Deluni gwangu, . . . eni nyi na mi hefemudza”

1. Khu guya khu Matewu 11:28-30, gitumbiso muni gi giridwego khu Jesu?

JESU a di tumbisa silo nya sadi ngudzu ga gidzemo gi nga ba gi mu engiseya. A di khuye: “Deluni gwangu, eni nyi na mu hefemudza.” (Leri Matewu 11:28-30.) Igyogyo khandri gitumbiso nya mahala. Khu giyeyedzo, nga dundrugeya khesi Jesu a giredego nyamayi moyo a nga ba ari ni madwali nya makhongolo.

2. Ginani egi Jesu a giredego nyamayi moyo a nga ba a dwala?

² Nyamayi moyo a di gu vbweta giphaso. A di gu hongode ga va dhogodheya nya vangi na gu tumba gu khuye a na mana giphaso. Gu vbindride 12 myaga na gu tshaniseka ngudzu khu madwali, ganiolu mwalo a nga ba a si kodza gu mu phasa gu hawuluga. Khu guya khu nayo, uye a diri muthu nya mba handzega. (Levhi 15:25) Khavbovbo, apwa gu pwani Jesu a di gu hawulugisa vadwali, khu kharato a pheya gu mu vbwetedzeya. Tepo a nga mu mana, a di khuha tshoka nya libhadzi laye, khavbovbo a dzegeya gu hawuluga! Ganiolu Jesu giride nya singi nyo vbindre basi gu mu hawulugisa, uye a di phara nyamayi wule khu ndziya nya yadi, nyo bwe a dzipwa na gu haladzwa ni gu ningwa githawo. Khu giyeyedzo, tepo a nga ba a bhula naye, yeyedzide isoso khu gu thumisa lito “Mwanangu.” Nya mba kanakana, nyamayi wule dzipwide na gu tiyisidwe ngudzu! — Luka 8:43-48.

3. Siwudziso muni hi na si hlamulago?

³ U wonide gu khuwe nyamayi wule a di hongola ga Jesu? Uye giride gilogyo, kha khala khu mawogo. Anethu muhuno gu vbwetega hi dzi garadza gasi gu hongola ga Jesu. Muhuno, Jesu kha na nga hawulugisa khu gu thumisa siliwugiso ava va hongolago gwaye. Ganiolu uye a gu hi konvhidhari, khuye: “Deluni gwangu, . . . eni nyi na mi hefemudza.” Avba nya ndrima yeyi, hi na hlamula siwudziso sesi nya livbandre: “Hi nga hongola kharini ga Jesu? A di gu vbweta khuye ginani Jesu tepo a nga khuye: “RwaIani pingwi wangu?” Ginani hi nga gi hevbulago gwaye? Khu ginani thumo hi ningidwego khu Jesu, wu hi hefemudzago? Nigu hi nga simama kharini gu hefemula na hi rwade pingwi waye?

“DELUNI GWANGU”

4-5. Khu dzevbini dzindziya nyo khaguri hi nga hongolago khidzo ga Jesu?

⁴ Mweyo nya dzindziya nyo hongole khidzo ga Jesu, khu gu hevbula esi a si ganedego ni esi a giridego khavba hi si kodzago khavbo. (Luka 1:1-4) Mwalo a na hi gireyago isoso, gu vbwetega gu hi hevbula habune matimo yoyo. Ha gu hongola gambe ga Jesu khu gu hi hunga makungo nyo bhapatiswe hi bwe hi khala vapizane va Kristo.

⁵ Yimbe ndziya hi nga hongolago khiyo ga Jesu, khu gu hi yela madhota nya libandla ho ba hi vbweta giphaso. Jesu a gu thumisa “siningwa” soso nya vathu gasi gu khathaleya dzinvuta dzaye. (Efes. 4:7, 8, 11; Joh. 21:16; 1 Ped. 5:1-3) Hi yede gu pheya khethu hi lomba giphaso gyawe. Kha hi vireyi gu khethu madhota ma leri mapimo yathu gasi gu tugula esi hi si vbwetago. Nga wona esi ndriyathu moyo nyo pwani khuye Julian, a si ganedego: “Si lombegide gu nyi ema gu thumeya Bheteli khu kotani nya mawugelo yangu, khavbovbo moyo nya vandriyathu nyi ningide mawonelo nyo khuye tshukwana u lomba madhota ma ta gu tiyisa. Gupheyani, nyi di gu kheni kha nyi gi vbweti giphaso. Ganiolu, khu hwane, nyi di lomba giphaso, nigu liendro lolo nya wuhavisi va nyi giredego gi khade gimwegyo nya siningwa nya lisima ngudzu nyi gi hakhidego.” Madhota nyo tumbege nya nga aya ma endredego Julian ma nga hi phasa guti “mahingigedzo ya Kristo,” si thulago gu pwisisa ni gu pimedzeya mapimiselo yaye. (1 Kor. 2:16; 1 Ped. 2:21) Khu lisine egi gimwegyo nya siningiwa nya lisima ngudzu a hi ningidego.

“RWALANI PINGWI WANGU”

6. Ginani egi Jesu a nga ba a vbweta gu ganeya tepo a nga khuye: “RwaIani pingwi wangu”?

⁶ Tepo Jesu a nga khuye: “Rwalani pingwi wangu,” uye adzina a di vbweta khuye “dzumeyani wuthangeyi wangu.” Adzina gambe a di gu vbweta gu khuye “Rwalani pingwi wangu, gasi hatshavbo hi thumeya Jehovha gumogo.” Yatshavbo mitshamuselo yeyi ya gu yeyedza gu khiyo gu vbwetega hi dzi garadza.

7. Khu guya khu Matewu 28:18-20, i thumo muni hi rumidwego gu wu gira, nigu hi nga tiyisega khu ginani?

⁷ Ethu ha gu dzumeya konvhite ya Jesu tepo hi dzi hedzeledzago ga Jehovha hi bwe hi bhapatiswa. Jesu a gu rana vatshavbo gasi gu hongola gwaye, nigu uye kha na nga himbedzeya muthu a vbwetago gu thumeya Jehovha khu monyo waye watshavbo. (Joh. 6:37, 38) Vatshavbo valandreyi va Kristo va ningidwe lithomo nyo gire navo thumo owu Jehovha a rumidego Jesu gu wu gira. Hi nga tiyisega gu khethu tepo yatshavbo Jesu a na ba ari ni ethu gasi gu hi phasa gu gira thumo wowo. — Leri Matewu 28:18-20.

‘HEVBULANI KHENI’

8-9. Khu ginani vathu nyo dzinogise va nga ba va hongola ga Jesu, nigu siwudziso muni hi yedego gu dzi gira?

⁸ Vathu nyo dzinogise va di gu hongola ga Jesu. (Mat. 19:13, 14; Luka 7:37, 38) Khu ginani? Nga dundrugeya khu gu hambana gu gomogo vbakari ga Jesu ni Vafarisi. Vathangeyi vava nya dzitshetshe va diri mwalo lihaladzo nigu va di gu dzi khusedza. (Mat. 12:9-14) Jesu a diri ni lihaladzo ni gu dzinogisa. Vafarisi va di gu gola gu tidwa khu vambe kha nga vathu nya lisima ngudzu. Jesu ganede gu khuye avo kha va nga ba va gira silo nya sadi, a bwe a kutsa vapizane vaye gudzinogisa ni gu thumeya vambe. (Mat. 23:2, 6-11) Vafarisi va di gu havisa vambe, kholu vathu nya vangi va di gu thava gu tshuka va dugeledwa khu silo nya mba sadi va gu mba va engisa. (Joh. 9:13, 22) Jesu a di gu hefemudza vambe khu sigiro nya lihaladzo ni malito nya ndruda.

⁹ Ina u di nga hevbula silo soso khu ga Jesu? Dzi wudzise esi: ‘Ina nyi ngu tidwa kha nga muthu nya wadi ni gudzinogisa? Ina nyi dzi emisede gu gira ni mithumo nyo vbevbuge gasi gu thumeya vambe? Ina nyi ngu yeyedza wuwadi vambe?

10. Makhalelo muni aya Jesu a nga ba a ma andrisa vbakari gwaye ni valandreyi vaye?

¹⁰ Jesu a di gu andrisa gurula vbakari gwaye ni sithumi-kwawe saye, nigu a di gu gola gu va hevbudza gu gira gwadi thumo. (Luka 10:1, 19-21) A di kutsa valandreyi vaye gu gira siwudziso, nigu a di gu vbweta gupwa mawonelo yawe. (Mat. 16:13-16) Gu fana ni sifilori si vhikedwego ga dziphuvbo nyo vivbe, girame ni simbe, vapizane navo va di gu dandra gwadi khu liphuvboni. Avo va di gu vegisa gwadi mapimoni esi Jesu a nga ba a va hevbudza, va bwe va velega mihandro khu mithumo nya yadi.

11. Siwudziso muni hi yedego gu dzi gira?

¹¹ Ina u ngu thangeya vambe? Wa gu ba u thangeya, dzi wudzise esi: ‘Makhalelo muni nyi ma andrisago vbakari nya vathumi-khwathu thumotunu ni gaya? Ina nyi ngu andrisa gurula? Ina nyi ngu kutsa vambe gu gira siwudziso? Ina nyi dzi emisede gupwa mawonelo yawe?’ Gima kha hi vbweti gu dzegeleya Vafarisi, avo va nga ba va goroga va gu wudziswa silo nyo khaguri khu vambe va bwe va tshanisa ava va nga ba vari ni mawonelo nyo hambane ni aya yawe. — Marko 3:1-6; Joh. 9:29-34.

‘HI NA MANA GUTANGALA NYA MIHEFEMULO YATHU’

12-14. Khu ginani thumo hi ningidwego khu Jesu wu hi tangadzisago?

¹² Khu ginani si hi tangadzisago gu gira thumo owu hi ningidwego khu Jesu? Hi na ni sighelo nya singi, ganiolu hongoleni hi wonani sidugwana sakone.

¹³ Hi na ni vathangeyi nya vadi. Jehovha, Muthangeyi wathu nya khongolo, kha hi tshanisi mwendro gu mba hi yeyedza gubonga. Aye a ngu bonga khu thumo hi girago. (Hebh. 6:10) Nigu a ngu hi ninga tshivba hi yi vbwetago gasi gu khathaleya thumo a hi ningidego. (2 Kor. 4:7; Gal. 6:5) Jesu, Pfhumu yathu, a hi vegede giyeyedzo nya gyadi nya edzi hi yedego gu phara khidzo vambe. (Joh. 13:15) Nigu madhota, a gu ava va hi khathaleyago, ma gu zama gu dzegeleya Jesu, “Muhavisi nya khongolo.” (Hebh. 13:20; 1 Ped. 5:2) Avo va gu gira satshavbo va si kodzago gasi gu khala vathu nya vadi, va tiyisago vambe, ni gutiya-hwambo gasi ma hi hevbudza, ma hi thangeya ni gu hi vhikeya.

¹⁴ Hi na ni dzipari nya dzadi. Gu mwalo vambe vathu va gu na ni dzipari dzi va haladzago, dzi tsakago khu gu thuma gumogo kha nga ethu. Nga drundrugeya esi: Hi na ni lithomo nyo thume ni vathu va gu ni mavbanyelo nya yadi ganiolu va si dzi embeyigo gu khavo vakhongolo guvbindra vambe. Va na ni makodzelo nyo gire silo ganiolu va ngu dziti gambe gu khavo va ngu hegedwa, va bwe va wona vambe kha nga vatshukwana guvbindra avo. Avo kha va hi phari kha nga sithumi-khwathu basi, ganiolu kha nga dzipari. Nigu pwanano wathu wu tiyide ngudzu nyo bwe hi dzi emiseya gu feyana khu gyathu!

15. Hi yede gu dzipwa kharini khu thumo hi girago?

¹⁵ Hi na ni thumo nya wadi. Ha gu hevbudza vathu lisine khu Jehovha hi bwe hi tivegisa malipha ma ganedwago khu Sathane. (Joh. 8:44) Sathane a gu tshanisa vathu khu malipha ma va girago va dzipwa na vari mwalo gutumba. Khu giyeyedzo, a gu vbweta gu khuye hi khodwa gu khethu Jehovha kha na nga hi divaleya sighoho sathu ni gu khethu mwalo lihaladzo. Malipha yaya ma vivbide ngudzu nyo bwe ma gira vathu va dzipwa na vari mwalo gutumba! Tepo hi hongolago ga Kristo, sighoho sathu sa gu divaledwa. Nigu, lisine khu gu Jehovha a ngu hi haladza ngudzu ethu hatshavbo. (Rom. 8:32, 38, 39) Si ngu tsakisa ngudzu gu hi phasa vathu gu hevbula gutumba Jehovha hi bwe hi va yeyedza edzi va nga tshukwadzisago khidzo womi wawe!

SIMAMA GUTANGALA AMBARI OLU U RWADEGO PINGWI WA JESU

16. Rwalo owu Jesu a hi lombidego gu wu rwala wu hambanide kharini ni yimbe mirwalo hi yi rwalago guvbanyani gwathu?

¹⁶ Rwalo owu Jesu a hi lombidego gu wu rwala wu hambanide ngudzu ni mirwalo hi yi rwalago guvbanyani. Khu giyeyedzo, guvbeyani nya litshigu nya thumo, gutala nya vathu kha va dzipwi basi na va garade ganiolu na va gorogide gambe. Gu hambana ni isoso, hwane nyo ba hi vbedzide tepo nyo khaguri na hi thumeya Jehovha ni Kristo, gu tsaka hi gupwago gukhongolo ngudzu. Adzina hi nga dzipwa na hi garade guvbeyani nya litshigu, ganiolu si lombega gambe gu hi hongola mitshanganoni ni wutshigu. Ambari ulolo, gutala nya dzitepo, tepo yi vbeyago mitshangano hi bweleya gaya, hi ngu dzipwa na hi tiyisidwe ni gu tangadziswa. Isoso si ngu dugeleya gambe tepo hi tshumayelago ni tepo hi hevbulago Bhibhiliya. Tepo hi dzi garadzeyago gu gira isoso, ha gu dzipwa na hi tiyisidwe ni gu tangadziswa!

17. Ginani egi hi yedego gu gi dundruga maningano ni giemo gyathu, nigu hi yede gu dzi woneya ga ginani?

¹⁷ Hi yede gu dundruga gu khethu moyo ni moyo wathu na ni tshivba nyo khaguri. Khu kharato gu vbwetega hi dzi woneya ga esi hi si rwalago. Khu giyeyedzo, adzina hi nga gastari tshivba yathu na hi gu zama gu mana dzithomba. Nga wona esi Jesu a embedego lidzaha nyo khaguri nya gighanyi, li nga mu wudzisa esi: “Ginani nyi fanelago gu gira gasi nyi mane guvbanya nya gupindruge?” Lidzaha leli li di gu engisa nayo. Adzina a diri muthu nya wadi, kholu omu nya matimo ma gomogo omu nya invhangeli ya Marko, gu lovidwe gupwani Jesu ‘tsakisidwe khuye.’ Jesu a di mu ninga konvhite mweyo. A di khuye: “Indra u ya rengisa satshavbo u gu naso, Hwane nya iso delu uta nyi landrela.” Lidzaha lile li di gu si vbweta gu landreya Jesu, ganiolu kha la si kodza gu hambana ni ‘dzithomba dzalo nya dzingi.’ (Marko 10:17-22) Kha nga handro wakone, ilo li di kanyisa pingwi li nga ba li ningidwe khu Jesu li bwe li simama gu khala gumbi nya “dzithomba” dzaye. (Mat. 6:24) Nari khatshi u diri wulangani gwalo, na wu hathide ginani?

18. Ginani hi yedego gu khaleya gu gi gira, nigu khu ginani?

¹⁸ Tepo ni tepo, gwadi ngudzu gu hi dzi gevisisa gasi gu wona esi hi si thangisago guvbanyani gwathu. Khu ginani? Gasi gu tiyisega gu khethu ina hi ngu thumisa tshivba yathu khu ndziya nya wugengeyi gani. Nga wona esi si ganedwego khu lidzaha nyo khaguri nyo pwani khilo Mark, wari khuye: “Khu myaga nya yingi, nyi di gu pimisa gu kheni nya gu vbevbugisa womi wangu. Nyi diri piyonero, ganiolu tepo yatshavbo nyi di gu pimisa khu dzitsapawu basi, ni womi nyo khadzisege. Nyi di gu zama gu pwisisa gu kheni, gasi khu ginani womi wangu wu garadzago. Khavbovbo, nyi tugula gu kheni nyi di gu thangisa esi nyi nga ba nyi si vbweta, nyi ninga Jehovha tepo yi nga yi nyi tshaleya.” Mark a di vbindrugedza mapimiselo yaye ni womi waye gasi gu si kodza gu thumeya ngudzu Jehovha. Wari khuye: “Dzimbe dzitepo nyi di gu garadzega, ganiolu khu gu phaswa khu Jehovha ni Jesu, nyi ngu pala sigaradzo sangu.”

19. Khu ginani gu manega ni mawonelo nya yadi khu silo si gu na ni lisima?

¹⁹ Hi na simama gutangadziswa ambari ha gu ba hi rwade pingwi wa Jesu ha gu gira silo siraru. Gupheya, simama ni mawonelo nya yadi khu silo. Ethu ha gu gira thumo wa Jehovha, khu kharato hi yede gu wu gira khedzi Jehovha a si vbwetago khidzo. Hi sithumi nigu Jehovha khuye patrawu wathu. (Luka 17:10) Ha gu zama gu gira thumo waye khedzi hi dzinago khidzo, si na hi garadzeya gu rwala pingwi. Ambari mombe nya tshivba ngudzu, yi na dzi bayiseya ni gu vbiredzela gu garala ya gu zama gu hongola omu yi gunago, khavbovbo yi dwana ni kanga owu hi handzegidwego khu mune wayo, gasi gu yi woneleya. Ganiolu ha gu thuma khedzi Jehovha a si vbwetago khidzo, hi na si kodza gu gira silo hi nga ba hi pimisa gu khethu kha hi na nga si kodza, hi bwe hi pala sigaradzo hi nga ba hi pimisa gu khethu kha hi na nga si kodza gu si pala. Dundruga gu khuwe mwalo ni muthu a na si kodzago gu tandregisa gutadzisega nya gugola ga Jehovha! — Rom. 8:31; 1 Joh. 4:4.

20. Khu gevbini gighelo gi yedego gu hi gira hi rwala pingwi wa Jesu?

²⁰ Nya wuvili, thuma khu gighelo nya gyadi. Makungo yathu khu gu zundza Papayi wathu nya lihaladzo Jehovha. Matshiguni ya Jesu, ava va nga ba vari vamagundrele, va nga ba va vbweta gu khavo satshavbo si manwa khavo, nya mba hweya va di vbeledwa khu gutsaka, va rula pingwi wa Jesu. (Joh. 6:25-27, 51, 60, 66; Filp. 3:18, 19) Guhambana ni vathu vovo, ava va nga ba va thumeya Nungungulu khu gu kutswa khu lihaladzo lawe khu Nungungulu ni vambe vathu va simamide gu rwala pingwi wawe khu gutsaka guvbanyani gwawe gwatshavbo mafuni, na vari ni gutumba nyo thume gumogo ni Kristo ndzadzini. Gu fana navo, hi na simama na hi tsakide ha gu rwala pingwi wa Jesu khu gighelo nya gyadi.

21. Khu guya khu Matewu 6:31-33, ginani hi nga gi vireyago gu khethu Jehovha a hi gireya?

²¹ Nya wuraru, vireya esi nya sadi. Hi hathide womi wu na lombago gu khuwo hi dzi hiya silo nyo khaguri hi bwe hi dzigaradza. Jesu hi gengedzide gu khuye hi na tshaniswa. Ganiolu hi nga vireya gu khethu Jehovha a na hi ninga tshivba hi yi vbwetago gasi gu timiseya ni gevbini gigaradzo. Tepo hi yago hi timiseya, khavbo gambe hi na tiyisago tshivba yathu. (Jak. 1:2-4) Hi nga vireya gambe gu khethu Jehovha a na hi ninga esi si na vbwetegago gasi hi khathaledwa khu Jesu, ni gu tiyiswa khu vandriyathu. (Leri Matewu 6:31-33; Johane 10:14; 1 Vatesalonika 5:11) Khu lisine hi na ni satshavbo si vbwetegago gasi gu timiseya ni gevbini gigaradzo.

22. Ginani egi hatshavbo hi nga gi bongago?

²² Nyamayi a hawulugisidwego khu Jesu tangade ngudzu litshigu lile. Ganiolu a di hadzi gu simama gutangala kala gupindruga a gu khala mupizane nyo tumbege wa Kristo. Wo si wona kharini, ginani egi a nga gira khu gulandreya? Nga dundrugeya khu tshatshazelo a nga hadzi manega nawo khu gu rwala pingwi wa Jesu, a di hadzi khala mupizane wa Jesu. A di hadzi ya thuma ni Jesu ndzadzini! Gudzigaradza gwatshavbo a nga hadzi gu gu gira gasi gu landreya Kristo, gu di hadzi padwa khu makategwa nyo samadzise a nga hadzi ma mana. Gani hi na ni gutumba nyo vbanye ndzadzini mwendro mafuni, hi nga bonga ngudzu khu konvhite hi ningidwego khu Jesu: nyo hongole gwaye!