Edzi libandla li nga phasago khidzo sihevbuli nya Bhibhiliya gu dandra khu liphuvboni kala siya bhabhatiswa

1-2. Khu mani a nga phasago gihevbuli nya Bhibhiliya gu dandra khu liphuvboni kala giya bhabhatiswa?

NDRIYATHU nya nyamayi nyo pwani khu Amy, a vbanyago Fiji, wari khuye: “Nyi di gu si gola esi nyi nga ba nyi si hevbula omu nya Bhibhiliya nigu nyi di gu dziti gu kheni lisine. Ganiolu, tepo nyi nga pheya gu dzi tshanganisa ni vandriyathu, khavbo nyi nga kodza gu vbindrugedza silo nyo khaguri womini gwangu nyi bwe nyi bhabhatiswa.” Malito ya ndriyathu yoyu, mo yeyedza gilo nya lisima ngudzu. Gihevbuli nya Bhibhiliya gi nga hunga gu bhabhatiswa gya gu phaswa khu vambe vandriyathu libandlani.

² Ni wevbini muhuweleyi a nga phasa muthu nyo khaguri gu gira gipandre nya libandla. (Efes. 4:16) Piyonero moyo nyo pwani khu Leilani a vbanyago Vanuatu, wari khuye: “Livingu limwedo lari khilo, ni wevbini muthu dhoropani a nga phasa gyanana gu dandra gwadi. Nyo pimisa gu kheni isoso si ngu fana ni thumo nyo gire vapizane. Khu giolovedzo, gasi gu muthu a dandra khu liphuvboni a ngu vbweta giphaso gya vatshavbo libandlani.” Khu kharato, vavelegi, valongo, dzipari ni vaprofesori xikwatunu, vatshavbo va nga phasa gyanana gu dandra gwadi. Avo va gu gira isoso khu gu gi kutsa ni gu gi hevbudza silo nya lisima. Khu gufana, vahuweleyi va nga ninga wusingalagadzi sihevbuli nya Bhibhiliya, va si kutsa va bwe va si vegeya giyeyedzo nya gyadi. Vahuweleyi va gu gira esi, va na phasa sihevbuli nya Bhibhiliya gu dandra khu liphuvboni kala siya bhabhatiswa. — Mav. 15:22.

3. Ginani u gi hevbulago khesi si ganedwego khu Ana, Dorin ni Leilani?

³ Vatshavbo vandriyathu libandlani va nga phasa gihevbuli nya Bhibhiliya nigu muhuweleyi a gimbidzisago gihevbulo nya Bhibhiliya a yede gu tsaka khu giphaso gyogyo. Nga wona esi si ganedwego khu Ana a thumago kha nga piyonero nyo hathege Moldávia. Uye wari khuye: “Kha si vbevbugi gu muhuweleyi moyo basi a khathaleya satshavbo esi gihevbuli nya Bhibhiliya gi si vbwetago gasi gu gi dandra khu liphuvboni.” Dorin, a thumago nuye kha nga piyonero nyo hathege Moldávia, wari khuye: “Khu giolovedzo vambe vahuweleyi va ngu tala gu ganeya silo si kuhago monyo nya gihevbuli, silo nya gu eni gima nyi di hadzi gu mba ganeya.” Leilani a ngu ganeya gimbe gighelo nya gu hi tsaka tepo vambe va hi phasago. Uye wari khuye: “Tepo gihevbuli gi wonago edzi vandriyathu va khathalago khidzo khigyo ni gu gi haladza, igyo gyo dzegeya gu si wona gu khigyo hi vathu va Jehovha.” — Joh. 13:35.

4. Ginani hi na bhulago khigyo avba nya ndrima yeyi?

⁴ Adzina u nga dzi wudzisa gu khuwe: ‘Nyi nga phasa kharini gihevbuli nya Bhibhiliya gu dandra khu liphuvboni nari gu khandri gihevbuli gyangu?’ Avba nya ndrima yeyi, hi na wona esi hi yedego gu gira a gu tshuka ndriyathu nyo khaguri a hi konvhidhari gasi guya gimbidzisa naye gihevbulo nya Bhibhiliya. Hi na wona gambe esi hi yedego gu gira tepo gihevbuli nya Bhibhiliya gi pheyago guta mitshanganoni. Khu mahegiso hi na wona esi madhota ma yedego gu gira gasi gu phasa sihevbuli nya Bhibhiliya gu dandra khu liphuvboni kala siya bhabhatiswa.

NDRIYATHU A GU GU KONVHIDHARI GASI GUYA GIMBIDZISA NAYE GIHEVBULO NYA BHIBHILIYA

5. A gu tshuka muhuweleyi nyo khaguri a gu konvhidhari gasi guya gimbidzisa naye gihevbulo nya Bhibhiliya, khu wevbini thumo wago?

⁵ Avba nya gihevbulo nya Bhibhiliya, oyu a gu na ni responsabhilidhadhe nyo phase gihevbuli gu pwisisa Lito la Nungungulu, muhevbudzi. A gu tshuka muhuweleyi nyo khaguri a gu konvhidhari gasi guya gimbidzisa naye gihevbulo nya Bhibhiliya, thumo wago gu mu phasa. (Muh. 4:9, 10) Ganiolu, ginani u yedego gu gira gasi u khala muphasedzeyi nya wadi?

6. Muhuweleyi a gu gu konvhidhari gasi guya gimbidzisa naye gihevbulo nya Bhibhiliya, u nga thumisa kharini wusingalagadzi wu gomogo omu ga Mavingu 20:18?

⁶ Dzi dongiseye gwadi. Nyo pheye, lomba muhuweleyi a gu tshamuseya silwana sidugwana maningano ni gihevbuli gyaye. (Leri Mavingu 20:18.) U nga mu wudzisa khuwe: “Ginani u gitigo khu gihevbuli gyago? Khu yavbini mahungu mu na hevbulago khayo? Khu yavbini makungo yago khu mahungu yoyo? Somo nyi yedego gu ganeya mwendro gu mba ganeya? Ginani gi nga phasago gihevbuli gu dandra khu liphuvboni?” Lisine gu muhuweleyi kha na nga gu embedzeya misihalo ya gihevbuli gyaye, ganiolu, mahungu a na gu embeyago ma nga gu phasa ngudzu. Misiyonariyo moyo nyo pwani khu Joy, a ngu tala gu bhula khu isoso ni vandriyathu a va konvhidharigo gasi vaya gimbidzisa naye sihevbulo saye nya Bhibhiliya. Uye wari khuye: “Eni nyi ngu gola ngudzu gu manega ni mabhulo yaya ni oyu nyi dugago naye thumo nyo tshumayele, kholu isoso si ngu mu phasa gu yeyedza gu khathala khu gihevbuli gyangu a bwe a patega avba nya gihevbulo.”

7. A gu tshuka ndriyathu a gu konvhidhari gasi guya gimbidzisa naye gihevbulo gyaye nya Bhibhiliya, khu ginani u yedego gu dzi dongiseya?

⁷ A gu tshuka ndriyathu a gu konvhidhari gasi guya gimbidzisa naye gihevbulo gyaye nya Bhibhiliya, gwadi u dongiseya mahungu mu naya bhulago khayo na yi ngo tshade tepo. (Ezira 7:10) Dorin hi ganedego khuye gupheyani wari khuye: “Nyi ngu tsaka ngudzu khu gu wona ndriyathu nyi dugago naye gutshumayelani na dongisede gwadi gihevbulo. Khu gu gira isoso, uye a ngu si kodza gu ninga mitshamuselo yi phasago avba nya gihevbulo.” Khu kharato, gihevbuli gi na wona gu khigyo mwatshavbo mu dongisede gwadi nigu isoso si na gi vegeya giyeyedzo nya gyadi. Ambari wa gu mba si kodza gu dongiseya satshavbo, dzi ninge gitepwana nyo wone dzipontu nya litshina nya esi mu na bhulago khiso.

8. Ginani u nga girago gasi u gira milombelo nyo kongome ni eyi yi phasago?

⁸ Nombelo gilo nya lisima avba nya gihevbulo nya Bhibhiliya, khu kharato, dundrugeya gwadi khesi u na ganeyago na yi ngo tshade tepo a gu tshuka muhevbudzi a gu lomba gu gira nombelo. Wo gira isoso, nombelo wago wu na ba wuri nombelo nyo kongome ni owu wu phasago. (Ndzi. 141:2) Wona esi si dugeledego ndriyathu nya nyamayi nyo pwani khu Hanae, a vbanyago Japawu. Na ngo hevbula Bhibhiliya, muhevbudzi waye a di gu tala gu dzega mumbe ndriyathu gasi guya gimbidzisa naye gihevbulo. Kala muhuno Hanae a ngo dundruga milombelo yi nga ba yi girwa khu ndriyathu wule. Uye wari khuye: “Nyi di gu si wona gu kheni ndriyathu wule a diri ni wupari nyo tiye ni Jehovha, khu kharato, nyi di gu vbweta gu pimedzeya giyeyedzo gyaye. Dzitepo dzatshavbo a nga ba a khumbuga lina langu omu nya milombelo, nyi di gu dzipwa na nyi gu haladzwa.”

9. Guya khu Jakobe 1:19, ginani u nga girago gasi gu phasedzeya muhevbudzi avba nya gihevbulo nya Bhibhiliya?

⁹ Phasedzeya muhevbudzi avba nya gihevbulo. Ndriyathu nya nyamayi nyo pwani khu Omamuyovbi, a thumago kha nga piyonero nyo hathege Nigéria, wari khuye: “Muphasedzeyi nya wadi avba nyo gimbidzise gihevbulo nya Bhibhiliya, khoyu a vegago gu pima avba nya gihevbulo. Uye a ngu ningeya dzikomentariyu nya dzadi, ganiolu, kha ganeyi ngudzu kholu a ngu dziti gu khuye, muhevbudzi khuye a yedego gu gimbidzisa gihevbulo.” Khu kharato, u nga dziti kharini gu khuwe olu u yede gu ganeya nigu ginani u yedego gu ganeya? (Mav. 25:11) Vega gwadi gu pima tepo muhevbudzi ni gihevbuli va ganeyago. (Leri Jakobe 1:19.) Wa gu gira isoso, u na si kodza gu phasa. Ganiolu, u yede gu pimisa na wu si ganeyi. Khu giyeyedzo, u nga tadzi silo nyo ganeye, u nga piyi muhevbudzi a gu ba a tshamuseya gilo nyo khaguri mwendro gu pheya mambe mabhulo nyo hambane ni aya ma bhudwago. Ganiolu, u nga phasa gihevbuli gu pwisisa mahungu ma bhudwago khu gu ningeya tshamuselo nyo role, giyeyedzo nyo khaguri mwendro gu gira giwudziso. Dzimbe dzitepo, wa gu wona gu khuwe u mwalo gilo nyo ganeye avba nya gihevbulo, zundza gihevbuli nya Bhibhiliya u bwe u yeyedza gu khuwe u ngu khathala khigyo. Isoso si na gi phasa gu dandra khu liphuvboni.

10. Matshangu yago ma nga phasa kharini gihevbuli nya Bhibhiliya?

¹⁰ Bhuleya gihevbuli nya Bhibhiliya matshangu yago. Wa gu wona gu khuwe isoso si nga phasa gihevbuli, u nga gi bhuleya edzi u hevbudego khidzo lisine, sigaradzo u tshanganidego naso ni edzi Jehovha a gu phasidego khidzo womini gwago. (Ndzi. 78:4, 7) Matshangu yago si nga gira kamo nari esi gihevbuli gi nga ba gi vbweta gu sipwa. Ayo ma nga tiyisa gukhodwa nya gihevbuli mwendro gu gi kutsa gu dandra khu liphuvboni kala giya bhabhatiswa. Nigu ayo adzina ma nga yeyedza gihevbuli edzi gi nga palago khidzo gilingo gi emisanago nagyo. (1 Ped. 5:9) Gabriel, a vbanyago Brazil ni gu olu a thumago kha nga piyonero, a gu dundruga egi gi mu phasidego na nga gu hevbula Bhibhiliya. Uye wari khuye: “Tepo nyi nga ba nyipwa matshangu ya vandriyathu, nyi di gu wona gu kheni Jehovha a ngu si wona sigaradzo hi tshanganago naso. Nigu abari gu avo va si kodzide gu si pala, aneni nyi nga si kodza.”

GIHEVBULI NYA BHIBHILIYA GYA GUTA MITSHANGANONI

11-12. Khu ginani hi yedego gu hakha gwadi gihevbuli nya Bhibhiliya gi pheyago guta mitshanganoni?

¹¹ Gasi gu gihevbuli nya Bhibhiliya gi dandra khu liphuvboni kala giya bhabhatiswa, gi yede gu manega mitshanganoni tepo yatshavbo gi bwe gi phasega khiyo. (Hebh. 10:24, 25) Khu lisine, muhevbudzi khuye a na gi konvhidharigo gasi gita mitshanganoni. Gya guta Salawuni nya Mufumo, hatshavbo hi yede gu gi kutsa gu simama guta mitshanganoni. Hi nga gira kharini isoso?

¹² Hoyozeya gihevbuli. (Rom. 15:7) Gihevbuli gya gu hakhwa gwadi mitshanganoni, igyo gi na kutsega gu wuya gambe. Losa gihevbuli u bwe u gi tivegisa ga vambe. Wa gu wona gu khuwe muhevbudzi wagyo a si vbohi, mwendro a gu khathaleya yimbe mithumo Salawuni nya Mufumo, simama gu bhula nagyo. Gi engiseye gwadi tepo gi ganeyago u bwe u yeyedza gu khuwe u ngu khathala khigyo. Avba gu na ni giyeyedzo gya Dmitrii, oyu a bhabhatisidwego myagana hwane nigu olu a gu thuma kha nga muphasedzeyi nya libandla. Na gu ganeya khu litshigu nyo pheye a nga hongola mitshanganoni, uye wari khuye: “Ndriyathu nyo khaguri a di nyi wona na nyi emide vbavbandzi na nyi gu thava, khu kharato, a di ta nyi dzega hi beya hatshavbo Salawuni nya Mufumo. Nya vangi va di nyi hidzimeleya vata nyi losa. Khu lisine, isoso si nyi samadziside ngudzu nyo bwe nyi vbweta gu kheni tshigu ni tshigu gu girwa mitshangano. Mitshanganoni nyi dzipwide khu ndziya nya gu nyi di nga si dzipwi khiyo wumbe wulanga.”

13. Mavbanyelo yago ma nga kuha kharini gihevbuli nya Bhibhiliya?

¹³ Khala giyeyedzo nya gyadi. Mavbanyelo yago ma nga phasa gihevbuli gu wona gu khigyo ethu hi Makristo nya lisine. (Mat. 5:16) Vitalii, muhuno a thumago kha nga piyonero Moldávia, wari khuye: “Nyi di gu vega gupima avba nya mavbanyelo ya vandriyathu libandlani, edzi va nga ba va pimisa khidzo ni edzi va nga ba va gira khidzo silo. Isoso si nyi giride nyi tiyisega gu kheni khu lisine Dzifakazi dza Jehovha dza gu thangedwa khu Nungungulu.”

14. Giyeyedzo gyago gi nga phasa kharini muthu gu simama gu dandra khu liphuvboni?

¹⁴ Na gi si bhabhatiswi, gihevbuli nya Bhibhiliya gi yede gu thumisa esi gi hevbulago. Isoso khandri tepo yatshavbo si vbevbugago. Ganiolu, gya gu wona edzi u wuyedwago khidzo khu gu thumisa matshina nya milayo nya Bhibhiliya, adzina gi nga kutsega gu gu pimedzeya. (1 Kor. 11:1) Wona giyeyedzo gya Hanae, hi bhudego khuye gupheyani. Uye wari khuye: “Vandriyathu libandlani va di gu vbanya khesi nyi nga ba nyi si hevbula. Nyi hevbude edzi nyi nga tiyisago khidzo vambe, nyi khala muthu nyo divaleye ni gu yeyedza lihaladzo. Vandriyathu va di gu ganeya gwadi khu vambe, khu kharato, nyi di gu vbweta gu va pimedzeya.”

15. Guya khu Mavingu 27:17, khu ginani hi yedego gu gira wupari ni sihevbuli nya Bhibhiliya?

¹⁵ Gira wupari ni gihevbuli nya Bhibhiliya. Tepo gihevbuli gi simamago guta mitshanganoni, simama gu gi yeyedza gu khuwe u ngu khathala khigyo. (Filp. 2:4) Dzi ninge tepo nyo bhule ni gihevbuli nya Bhibhiliya. Gi zundze khu gu dzigaradza gi gu giridego gasi gu vbindrugedza silo nyo khaguri. Gi wudzise khedzi gihevbulo gyagyo gi gimbiyago khidzo. U gi wudzisa khu mawugelo ya va ndrangani gwagyo ni edzi thumo wagyo wu gimbiyago khidzo. Ganiolu, dzi woneye gasi u si giri siwudziso si na gi theyago dzitshoni. Mabhulo nya nga aya, ma na phasa mwatshavbo mwa vavili gu manega ni wupari nya wadi nigu isoso si nga gira gihevbuli nya Bhibhiliya gi dogoreya gu bhabhatiswa. (Leri Mavingu 27:17.) Hanae, muhuno a gu thuma kha nga piyonero nya tepo yatshavbo. Na gu ganeya khu litshigu nyo pheye gu hongola mitshanganoni, uye wari khuye: “Tepo nyi nga ba nyi thanga wupari ni vandriyathu libandlani, nyi di si yi woni ni tepo nyo hongole mitshanganoni. Ambari nyo ba nyi garade, nyi di gu hongola Salawuni nya Mufumo. Nyi di gu tsakiswa ngudzu khu gu manega ni dzipari dzangu nya dziphya. Isoso si nyi phaside gu piya wupari ni vale va nga ba va si thumeyi Jehovha. Tepo yatshavbo nyi di gu vbweta gu dzipwa vbafuvbi ni Jehovha ni vandriyathu libandlani. Khu kharato, nyi di hunga gu bhabhatiswa.”

16. Ginani gambe u nga girago gasi gu phasa gihevbuli gi dzipwa na gi gu lumba libandla?

¹⁶ Tepo gihevbuli nya Bhibhiliya gi simamago gu dandra khu liphuvboni, gi phase gu dzipwa na giri givbango nya libandla. Ndziya nyo gire khiyo isoso, khu gu khala muthu nyo hakhe gwadi vapfhumba. (Hebh. 13:2) Denis, a vbanyago Moldávia, a gu dundruga tepo na ngo hevbula Bhibhiliya, wari khuye: “Eni ni mwangadzi wangu, hi konvhidharidwe dzitepo nya dzingi khu vandriyathu gasi gu hongola mitshanganoni. Ga dzitepo dzodzo, avo va hi tshamusede edzi Jehovha ava phasidego khidzo. Isoso si hi tiyiside ngudzu nigu si hi phaside gu wona gu khethu ethu ho vbweta gu thumeya Jehovha nigu hi di hadzi manega ni womi nyo tsakise.” Gihevbuli nya Bhibhiliya gya gu khala muhuweleyi, u nga gi konvhidhari gasi mu ya thuma mwatshavbo thumoni nyo tshumayele. Diego, a gu muhuweleyi Brazil, wari khuye: “Vandriyathu nya vangi va nyi konvhidharide gasi hi ya thuma hatshavbo thumoni nyo tshumayele. Isoso si nyi phaside gu vati gwadi. Nyi hevbude nya singi gwawe nigu nyi dzipwide vbafuvbi ni Jehovha ni Jesu.”

MADHOTA MA NGA PHASA KHU NDZIYA MUNI?

17. Madhota ma nga phasa kharini sihevbuli nya Bhibhiliya?

¹⁷ Dzi ninge tepo nyo bhule ni sihevbuli nya Bhibhiliya. Madhota, mwa gu yeyedza lihaladzo ni gu khathala khu sihevbuli nya Bhibhiliya, mu na si phasa gu dandra khu liphuvboni kala siya bhabhatiswa. Khu ginani mu si dzi ningigo tepo nyo bhule ni sihevbuli nya Bhibhiliya mitshanganoni? Sa gu khusedza gasi gu hlamula mitshanganoni, si rane khu malina yaso. Wa gu gira isoso, iso si na wona gu khiso u ngu khathala khiso. Dzi ninge tepo nyo hongole thumoni nyo tshumayele ni muhuweleyi nyo khaguri tepo a hongolago a ya gimbidzisa gihevbulo gyaye nya Bhibhiliya. Gu manega gwago avba nya gihevbulo, si nga kuha gihevbuli nya Bhibhiliya khu ndziya nyo samadzise. Piyonero moyo nyo pwani khu Jackie a vbanyago Nigéria, wari khuye: “Sihevbuli nya singi nya Bhibhiliya, si ngu samadziswa ngudzu sa gu tugula gu khiso ndriyathu nyi nga ba nyiri naye avba nya gihevbulo gyathu, lidhota.” Gihevbuli gimwegyo nya Bhibhiliya gi di nyi embeya khigyo: “Pastori wangu gima na sa gira isoso. Uye basi a gu wuseya sighanyi nigu a gu si wuseya basi sa gu livba dzitsapawu.” Olu gihevbuli gegi gi ngu hongola mitshanganoni.

18. Madhota ma nga thumisa kharini malito ma gomogo omu ga Mithumo 20:28?

¹⁸ Trenari ni gu kutsa vahevbudzi. Madhota, enu mu na ni thumo nya lisima ngudzu. Gu phasa vahuweleyi gu khala vatshumayeli nya vadi ni vahevbudzi nya vadi. (Leri Mithumo 20:28.) Adzina muhuweleyi a nga khala dzitshoni gu gimbidzisa gihevbulo na muri mwatshavbo. Sa gu girega isoso, gimbidzisa uwe gihevbulo. Jackie hi ganedego khuye gupheyani, wari khuye: “Madhota ma ngu tala gu nyi wudzisa maningano ni sihevbuli sangu. Nya gu tshangana ni gigaradzo avba nya gihevbulo nyo khaguri, ayo ma ngu nyi ni ninga mawonelo nya yadi.” Madhota ma nga gira nya singi gasi gu tiyisa ni gu kutsa vahevbudzi nya Bhibhiliya. (1 Tes. 5:11) Jackie, a gu engedza gambe khuye: “Nyi ngu tsaka ngudzu tepo madhota ma nyi kutsago ma bwe ma nyi embeya gu khayo thumo nyi girago khwa lisima gwawe. Malito nya nga aya ma ngu tangadzisa monyo nga khatsi mati nyo dzidziye ma tshimago lidora. Malito yawe nyo zundze ma ngu engedzeya gutumba ni gu tsaka nyi gupwago khu gu gimbidzisa sihevbulo nya Bhibhiliya.” — Mav. 25:25.

19. Gu tsaka muni hatshavbo hi nga gupwago?

¹⁹ Ambari wa gu ba u si gimbidzisi gihevbulo nya Bhibhiliya olu, u nga phasa muthu nyo khaguri gu dandra khu liphuvboni kala a ya bhabhatiswa. Wa gu konvhidharwi gasi guya gimbidzisa gihevbulo, dzi dongiseye gwadi gasi u ya ningeya dzikomentariyu dzi na phasago muhevbudzi. Ganiolu, dzi woneye gasi u si tadzi silo nyo ganeye. Gira wupari ni sihevbuli nya Bhibhiliya si pheyago guta mitshanganoni u bwe u khala giyeyedzo nya gyadi gwaso. Wa gu ba uri lidhota, kutsa sihevbuli khu gu u dzi ninga tepo nyo bhule naso. Tiyisa vahevbudzi khu gu va trenari ni gu va zundza. Khu gu gira isoso, u na tsaka khu gu phasa muthu gu haladza Jehovha ni gu mu thumeya.