Mathumiselo nya dzitsapawu

Vathu nya vangi va phasidwe khu matshina nya nayo nya Bhibhiliya gu kodza gu thumisa dzitsapawu.

MANEGA NI MAKUNGO NYA YADI

LITSHINA NYA NAYO NYA BHIBHILIYA: “Makungo ya muthu a gu ma pimisa gwadi, ma na mu ninga mihandro, aholu ayo nya gu ma dongisele khu guvbiredza, kha ma [phasi] gilo.” — Mavingu 21:5.

SO THULA GINANI: Gira makungo nya yadi, u bwe u ma landreya. Pheya khu gu gira makungo na wu nga si thumisi dzitsapawu. Dundruga gu khuwe adzina khu na nga si kodza gu renga satshavbo u si vbwetago. Khu kharato, thumisa dzitsapawu dzago khu wugengeyi.

GINANI U YEDEGO GU GIRA:

Gira sasamedzo. Gira sasamedzo nya satshavbo u vbwetago gu renga, u bwe u si vega khu mitsawa. Khavbovbo, wona gu khuwe avba nya tsawa ni tsawa u na thumisa kharini. Ga gu lombega dzitsapawu nya dzingi gasi gu dzi thumisa avba nya tsawa nyo khaguri, vbungulanyana avba nya edzi nya wumbe tsawa. Khu giyeyedzo, abari gu u thumiside dzitsapawu nya dzingi gasi gu renga mafura nya movha, dzega dzitsapawu dza avba nya wumbe tsawa wu gu mwalo lisima nya likhongolo ngudzu u engedzeya khidzo — nya nga gu vavudzisa dzinyama bazaritunu.
Potsa gu vanga mangava nya mba vbwetega. Sa gu kodzega, u nga vangi mangava. Malangani nya isoso, hengedzeya dzitsapawu gasi u rega esi u si vbwetago. Wa gu ba u thumisa cartão de crédito, ngima ni ngima zama gu livba mangava yatshavbo gasi gu si livbiswi dzijuri. Wa gu ba u dhevha, bhudzisana ni oyu u mu dhevhago khu malivbelo yakone.

Wugevisisi nyo khaguri wari khuwo vathu va thumisago cartão de crédito gasi gu renga silo, va ngu tala gu thumisa dzitsapawu nya dzingi. Khu kharato, wa gu ba u thumisa cartão de crédito, yi thumise khu wugengeyi.

U NGA KHALI KHU MAWOGO

LITSHINA NYA NAYO NYA BHIBHILIYA: “Ngara kha limi a gu bani nari vbagirametunu, aholu gikhati nya guvbwere a na si vbweta a si hamuga.” — Mavingu 20:4.

SO THULA GINANI: Wugara wu ngu hetedza muthu kala a beya wusiwanani. Khu kharato, khala muthu nya sighingi, u bwe u khwekedza sikinyetana u na si thumisago ga gu dugeleya gilo khavba ni avba.

GINANI U YEDEGO GU GIRA:

Khala muthu nya sighingi. Wa gu manega ni sighingi ni mapimo thumoni, patrawu wago a na gu gola nigu kha na nga gu tutumisa thumoni.
Khala muthu nyo tumbege. U ngabi silo sa patrawu wago. Wa gu mba tumbega u na nyenyezisa lina lago nigu u na tshuka u lutuga gasi gu mana thumo.
Enedziswa khesi u gu naso. Tepo yatshavbo wa gu huwe lutulutu khu gu vbweta dzitsapawu u na hegisa khu gu ghoha womi wago nedzi u pwananago khidzo ni vambe. Dundruga: dzitsapawu khandriso satshavbo si vbwetegago guvbanyani.

MAMBE MATSHINA NYA NAYO NYA BHIBHILIYA

Mwama a lerigo Bhibhiliya khomu nya interneti — Leri Bhibhiliya omu nya interneti. Yomo khu mazanazana malimi omu nya jw.org

U NGA HAGANISEYI TEPO NI SIKINYETENA SAGO AVBA NYA SILO NYA MBA NA HUNGO.

“Kholu bewudzi ni muthu nya limidzo, va na thega wusiwanani, ligovbe lawe li na va ambagisa siziva.” — MAVINGU 23:21.

U NGA DZI VETI HUNGO KHU KOTANI NYA DZITSAPAWU.

“Mu nga garadzegi khu guvbanya gwanu, na mu gu pimisa, khenu: Ginani hi na hodzago, mwendro ginani hi na selago mwendro sanu gu sanisekani khu givili gyanu, na mu gu pimisa, khenu: Ginani hi na ambalago.” — MATEWU 6:25.

POTSA LIDIWO.

“Muthu nya [lidiwo] a gu tutumela gufuma, aholu kha dziti gukhuye a na khala gisiwana.” — MAVINGU 28:22.