Mufumo wa Nungungulu ni satshavbo sivangwa saye si tshanganisidwe khu gurula ni gu pwanana

Khu ginani hi wu vbwetago Mufumo wa Nungungulu?

Tepo Muvangi wathu Jehovha a nga tumbunusa vathu nyo pheye, khuye basi a nga ba a Fuma. A di gu fuma khu lihaladzo. A di gira ndranga nyo mbure — thembweni ga Edheni — gasi gu vathu va vbanya umo. A di va ninga gambe guhodza nya gungi. Ningide gambe vathu thumo nya wadi. (Genesi 1:28, 29; 2:8, 15) Vathu na va dzi buzide khu gurula na ri khatshi va di simamide gu fumedwa khu Nungungulu.

Adhamu a pharidego handro owu Nungungulu a nga wu himbedzeya a ningidwego khu Evha. — Vathu nyo pheye va bombide Nungungulu kha nga Pfhumu yawe

Bhibhiliya ya gu tshamuseya gu khiyo ngilozi nyo pandruge, yi ranwago pwani khu Sathane Dhiyabulosi, yi di wugeya wufumu wa Nungungulu. Sathane a di khuye vathu va nga tsaka nya mba thangedwa mwendro gu fumedwa khu Nungungulu. Egi gi si tsakisigo khugo, va papayi vathu nyo pheye, Adhamu ni Evha, va khodwe malipha ya Sathane va wugeya navo Nungungulu. — Genesi 3:1-6; Gutuledwa 12:9.

Khu gu ba Adhamu ni Evha va bombide Nungungulu kha nga Pfhumu yawe, va di luza ndranga yawe nyo mbure ni womi nya pindrugedwa. (Genesi 3:17-19) Esi va si hathidego kha sa kuha avo basi, satshavbo sanana sawe si kuhidwe khu wupumbu va wu giridego. Bhibhiliya ya gu tshamuseya gu khiyo khu gu ba Adhamu a ghohide, “gighoho gi bede mafuni gambe gighoho gi yade gufa.” (Varoma 5:12) Gighoho gi reside wumbe handro gambe: “Muthu nya tshivba a gu fumela mumbe muthu gasi gu mu tshanisa.” (Muhevbudzi 8:9) Khu mambe maganelelo, tepo vathu va dzi fumeyago sigaradzo sa gu engedzeya.

MIFUMO NYA VATHU YI PHEYA GU FUMA

Mwama nya gu dzi khusedze Nimerodi a emidego. Vathu na va vbaha. — Nimerodi wugede Jehovha

Mufumeyi nyo pheye a khumbugwago omu nya Bhibhiliya khu Nimerodi. Uye wugede wufumu wa Jehovha. Matshiguni ya Nimerodi vathu nya tshivba va thumiside tshivba yawe khu ndziya nyo vivbe. Tanga nya 3000 myaga yi vbindridego, Pfhumu Solomoni lovide khuye: “[Nyi di wona] marongo ya vale va tshaniswago, na guri mwalo ni moyo nya gu va tangadzise. Vatshanisi vawe va di va wugela.” — Muhevbudzi 4:1.

Silo sa gu hi so kwata muhuno. Khu 2009, libhuku nyo khaguri la Nações Unidas li tshamusede gu khilo “sigaradzo nya singi si giregago muhuno” sa gu dugeleya khu kotani nya wufumeyi nya guvivbe wu gomogo.

TEPO NYO GIRE GILOGYO!

Litigo li yede gu manega ni mufumeyi nya wadi a na fumeyago gwadi vathu. Khiso esi Muvangi wathu a tumbisidego!

Dzifoto dzi yeyedzago handru wu reswago khu mifumo nya vathu. 1. Nyamayi a khadego ruwani nya ndzilo na wugarede gyanana gyaye gi liyago. 2. Mwama a dandridego khu tanga a gu romo vbakamani xipitali. 3. Masotswa ma vbophoseyago siphisa nyimbitunu. 4. Vawugeyi va gorogidego va gagamugeyago na va pharide madangaliya. 5. Mamayi ni gyanana gyaye va wonago janeya yi nga pandrwa drangani gwawe. 6.Lidhoropa li nyenyeziswago khu wutshi nya dzifiyo nya maghezi nya tshivba ngudzu. — Ambari mifumo nya yadi yi tandregide gu lulamisa sigaradzo nya vathu

Nungungulu emiside Mufumo, wu na tshungunulago mifumo yatshavbo nya vathu, nigu uwo “wu na tiya kala gupindruga.” (Dhaniyeli 2:44) Owu, khuwo Mufumo vathu nya vangi va wu gombeleyago. (Matewu 6:9, 10) Ganiolu Nungungulu kha na nga fuma yabune. Uye emiside muthu a vbanyidego mafuni momu gasi gu khala Pfumo. Khu yevbi Pfhumu yakone yi hathidwego khu Nungungulu?