Josefa a diri moyo nya sanana nya valandra sa Jakobe. Vakoma vaye va di wona gu khavo Josefa a di gu godwa ngudzu khu papayi wawe guvbindra avo. Wo pimisa gu khuwe va dzi pwide kharini khisoso? Va di mu pweya lidiwu Josefa. Khavbovbo, tepo Josefa a nga manega ni miloro nya mba olovelega, a di embedzeya vandriyaye. Va di wona gu khavo miloro yoyo yi di gu tshamuseya gu khiyo litshigu limwedo va di hadzi khidzimeya Josefa. Khu kharato, va di mu nyenya gu khuga ni gu ema!

Litshigu limwedo, vandriyaye Josefa va di gu havisa dzinvuta vbafuvbi ni lidhoropa la Sikemi. Jakobe a di ruma Josefa gasi a ya va wona. Va di wona Josefa khu hwindzo na ata, va embedzeyana gu khavo. ‘A nguta nyamilorwani. Hongoleni hi mu songe!’ Va di mu mola va mu rinya phalani. Ganiolu, Judha, moyo nya vandriyaye, a di khuye: ‘Hi nga mu songi! Tshukwana hi mu rengisa gasi a ya khala githumi.’ Khu kharato, va di mu rengisa khu 20 singerengere nya prata ga Vamedhiyani nya varengisi nya silo, va nga ba va hongola Egipto.

Khu hwane nya tepo, vandriye va Josefa va di dzega libhadzi laye va li todzeya novba nya phongo, va ya ninga papayi wawe, havo khavo: ‘Khandri libhadzi la gyanana gyago eli?’ Khu kharato, Jakobe a di pimisa gu khuye Josefa a di songidwe khu girengo nya likhabi. A di vbisega ngudzu monyoni. Mwalo a nga ba a si kodza gu mu thaveleya.

Josefa a di ya rengiswa Egipto, kha nga githumi ga pfhumu nya yikhongolo yi nga ba yi ranwa pwani khu Potifari. Ganiolu Josefa a diri ni Jehovha. Potifari a di wona gu khuye Josefa a di gu thuma gwadi nigu a di gu tumbega. Nyamba hweya, a di mu ninga thumo nyo thangeye silo satshavbo a nga ba ari naso.

Ngadza Potifari a di wona gu khuye Josefa a di mburide nigu a diri ni tshivba. Tsigu ni tshigu, ngadza Potifari a di gu mu lomba gu a lala naye. Ginani egi Josefa a giridego? A di bomba, huye khuye: ‘Kha nyi dzini! Isoso si vivbide. Pfhumu yangu yi ngu nyi tumba, nigu uwe u mwangadzi waye. Nyo lala nago nyi na ba nyi ghohede Nungungulu!’

Litshigu limwedo, ngadza Potifari a di zama gu gurumedza Josefa gu khuye a lala naye. A di mu mola khu sombo, ganiolu Josefa a di tshetemula a tutuma. Tepo Potifari a nga wuya gaya, mwangadzi waye a di mu embeya gu khuye pfinyidwe khu Josefa. A di gu mu lipheya. Potifari a di goroga ngudzu, a mola Josefa a mu khoteya pasoni. Ganiolu Jehovha kha mu divala Josefa.

Tepo Josefa a nga ba ari pasoni, Faro, Pfhumu ya Egipto, yi di manega ni miloro nya gu mwalo a nga ba a kodza gu yi tshamuseya. Moyo nya sithumi saye a di embeya Faro khuye Josefa a di hadzi si kodza gu mu tshamuseya miloro yaye. Faro a di ranisa Josefa khu guvbiredza.

Faro a di mu wudzisa khuye: ‘U nga si kodza gu nyi tshamuseya miloro yangu?’ Josefa a di tshamuseya Faro khuye: ‘Ga 7 myaga yi tago, gu na fumwa ngudzu guhodza omu Egipto, ganiolu gu na landreya 7 myaga nya ndzala. Hatha muthu nyo gengeye gasi gu a hengeledzeya guhodza gasi vathu vago va sifi khu ndzala.’ Faro a di hakha khuye: ‘Nyi hathide uwe! U na ba uri nya wuvili avba nya wufumu Egipto!’ Josefa a wu tide kharini tshamuselo nya miloro ya Faro? Josefa a di phaswa khu Jehovha.

Ndrani nya 7 myaga yi nga landreya, Josefa a di hengeledzeya guhodza. Ganiolu, hwane nyo ba yi vbindride 7 myaga, yi di beya ndzala tigoni gwatshavbo, kha nga edzi Josefa a ganedego khidzo. Va di pheya guta vathu khu malangani yatshavbo va ta renga guhodza. Papayi waye Jakobe, a dipwa gu pwani gomo guhodza Egipto, khu kharato a di rumeya 10 sanana saye si ya renga guhodza.

Sanana sa Jakobe si di hongola ga Josefa. Gu vboha va nga vboha, Josefa a di dzegeya gu vati. Ganiolu, avo kha va nga muti. Va di mu khidzimeya kha nga edzi a nga ba a loride khidzo na ngari gyanana. Josefa a di gu vbweta gu wona gu khuye vandriyaye va di nga gu vivbide myonyo mwendro va di vbindrugedzide. Khu kharato a di va embeya khuye: ‘Enu mu dzixipiyawu. Mo teya gu ta wona gu khenu li khade kharini litigo lathu.’ Va di hakha khavo: ‘Ahihi! Ha guta khu Khanani. Hi velegidwe na hiri 12 vandruye. Moyo wakona fude; oyu nya nandra a tshade ni papayi.’ Josefa a di khuye: ‘Indrani mu ya dzega nandra wanu muta naye avba, khavbo nyi na khodwago.’ Khavbovbo, va di bweleya gaya ga babe wawe.

Tepo va nga vbedza guhodza, Jakobe a di ruma gambe sanana saye gu bweleya Egipto. Va di dzega Bhejami, nandra wawe, va hongola naye. Gasi gu linga vandriyaye, Josefa a di theya kopo yaye nya prata omu nya saku ya Bhejami yi nga ba yiri ni guhodza, a vbedza a singedza vandriyaye khuye va diba. Tepo sithumi sa Josefa si nga mana kopo omu nya saku ya Bhejami, vandriyaye va di garadzega. Va di lomba Josefa gasi gu a tsayisa avo, a diga Bhejami.

Khavbobvo, Josefa a di wona gu khuye vandriyaye va di vbindrugedzide. Kha si kodza gambe gu dzi phara. A di liya; a vbedza huye khuye: ‘Kheni Josefa, ndriyanu. Papayi wangu a nga gu vbanya?’ Vandriyaye va di hlamala ngudzu. A di va embeya khuye: ‘Mu nga dzipwi nandru khesi mu nga nyi gira. Khu Jehovha a nga nyi rumeya eno gasi nyi ta vbulugisa womi wanu. Olu vbiredzani mu ya dzega papayi mu wuya naye.’

Va di bweleya gaya va ya embeya papayi wawe mahungu yoyo nya yadi va bwe va ya mu dzega va wuya naye Egipto. Josefa ni papayi waye va di bwe va manana gambe, hwane nya myaga nya yingi.