Mufumo wa Nungungulu wu na pheya lini gu fuma mafuni?

SILO MUNI SI NGA GANEDWA KHU JESU SI NGA HADZI GIREGA?

Jesu a di khuye: “Mayigo ma na wugelana, ni mifumo yi na wugelana niyo. Si na manega sirevareva nya sikhongolo; malanga nya mangi gu na manega ndzala ni mitungu nya gutale.” (Luka 21:10, 11) Silo satshavbo sesi si dugeleyago khu tepo yayimweyo sa gu yeyedza gu khiso “Mufumo wa Nungungulu wu vbohide.” Ina silo sesi si di nga dugeleya khu tepo ya yimweyo? Wona siyeyedzo.

1. DZINYIMBI

Ndrani nya matimo yatshavbo nya vathu, gu si giregi nyimbi nya nga eyi yi nga girega khu 1914! Valovi nya matimo gutala nya dzitepo vari khavo mwaga nya 1914 kha wu na nga divadwa kholu khuwo mwaga yi phedego nyimbi nyo pheye nya mafu. Nyimbi yeyi yi di asa ndziya nya gu songwe vathu nya vangi ngudzu; khu gu thumisa dzibhomba, siphisa, dzimina ni simbe silo si thumiswago nyimbitunu. Gu di landreya nyimbi nya wuvili nya mafu avba gu nga pheya gu thumiswa dzibomba nya tshivba ngudzu dzi tidwago gu pwani dzi armas atômicas. Dzinyimbi kha dzi kali gu khugeya khu 1914, nigu dzinyimbi dzodzo dzi songide vathu nya vangi.

2. SIREVAREVA

Libhuku nyo khaguri lari khilo mwaga ni mwago gu ngu veta gipimo nya 100 sirevareva nya sikhongolo si vangago ‘dzimhango nya dzikhongolo.’ Dzi Serviço de Pesquisa Geológica dza EUA dzari khidzo “guya khu mahungu ma lovidwego gale (gukhugeya khu va 1900), ha gu vireya 16 sirevareva nya sikhongolo ngudzu si na dugeleyago mwaga nyo khaguri.” Vasiyentista nyo khaguri vari khavo matshigwanaya go gira khatshi somo sirevareva nya singi kholu hi na ni makodzelo nya gu si wone, lisine khu gu, sirevareva nya sikhongolo si ngu vangeya sigaradzo nya singi mwendro kamo gu songa vathu nya vangi.

3. DZINDZALA

Dzindzala dzomo mafuni gwatshavbo, nigu gutala nya dzitepo dza gu vangwa khu dzinyimbi, wukanganyisi, sigaradzo nya ekonomiya, gihala ni simbe silo. Programa Mundial de Alimentos nya 2018 yari khiyo: “Gu na ni 821 dzimiliyoni nya vathu va pheyago gu keneledwa khu gilo nyo hodze, nigu 124 dzimiliyoni nya avo va gu weleya mafu khu ndzala.” Mwaga ni mwaga gu ngufa gipimo nya 3.1 dzimiliyoni nya sanana khu kotani nya mahodzelo mwendro desnutrição. Khu 2011 gu fude 45% nya sanana mafuni gwatshavbo.

4. MITUNGU

Organização Mundial da Saúde yari khiyo: “Sekulo 21 ya gu tidwa khu mitungu nya yikhongolo ngudzu. Madwali ya gale — kolera, febre amarela — ma wide nigu gu tumbunugide nya maphya — SARS, gripe pandêmica, Ebola ni Zika.” Ambari olu vasiyentista ni vadhogodheya va hevbulago nya singi maningano ni madwali nya mangimangi, va si mani rendre nya guthume madwali yatshavbo, mwendro kamo gu fuvisa mitungu.

5. THUMO NYA GUTSHUMAYELE WU GIRWAGO MAFUNI GWATSHAVBO

Jesu ganede gambe khu gimbe giyeyedzo tepo a nga khuye: “Mahungu nya Yadi yaya nya Mufumo wa Nungungulu ma na huweledwa tigoni gwatshavbo gasi gu ninga wufakazi mayigoni gwatshavbo. Khu hwane nya ugo khavbo gu no tago guhegisa.” (Matewu 24:14) Tepo litigo li vhikisanago ni sigaradzo nya singi, vathu va vbindrago 8 dzimiliyoni nya mayigo yatshavbo va gu tshumayela mahungu nya yadi nya Mufumu wa Nungungulu omu nya 240 mayigo, khu malimi nyo vbindre 1000. Ndrani nya matimo yatshavbo nya vathu esi gima si si gu giregi.

TSHAMUSELO MUNI SI HI NINGAGO SIYEYEDZO SESI?

Siyeyedzo si ningidwego khu Jesu si ngu tadzisega muhuno. Gutsaka muni si hi ningago siyeyedzo soso? Jesu a di khuye: “Mwa gu wonani satshavbo sesi, mu na dzitini nya gukhenu Mufumo wa Nungungulu wu vbohide.” — Luka 21:31.

Siyeyedzo si ningidwego khu Jesu, gumogo ni matimo nya Bhibhiliya sa gu hi phasa gu pwisisa gu khethu Nungungulu emiside Mufumo waye ndzadzini khu 1914.a Ga tepo yoyo, Nungungulu emiside Gyanana gyaye Jesu Kristo, kha nga Pfhumo. (Ndzimo 2:2, 4, 6-9) Nugunugu, Mufumo wa Nungungulu wu na fuma mafuni gwatshavbo, wu na fuvisa mifumo yatshavbo nigu wu na gira mafu ma khala paradhesi gasi gu vathu va vbanya kala gupindruga.

Khu gu piya, malito nya nombelo wa Jesu ma na tadzisega: “Mufumo wago wu nate; Gudzina gwago gu na girege mafuni kha nga ndzadzini.” (Matewu 6:10) Ginani gi girwago khu Mufumo wa Nungungulu gu khugeya khu 1914? Makategwa muni ma na reswago khu Mufumo wa Nungungulu tepo wu na fumeyago vathu vatshavbo?