Yeyedza gubonga khu siningwa hi gu mba si wona esi Jehovha a hi ningidego

1. Ginani egi Jesu a ganedego khu dzithomba dza ndzadzini?

KHANDRI siningwa satshavbo hi kodzago gu si wona. Khu lisine, gu ni siningwa nya singi hi si si wonigo. Avba nya Ganelo yaye ya Gigomoni, Jesu ganede khu siningwa sa ndzadzini si gu ni lisima ngudzu guvbindra dzithomba. A vbedza a ganeya lisine leli: “Avbo yi guromo thomba yago, khavbo wu na bani wu romo nuwo monyo wago.” (Mat. 6:19-21) Monyo wathu wu na hi kutsa gu dzi garadzeya gu mana silo hi si wonago na siri ni lisima ngudzu. Hi ngu hengeledzeya “thomba ndzadzini” khu gu dzi gireya lina nya ladi mahoni ga Nungungulu. Jesu a di khuye dzithomba dzodzo gima kha dzi na nga tshungunudwa ambari gu bidwa.

2. a) Guya khu 2 Vakorinto 4:17, 18, ginani egi Pawulo a hi kutsidego gu gi vegeya gupima? b) Ginani hi na bhulago khigyo avba nya ndrima yeyi?

² Mupostoli Pawulo hi kutside gu ‘vega mapimo . . . ga esi nyamba wonega.’ (Leri 2 Vakorinto 4:17, 18.) Siningwa sesi nyamba wonega so pata makategwa yatshavbo hi na dzi buzago khayo mafuni nya maphya ya Nungungulu. Avba nya ndrima yeyi, hi na bhula khu siningwa sina nya mba wonega hi dzi buzago khiso olu — wupari wathu ni Nungungulu, nombelo, giphaso hi ningwago khu liphuvbo nya guage la Nungungulu ni giphaso hi ningwago khu Jehovha, Jesu ni dzingilozi thumoni gwathu nyo tshumayele. Hongoleni hi wona edzi hi nga yeyedzago khidzo gu khethu hi ngu ninga lisima siningwa sesi nya mba wonega.

WUPARI WATHU NI JEHOVHA

3. Khu gevbini giningwa nya gikhongolo nya mba wonega hi gu nagyo nigu so kodzega kharini gu hi gi mana?

³ Giningwa nya gikhongolo nya mba wonega wupari wathu ni Jehovha. (Ndzi. 25:14) So kodzega kharini gu Nungungulu a gira wupari ni vathu nya mba vbeleya a bwe a simama na agide? Isoso si ngu kodzega khu kotani nya olu dzegiso wa Jesu wu ‘dusidego gighoho nya litigo.’ (Joh. 1:29) Jehovha a di gu dziti gu khuye Jesu a di hadzi tumbega kala gufani gwaye gasi a vbulugisa vathu. Khu gighelo gyogyo, si ngu kodzega gu Nungungulu a khala pari nya vathu va vbanyidego Kristo na si gufi. — Rom. 3:25.

4. Ninga siyeyedzo nya vama va khadego dzipari dza Nungungulu Jesu na si guti mafuni.

⁴ Nga dundrugeya khu vama nyo pheye va khadego dzipari dza Nungungulu. Abrahama, moyo nya vama vovo a yeyedzide gu khodwa nyo samadzise. Guvbindra 1000 myaga hwane nyo ba Abrahama a fude, Jehovha mu ranide khuye “pari yangu.” (Isa. 41:8) Khu kharato, ambari gufa kha gu si kodzi gu hambanisa Jehovha ni dzipari dzaye nya dzikhongolo. Mapimoni ya Jehovha, Abrahama a ngu vbanya. (Luka 20:37, 38) Gimbe giyeyedzo khu Joba. Tepo dzingilozi dzatshavbo dzi nga tshangana ndzadzini, Jehovha yeyedzide gu khuye a di gu mu tumba Joba. Mu ranide khuye “muthu nya gululame a thavago Nungungulu . . . kholu a ngu hambana ni guvivba.” (Joba 1:6-8) Ahati Dhaniyeli ke? A dzipwide kharini Jehovha kholu uye a thumedego Nungungulu khu gu tumbega khu tanga nya 80 myaga tigoni nya vathu va nga ba va si thumeyi Jehovha? Ngilozi yi mu tiyisegiside guraru gu khiyo “uwe u gigodwa” gya Nungungulu. (Dhan. 9:23; 10:11, 19) Hi nga tiyisega gu khethu Jehovha a ngu dogoreya ngudzu gu wusa dzipari dzaye dzi fudego. — Joba 14:15.

5. Ginani gi vbwetegago gasi hi khala dzipari nya dzikhongolo dza Jehovha?

⁵ Vathu vangani nya mba vbeleya muhuno va dzi buzago khu wupari wa vbafuvbi ni Jehovha? Khu lisine, dzimiliyoni nya avo. Ho dziti kharini? Khu gu vama nya vangi, vanyamayi nya vangi ni sanana nya singi mafuni gwatshavbo va ngu yeyedza khu mavbanyelo yawe gu khavo vo vbweta gu khala dzipari dza Nungungulu. Jehovha “a gu tsakiswa khu va nya gululama.” (Mav. 3:32) Wupari wawe ni Jehovha wo kodzega kholu va khodwago ga muphaso nya dzegiso wa Jesu. Khu kotani nya muphaso wowo, hi nga khala dzipari dza Jehovha khu gu hi hendzeledza womi wathu gwaye hi bwe hi bhapatiswa. Tepo hi girago silo sesi nya lisima, ho dzi pata ni dzimiliyoni nya maKristo ma dzi hendzeledzidego ni gu bhapatiswa, aya ma dzi buzago khu wupari nya wukhongolo ni Jehovha.

6. Hi nga yeyedza kharini gu khethu hi ngu ninga lisima wupari wathu ni Jehovha?

⁶ Hi nga yeyedza kharini gu khethu hi ngu ninga lisima wupari wathu ni Nungungulu? Gu fana ni Abrahama ni Joba va simamidego na va tumbegide guvbindra 100 myaga anethu hi yede gu simama gu tumbega ambari ho ba hi thumeya Jehovha khu myaga nya yingi. Kha nga Dhaniyeli, gu vbwetega hi ninga lisima wupari wathu ni Nungungulu guvbindra womi wathu. (Dhan. 6:7, 10, 16, 22) Khu gu phaswa khu Jehovha, hi nga si kodza gu timiseya sigaradzo hi tshanganago naso gasi wupari wathu ni Nungungulu wu si tshungunugi. — Filp. 4:13.

GININGWA NYA NOMBELO

7. a) Guya khu Mavingu 15:8, Jehovha a gu dzipwa kharini khu milombelo yathu? b)Jehovha a gu hlamula kharini milombelo yathu?

⁷ Gimbe giningwa nya mba wonega nombelo. Dzipari nya dzikhongolo dzi ngu gola gu bhuleyana esi va si pimisago ni esi si gomogo monyoni gwawe. Khidzo saye ni wupari wathu ni Jehovha. Jehovha a ngu ganeya ni ethu khu gu thumisa Bhibhiliya a gu umo a hi embeyago edzi a dzipwago khidzo ni esi a si pimisago. Ethu ha gu bhula naye khu nombelo hi bwe hi mu embeya esi si gomogo myonyoni gwathu. Jehovha a ngu tsakiswa khu gu engiseya milombelo yathu. (Leri Mavingu 15:8.) Kha nga olu a gu pari nya lihaladzo, Jehovha kha hegeyi basi gu engiseya milombelo yathu ganiolu a ngu bwe a yi hlamula. Dzimbe dzitepo a ngu hlamula nya mba hweya. Aholu yimbe tepo si ngu lomba gu hi simama gu gombeya khu gilo nyo khaguri. Ambari ulolo, hongoleni hi tiyisega gu khethu hlamulo wu nata khu tepo yi vbwetegago, khu ndziya nya yadi gambe. Khu lisine, hlamulo wa Nungungulu wu ngata khu ndziya nya gu khandriyo hi nga ba hi yi virede. Khu giyeyedzo, wulangani nyo hi duseye gilingo gyathu uye a nga hi ninga guti ni tshivba gasi gu gi timiseya. — 1 Kor. 10:13.

8. Hi nga yeyedza kharini gubonga gwathu khu giningwa nya nombelo?

⁸ Hi nga yeyedza kharini gubonga gwathu khu giningwa gegi nya lisima nya nombelo? Mweyo nya dzindziya nyo gire khiyo isoso khu gu engisa gileletelo gi gu khigyo hi nga “garali khu gu gira milombelo.” (1 Tes. 5:17) Jehovha kha hi gurumedzi gu gombeya. Wulangani nya isoso, uye a ngu ninga githawo giningwa gyathu nyo dzi hatheye habune esi hi si vbwetago a bwe a hi kutsa gu simama gu gombeya. (Rom. 12:12) Khu kharato, hi nga yeyedza gu bonga gwathu khu gu hi gombeya tepo yatshavbo. Ganiolu, milombeloni yathu hi nga divali gu mu bonga ni gu mu rungudza Jehovha. — Ndzi. 145:2, 3.

9. Ndriyathu moyo a gu dzipwa kharini khu nombelo, uwe ke wa gu dzipwa kharini?

⁹ Tepo hi yago hi thumeya Jehovha, hi wona ndziya a hlamulago khiyo milombelo yathu, gu bonga gwathu khu nombelo gu na engedzeya. Nga wona giyeyedzo gya Chris, ndriyathu moyo a thumidego thumoni nya tepo yatshavbo khu tanga nya 47 myaga yi vbindridego. Wari khuye: “Si ngu tsakisa ngudzu gu wuga dzimindrudzile gasi nyi gombeya ga Jehovha. Edzi si tsakisago khidzo gu ganeya ni Jehovha na li nga gu khuga lidambo, satshavbo na si mburide. Isoso si ngu nyi kutsa gu mu bonga khu satshavbo siningwa a hi ningidego gupata ni lithomo nya nombelo. Nigu, tepo nyi gombeyago guvbeyani nya litshigu si ngu tsakisa ngudzu guya lala na nyiri ni livhalo li agidego.”

GININGWA NYA LIPHUVBO NYA GUAGE

10. Khu ginani hi yedego gu ninga lisima liphuvbo nya guage la Nungungulu?

¹⁰ Liphuvbo nya guage la Nungungulu gimbe giningwa nya mba wonega hi ningidwego hi yedego gu gi ninga lisima. Jesu a hi kutside gu simama gu lomba liphuvbo nya guage. (Luka 11:9, 13) Khu gu thumisa liphuvbo nya guage, Jehovha a ngu hi ninga “tshivba . . . nya yikhongolo” ngudzu. (2 Kor. 4:7; Mith. 1:8) Khu gu phaswa khu liphuvbo nya guage hi nga si kodza gu emisana ni gevbini gigaradzo hi nga tshanganago nagyo.

11. Liphuvbo nya guage li nga hi phasa khu ndziya muni?

¹¹ Liphuvbo nya guage li nga hi phasa gu gira gwadi mithumo hi ningidwego khu Nungungulu. Liphuvbo la Nungungulu li nga tshukwadzisa makodzelo hi gu nawo nyo gire thumo wathu. Hi ngu dziti gu khethu ho si kodza gu mana mihandro nya yadi thumoni wa Nungungulu kholu hi phaswago khu liphuvbo nya guage la Nungungulu.

12. Guya khu Ndzimo 139:23, 24, hi nga gombeya hi lomba liphuvbo nya guage gasi li hi phasa gu gira ginani?

¹² Yimbe ndziya hi nga yeyedzago khiyo gu khethu hi ngu ninga lisima liphuvbo nya guage la Nungungulu khu gu gombeya hi lomba gu khethu Jehovha a hi phasa gu tugula gudogoreya mwendro mapimo nyo vivbe ma gomogo monyoni gwathu. (Leri Ndzimo 139:23, 24.) Ha gu gira isoso, Jehovha a na thumisa liphuvbo laye nya guage gasi hi kodza gu tugula mapimo ni guwegeleya nyo vivbe. Hwane nya gu ba hi tugude mapimo ni gudogoreya nyo vivbe hi gu nawo gu vbwetega hi gombeya ga Jehovha hi mu lomba liphuvbo nya guage gasi li hi ninga tshivba nyo pale gudogoreya gogo. Isoso si na yeyedza Jehovha gu khiso kha hi vbweti gu gira ni gevbini gi na mu girago a si vbweti gambe gu hi phasa khu gu thumisa liphuvbo laye nya guage. — Efes. 4:30.

13. Hi nga engedzeya kharini gubonga khu liphuvbo nya guage?

¹³ Hi nga yeyedza gubonga khu liphuvbo nya guage khu gu hi dundrugeya khesi ilo li girago matshiguni yathu. Na a si gu hongoli ndzadzini, Jesu embede esi vapizane vaye: “Gasi enu, mu na hakha tshivba gikhati Liphuvbo nya Guage li na gu tshigago gwanu. Mu na khala dzifakazi dzangu . . . kala mahegiso nya mafu.” (Mith. 1:8) Isoso khiso kamo si dugeleyago muhuno! Khu gu phaswa khu liphuvbo nya guage, gu na ni tanga nya 8 dzimiliyoni ni metadu nya vakhozeyi va Jehovha tigoni gwatshavbo. Hi ngu dzi buza gambe khu paradhesi ya liphuvboni kholu liphuvbo la Nungungulu li ngu hi phasa gu haguleya makhalelo nyo mbure nya nga lihaladzo, gurula, gulaphisa-monyo, wuwadi, gukhodwa, gudzinogisa ni gudziphara. Makhalelo yaya ma gu gira gipandre nya “mithumo mwendro mihandro nya liphuvbo la Nungungulu.” (Gal. 5:22, 23) Liphuvbo nya guage giningwa nya lisima ngudzu gwathu!

JEHOVHA, JESU NI DZINGILOZI VA NGU HI PHASEDZEYA THUMONI NYO TSHUMAYELE

14. Tepo hi tshumayelago mahungu nya yadi giphaso muni nya mba wonega hi gu nagyo?

¹⁴ Hi na ni giningwa nya mba wonega nyo khale “vaphasedzeli va Nungungulu,” va Jesu ni dzingilozi. (2 Kor. 6:1) Ho va phasedzeya tepo yatshavbo hi girago thumo nya gutshumayele. Na gu ganeya khuye ni vale va girago thumo wowu, Pawulo ganede esi: “Ethu hi sithumi hi thumago gumogo ni Nungungulu.” (1 Kor. 3:9) Tepo hi tshumayelago ho thuma gumogo ni Jesu gambe. Dundruga gu khuwe tepo Jesu a nga ninga gileletelo valandreyi vaye nya gu ‘gimbile va hevbudza mayigo yatshavbo,’ vbedzide khuye: “Nyi na bani nyiri nanu.” (Mat. 28:19, 20) Ahati dzingilozi ke? Hi ngu bonga ngudzu kholu dzingilozi dzi hi thangeyago tepo hi gimbiyago hi hevbudza “mahungu nya yadi nya gupindruge . . . vathu va vbanyago mafuni”! — Gutu. 14:6.

15. Ninga giyeyedzo gimwegyo nya Bhibhiliya nya edzi Jehovha a pategago khidzo avba nya thumo wathu nyo tshumayele.

¹⁵ Giphaso gyogyo gi tago khu ndzadzini gya gu hi phasa gu tadzisa ginani? Tepo hi tshumayelago mahungu nya mufumo dzimbe dzimbewu dzi ngu thega myonyoni nya yadi dzi buga. (Mat. 13:18, 23) Khu mani a girago gu dzimbewu dzodzo nya lisine dzi dandra dzi bwe dzi ninga mihandro? Jesu a di khuye mwalo a nga si kodzago gu khala mulandreyi waye a gu mba “ranwa khu Babe.” (Joh. 6:44) Bhibhiliya yi ngu ninga giyeyedzo nya isoso. Nga dundrugeya khu tepo Pawulo a nga tshumayela tsawa nya vanyamayi vbavbandze nya lidhoropa la Filipi. Nga wona esi Bhibhiliya yi si ganeyago khu moyo nya vanyamayi vovo, nyo pwani khu Lidhiya: “Pfhumu a di tula monyo waye afela gu hakha magana ya Pawulo.” (Mith. 16:13-15) Gu fana ni Lidhiya, vathu nya vangi muhuno va ngu ranwa khu Jehovha.

16. Khu mani a yedego gu zundzwa khu mihandro nya yadi hi yi manago thumoni nyo tshumayele?

¹⁶ Khu mani a yedego gu zundzwa khu mihandro nya yadi hi yi manago thumoni nyo tshumayele? Pawulo hlamude giwudziso gegi tepo a nga loveya malito yaya libandla la Korinto: “Eni nyi yade, Apolo thedzede mati, aholu, Nungungulu khuye a dandrisago. Khu kharato, oyu a yalago khandri gilo, ni oyu nuye a thedzelago mati khandri gilo; vbavbandze basi ga Nungungulu a gu uye a dandrisago.” (1 Kor. 3:6, 7) Gu fana ni Pawulo, tepo yatshavbo gu vbwetega hi ninga wuzundzo Jehovha khu yatshavbo mihandro nya yadi hi yi manago thumoni nyo tshumayele.

17. Hi nga yeyedza kharini gubonga khu lithomo nyo thume gumogo ni Nungungulu, Kristo ni dzingilozi?

¹⁷ Hi nga yeyedza kharini gubonga khu lithomo nyo thume gumogo ni Nungungulu, Kristo ni dzingilozi? Hi nga gira isoso khu gu thuma khu sighingi gasi gu tshumayela mahungu nya yadi vambe. Gu na ni dzindziya nya dzingi nyo gire khidzo isoso. Nya nga gu “hevbudza vathuni ni mu dzindrangani.” (Mith. 20:20) Vambe va ngu tshumayela khu githugedza. Tepo va mananago ni muthu va gu mba muti va gu mu losa khu ndziya nya wupari khavbovbo va zama gu pheya mabhulo naye. Muthu yoyo a gu dzi ningedzeya, avo va gu zama gu bedza mabhulo nya Mufumo wa Nungungulu.

18-19. a) Hi nga thedzeya kharini mati dzimbewu nya lisine? b) Ganeya khu matshango ma yeyedzago edzi Jehovha a phasidego khidzo gihevbulo gimwegyo nya Bhibhiliya.

¹⁸ Kha nga “sithumi [si] thumago gumogo ni Nungungulu,” kha hi yeli basi gu yala dzimbewu nya lisine ganiolu gu vbwetega hi dzi thedzeya mati. A gu tshuka muthu nyo khaguri a yeyedza gutsakeya gu vbwetega hi dzi garadzeya gu mu bweleleya mwendro gu lomba mumbe muthu a mu bweleleya gasi gu pheya gihevbulo nya Bhibhiliya. Hi ngu tsaka tepo hi wonago Jehovha na gu phasa gihevbulo nya Bhibhiliya gu vbindrugedza mapimiselo ni mavbanyelo.

¹⁹ Nga wona giyeyedzo gya Raphalalani wa Dzoni a nga ba ari nyanga. Uye a di gu tsakiswa khesi a nga ba a si hevbula omu nya Bhibhiliya. Ganiolu si mu garadzede ngudzu gu dzumeya esi Bhibhiliya yi si ganeyago maningano ni gu ganeya ni vale va fudego. (Dhet. 18:10-12) Vbadugwanavbadugwana, a di dzumeleya Jehovha a vbindrugedza mapimo yaye. Khu gu gimbiya nya tepo, a di diga wunyanga ambari olu wu nga ba wuri thumo waye nya gu dzi vbanyise. Raphalalani, olu a gu na ni 60 myaga, wari khuye: “Nyi ngu dzi bonga ngudzu Dzifakazi dza Jehovha khu gu ba dzi nyi phaside khu dzindziya nya dzingi gupata ni gu nyi phasa gu mana thumo. Nigu guvbindra satshavbo, nyo bonga ngudzu Jehovha kholu a nyi phasidego gu vbindrugedza mavbanyelo gasi nyi kodza neni gu tshumayela kha nga mweyo nya Dzifakazi dza Jehovha yi bhapatisidwego.”

20. Ginani u dzi emisedego gu gira?

²⁰ Avba nya ndrima yeyi hi hevbude khu siningwa sina nya mba wonega. Nya gikhongolo ga satshavbo khu lithomo nyo manege ni wupari nya wukhongolo ni Jehovha. Isoso si na hi tuleya ndziya nyo phasege khu simbe siningwa nya nga gu gombeya gwaye, gu ningwa giphaso khu liphuvbo nya guage ni gu phasedzedwa khu Jehovha, Jesu ni dzingilozi thumoni gwathu nyo tshumayele. Hongoleni hi dzi emiseya gu engedzeya gu bonga gwathu khu siningwa sesi nya mba wonega. Nigu gima hi nga digi gubonga Jehovha khu lithomo nyo khale pari yaye nya yikhongolo.