Ethu hi mwalo vafundrisa mwendro vapaderi va hakhiswago hengeledzanoni yathu. Ganiolu, kha nga edzi gu nga ba gu girwa tepo li nga pheya libandla nya wuKristo, ga gu emiswa vawoneleyi va vidzidwego gasi gu ‘havisa libandla la Nungungulu.’ (Mithumo 20:28) Madhota yaya vama va vidzidwego khu liphuvboni va thangeyago ni gu havisa libandla, ‘na va tshulegide myonyo, nasiri khu gu gurumedzwa; nasiri gu thumeya gu hakha dzitsapawu, aholu khu gudzina gwawe.’ (1 Pedro 5:1-3) I thumo muni ma wu girago gasi gu hi phasa?

Ma gu hi sayisa ni gu hi vhikeya. Madhota ma gu thangeya ni gu vhikeya libandla khu liphuvboni. Olu ma dzitigo gu khayo Nungungulu ma tumbide khu gu ma ninga thumo wowo nya lisima, madhota kha ma fumeyi vathu va Nungungulu, ganiolu ma gu hi phasa gu khadzisega ni gu mana litsako. (2 Vakorinto 1:24) Kha nga muhavisi a sayisago khu gu khathala mweyo ni mweyo nya dzinvuta dzaye, madhota ma gu zama guti givbango gimwegyo ni gimwegyo nya libandla. — Mavingu 27:23.

Ma gu hi hevbudza gu gira gugola ga Nungungulu. Semana ni semana, madhota ma gu thangeya mitshangano nya libandla gasi gu tiyisa gukhodwa gwathu. (Mithumo 15:32) Vbavbandze nya isoso, vama vovo nya gudziningedzeye va gu thangeya thumo nya gutshumayele, va thuma ni ethu ni gu hi hevbudza magirelo nya gu hambanehambane nya thumo nya gutshumayele.

Ma gu tiyisa sivbango nya libandla khu gimwegyo ni gimwegyo. Gasi gu phasa muthu ni muthu gu tiyisa wupari waye ni Jehovha, madhota nya libandla ma gu hi endreya dzindrangani gwathu mwendro Salawuni nya Mufumo gasi gu hi phasa ni gu hi thaveleya khu gu thumisa Bhibhiliya. — Jakobe 5:14, 15.

Vbavbandze nya thumo ma wu girago libandlani, madhota nya mangi ma na ni mithumo yawe nya gu dzi vbanyise ni dzindranga ma yedego gu dzi sayisa. Isoso niso sa gu vbweta tepo ni gukhathaledwa. Vandriyathu vava va thumago ngudzu va yede gu ningwa githawo khethu. — 1 Vatesalonika 5:12, 13.

• I thumo muni wu thumwago khu madhota nya libandla?

• Madhota ma gu yeyedza kharini gu hi khathaleya?

Bhibhiliya ya gu ganeya khu mitsawa mivili nya vama nya maKristo va gu na ni mithumo libandlani — ‘vathangeyi ni vaphasedzeyi.’ (Vafilipi 1:1) Khu giolovedzo, libandla ni libandla li na ni vandriyathu nya vangyana va li thumeyago. I thumo muni wu girwago khu vaphasedzeyi nya libandla gasi hi phasega?

Va gu phasedzeya huwo nya madhota. Vaphasedzeyi nya libandla vama nya vaphya mwendro va dandridego va tiyidego liphuvboni, va tumbegago na va gu pimisa gwadi. Avo va gu gira mithumo nya lisima yi vbwetago tshivba, eyi semana ni semana yi girwago libandlani. Isoso sa gu phasa madhota gu vega gupima gwawe thumoni nya gu hevbudze ni gu havisa dzinvuta.

Va gu gira mithumo yi phasago. Vaphasedzeyi nyo khaguri nya libandla va gu thuma kha nga vayeyedzeyi gasi gu hakha ni gu hoyozeya vatshavbo ava va vbohago mitshanganoni. Vambe va gu thuma ni mitshini nya gu khusedze malito, gu kabaniseya dzilivru, gu woneleya dzitsapawu nya libandla ni gu kabaniseya sipandre sesi sivbango nya libandla si yedego gu tshumayela umo. Avo gambe va ngu phasedzeya gusayisani nya Salawu nya Mufumo. Yimbe tepo va ngu lombwa khu madhota gu phasa ava va gumbidego. Ni wevbini thumo vaphasedzeyi nya libandla va wu hakhago, va gu wu gira na va tsakide. Liphuvbo lolo va li yeyedzago la gu gira vatshavbo libandlani va va ninga githawo. — 1 Thimoti 3:13.

Va gu ninga giyeyedzo nya gyadi kha nga vama nya maKristo. Vaphasedzeyi nya libandla va gu hathwa khu kotani nya makhalelo yawe nya yadi nya wuKristo. Tepo va vegago dziganelo mitshanganoni, va gu tiyisa gukhodwa gwathu. Khu gudziningedzeya gwawe thumoni nya gutshumayele, va gu hi kutsa gu anethu hi manega ni sighingi. Khu kotani nya gu thumisane gwadi ni madhota, vaphasedzeyi nya libandla va gu endzegedzeya gutsaka ni gupwanana libandlani. (Vaefeso 4:16) Khu gugimbiya nya tepo, anavo va ngu ninganedwa khu gu thuma kha nga madhota.

• Vaphasedzeyi nya libandla vama nya gu khale kharini?

• Vaphasedzeyi nya libandla va gu phasa kharini libandla gu gimbiya gwadi?

Milowo nya giGreki nya wuKristo yi ngu ganeya gambe ni gambe khu Bharinabha ni mupostoli Pawulo. Vama vava va di gu thuma kha nga vawoneleyi va gimbiyagimbiyago, na va gu endreya mabandla nya gupheye. Khu ginani? Kholu va di gu khathala ngudzu khu gukhadzisega ga vandriyawe nya makhodwa. Pawulo a di khuye a di gu dogoreya ‘gu bweleya a gimbiya a holeya vandriyaye’ gasi guti gu khuye va gu vbanya kharini. Uye a di gu dzumeya gu gimbiya mazana nya dzikilometro gasi gu ya va tiyisa. (Mithumo 15:36) Ogu khugo gugola ga vawoneleyi vathu va gimbiyagimbiyago muhuno.

Va gu teya gu ta hi tiyisa. Muwoneleyi nya gipandre a gu endreya mabandla ma ninganago 20, a khala semana omu nya libandla limwedo guvili khu mwaga. Hi ngu phasega ngudzu khu guvidzwa ga vandriyathu vava ni ga vagadzi vawe, va gu ba na va dzegide. Avo va gu zama guti vathu vaphya ni ava va gumbidego, nigu va ngu gola gu hi bangaladza thumoni nya lithembwe ni sihevbuloni sathu nya Bhibhiliya. Vawoneleyi vava va gu vbwegedzwa khu madhota guhavisani va bwe va hi tiyisa. Va ngu vega dziganelo dzi tiyisago mitshanganoni nya libandla ni mitshanganoni nya yikhongolo. — Mithumo 15:35.

Va ngu khathaleya vatshavbo. Vawoneleyi nya sipandre va ngu khathala ngudzu khu makhalelo nya mabandla khu liphuvboni. Avo va gu tshangana ni madhota ni vaphasedzeyi nya libandla gasi gu gevisa gudandra nya libandla ni gu va ninga wusingalagadzi wu phasago gasi va gira gwadi thumo wawe. Va ngu phasa vapiyonero gu dugeleya thumoni wawe nya gutshumayele, va bwe va tsaka khu guti ava va ngo pheyago gu hengeya ni Dzifakazi ni gu wona edzi va dandrago khidzo khu liphuvboni. Moyo ni moyo nya vandriyathu vava a gu dzi ningeya khu gudzina kha nga “githumi gikhwathu” gasi gu hi phasa. (2 Vakorinto 8:23) Ethu hi yede gu pimedzeya gukhodwa ni gudziningedzeya gwawe ga Nungungulu. — Vahebheru 13:7.

• Khu ginani vawoneleyi nya sipandre va endreyago mabandla?

• U nga phasega kharini wa gu endredwa khavo?

Go dugeleya mhango, Dzifakazi dza Jehovha dza gu dzegeya gu gira malulamiselo gasi gu ya phasa vandriyawe va dugeledwego khiyo. Gudzigaradza gogo go yeyedza wukhongolo nya lihaladzo lathu khu vandriyathu. (Johane 13:34, 35; 1 Johane 3:17, 18) Ha gu phasedzeya kharini?

Ha gu phasedzeya khu dzitsapawu. Tepo gu nga manega ndzala nya yikhongolo Judheya, maKristo nya gupheye ya Antiyokiya ma di rumeya dzitsapawu gasi gu phasa vandriyawe va liphuvboni. (Mithumo 11:27-30) Anethu ha guti gu khethu vandriyathu tigoni nyo khaguri va ngu emisana ni sigaradzo, ha gu rumeya mihengo yathu khu gu thumisa libandla gasi gu phasedzeya ava va gomogo gutshanisekani. — 2 Vakorinto 8:13-15.

Ha gu ninga giphaso gi vbwetegago. Madhota yaya ma gomogo gipandreni gi nga dugeledwa khu mhango ma gu vbwetedzeya givbango ni givbango nya libandla gasi gu tiyisega gu khayo vatshavbo va manegide nigu va vbulugide. Gu ngu wumbwa kometi nya gu lamuleye dzimhango gasi gu thangeya gukabanisedwa nya guhodza, mati nyo seye, guambala, wulanga nya gu khale ni gu khathaleya vadwali. Dzifakazi nya dzingi dzi tigo mithumo nya gu hambanehambane yi vbwetegago dza gu dzi ningedzeya dzi bwe dzi dzi livbeya dzabune gasi gu ya phasedzeya mithumo nya gulamuleye dzimhango mwendro gu vbahedza dzinyumba ni dziSalawu nya Mufumo. Gupwanana gwathu kha nga hengeledzano ni esi hi si hevbudego khu gu thuma hatshavbo sa gu hi gira hi kodza gu rumeya sithumi ni satshavbo si vbwetegago khu guvbiredza ga gu dugeleya sigaradzo wulangawo. Ambari olu hi thawuludzeyago libogo “vandriyathu gukhodwani,” sa gu kodzega hi ngu phasa vambe navo, na hi si khedzi wukhongeli va lumbago uwo. — Vagalatiya 6:10.

Ha gu singadza ni gu thaveleya vathu khu liphuvboni. Ava va dugeledwago khu mhango vo vbweta guthaveledwa ngudzungudzu. Dziteponi dzodzo, ethu ha gu ningwa tshivba khu Jehovha, ‘Nungungulu nya guthaveleye gwatshavbo.’ (2 Vakorinto 1:3, 4) Ethu hi ngu ganeya khu situmbiso nya Bhibhiliya ni ava va gomogo gutshanisekani, hi va tiyisa gu khethu nugunugu Mufumo wa Nungungulu wu na vbedza dzimhango dzatshavbo dzi vangago wuvi ni gutshaniseka. — Gutuledwa 21:4.

• Khu ginani Dzifakazi dzi kodzago gu phasa vambe khu guvbiredza ga gu dugeleya dzimhango?

• Ha gu thaveleya kharini khu liphuvboni ava va vbulugidego dzimhango?

Nari vbafuvbi ni gufa, Jesu bhude ni vana nya vapizane vaye khu phuvbo, a gu — Pedro, Jakobe, Johane ni Andreya. Tepo Jesu a nga ba a profeta khu giwonegiso nya gumanege gwaye matshiguni nya guhegise, giride giwudziso nya lisima: ‘Khu gevbini githumi nya gutumbege, nya gugengeye, gile gi na vegwago mbeli nya sithumi sikwawe khu pfhumu, gasi gu si ninga guhodza khu tepo yi vbwetegago?’ (Matewu 24:3, 45; Marko 13:3, 4) Jesu a di gu tumbisa vapizane vaye gu khuye kha nga “pfhumu” yawe, uye a na emisa vathu va na ningago guhodza nya liphuvbo nya simasima ga valandreyi vaye matshiguni nya guhegise. Khu vamani va wumbago githumi gegi?

Tsawa nya wudugwana nya valandreyi va Jesu va todzidwego. “Githumi” gyogyo gya gu tidwa kha nga Huwo nya Guthangeye nya Dzifakazi dza Jehovha. Igyo gya gu ninga guhodza nya liphuvbo khu tepo yakona ga vakhozeyi vakwawe va Jehovha. Ethu ha gu tumba githumi gegi nya gutumbege gasi gu simama gu hi ninga gipimo nya ‘guhodza khu tepo yi vbwetegago.’ — Luka 12:42.

Gya gu sayisa ndranga ya Nungungulu. (1 Thimoti 3:15) Jesu ningide githumi gegi rwalo nya wukhongolo ngudzu nya gu thangeye gipandre gya mafuni nya hengeledzano ya Jehovha — gasi gu woneleya dzithomba dzayo, gu thangeya thumo nya gutshumayele ni gu hi hevbudza khu gu thumisa mabandla yathu. Khu kharato, gasi gu hi ninga esi hi si vbwetago khu tepo yakona, ‘githumi nya gutumbege ni nya gugengeye’ gya gu kabaniseya guhodza nya liphuvbo khu dzilivru hi dzi thumisago thembweni, ni milongoloko nya mitshangano nya libandla ni mitshangano nya yikhongolo.

Githumi gegi gi tumbegide lisineni nya Bhibhiliya ni thumoni wagyo nya gu tshumayele mahungu nya yadi, nigu gi gengede khedzi gi khathaleyago khidzo silo satshavbo si gomogo mafuni gi nga ningwa khu Kristo gasi gu si sayisa. (Mithumo 10:42) Jehovha a ngu kategisa thumo wagyo khu gu engedzeya ni gu tadza guhodza nya liphuvbo. — Isaya 60:22; 65:13.

• Khu mani a nga emiswa khu Jesu gasi gu ninga guhodza nya liphuvbo vapizane vaye?

• Githumi gi tumbegide ni gu gengeya khu ndziya muni?

Omu nya lizana myaga nya gupheye, tsawa nya wudugwana nya “vapostoli ni madhota” wu nga ba wuri Jerusalema wu di gu thuma kha nga huwo nya guthangeye gasi gu piya mahungu nya lisima khu lina nya libandla latshavbo nya wuKristo la ava va todzidwego. (Mithumo 15:2) Avo va di gu piya mahungu khu monyo moyo hwane nya gu ba va bhude khesi Milowo yi ganeyago va bwe va dzumeya gu thangedwa khu liphuvbo la Nungungulu. (Mithumo 15:25) Ayoyo khayo mathumelo ma landredwago muhuno.

Ya gu thumiswa khu Nungungulu gasi gu gira gugola gwaye. Vandriyathu nya vama va todzidwego va thumago kha nga Huwo nya Guthangeye va ngu khathala ngudzu khu Lito la Nungungulu nigu va vidzidwe gwadi gasi gu thangeya silo nya liphuvbo ni edzi thumo wathu wu yedego gu girwa khidzo. Avo va gu tshangana semana ni semana gasi gu bhula khu silo si yelanago ni vandriyathu mafuni gwatshavbo. Kha nga omu nya lizana myaga nya gupheye, iyo ya gu ninga sileletelo si seketedwago omu nya Bhibhiliya, khu gu thumisa malangaliya mwendro vawoneleyi va gimbiyagimbiyago ni vambe. Isoso sa gu phasa vathu va Nungungulu gu pimisa ni gu gira silo khu gupwanana. (Mithumo 16:4, 5) Huwo nya Guthangeye ya gu woneleya gudongisedwa nya guhodza nya liphuvbo, yi kutsa vatshavbo gu thangisa thumo nya gu tshumayele Mufumo, yi bwe yi woneleya guemiswa ga vandriyathu nya vama gasi gu thangeya mabandla.

Yi ngu dzumeya gu thangedwa khu liphuvbo la Nungungulu. Huwo nya Guthangeye ya gu lomba sileletelo ga Pfhumu nya Yikhongolo ga dzatshavbo, Jehovha, ni ga Hungo nya libandla, Jesu. (1 Vakorinto 11:3; Vaefeso 5:23) Sivbango nya huwo yeyi kha si dzi woni kha nga vafumeli nya vathu va Nungungulu. Iso, gumogo ni maKristo yatshavbo ma todzidwego, ‘sa gu landreya Nvutana [Jesu] malangani yatshavbo’ yi hongolago. (Gutuledwa 14:4) Huwo nya Guthangeye yi ngu bonga ha gu yi gombeleya.

• Khu vamani va nga ba va gira gipandre nya huwo nya guthangeye omu nya lizana myaga nya gupheye?

• Huwo nya Guthangeye muhuno ya gu yeyedza kharini gu khiyo ya gu vbweta gu thangedwa khu Nungungulu?

Bheteli lina nya giHebheru li gu na ni tshamuselo nya gu pwani “Nyumba ya Nungungulu.” (Genesi 28:17, 19) Lina li ninganago gwadi gu rana dzinyumba dzi emisidwego khu Dzifakazi dza Jehovha malangani nya mangi gasi gu thangeya ni gu phasedzeya khavbo thumo nya gutshumayele. Huwo nya Guthangeye ya gu thuma tsindza gwathu nya mafu yatshavbo, a gu Novha Yorki, Estados Unidos, nigu ya gu woneleya thumo nya dzixikiritori nya matamo mayigoni nya mangi. Kha nga tsawa, ava va thumago dzinyumbani momo va gu ranwa pwani ndranga ya Bheteli. Kha nga ndranga nya gu olovelege, avo va gu vbanya va bwe va thuma vatshavbo, va hodza gumogo, ni gu hevbula gumogo Bhibhiliya khu gupwanana. — Ndzimo 133:1.

Wulanga nya guhathege avba sivbango nya ndranga yoyo si thumago avbo khu sighingi. Dzindrangani dzatshavbo dza Bheteli, gu na ni vama ni vanyamayi nya maKristo va dzi ningedzeyago ngudzu gu gira gugola ga Nungungulu ni gu thumeya Mufumo tepo yatshavbo. (Matewu 6:33) Gu mwalo ne moyo wawe a hakhago dzitsapawu khu kotani nya thumo a wu girago, ganiolu va ngu ningwa kwartu ni guhodza va bwe va ningwa sikinyetana gasi gu dzi khathaleya mili. Muthu ni muthu Bheteli na ni thumo, a ngu kodza gu thuma xikiritori, kuzinyani, mwendro omu gu hodzedwago umo. Vambe va gu thuma gughandlani nya dzilivru, guagisani, guhandzani nya sombo nya guambale, gulungisani nya esi si ghohekidego, mwendro simbe.

Wulanga nya vathu va pharegidego khu gu phasedzeya thumo nya gu tshumayele Mufumo. Thumo nya wukhongolo wu girwago khu Bheteli gu vbohisa lisine nya Bhibhiliya ga vathu nya vangi khavba si kodzegago khavbo. Bruxura yeyi giyeyedzo nya isoso. Yi lovidwe na yi gu woneledwa khu Huwo nya Guthangeye, yi rumedwa khu dzikomputadhori ga mazana nya mitsawa nya vavbindrugedzeyi mafuni gwatshavbo, yi ghandlwa khu makina nya gu tutume ngudzu omu nya dziBheteli nya dzingi dzi ghandlago, khu guhegisa yi rumedwa mabandlani ma vbindrago 110 000. Avba nya gighava gimwegyo ni gimwegyo nya thumo wowo, dzindranga dza Bheteli dzi ngu phasa ngudzu thumoni wowu nya givbiredza ngudzu ga yatshavbo — gu gu gu tshumayela mahungu nya yadi. — Marko 13:10.

• Khu vamani va thumago Bheteli, nigu va gu sayiswa kharini?

• I thumo muni nya givbiredza wu phasedzedwago khu thumo nya dzi Bheteli dzatshavbo?

Sivbango nya ndranga ya Bheteli sa gu thuma omu nya sipandre nya mithumo nya gu hambanehambane, na si gu phasedzeya thumo nya gutshumayele nya litigo limwedo mwendro nya mayigo nya mangi. Sa gu thuma mitsawani nya wuvbindrugedzeyi, gughandlani nya dzirevhista, gupatani nya dzipajina nya dzilivru, guvegedzeyani nya dzilivru, gu gravhari mahungu nya guengiseye ni dzivhidhyu, mwendro gu khathaleya simbe silo sa mayigoni momo.

Thumo wa gu woneledwa khu Kometi nya Litamo. Huwo nya Guthangeye ya gu rwega Kometi nya Litamo thumo nya gu woneleye xikiritori mweyo ni mweyo nya litamo. Kometi yoyo ya gu wumbwa khu madhota mararu mwendro guvbindra ma vidzidwego gwadi. Tepo yatshavbo iyo ya gu bikeya Huwo nya Guthangeye mahungu ma yelanago ni gudandra nya thumo omu nya litigo li woneledwago khu kometi yoyo gumogo ni sigaradzo sesi yimbe tepo si dugeleyago. Mibiko yoyo ya gu phasa Huwo nya Guthangeye gu hatha mahungu ma yedego gu lowa omu nya dzilivru ni gu hevbudwa mitshanganoni nya libandla ni mitshanganoni nya yikhongolo. Gu ngu tala gu rumedwa vaemeyi nya Huwo nya Guthangeye va endreyago matamo gasi gu ninga sileletelo Dzikometi nya Matamo nya gu gimbidzise khiso thumo wadzo. (Mavingu 11:14) Khu matshigu yoyo gu ngu lulamiswa longoloko nya guhathege wu patago ganelo yi vegwago khu muemeyi nya tsindza gasi gu tiyisa ava va vbanyago vbafuvbi ni xikiritori nya litamo.

Ga gu girwa thumo wu phasago mabandla. Vandriyathu nya vama nya guvidzwe va thumeyago xikiritori nya litamo va gu pasisa silombo nya gu tule mabandla nya maphya. Vandriyathu vovo va ngu bwe va ninga sileletelo si yelanago ni thumo nya vapiyonero, vamisiyonaryo ni vawoneleyi nya sipandre va thumeyago tigoni gu woneledwago khu xikiritori yoyo nya litamo. Va ngu dongiseya mitshangano nya yikhongolo, va woneleya guvbahwa nya dziSalawu nya dziphya nya Mufumo, va gira satshavbo si vbwetegago gasi gu dzilivru dzi rumedwa mabandlani. Satshavbo si girwago xikiritori nya litamo sa gu phasedzeya gutadzisega nya thumo nya gutshumayele. — 1 Vakorinto 14:33, 40.

• Dzikometi nya Matamo dza gu phasa kharini Huwo nya Guthangeye?

• Mithumo muni yi girwago xikiritori nya litamo?

Gasi gu gira gwadi thumo nya gu huweleye “mahungu nya yadi” ga vathu vatshavbo va tigoni, “nya mafumbu, ni mahundzu, ni malimi yatshavbo,” ethu ha gu dusa dzilivru khu malimi ma vbindrago 750. (Gutuledwa 14:6) Ha gu wu gira kharini thumo wowo nya gugaradze? Ha gu wu gira khu gu phaswa khu tsawa nya valovi va phalalegedego mayigoni ni vavbindrugedzeyi nya gudzigaradze. Vatshavbo vovo Dzifakazi dza Jehovha.

Mahungu ya kona mo pheya khu gu lowa khu giNgiza. Huwo nya Guthangeye ya gu thangeya thumo nya Gipandre nya Wulovi gi thumeyago tsindza gwathu nya mafu yatshavbo. Gipandre gegi gya gu woneleya mithumo yi ningwago valovi va thumago tsindza ni matamoni nyo khaguri. Olu hi gu na ni valovi nya gu hambanehambane hi ngu kodza gu ganeya khu silo nya giwuthu nya mayigo ni makhalelo nya gu hambanehambane, si gu esi si girago gu dzilivru dzathu dzi tsakisa vathu va mayigoni gwatshavbo.

Hwane nya gu lowe, mahungu yoyo ma gu rumedwa ga vavbindrugedzeyi. Hwane nya gu ba ma lovidwe, ma lulamiswa ma bwe ma pasiswa, mahungu yoyo ma gu rumedwa khu gu thumisa dzikomputadhori ga mitsawa nya vavbindrugedzeyi va phalalegedego mafuni, ava va vbindrugedzeyago, va popola, ni gu agisa mahungu. Avo va gu dzi garadzeya gu hatha ‘malito nya gululame nya lisine’ khu malimi yawe ma phasago vahevbuli nya malimi yoyo gu pwisisa mongo wa wumowo wu manwago khu vahevbuli nya giNgiza. — Muhevbudzi 12:10.

Dzikomputadhori dza gu vbiredzisa thumo. Komputadhori kha yi kodzi gu tshikedza vathu vava va lovago mwendro va vbindrugedzeyago mahungu. Ganiolu, thumo wawe wu ngu kodza gu vbiredziswa khu gu thumisa dzidhisiyonaryo, dzigramatika, ni mambe materiyali nya gu kembe khayo mahungu ma thedwego omu nya komputadhori. Dzifakazi dza Jehovha dzi giride Sistema Electrônico de Fotocomposição Multilíngue (MEPS), wu gu longoloko nya komputadhori wu thumisedwago gu pata mahungu nya mazana nya malimi ni sithombe gasi si khadzisa wulivru si bwe si ghandlwa.

Khu ginani hi dzi garadzago ngudzu kharati, ambari khu malimi ma ganedwago khu vathu nya vadugwana basi? Khu gu Jehovha a gu vbweta gu khuye “vathu vatshavbo va vbanye ni guti lisine.” — 1 Thimoti 2:3, 4.

• Dza gu lowa kharini dzilivru dzathu?

• Khu ginani hi vbindrugedzeyago dzilivru dzathu khu malimi nya mangi ngudzu?

Hengeledzano yathu yi ngu dusa yi bwe yi kabaniseya mazana nya dzimiliyoni nya dziBhibhiliya ni dzimbe dzilivru mwaga ni mwaga nya mba lomba dzitsapawu. Hi ngu vbaha hi bwe hi sayisa dziSalawu nya Mufumo ni dzixikiritori nya matamo. Hi ngu sayisa magumi nya mazana nya sithumi sa Bheteli ni vamisiyonaryo, hi bwe hi phasa vathu va dugedwego khu mhango. Khu satshavbo soso, adzina u ngu dzi wudzisa gu khuwe, ‘Va gu dzi mana kharini dzitsapawu nya gu gire satshavbo soso?’

Kha hi hengiseyi gipandre nya wugumi, ne kha hi gurumedzi miningelo. Ambari olu gu vbwetegago dzitsapawu nya dzingi gasi gu gimbidzisa thumo wathu nya gutshumayele, ethu kha hi hengiseyi dzitsapawu. Gu ngu vbindra lizana myaga wughandli nya wuvili nya revhista A Murinzeli na wu ganede gu khuwo hi ngu khodwa gu khethu ha gu phaswa khu Jehovha thumoni wathu nigu khu kotani nya isoso “gima kha hi na nga lomba gu phaswa khu dzitsapawu dza vathu.” Kha nga edzi si nga ganedwa, ethu gima hi si gu lombi dzitsapawu! — Matewu 10:8.

Thumo wathu wa gu phasedzedwa khu miningelo nya gudzine. Vathu nya vangi va ngu tsakeya thumo wathu nya gu hevbudze Bhibhiliya va bwe va gira miningelo nya gu wu phasedzeye. Dzifakazi dzabune dzi ngu ningeya khu gutsaka tepo yadzo, tshivba, dzitsapawu, ni dzimbe dzithomba gasi dzi gira gugola ga Nungungulu mafuni gwatshavbo. (1 Dzikoronika 29:9) Dzisalawuni nya Mufumo ni omu gu giredwago mitshangano nya sipandre ni eyi nya mighanga gu na ni dzikaxa nya miningelo omu ava va dzinago gu gira miningelo va kodzago gu yi theya umo. Vambe va ngu kodza gu gira miningelo khu gu thumisa pajina yathu nya internet, jw.org. Gipandre nya gikhongolo nya dzitsapawu hi dzi hakhago gya guta khu mandzani nya vathu nya sisiwana, va fanago ngudzu ni noni yile yi nga zundzwa khu Jesu khu gu theya sikinyetana sivili kwamani nya tempeli. (Luka 21:1-4) Khu kharato, ni wevbi a dzinago a ngu kodza gu ‘vega gilogyo khu phuvbo’ gasi a ningeya “khu gu dzina nya monyo waye.” — 1 Vakorinto 16:2; 2 Vakorinto 9:7.

Hi ngu khodwa gu khethu Jehovha a na simama gu kutsa myonyo ya ava va vbwetago gu mu zundza khu dzithomba dzawe khu gu phasedzeya thumo nya Mufumo gasi gugola gwaye gu girwa. — Mavingu 3:9.

• Ginani gi hambanisago hengeledzano yathu ni mambe mafumbo nya wukhongeli?

• Ya gu thumiswa kharini miningelo nya gudzine?

Kha nga edzi si yeyedzwago khu lina Salawu nya Mufumo, esi si hevbudwago ndrani nya Salawu so seketedwa omu nya Bhibhiliya na si gu ganeya ngudzungudzu khu Mufumo wa Nungungulu — gi nga ba gri igyo gihungo nya mahungu nya gutshumayele ga Jesu. — Luka 8:1.

Dzinyumba dzi giredwago umo wukhozeyi nya lisine. Thumo nya gu tshumayele mahungu nya yadi nya Mufumo wa gu thangedwa gukhugeya avbovbo. (Matewu 24:14) Dzisalawu nya Mufumo dzi ngu hambana khu wukhongolo ni mavbahelo, ganiolu dzatshavbo dzinyumba dzodzo khandri dzikhongolo ngudzu nigu kha dza mbura ngudzu gu vbindra pimo. Nya dzingi dzakona dza gu thumiswa khu mabandla nya gu vbindre limwedo. Myagani yeyi nya guhegise, hi vbahide magumi nya magumi mazana nya dziSalawu nya Mufumo nya dziphya (gipimo nya livbandre khu litshigu) gasi hi longoloka gwadi ni guengedzeya nya mabandla yathu. Sa gu kodzega kharini isoso? — Matewu 19:26.

Dza gu vbahwa khu dzitsapawu nya miningelo nya gudzine. Miningelo yoyo ya gu rumedwa xikiritori nya litamo gasi gu phasa mabandla ma vbwetago gu vbaha mwendro gu vbahedza Salawu nya Mufumo.

Dza gu vbahwa khu vathu nya gu dzi ningedzeye nya makhalelo nya gu hambanehambane, na va si hakhiswi khu thumo wawe. Omu nya mayigo nya mangi gu emisidwe Mitsawa nya gu vbahe dziSalawu nya Mufumo. Mitsawa yoyo nya sivbango nya guvbahe ni vale va dzi ningedzeyago ya gu khala khu gu gimbiyagimbiya mabandlani ya tigoni momo, na yi gu vboha ambari malangani nya hwindzo ngudzu, gasi gu ya phasa mabandla ya umomo gu vbaha dziSalawu dzayo nya Mufumo. Omu nya mambe mayigo gu emisidwe Dzifakazi dzi ninganedwago gasi gu thangeya thumo nya gu vbahe ni gu vbahedza dziSalawu nya Mufumo ndrani nya gipandre dzi gi woneleyago. Ambari olu vameseri nya vangi va dzi ningedzeyago gwatshavbo omu gu vbahwago Salawu, ava va talago ngudzu khava va lumbago libandla lolo va dzi ningedzeyago gasi gu phasedzeya. Liphuvbo la Jehovha gumogo ni gudzigaradza ga vathu vaye khiso si girago gu thumo wowu wu kodzega. — Ndzimo 127:1; Vakolosi 3:23.

• Khu ginani dzinyumba dzathu nya wukhozeyi dzi ranwago pwani dziSalawu nya Mufumo?

• Sa gu kodzega kharini gu vbaha dziSalawu nya Mufumo mafuni gwatshavbo?

Dzisalawu dzatshavbo nya Mufumo dza Dzifakazi dza Jehovha dzi rwade lina nyo age la Nungungulu. Khu kharato, ha gu wona gu khethu gu hengeya gusayisani ni gulungisani nya Salawu nya Mufumo lithomo nigu gipandre nya wukhozeyi wathu nya guage. Vatshavbo va ngu kodza gu hengeya.

Hwane nya mitshangano, dzi ningedzeye gu phasedzeya gu agisa. Hwane nya tshangano moyo ni moyo nya libandla, vandriyathu nya vama ni vanyamayi va ngu agisa Salawu nya Mufumo gasi yi sayisega. Khu tepo ni tepo, yi ngu agiswa khu ndziya nya gutshinge. Thumo wowo wa gu thangedwa khu lidhota mwendro muphasedzeyi nya libandla, na gu landreya sasamedzo nya silo si vbwetago gu girwa. Sa gu ba si vbwetega, vomo ava va dzi ningedzeyago gasi gu vbiyela, gu handza vbavbatshi, gu phuphuta kudzudzwane, gu vegedzeya dzikadera, gu agisa sipeto, gu handza dzijaneya, gu dzudzuga ndzilo, mwendro gu vbiyela vbavbandze ni gu sayisa senge. Gumogo khu mwaga, khu vbadugwana gakona, gu ngu vegwa litshigu gasi gu agiswa Salawu nya Mufumo khu guvbeleya. Khu gu pata sanana sathu mithumoni nyo khaguri, ha gu si hevbudza gu yeyedza githawo khu wulanga wathu nya wukhozeyi. — Muhevbudzi 5:1.

Dzi ningedzeye gasi gu phasedzeya gu lungisa ni gevbini gi vbwetegago. Mwaga ni mwaga, Salawu nya Mufumo yi ngu khedzwa gwadi ndrani ni vbavbandze gasi gu wona esi si nga ghoheka. Hwane nya gukhedzwe gogo, gu ngu lungiswa-lungiswa sipandre nyo khaguri gasi yi simama na yi khalegide. Isoso sa gu phasa gu mba ghohekedwa khu silo nya gu dhure ngudzu. (2 Dzikoronika 24:13; 34:10) Salawu nya Mufumo yi agidego ni gukhalega khiyo yi gu wulanga wu ninganedwago khu gu khozeya umo Nungungulu wathu. Khu gu hengeya thumoni wowo, ha gu yeyedza edzi hi mu haladzago khidzo Jehovha ni edzi hi yi golago khidzo nyumba yathu nya gukhozeye. (Ndzimo 122:1) Isoso niso sa gu phasa vathu gu tsakeya wukhozeyi wathu. — 2 Vakorinto 6:3.

• Khu ginani hi si yeligo gu diga gu khathaleya nyumba yathu nya wukhozeyi?

• Ginani gi girwago gasi Salawu nya Mufumo yi khala na yi agide?

U ngu dzina gu hevbula mahungu nyo khaguri khu guvbeleya gasi gu engedzeya guti gwago nya Bhibhiliya? U ngu vbweta guti lowo mwendro muthu, wulanga, mwendro gilo gi khumbugwago omu nya Bhibhiliya? Mwendro u ngu dzi wudzisa gu khuwe ina furi Lito la Nungungulu li ngu kodza gu gu phasa siloni si gu garadzago guvbanyani? Wa gu ba u dundrugeya isoso monyoni gwago, indra bhibliyoteka ya Salawuni nya Mufumo.

Yi na ni dzilivru ni simbe si hi phasago gu hevbula mahungu nya gu hambanehambane khu guvbeleya. Adzina u mwalo dzilivru dzatshavbo dzi seketedwago omu nya Bhibhiliya dzi dusidwego khu Dzifakazi dza Jehovha dzi gomogo khu lidimi lago. Ganiolu, bhibliyoteka ya Salawuni nya Mufumo yi na ni dzilivru nya dzingi dzi ngarigo gu duswa. Si ngu kodzega gu iyo na yiri ni mafumbo nya gu hambanehambane nya dziBhibhiliya, dhisiyonaryo nya yadi, ni dzilivru nya giphaso. Na yi si gu pheyi mitshangano ni hwane nya iyo, tshulega gu thumisa ni yevbi livru yi gu romo bhibliyoteka. Go ba guri ni komputadhori, adzina yi na ni Biblioteca da Torre de Vigia, yi gu longoloko wu gu na ni dzilivru dzathu nya dzingi ngudzu. Yi ngu vbevbuga gu yi thumisa, nigu u ngu kodza gu vbwetedzeya mahungu u ma vbwetago khu gu lova gihungo gyakona, lito, mwendro livhesi nya Bhibhiliya.

Yi ngu phasa sihevbuli nya Tshangano nya thumo ni mavbanyelo. U ngu kodza gu londrowa gwadi bhibliyoteka ya Salawuni nya Mufumo tepo u dongiseyago sipandre sago. Muwoneleyi nya Tshangano nya thumo ni mavbanyelo khuye a woneleyago bhibliyoteka yoyo. Khuye a yedego gu theya dzilivru dzi ngarigo gu duswa ni gu yi sayisa gwadi. Uye mwendro muhevbudzi wago nya Bhibhiliya a ngu kodza gu gu yeyedza mavbwetelo nya mahungu u ma vbwetago. Ambari ulolo, gu ngu himbedzedwa gu duga khu Salawuni nya Mufumo ni dzilivru dza bhibliyoteka. Hi na gira gwadi gambe ha gu sayisa dzilivru dzodzo ni gu mba dzi loveteya.

Bhibhiliya yari khiyo gasi gu ‘mana guti ga Nungungulu,’ hi yede gu dzina gu gu vbwetedzeya kha nga “thomba yi sihidwego.” (Mavingu 2:1-5) Bhibliyoteka ya Salawuni nya Mufumo yi nga gu phasa gu pheya gu vbwetedzeya guti gogo.

• Dzilivru muni ni simbe si phasago gu vbwetedzeya mahungu khu guvbeleya si gu romo bhibliyoteka ya Salawuni nya Mufumo?

• Khu mani a kodzago gu gu phasa gu londrowa gwadi bhibliyoteka ya Salawuni?

Jesu Kristo embede esi valandreyi vaye: “Wu na dzure mwenge wanu mahoni nya vathu, gasi, va wone mithumo yanu nya yadi, va dhumise Babe wanu a guromo ndzadzini.” (Matewu 5:16) Gasi gu gira isoso, ha gu londrowa gwadi tekinolojiya ya matshigwanaya, gupata ni interneti. Pajina yathu nya interneti, jw.org/toh, khiyo ndziya nya nayo nya gu mane khiyo mahungu ma yelanago ni gukhodwa ni mithumo nya Dzifakazi dza Jehovha. Ginani gi yeyedzwago omu nya pajina yoyo?

Mihlamulo nya siwudziso si oloveyago gu girwa maningano ni Bhibhiliya. U ngu kodza gu mana mihlamulo nya siwudziso nya lisima ngudzu si giridwego. Khu giyeyedzo, sidangaliyana Gutshaniseka gu na tshuka gu vbeya kamo? ni Ina ava va fudego va na wuga va vbanya gambe? si ngu manega omu nya interneti khu malimi ma vbindrago 600. U nga mana gambe Tradução do Novo Mundo khu malimi ma vbindrago 130 ni dzilivru dzi phasago gu hevbula Bhibhiliya, gupata ni livru Ginani hi hevbudzwago khu Bhibhiliya? ni dzirevhista dzi ngarigo gu duswa nya A Murinzeli ni Khindlimuka! Nya dzingi nya dzilivru dzedzi dzi ngu kodza gu hevbudwa mwendro gu engisedwa khomu nya interneti ambari gu tshiswa gasi dzi engisedwa vbavbandzi nya interneti khu MP3, gu wonwa khu PDF mwendro EPUB. U ngu kodza gambe gu ghandla dzipajina nyo khaguri gasi gu ninga muthu a dzi tsakeyago khu lidimi laye! Mambe mahungu ma gu nonedzwa khu vhidhyu khu malimi nya mangi nya mawogo. U ngu kodza gu tshisa gulerwi nya Bhibhiliya khomu nya interneti, dzidrama dzi seketedwago omu nya Bhibhiliya, ni dzindzimo nya gumbure gasi gu dzi hungateya khidzo.

Mahungu nya lisine ma yelanago ni Dzifakazi dza Jehovha. Umomo gambe gu ngu thedwa mahungu nya silo si ngarigo gu girega ni dzivhidhyu dzi yeyedzago thumo wathu wa mafuni gwatshavbo, sigiro si dugeleyago Dzifakazi dza Jehovha, ni mithumo yathu nya gu dzi garadzeye gu phasa ava va dugedwego khu dzimhango. U ngu kodza gu mana sitiviso nya mitshangano nya mughanga yi ngo gu tago ni makhero nya dzixikiritori dzathu nya matamo.

Khu dzindziya dzedzi, ha gu wonengedzeya guwonegeya nya lisine kala malangani ya hwindzo ngudzu mafuni gwatshavbo. Vathu va mayigo-khongolo yatshavbo, gupata ni Antartidha, va ngu phasega. Ha gu lombeleya gu khethu ‘mahungu ya Jehovha ma andra’ khu guvbiredza mafuni gwatshavbo, gasi Nungungulu a zundzwa. — 2 Vatesalonika 3:1.

• Pajina yathu nya interneti, jw.org/toh, ya gu phasa kharini vathu nya vangi gu hevbula lisine nya Bhibhiliya?

• Ginani u vbwetago gu gi wona omu nya pajina yathu nya interneti?