Gighoho gu jogari?

Hlamulo nya Bhibhiliya

Bhibhiliya kha yi tshamuseyi khu gu kongoma maningano khu dzijogu nya mabango. Ganiolu, matshina nya Bhibhiliya ma ngu hi phasa gu pwisisa gu khethu, mahoni ga Nungungulu gu jogari gighoho. — Vaefeso 5:17.a

• Vathu nya vangi va gu jogari khu kotani nya wudogodogo, nigu isoso Nungungulu a ngu si nyenya. (1 Vakorinto 6:9, 10; Vaefeso 5:3, 5) Ava va pategago avba nya jogu, va gu vireya gu ghanya dzitsapawu khu gu luza ga vambe. — Ekisodha 20:17; Varoma 7:7; 13:9, 10.

• Gu jogari mwendro gu gira aposta, ambari na dziri dzitsapawu nya dzidugwana basi, si nga gu gira u haladza dzitsapawu, a gu silo si na gu vangeyago sigaradzo nya singi. — 1 Thimoti 6:9, 10.

• Oyu a pategago avba nya dzijogu nya mabango, dzitepo nya dzingi a gu tumba dzisorti mwendro sihena. Ganiolu, Nungungulu a gu wona isoso nga gu khozeya vanungungulu nya malipha, a gu silo si hambanago ni wukhozeyi a wu vbwetago. — Isaya 65:11.

• Bhibhiliya kha yi dzumeleyani ni mawonelo nya gu ghanye nya mba dzi garadza. Iyo ya gu hi kutsa gu thuma khu gu dzi garadza. (Muhevbudzi 2:24; Vaefeso 4:28) Wusingalagadzi nya Bhibhiliya wa gu hi kutsa gu ‘thuma gasi gu dzi sayisa.’ — 2 Vatesalonika 3:10, 12, Nova Tradução na Linguagem de Hoje.

• Gu patega avba nya dzijogu nya mabango si nga gira gu hi manega ni liphuvbo nya mapalisana, a gu gigiro gi himbedzedwago khu Bhibhiliya. — Vagalatiya 5:26.