo va di tutumiswa ambari olu va nga ba va livbidwe 100 dzitalento nya parata, muhuno a gu 660 mil ni 600 dzidholari. Avo va gorogide khu gu ba va bweledzidwe gaya kholu va di hadzi gu luza dzithomba va nga hadzi guya phanga. Tepo va nga ba va bweleya va di phanga madhoropa nyo khaguri gukhugeya Samariya kala Beti-Horoni.— 2Dzik 25:6-10, 13.
‘Linga’, u wona edzi Jehovha a gu wadi khidzo
16 Dzi hiye silo nyo khaguri gasi u thumeya Jehovha khu dzimbe dzindziya. Kha si vbweti kala hi dzi hiya satshavbo gasi gu tsakisa Jehovha. (Muh. 5:19, 20) Ambari ulolo, ha gu ba hi si si kodzi gu engedzeya thumo wathu ga Jehovha khu gu ba hi thava gu dzi hiya silo nyo khaguri, hi na ba hi fana ni mwama moyo a khumbugwago avba nya gipimaniso gya Jesu. Mwama yoyo, a di gu garadzega ngudzu khu gu vbweta gu mana womi nyo khadzisege nyo bwe a divala Nungungulu. (Leri Luka 12:16-21.) Ndriyathu moyo nyo pwane khu Christian a vbanyago França, wari khuye: “Nyi di si thumisi tepo ni tshivba yangu gasi gu thumeya Jehovha khu monyo wangu watshavbo ni gu khathaleya gwadi ndraga yangu.” Uye ni mwangadzi waye va di hunga gu thuma kha nga vapiyonero. Ganiolu, gasi va gira isoso, va di yede gu diga mithumo yawe. Khu kharato, va di pheya gu gira thumo nyo agise (limpeza) gasi va mana dzitsapawu nyo dzi vbanyise khidzo va bwe va hevbuleya gu tsakiswa khesi kamo va nga ba vari naso. Ganiolu, ina gudzigaradza gwatshavbo gogo gu reside makategwa? Christian wari khuye: “Olu, hi ngu gola ngudzu gu tshumayela nigu hi ngu tsaka ngudzu tepo hi wonago sihevbuli ni dzirevhizita dzathu na dzi gu hevbula lisine.”
Kemba dzithomba nya liphuvbo
w07 15/12 paj. 10, par. 1
Ina u na ni pari yi vidzidwego khu liphuvboni?
“[Uziya] A di dzi garadza khu gu vbweta Nungungulu matshiguni ya Zakariya, uye a nga bani na siti gwadi siwoniso sa Nungungulu; gikhati a nga namarela ga PFHUMU Nungungulu, Uye a di mu kategisa.” (2 Dzik. 26:1, 4, 5) Kha nga olu a nga ba a “siti gwadi siwoniso sa Nungungulu” Zakariya a khade giyeyedzo nya gyadi ga Uziya.
29 NYA MAIO – 4 NYA JUNHO
DZITHOMBA NYA LITO LA NUNGUNGULU | 2 DZIKORONIKA 28-29
“U nga thumeya Jehovha ambari wa gu ba u tshangana ni sigaradzo”
w16.02 paj. 14, par. 8
Pimedzeya dzipari dza Jehovha
8 Gu hambana ni Ruti, Ezekiya velegidwe ga litigo li nga ba li hathidwe khu Jehovha gasi gu mu thumeya. Ganiolu, khandri vatshavbo Vaisrayeli va nga ba va thumeya Jehovha khu gutumbega. Pfhumu Akazi, papayi wa Ezekiya a diri moyo wakone. A diri mwama nyo vivbedwe khu monyo, nigu kutsedzede vathu nya vangi Judha gu khozeya vambe vanungungulu. Nigu, uye kha nga ba a ninga githawo tempele ya Jehovha yi nga ba yi romo Jerusalema. Tepo Ezekiya a nga ba ari gyanana tshanganide ni sigaradzo nya singi. Khu giyeyedzo, uye a wonide vandriyaye na va gu songwa gasi gu ningedwa kha nga muphaso ga vanungungulu nya malipha. — 2 Dzipf. 16:2-4, 10-17; 2 Dzik. 28:1-3.
w16.02 dzipaj. 15-16, par. 9-11
Pimedzeya dzipari dza Jehovha
9 Adzina saye isoso na si giride Ezekiya a khala muthu nyo vivbedwe khu monyo a bwe a wugeya Nungungulu. Muhuno, ambari vambe va gu mba tshangana ni sigaradzo avo va gu dzipwa na va tshulegide gu “wugela Pfhumu Nungungulu” ni gu wugeya hengeledzano yaye. (Mav. 19:3) Vambe va gu pimisa gu khavo olu vavelegi vawe va nga gira silo nya singi nyo vivbe, anavo va yede gu gira sasimweso. (Ezek. 18:2, 3) Ina isoso Lisine?
10 Tepo hi dundrugeyago khu womi wa Ezekiya, isoso sa gu yeyedza gu khiso khandri lisine. Ethu kha hi yeli gu zangareya Jehovha kholu khandri uye a hi vangeyago sigaradzo hi tshanganago naso. (Joba 34:10) Lisine gu esi vavelegi va girago si na kuha sanana sawe gu gira silo nya sadi mwendro nyo vivbe. (Mav. 22:6; Kol. 3:21) Ganiolu, esi kha si thuli gu khiso iso si na gira esi vavelegi vaso va girago, kholu Jehovha a hi ningide giningwa nya gu dzi hatheye esi hi si vbwetago gu gira. (Dhet. 30:19) Ezekiya thumiside kharini giningwa gegi?
11 Ezekiya khade mweyo nya dzipfhumu dza Judha. (Leri 2 Dzipfhumu 18:5, 6.) Khu lisine, papayi waye kha nga ba ari giyeyedzo nya gyadi nigu a diri pfhumu nyo vivbedwe khu monyo guvbindra dzatshavbo dzipfhumu. Ambari ulolo, Ezekiya a di hatha gu landrisa siyeyedzo nya sadi nya nga muprofeti Isaya, Mikeya ni Oseya. Ethu hi nga dundrugeya pfhumu Ezekiya na gu dundrugeya gwadi khu magana ya vama vava nyo tumbege, a gu iso si nga mu phasa gu dzumeya wusingalagadzi ni gu kawukwa khu Jehovha. Uye gambe a di hunga gu lulamisa esi papayi waye a nga ba giride. Giride isoso khu gu agisa tempele, a gira miphaso khu sighoho sa vathu vaye a bwe a fuvisa sifananiso. (2 Dzik. 29:1-11, 18-24; 31:1) Tepo pfhumu ya Siriya, Senakeribe yi nga vbweta gu pfhungumula lidhoropa la Jerusalema, Ezekiya yeyedzide gutiya-hwambo ni gukhodwa. Uye a di gu tumba gu khuye Nungungulu a na va vbulugisa a bwe a tiyisa vathu vaye khu malito yaye ni giyeyedzo gyaye. (2 Dzik. 32:7, 8) Khu gu landreya, tepo Ezekiya a nga gira silo khu gu dzi khusedza a bwe a kawukwa, Ezekiya a di dzi nogisa a bwe a dzi laya. (2 Dzik. 32:24-26) Uye kha diga sighoho a giridego gale si kuha womi waye. Wulangani nya isoso, uye a yeyedzide gu khuye a diri pari ya Jehovha nigu a hi vegede giyeyedzo nya gyadi.
Kemba dzithomba nya liphuvbo
w12 15/2 paj. 24
Nathani emede wukhozeyi nya lisine
Nathani a diri ni mawonelo nyo hambane ni aya ya Nungungulu maningano ni guvbahwa nya tempele. Ganiolu, Nathani kha ngurangura nigu a di dzi nogisa a bwe a gira esi Jehovha a nga khuye a yede gu gira. Ethu ha gu hevbula gu khethu ambari ha gu manega ni mawonelo nya gu hambane ni aya ya Nungungulu, ethu hi yede gu mu engisa hi bwe hi dzi nogisa tepo hi kawukwago khu Jehovha.
5-11 NYA JUNHO
DZITHOMBA NYA LITO LA NUNGUNGULU | 2 DZIKORONIKA 30-31
“Gu tshangana gumogo si ngu hi phasa”
it-1 paj. 920, par. 2
Ezekiya
Sighingi a si yeyedzidego ndrani nya wukhozeyi nya lisine. Ezekiya yeyedzide sighingi ndrani nya wukhozeyi wa Jehovha tepo a nga khala pfhumu nari ni 25 myaga. Gilo nyo pheye a nga gira a di vbahedza tempele. Khavbovbo, a di rana vaphasi nya mhamba ni Valevhi a va embeya gu khuye: “Khidzo kharato, monyo wangu olu wu pimisago gu gira gidzumeledzwano ni PFHUMU Nungungulu wa Israyeli.” Gu diri gidzumeledzwano nya gutumbege nga gidzumeledwano nya nayo gi nga ba gi thuma, ganiolu gi nga ba gi kanyiswa. Khu kharato, gi di yede gu pheledzwa gambe Judha. Khu gu dzi garadza ngudzu, uye a di sasamedza Valevhi mithumoni gwawe a bwe a gira malulamiselo nya gu vbweti esi va nga hadzi gu si thumisa gasi gu emba khiso. Gu diri ngima nya Nisani, a gu ngima va nga ba va yede gu gira phasika, ganiolu tempele, vaphasi nya mhamba ni Valevhi kha va nga ba va agide mbeli ga Nungungulu. Kala 16 nya Nisani tempele ni esi si nga ba si thumiswa mule si di gu khadzegiside gwadi. Vatshavbo Israyeli va di yedwe gu agiswa. Khu gu landreya yi di girwa miphaso nyo hambane-hambane. — 2Dzik 29:1-36.
it-1 paj. 920, par. 3
Ezekiya
Kha nga olu phasika yi nga ba yi si kodzegi gu girwa khu ngima wakone khu kotani nya olu vathu va nga mba va sa aga, Ezekiya a di vega nayo nya gu khuye Phasika wu girwa ga ngima wu nga hadzi gu landreya. Uye kha rana basi Vajudha, ganiolu ni Vaisrayeli vatshavbo. Uye a di thumisa malangaliya gukhugeya ga litigo la Bersebha kala Dhani. Ava va nga ba va gimbiya va ningeya malangaliya va tshanganide ni vawugeyi, ganiolu vathu nyo khaguri nya mahundzo ya Azer, Manasi, Zembuloni, Efrayimi ni Isakari va dzi nogiside va bwe va hongola phasikatuno. Nigu gambe va di romo vathu nya vangi va Jehovha va nga ba va siri Vaisrayeli. So wonega gu khatshi si di gu garadzeya vambe va nga ba vari vakhozeyi nya lisine gu manega phasikatuno, kholu vale va nga ba va gira gipandre nya mahundzo nya 10 avo va di gu dzi bedzedzede umo nya wukhozeyi nya malipha nigu va di gu wugedwa khu Vasiriya. Gupata ni ava va nga ba va gimbiya va ningeya malangaliya. — 2Dzik 30:1-20; Mit 9:10-13.
it-1 paj. 920, dzipar. 4-5
Ezekiya
Hwane nya phasika, avo va di gira gambe Buzo nya sibaba nya mba thedwa mela, nigu kha nga olu va nga ba va tsakide ngudzu avo va di hunga gu simama gu gira buzu wowu khu 7 matshigu. Vale va nga ba tshangana ni sigaradzo, Jehovha ava kategiside kholu uye a giride gu, gu “manega gutsaka dhoropani ga Jerusalema . . . gima [kha wa nga manega gambe buzu nya nga wule dhoropani ga Jerusalema].”— 2Dzik 30:21-27.
Gu diri gigiro nya lisima nya gu wusedzwe nya wukhozeyi nya lisine. Na va si bweleyi gaya avo va di pandreleya sifananiso, mabiwo yakone, siluvelo, malanga si nga ba si romo sifananiso ni gu khungumuleya sigomo gwatshavbo Judheya, Vabhejami, Efrayimi ni Manasi. (2Dzik 31:1) Ezekiya vegide giyeyedzo nya gyadi, kholu uye a di khungumula gifananiso nya nyoga egi Mosi a nga ba a giride, kholu vathu nya vangi va di gu gi khozeya. (2Dzipf 18:4) Hwane nya Buzu wowu, Ezekiya a di gira satshavbo a nga si kodza gasi gu tiyisega gu khuye wukhozeyi wa Jehovha wu simama gu girwa. A giride isoso, khu gu sasamedza vaphasi nya mhamba ni yimbe mithumo yi nga ba yi girwa tempeleni. Uye a di kutsa vathu gu engisa nayo wu nga ba wu gimbiliyana ni miningelo yi nga ba yi girwa khu Valevhi ni Vaphasi nya mhamba. Nigu vathu va seketede malulamiselo yaya khu monyo wawe watshavbo. — 2Dzik 31:2-12.
Kemba dzithomba nya liphuvbo
“Vbiredza gupwa”
14Yimbe ndziya hi nga yeyedzago khiyo gudzinogisa khu gu engiseya gwadi tepo vambe va ganeyago. Jakobe 1:19 wari khuye, hi na “vbiredze gupwa.” Jehovha khuye muengiseyi nya wadi ga vatshavbo.
12-18 NYA JUNHO
DZITHOMBA NYA LITO LA NUNGUNGULU | 2 DZIKORONIKA 32-33
“Tiyisa vandriyago tepo va tshanganago ni sigaradzo”
it-1 paj. 241 par. 3
Asiriya
Senakeribhe. Senakeribhe, gyanana gya Sarighamu nya wuvili, a di wugeya Mufumo wa Judha khu mwaga nya wu 14 nya gu fume ga Ezekiya khu 732 na ma si vbohi matshigu yathu. (2Dzipf 18:13; Isa 36:1) Ezekiya a di wugeya Asiriya ambari olu sigaradzo sile va nga ba va tshangana naso si vangidwego khesi papayi waye Akazi a giridego. (2Dzipf 18:7) Senakeribhe tepo a nga vbweta gu wugeya Judha a di pheya khu gu khodzisa 46 madhoropa (wona gambe Isa 36:1, 2). Nigu nari khu lizumbutuno gwaye Lakise, Senakeribe a embeya di Ezekiya gasi gu livba khuphu nya 30 dzitalento nya oru, muhuno dzi dinganago (11 dzimiliyoni ni 560 mil dzidholari) ni 300 dzitalento nya parata dzi dinganago miliyoni mweyo ni 982 mil dzidholari. (2Dzipf 18:14-16; 2Dzik 32:1; fananisa esi ni Isa 8:5-8.) Ambari olu khupo wu livbidwego, Senakeribhe a di rumeya vathangeyi nyo khaguri gasi guya embeya vavbanyi va Jerusalema gu va dzi ningeya. (2Dzipf 18:17–19:34; 2Dzik 32:2-20) Isoso si giride Jehovha a fuvisa 185000 masotshwa ya Asiriya a bwe a gurumedza Senakeribhe gu bweleya Ninivha. (2Dzipf 19:35, 36) Tepo a nga bweleya Ninivha, Senakeribhe a diya songwa khu sanana saye a bwe a tshikedzwa vbagikhalutuno nya Wufumo khu gimwegyo nya sanana saye Ezari-Adhoni. (2Dzipf 19:37; 2Dzik 32:21, 22; Isa 37:36-38) Sigiro sesi, gupata ni gu tshungunudwa nya mabuthu ya Asiriya si lovidwe umo nya siwindri nyo khaguri si ganeyago khu gu vbanya ga Senakeribhe ni Ezari-Adhoni. — DZIFOTU, vhol. 1, paj. 957.
w13 15/11 paj. 19, par. 2
Ezekiya a di gira gilogyo
12 Jehovha a dzi emisede gu hi phasa gu gira esi hi si si kodzigo gu gira. Olu uye a gu vireya gu hi gira satshavbo hi si kodzago. Ezekiya “a di luga gikungo ni manganagana ni vathangeyi vaye nya dzinyimbi,” vatshavbo va di “futela milambo yatshavbo ni sitshongwana satshavbo si nga ba si goga vbakari nya litigo . . . Ezekiya a di tala khu tshivba a vbahedza likhokhola li nga ba li khungumugide, a khusedza makhokhola ma lapha, a vbaha limbe likhokhola khu vbavbatshi . . . a gira matshari ni sitshango nya singi.” (2 Dzik. 32:3-5) Khu makungo nya gu sayise ni gu vhikeya vathu vaye, Jehovha a thumiside vama va nga ba va yeyedza gutiya-hwambo, a gu Ezekiya, vathangeyi ni vaprofeti va nga ba va vidzidwe khu liphuvboni.
w13 15/11 paj. 19, par. 13
Ezekiya a di gira gilogyo
13 Esi Ezekiya a giridego khu gu landreya si diri ni lisima guvbindra gu tshika milambo ni gu vbahedza makhokhola. Kha nga olu a nga ba ari muhavisi nya wadi, uye a di tshanganisa vathu vatshavbo a bwe a va tiyisa khu liphuvboni khu gu khuye: “Tiyani longo, mu nga vbeli tshivba khu kotani wa mufumeli wa Asiriya . . . , Kholu ava va gu na ni ethu vangi ngudzu guvbindra ava va gu naye uye.” Aya malito nya gu tiyise nigu khu lisine Jehovha a di hadzi gu dwaneya vathu vaye. Khu gupwa malito yaya, Vajudha va di ‘tangadziswa khu magana ya Ezekiya mufumeli wa Judha.’ Wona gu khuwe ‘malito ya Ezekiya’ ma nga ninga tshivba Vajudha. Ezekiya, vathangeyi ni muprofeti Isaya ni Mikeya, avo va khade vahavisi nya vadi kha nga edzi Jehovha a nga ba a ganede khidzo khu gu thumisa vaprofeti vaye. — 2 Dzik. 32:7, 8; Leri Mikeya 5:5, 6.
Kemba dzithomba nya liphuvbo
Sa gu thula ginani gu dzi laya khu lisine?
12 Uye dzi nogiside mbeli ga Nungungulu nigu giride nya singi gu vbindra isoso. Uye gombede ga Jehovha gasi a mu yeyedza wuhindzi. Manasi vbindrugedzide mavbanyelo yaye. Uye dzi garadzede gu lulamisa sighoho a giredego a dzi garadzeya gu khozeya Jehovha a bwe a phasa vambe gu gira sasimweso.
19-25 NYA JUNHO
DZITHOMBA NYA LITO LA NUNGUNGULU | 2 DZIKORONIKA 34-36
“Ina u ngu phasega khu gu hevbula Lito la Nungungulu?”
it-1 paj. 1178, par. 2
Hulidha
Tepo Josiya a nga engiseya gulerwi nya “libhuku nya nayo” li manidwego khu Hilkiya muphasi nya mhamba tepo yi nga ba yi wusedzwa tempele, uye a di ruma vathu gasi guya wudzisa maningano ni libhuku leli ga Jehovha. Avo va di hongola ga Hulidha oyu a nga va embeya magana ya Jehovha ma nga ba ma yeyedza gu khayo va di hadzi gu tshangana ni sigaradzo khu kotani nya olu va nga diga gu engisa esi si nga lowa omu nya “libhuku” nya nayo. Hulidha a di khuye khu gu ba Josiya a dzi nogiside mbeli ga Jehovha, uye a di hadzi gufa na si woni sigaradzo si nga hadzi gu thegeya litigo lile. — 2Dzipf 22:8-20; 2Dzik 34:14-28.
w09 15/6 paj. 10, par. 20
Khathaleya nyumba ya Jehovha!
20 Tepo yi nga ba yi wusedzwa tempele, muphasi nya mhamba Hilikiya ‘a manide libhuku nya nayo ya Jehovha yi nga lowa khu Mosi.’ Uye a di dzega libhuku lolo a ninga Safani, uye a dzega a lereya Josiya. (Leri 2 Dzikoronika 34:14-18.) Ginani a giridego tepo a ngapwa magana yoyo? Josiya a pfherura dzingandzu dzaye a bwe a ruma sithumi saye gasi guya wudzisa Jehovha khu mahungo yoyo. Khu gu thumisa muprofeti Hulidha, Nungungulu a di tumbisa gu fuvisa Vajudha nyo khaguri. Ambari olu Jehovha a nga tumbisa gu fuvisa Vajudha nyo khaguri, Josiya kha khala khu mawogo. Uye a di pheya gu fuvisa sifananiso si nga ba si thumiswa avba nya wukhozeyi nya malipha ni gu uye a simamide gu tsakedwa khu Jehovha. (2 Dzik. 34:19-28) Ginani hi gi hevbulago? Ethu hi nga hevbula khu giyeyedzo gya Josiya khu hi dzegeya gu engisa sileletelo sa Jehovha ni gu dundrugeya esi hi na si manago ha gu dzumeleya mavbanyelo nya mba handzega ni gu mba tumbega ma ghoha wukhozeyi wathu. Gu fana ni Josiya hi nga tumba gu khethu Jehovha a na hi tsakeya ha gu yeyedza sighingi avbo nya wukhozeyi nya lisine.
Kemba dzithomba nya liphuvbo
w17.03 paj. 27, par. 16
16 Neku a di gu hongola dhoropani la Karikemi gasi guya dwana, ganiolu nasiri guya dwana ni vathu va Jerusalema. Neku kha nga ba a vbweta gu wugeya vathu va Jehovha. Khu lisine, Josiya kha hunga silo khu wugengeyi khu gu ba a hungide guya dwana ni Neku. Ginani hi gi hevbulago? Tepo hi tshanganago ni gigaradzo nyo khaguri, gupheya hi yede guti esi Jehovha a si pimisago khu mahungo yoyo.
26 NYA JUNHO–2 NYA JULHO
DZITHOMBA NYA LITO LA NUNGUNGULU | EZIRA 1-3
“Dzumeya gu thumiswa khu Jehovha”
Ina u ngu wona esi Zakariya a si wonidego?
VAJUDHA va di gu tsakide ngudzu. Jehovha Nungungulu khendzugiside “liphuvbo la Kiro, mufumeli wa Perisiya” gasi gu ya tshudzisa Vaisrayeli va nga ba va vbanya Bhabhiloni khu myaga nya yingi. Pfhumu yi di tivisa gu khiyo, Vajudha va di yede gu bweleya tigoni gwawe va bwe va ya vbaha nyumba ya “Pfhumu Nungungulu wa Israyeli.” (Ezira 1:1, 3) Khu lisine isoso si di gu tsakisa ngudzu! Isoso si di gu thula gu khiso, Vajudha va di hadzi gu si kodza gambe gu khozeya Nungungulu nya lisine ga litigo a nga ba a va ningide.
w17.10 paj. 26, par. 2
Kareta ni gihugo nya wufumo sa gu gu vhikeya kharini?
2 Zakariya a di gu dziti gu khuye Vajudha va nga bweleya Jerusalema va di gukhodwa ga Jehovha. Jehovha a di gira gu Vajudha va diga dzidranga dzawe ni dzinogosi dzawe Bhabhiloni gasi va bweleya Jerusalema. (Ezira 1:2, 3, 5) Ga vambe Vajudha, Bhabhiloni gu diri gaya gwawe, ganiolu avo va dzumede guya vbanya ga wulanga va nga ba va si guti. Khu ginani? Kholu avo va di gu vbweta gu phasedzeya gu vbahedza tempele. Nari khatshi gu vbahedza tempele kha gu nga ba guri ga lisima gwawe, avo na va sa gira liendro leli nyo garadze va bwe va gimbiya pfhuka nya 1600 dzikilometru gasi gu vboha Jerusalema.
Kemba dzithomba nya liphuvbo
w06 15/1 paj. 19, par. 1
Tshamuselo nya libhuku la Ezira
1:3-6. Gufana ni Vaisrayeli va nga khala Bhabhiloni, Dzifakazi nya dzingi dza Jehovha kha dzi kodzi gu beleya thumo nya tepo yatshavbo mwendro guya thuma umo gu vbwetegago ngudzu giphaso. Ambari ulolo, avo va ngu seketeya ava va girago thumo wowu, khu gu gira miningelo nya gu dzini gasi gu seketeya thumo nyo tshumayele.