Siwudziso Sa Valeri

Tepo Sathane a nga embeya Evha gu khuye kha na ngafa a gu hodza handro nya guti esi nya sadi ni esi nyo vivbe, ina a di pheya kharato malipha ma olovelegidego muhuno nyo khayo hefemulo nya muthu kha wufi?

So wonegisa gu khatshi ahihi. Dhiyabhulosi kha embeya Evha gu khuye a gu hodza handro wule wu himbedzedwego khu Nungungulu a di hadzi gira gukhatshi fude ganiolu gimbe gipandre nya givili gyaye (esi vambe muhuno va si thulago gu khiso i hefemulo nya mbafa) gi simama gu vbanya wulangawo. Khu gu thumisa Nyoga, Sathane a di khuye o gara Evha a hodza handro nya simbo wule uye “kha na ngafa gilo.” A di gu vbweta gu khuye, uye a di hadzi gu simama gu vbanya, a dzi buza khu womi nya tshukwana mafuni, a vbanya nya mba thangedwa khu Nungungulu. — Gen. 2:17; 3:3-5.

Abari gu gihevbudzo nya malipha nyo khigyo hefemulo kha wu wufi kha gya khugeya thembweni ga Edheni, gi khugede hayi? Kha gu tivegi gwadi omu gi khugedego umo. Hi ngu dziti gu khethu watshavbo wukhozeyi nyo vivbe wu fuvisidwe Ndrambini ya matshiguni ya Nowa. Avo va vbulugidego khu Nowa ni ndranga yaye basi, nigu avo va diri vakhozeyi nya lisine, khu kharato mwalo muthu a nga hadzi phalalegiseya sihevbudzo nya wukhongeyi nya malipha.

Si ngu pwisisega ha gu khethu gihevbudzo nyo pwani hefemulo kha wufi gi phede hwane nya Ndrambi. Tepo Nungungulu a nga hambanisa malimi Bhabheli, vathu ‘va di phalalegeya mafuni gwatshavbo,’ kha hi kanakani gu khethu va phede gu manega ni mapimo nyo khayo hefemulo kha wufi. (Gen. 11:8, 9) Ambari gihevbudzo gegi gyo ba gi khugede hayini, hi nga tiyisega gu khethu “babe nya malipha,” Sathane Dhiyabhulosi khuye a gi kutsedzedego nigu si mu tsakiside gu gi wona na gi gu phalalega. — Joh. 8:44.