Dzifakazi dzingani dza Jehovha u dzi tigo? Yimbe tepo dzimbe vavhizinyu vago, sithumi sikwanu mwendro sihevbuli sikwanu. Adzina saye hi di nga bhula nago khu Bhibhiliya. Khethu vamani khu lisine, nigu khu ginani hi bhulago ni vathu khesi hi si khodwago?

Ethu hi vathu va fananago ni vambe. Hi vathu nya mitumbunugo ni makhalelo nya gu hambanehambane. Vambe vbakari gwathu va di gu lumba yimbe mitsawa nya wukhongeli, nigu vambe kha va nga ba va khodwa ga Nungungulu. Na hi si gu khali Dzifakazi, hatshavbo hi dzi ningide tepo nya gu hevbule gwadi esi Bhibhiliya yi hevbudzago. (Mithumo 17:11) Hi di khodwa esi hi nga hevbula, khavbovbo hi dzi hatheya gu khozeya Jehovha Nungungulu.

Hi ngu phasega khu gu hevbula Bhibhiliya. Kha nga vathu vatshavbo, ethu hi ngu emisana ni sigaradzo gumogo ni sihoso sathu. Ganiolu, khu gu zama gu thumisa matshina nya milayo nya Bhibhiliya guvbanyani gwathu ga tshigu ni tshigu, hi tshukwadziside mavbanyelo yathu. (Ndzimo 128:1, 2) Egi khigyo gimwegyo nya sighelo si hi girago hi bhuleya vambe silo nya sadi hi si hevbulago omu nya Bhibhiliya.

Ha gu vbanya khu milayo ya Nungungulu. Milayo yoyo, yi hevbudzwago omu nya Bhibhiliya, ya gu hi phasa gu manega ni mavbanyelo nya yadi ni gu ninga githawo vakhwathu, gumogo ni makhalelo nya nga gutumbega ni wuwadi. Iyo gambe ya gu phasa gu andrisa hengeledzano nya vathu va tiyidego ni va nya sighingi, gumogo ni gu tiyisa mavbanyelo nya dzindranga. Olu hi khodwago gu khethu ‘Nungungulu kha hatheyi vathu,’ ethu ha gu lumba ndranga mweyo yi wumbwago khu sivbango sa mafuni gwatshavbo si tshanganiswago khesi hi si khodwago, si si venganigo khu kotani nya politika ni gu hambana nya mafumbo. Ambari olu hi fananago ni vambe, ethu ha gu wumba hengeledzano nya vathu va hathegidego. — Mithumo 4:13; 10:34, 35.

• Ginani gi girago Dzifakazi dza Jehovha dzi fanana ni vambe vathu?

• Milayo muni yi hevbudwago khu Dzifakazi khu gu thumisa Bhibhiliya?

Vathu nya vangi va gu dundrugeya gu khavo Dzifakazi dza Jehovha lina nya wukhongeli nya wuphya. Ganiolu, omu nya 2.700 nya myaga yi vbindridego, sithumi sa Nungungulu wa moyo nya lisine si tshamusedwe kha nga “dzifakazi” dzaye. (Isaya 43:10-12) Kala khu mwaga nya 1931, hi di gu tidwa kha nga Sihevbuli nya Bhibhiliya. Khu ginani hi nga dzi thula lina nya Dzifakazi dza Jehovha?

Ilo la gu tivegisa Nungungulu wathu. Khu gu yelana ni milowo ya gale, lina la Nungungulu, Jehovha, li ngu manega khu magumi mazana nya dzitepo omu nya Bhibhiliya. Omu nya dziBhibhiliya nya gu hambanehambane lina leli li tshikedzidwe khu mambe malina, nya nga Pfhumu mwendro Nungungulu. Ambari ulolo, Nungungulu nya lisine a di dzi tivegiside ga Mosi khu lina laye nya lisine, Jehovha, khu gu khuye: “Eli khilo lina langu kala gupindruga.” (Ekisodha 3:15) Khu kharato, uye a gu dzi hambanisa ni vanungungulu vatshavbo nya malipha. Ethu hi ngu dzi khusedza khu gu ranwa khu lina nya guage la Nungungulu.

Ilo la gu tshamuseya thumo wathu. Vathu nya vangi va nga landreleyana, gu pheya khu Abheli, a nga ba ari muthu nya gutumbege, va ningide wufakazi nya gukhodwe gwawe ga Jehovha. Khu gugimbiya nya mazana nya myaga, Nowa, Abrahama, Sara, Mosi, Dhavhidhe, ni vambe, va dzi patide ni “dzifakazi nya vathu nya vangi ngudzu.” (Vahebheru 11:4–12:1) Kha nga edzi muthu a fakazago khidzo tribhunali gasi gu vhikeya muthu a gu mwalo nandru, ethu hi dzi emisede gu tivegisa lisine khu Nungungulu wathu.

Ha gu pimedzeya Jesu. Bhibhiliya ya gu mu rana khiyo i “fakazi nya guthembege nya lisine.” (Gutuledwa 3:14) Uye mune Jesu a di khuye ‘tiviside lina la Nungungulu’ a bwe a “ninga wufakazi nya lisine” khu Nungungulu. (Johane 17:26; 18:37) Khu kharato, valandreli nya lisine va Kristo va yede gu ranwa khu lina la Jehovha va bwe va li tivegisa. Isoso khiso esi Dzifakazi dza Jehovha dzi dzi garadzeyago gu gira.

• Khu ginani Sihevbuli nya Bhibhiliya si nga dzi thula lina nya Dzifakazi dza Jehovha?

• Jehovha phede vbanyalini guva ni dzifakazi mafuni?

• Khu yevbi Fakazi ya Jehovha nya yikhongolo ga dzatshavbo?

Bhibhiliya yi profetide gu khiyo hwane nya gufe ga Kristo, gu na manega vahevbudzi nya malipha vbakari nya maKristo nya gupheye va na nyenyezisago lisine nya Bhibhiliya khu malipha. (Mithumo 20:29, 30) Khu gugimbiya nya tepo, khiso kamo isoso si nga dugeleya. Va di patedzeya sihevbudzo sa Jesu ni sihena nya wukhongeli nya wuhedheni, si gu esi si nga gira gu wuKristo wu vbindrugedzwa wu khala nya malipha. (2 Thimoti 4:3, 4) Ganiolu, ina hi nga dziti kharini gu khethu mapwisiselo hi gu nawo khu Bhibhiliya muhuno khayo nya lisine?

Yi di vboha tepo nya gu Jehovha a tivegisa lisine. Uye ganede gale ngudzu gu khuye ‘khu tepo yeyi nya guhegise, guti nya lisine gu na tala.’ (Dhaniyeli 12:4) Khu mwaga nya 1870, tsawa nya wudugwana nya vasoti nya lisine wu di tugula gu khuwo sihevbudzo nya dzitshetshe nya dzingi kha sa nga ba si seketedwa omu nya Bhibhiliya. Khavbovbo, avo va di pheya gu vbwetedzeya mapwisiselo nya sihevbudzo nya lisine nya Bhibhiliya. Jehovha va kategiside khu gu va yeyedza ndziya nya lisine.

Vathu nya ndruda va di hevbula Bhibhiliya khu gudziningedzeya ngudzu. Sihevbuli soso nya Bhibhiliya nya ndruda, si handzamedzwago khethu, si thumiside mahevbulelo yaya hi ngo gu ma thumisago muhuno. Si di ba si hevbula Bhibhiliya khu gu landreya hungo ni hungo nya mahungu. Va gu mana gipandre nya Bhibhiliya gi nga ba gi garadza gu gi pwisisa, va di gu vbwetedzeya mambe mavhesi ma gi tshamuseyago. Va gu wona gu khavo esi va si pwisisidego si ngu pwanana ni simbe sipandre nya Milowo, va di gu si lova. Khu gu diga Bhibhiliya yi dzi tshamuseya yabune, avo va wusedzide lisine nya lina ni Mufumo wa Nungungulu, gighelo nya gu Nungungulu a vanga vathu ni mafu, giemo gya ava va fudego, ni gutumba nya guwuswe khu gufani. Gusota gwawe lisine gu va duside maliphani ni sihenani nya singi. — Johane 8:31, 32.

Khu 1879, Sihevbuli nya Bhibhiliya si wonide gu khiso yi vbohide tepo nya gu tivegise lisine mafuni gwatshavbo. Khu kharato, mwagani wowo kamo va di pheya gu dusa A Murinzeli i huwelela a Mufumo wa Jehova, yi gu revhista hi ngo gu yi dusago muhuno. Olu ha gu tshumayela lisine nya Bhibhiliya omu nya 240 mayigo khu malimi ma vbindrago 750. Guti nya lisine gima gu di si tali ngudzu nga muhuno!

• Hwane nya gufe ga Kristo, ginani gi nga dugeleya lisine nya Bhibhiliya?

• Ginani gi nga hi phasa gu wusedza lisine nya Lito la Nungungulu?

Khu magumi nya myaga, Dzifakazi dza Jehovha dzi thumiside, dzi ghandla ni gu kabaniseya dziBhibhiliya nya gu hambanehambane. Ganiolu hi wonide gu khethu gu ngu vbwetega gu duswa wuvbindrugedzeyi nya wuphya nya Bhibhiliya wu na phasago vathu “guti lisine.” Nungungulu o vbweta gu khuye vathu vatshavbo vati lisine. (1 Thimoti 2:3, 4) Khu kharato, khu 1950 hi phede gu dusa sipandre nya Bhibhiliya yeyi hi yi thumisago muhuno, yi ranwago pwani Tradução do Novo Mundo, NM khu giPutukezi. Bhibhiliya yeyi yi vbindrugedzedwe khu ndziya nya gutumbege khu malimi ma vbindrago 130.

Gu di gu vbwetega Bhibhiliya yi vbevbugago gu yi pwisisa. Malimi ma ngu vbindrugedza khu gugimbiya nya tepo. Khu kharato dziBhibhiliya nya dzingi dzi na ni malito ma si pwisisegigo gwadi mwendro ma vbindredwego. Gu diga isoso, gu nguta na gu gu tugudwa milowo ya gale nya lisine nya gu lowe khu mandza yi pwananago gwadi ni milowo nya gupheye, yi phasago gu pwisisa gwadi malimi nya giHebheru, giAramaiko ni giGreki ma thumisidwego gulowani nya Bhibhiliya.

Gu di gu vbwetega wuvbindrugedzeyi wu tshamuseyago gwadi lito la Nungungulu. Vbavbandze nya gu gire esi va si golago khu milowo yi tumbunusidwego khu Nungungulu, vavbindrugedzeyi nya Bhibhiliya va yede gu vbindrugedzeya khu gutumbega va landra edzi iyo yi tumbunusidwego khidzo. Ambari ulolo, omu nya wuvbindrugedzeyi nya wungi nya Bhibhiliya, lina la Nungungulu, Jehovha, kha li thumiswi.

Gu di gu vbwetega Bhibhiliya yi zundzago Mutumbunusi wayo. (2 Samuweli 23:2) Kha nga esi si yeyedzwago vbavbatshi vbavba, omu nya Tradução do Novo Mundo, lina la Jehovha li bweledzedwe malangani yalo ma ninganago 7 000 omu nya milowo ya gale ngudzu nya Bhibhiliya. (Ndzimo 83:18, NM) Kha nga handro nya myaga nya gu sote lisine, Bhibhiliya yeyi yi ngu tsakisa gu yi leri kholu yi yeyedzago gwadi mapimo ya Nungungulu. Gani u na ni Tradução do Novo Mundo khu lidimi lago gani u mwalo, hi ngu gu kutsa gu uva ni giolovedzo gegi nya gyadi nya gu hevbule Lito la Jehovha tshigu ni tshigu. — Josuwa 1:8; Ndzimo 1:2, 3.

• Khu ginani hi nga wona gu khethu gu ngu vbwetega wuvbindrugedzeyi nya wuphya nya Bhibhiliya?

• Giolovedzo muni nya gyadi gya tshigu ni tshigu gi yedego guva ni ava va vbwetago guti gugola ga Nungungulu?