Libhuku la Gutuledwa la gu tshamuseya ginani gwago muhuno?

1-2. Khu gevbini gighelo nyo pheye gi hi girago hi vega gupima avbo nya libhuku leli la Gutuledwa?

U DI NGA kovhidharwi gasi gu wona albhu nya dzifotu nya muthu nyo khaguri? Tepo u wonago dzifotu dzodzo, u nga wona vathu u gu mba vati. Ganiolu, fotu mweyo yi ndrindra gupima gwago. Khu ginani? Kholu anuwe u womo avba nya fotu yoyo. Tepo u yi khedzago wa gu zama gu dundrugeya litshigu u nga dusa ni wulanga wakone ni gu gambe uwe wa gu zama guti vathu nyo khaguri va guromo avba nya fotu yoyo. Fotu yoyo khu lisine gilo nya lisima gwago.

² Libhuku la Gutuledwa la gu fana ni fotu. Khu ginani? Khu sighelo sivili. Nyo pheye, khu gu libhuku leli nya Bhibhiliya li lovedwe ethu. Gupheyani nya livhesi leli, ha gu leri esi: “Khugo ogu gutuledwa ga Jesu Kristo, ugo a nga ningwago khu Nungungulu, gasi a yeyedze ga sithumi saye iso si guromo vbafuvbi ni gu girega.” (Gutu. 1:1) Khu kharato, iso si nga lowago umo nya libhuku leli kha sa lovedwa vathu vatshavbo, ganiolu si lovedwe ethu kholu hi sithumi sa Nungungulu. Kha nga olu hi gu vathu va Nungungulu, ethu kha hi thurugi tepo hi pategago avbo nya gu tadzisege nya siprofeto si gomogo umo nya libhuku leli nyo hlamadzise. Khu mambe maganelelo, ethu ha gu dzi wona “avba nya fotu.”

3-4. Lini si nga hadzi gu tadzisega siprofeto si gomogo umo nya libhuku la Gutuledwa guya khu Gutuledwa 1:3, nigu isoso si yede gu hi kutsa gu gira ginani?

³ Gighelo nya wuvili gya gu pata tepo siprofeto sesi si na tadzisegago khiyo. Johane ganede khu tepo siprofeto sesi si na tadzisegago khiyo tepo a nga khuye: “Khu litshigu la Pfhumu nyi di tshigedwa khu liphuvbo.” (Gutu. 1:10) Tepo Johane a nga lova malito yaya, khu mwaga nya 96 matshigoni yathu, “litshigu la Pfhumu” li di nga si pheye. (Mat. 25:14, 19; Luka 19:12) Ganiolu, guya khu giprofeto nya Bhibhiliya, litshigu lolo li phede khu 1914 tepo Jesu a nga emiswa kha nga Pfhumu ndzadzini. Siprofeto sa omu nya libhuku la Gutuledwa, si patago vathu va Nungungulu si di pheya gu tadzisega. Ethu ha gu vbanya ndrani nya “litshigu la Pfhumu!”

⁴ Khu kotani nya olu hi vbanyago matshigoni nyo garadze, ethu hi yede gu vega gwadi gupima avba nya wusingalagadzi wu lovidwego omu ga Gutuledwa 1:3 wu gu khuwo: “Kategide wule a hevbulago libhuku leli; ni vale vapwago magana yaya nya wuprofeti, va ma vegedza myonyoni gwawe silo si lovidwego, kholu satshavbo sesi, somo vbafuvbi nya gugirege.” Hi yede gu ‘leri khu lito nyo khugege’ gasi ‘hipwa magana yaya nya wuprofeti,’ ni gu “ma vegedza.” Khu kharato, khu yavbini malito nyo khaguri hi yedego gu ma engisa?

TIYISEGA GU KHUWE WUKHOZEYI WAGO WU NGU HAKHEGA GA JEHOVHA

5. Libhuku la Gutuledwa la gu yeyedza kharini lisima nya gu tiyisege gu khethu wukhozeyi wathu wu ngu hakhwa khu Jehovha?

⁵ Umo nya gipimo nyo pheye nya libhuku la Gutuledwa, ha gu hevbula gu khethu Jesu a ngu siti esi si dugeleyago omu nya mabandla nya vathu vaye. (Gutu. 1:12-16, 20; 2:1) Jesu a yeyedzide isoso tepo khiyo a nga rumeya mahungu umo nya 7 mabandla ya Ásia Menor. Umo nya mahungu yoyo, uye a di ningeya sileletelo nya gu kongome si nga hadzi phasa Makristo ya lizana myaga nyo pheye gu tiyisega gu khavo wukhozeyi wawe wu ngu hakhwa khu Jehovha. Vbavbandzi nya isoso, mahungu yoyo ma nga thuma ga vathu va Nungungulu muhuno. Ginani hi gi hevbulago? Muthangeyi wathu, Jesu Kristo, a ngu dziti gu khuye hi na ni wupari nya wadi ni Jehovha mwendro ne. Uye a ngu hi thangeya ni gu hi vhikeya, nigu a ngu wona satshavbo si hi giregeyago. Uye a ngu siti esi hi yedego gu gira gasi hi simama gu tsakedwa khu Jehovha. Khu gevbini gileletelo hi yedego gu gi landrisa muhuno?

6. a) Guya khu mahungu ya Jesu ma gomogo ga Gutuledwa 2:3, 4, gigaradzo muni egi libandla la Efeso li nga ba liri nagyo? b) Ginani hi gi hevbulago khu isoso?

⁶ Leri Gutuledwa 2:3, 4. Simama gu tiyisa lihaladzo lago khu Jehovha. Mahungu aya Jesu a embedego mabandla ya Efeso, ma yeyedzide khayo avo va di gu timiseya ni gu simama gu thumeya Jehovha ambari va nga ba va tshangana ni sigaradzo nya sikhongolo. Ambari ulolo, avo va di luzide lihaladzo lavo nyo pheye khu Jehovha. Nigu avo va di yede gu wusedza lihaladzo lolo, gasi gu wukhozeyi wawe wu hakhega. Khu ndziya nyo fane, muhuno hi yede gu gira nya singi guvbindra gutimiseya basi. Hi yede gu timiseya khu sighelo nya sadi. Nungungulu wathu kha vege basi gupima ga esi hi girago, a gu vega gambe gupima ga egi gi hi kutsago gu gira gilo gyogyo. Egi gi hi kutsago gu gira gilo khya lisima gwaye kholu uye a gu vireya gu khuye wukhozeyi wathu wu dzi seketeya avba nya lihaladzo hi gu nalo khuye ni gu mu bonga. — Mav. 16:2; Marko 12:29, 30.

7. a) Kha nga li yeyedzago libhuku la Gutuledwa 3:1-3, gigaradzo muni libandla la Sardhesi li nga ba liri nagyo? b) Ginani hi yedego gu gira?

⁷ Leri Gutuledwa 3:1-3. Hi yede gu simama na hi khendzugide hi bwe hi gengeya. Sivbango sa libandla la Sardhesi si diri ni sigaradzo nyo hambanehambane. Ambari olu va nga ba va thumede Jehovha gale, avo va di si giri gambe thumo wa Jehovha khu sighingi. Jesu a va embede gasi va ‘khendzuga.’ Gigegendzo muni hi gi manago? Khu lisine Jehovha kha divali thumo wathu. (Hebh. 6:10) Ambari ulolo, kha hi yeli gu pimisa gu khethu khu kotani nya olu hi thumedego Jehovha gale, hi mwalo gambe gighelo nya gu mu thumeye olu. Ambari olu adzina ethu hi gu na ni gu hegedwa nyo khaguri guvbindra gale, ethu hi yede gu simama na hi pharegide khu gu “thuma gikhati gyatshavbo khu gunengela esi Nungungulu a si vbwetago,” hi bwe hi simama na hi khendzugide ni gu gegengeya kala mahegiso. — 1 Kor. 15:58; Mat. 24:13; Marko 13:33.

8. Ginani hi gi hevbulago khu malito ya Jesu a embedego vandriyathu va Lawodhikeya, ma gomogo umo ga Gutuledwa 3:15-17?

⁸ Leri Gutuledwa 3:15-17. Hi yede gu khozeya Jehovha khu monyo ni tshivba yathu yatshavbo. Mahungu aya Jesu a embedego libandla la Lawodhikeya ma yeyedzide gimbe gigaradzo nyo hambane. Avo va di gu ‘dzidzide’ avbo nya wukhozeyi wawe. Khu kotani nya gu mba khathala gwawe, Jesu a va embede gu khuye avo va diri ‘vatshaniseki ni sisiwana.’ Avo va di yede gu yeyedza sighingi avba nya wukhozeyi wawe ni ga Jehovha. (Gutu. 3:19) Ginani hi gi hevbulago? Abari gu kha hi thumi gambe khu sighingi, hi yede gubonga ngudzu khu satshavbo silo nya sadi esi Jehovha ni hengeledzano yaye va hi ningago. (Gutu. 3:18) Gima kha hi yeli gu dzi garadzeya gu mana womi nyo khadzisege olu nyo bwe wukhozeyi wathu ga Jehovha wu si khali gilo nya lisima womini gwathu.

9. Kha nga si khumbugidwego umo nya mahungu ya Jesu a embedego Makristo ya Pergamo ni Tiyatira, gigaradzo muni hi yedego gu gi potsa?

⁹ Hi yede gu potsa satshavbo sihevbudzo sa vawugeyi. Jesu layide vathu nyo khaguri Pergamo khu gu va andrisa gu mba pwanana khu gyawe. (Gutu. 2:14-16) Uye zundzide va Tiyatira khu kotani nya olu va nga ba va potside “gueta ga sathane” a bwe a va kutsa gu ‘vegisa’ lisine. (Gutu. 2:24-26) Makristo ma vbodego ma phedego gu landrisa sihevbudzo nya malipha ma di yede gu dzi laya. Ethu muhuno ke? Ethu hi yede gu potsa ni gevbini gihevbudzo gi wugeyago mapimiselo ya Jehovha. Gupheyani adzina hi nga wona gu khethu vawugeyi adzina va ngu khathala khesi Bhibhiliya yi ganeyago, ganiolu mithumo yawe kha yi yeyedze isoso. (2 Thim. 3:5) Si na hi vbevbugeya gu tugula mwendro gu potsa sihevbudzo nya malipha ho bari sihevbuli nya sadi nya Lito la Nungungulu.— 2 Thim. 3:14-17; Judha 3, 4.

10. Ginani gambe hi nga gi hevbulago khesi Jesu a embedego mabandla ya Pergamo ni Tiyatira?

¹⁰ Hi yede gu potsa yatshavbo magirelo nya wubhayi. Vandriyathu va Pergamo ni Tiyatira va diri ni gimbe gigaradzo. Jesu kawukide vathu nyo khaguri ga mabandla yaya khu gu mba potsa wubhayi. (Gutu. 2:14, 20) Ginani hi gi hevbulago? Ethu kha hi yeli gu vireya gu khethu Jehovha a divaleya ni yavbini mavbanyelo yathu nyo vivbe, ambari na hi mu thumede khu myaga nya yingi mwendro na hiri ni malungelo nya mangi olu. (1 Sam. 15:22; 1 Ped. 2:16) Uye o vireya gu khuye hi sayisa milayo yaye ambari milayo nya litigo na yi gu kutsedzeya mavbanyelo nyo vivbe. — Efes. 6:11-13.

11. Ginani hi gi hevbudego kala olu? (Wona gambe kwadru yi gu khiyo: “Sihevbulo si na hi phasago muhuno.”)

¹¹ Ginani hi gi hevbudego kala olu? Hi yede gu tiyisega gu khethu wukhozeyi wathu wu ngu hakhega ga Jehovha. Abari gu ha gu gira gilo nyo khaguri gi girago gu wukhozeyi wathu wu si hakhegi, hi yede gu dzegeya gu vbindrugedza gasi hi tsakedwa khu Nungungulu. (Gutu. 2:5, 16; 3:3, 16) Ambari ulolo, Jesu ganede gimbe gilo umo nya mahungu yaye a nga embeya mabandla. Khu gevbini gilo gyogyo?

DZI EMISEYE GU TIMISEYA GU WUGEDWA

12. Ginani hi nga gi hevbulago khu mahungu ya Jesu a embedego vandriyathu va Esmirina ni Filadhelifiya? (Gutuledwa 2:10)

¹² Olu hongoleni hi bhula khu mahungu ya Jesu a embedego mabandla ya Esmirina ni Filadhelifiya. Uye embede Makristo gu khuye kha ma nga ba ma yede gu thava gu wugedwa, kholu Jehovha a di hadzi gu ma tshatshazeya ma gu simama na ma tumbegide. (Leri Gutuledwa 2:10; 3:10) Ginani hi gi hevbulago muhuno? Hi yede gu vireya gu wugedwa ni gu dzi emiseya gu timiseya. (Mat. 24:9, 13; 2 Kor. 12:10) Khu ginani si gu na ni lisima gu dundrugeya khu isoso?

13-14. Ginani gi giregidego ni vathu va Nungungulu kha nga handro nya esi si khumbugidwego umo ga Gutuledwa 12?

¹³ Libhuku la Gutuledwa la gu yeyedza gu khilo vathu va Nungungulu va di hadzi gu wugedwa khu “litshigu la Pfhumu” a gu matshigu hi vbanyago olu. Gutuledwa gipimo 12 a gu yeyedza gu khuye yi di dzegeya gu manega nyimbi dzandzini hwane nyo ba Jesu a khade Pfhumu. Migeli, a gu Jesu Kristo, hwane nyo ba a bwelede dzandzini uye ni dzingilozi dzaye va di dwana ni Sathane ni madhemoni yaye. (Gutu. 12:7, 8) Kha nga handro wakone, valala vava va Nungungulu va padwe va bwe va rinywa mafuni umo va tshanisago vathu. (Gutu. 12:9, 12) Kha nga handro, ginani gi giregidego ni vathu va Nungungulu?

¹⁴ Khu gu landreya Gutuledwa a gu hi embeya esi sathane a giridego. Uye kha si kodzi gambe gu bweleya dzandzini. Khu kharato, a gu wugeya sithumi si todzidwego sa Nungungulu omu mafuni, si gu iso si emeyago Mufumo wa Nungungulu si bwe si landrisa “wufakazi wa Jesu Kristo.” (Gutu. 12:17; 2 Kor. 5:20; Efes. 6:19, 20) Giprofeto gegi gi tadzisegide kharini?

15. Khu mani a emeyago ‘dzifakazi dzimbili’ dzi khumbugwago umo ga Gutuledwa gipimo 11, nigu ginani gi giregidego navo?

¹⁵ Sathane a gu thumisa valala va Nungungulu gasi gu wugeya vandriyathu va todzidwego, va thangeyago thumo nyo tshumayele. Vama vava va gu emeya “dzifakazi . . . dzimbili” dzi nga ba dzi wonwa na dzi fude, dzi khumbugwago omu nya libhuku la Gutuledwa.b (Gutu. 11:3, 7-11) Khu 1918, 8 vandriyathu va nga ba va thangeya hengeledzano, va di khothedwa nya mba na nandru va bwe va khala myaga nya yingi pasoni. Vathu nya vangi va di gu pimisa gu khavo thumo wa va ndriyathu vava va todzidwego wu di emisidwe.

16. Gigiro muni nyo hlamadzise gi giregidego khu 1919, nigu ginani egi Sathane a simamidego gu gira gu khugeya ga tepo yoyo?

¹⁶ Giprofeto gi gomogo umo ga Gutuledwa gipimo 11 gya gu ganeya gambe gu khigyo ‘dzifakazi dzimbili’ dzi di hadzi gu wuya dzi vbanya gambe hwane nya tepo nyo khaguri. Giprofeto gegi gi tadzisegide khu ndziya nyo hlamadzise hwane nya mwaga moyo vandriyathu vava na va khothedwe pasoni. Khu Março nya 1919, vandriyathu vava va todzidwego va di duswa khu pasoni nigu va di dusedwa nandru. Vandriyathu va di dzegeya gu thangeya gambe thumo nyo tshumayele ni gu hevbudza. Ganiolu, isoso kha sa gira sathane a ema gu wugeya vathu va Nungungulu. Gu khugeya tepo yoyo, Sathane a gu vanga “tsongo” nya gu wugeye vatshavbo vathu va Nungungulu. (Gutu. 12:15) Hatshavbo gu vbweta hi ‘timiseya hi bwe hi manega ni gukhodwa.’ — Gutu. 13:10.

GIRA SATSHAVBO U SI KODZAGO AVBA NYA THUMO HI NINGIDWEGO KHU JEHOVHA

17. Giphaso muni nya mba gi vireya vathu va Nungungulu va gi hakhago, ambari olu va wugedwago khu sathane?

¹⁷ Libhuku la Gutuledwa gipimo 12 la gu yeyedza gu khilo vathu va Nungungulu va di hadzi gu ningwa giphaso nyo khaguri khu wulanga va nga ne gu wu vireya. Libhuku la Gutuledwa la gu tshumuseya gu khilo “litigo” li na midza “tsongo” nya gu wugeye. (Gutu. 12:16) Khiso kamo si giregago. Dzimbe dzitepo, vathu nyo khaguri ga litigo leli la Sathane, nya nga Valamuli va ngu gira gilogyo gasi gu vbulugisa vathu va Nungungulu. Dzitepo nya dzingi tribhunali yi ngu ninga gutshulega nyo khaguri sithumi sa Jehovha. Iso sa gu thumisa kharini gutshulega gogo? Iso sa gu londrola ni levbini lithomo gasi gu gira thumo va ningidwego khu Jehovha. (1 Kor. 16:9) Thumo wowo wa gu pata ginani?

18. I thumo muni nya lisima hi gu nawo matshigoni yaya nyo hegise?

¹⁸ Jesu profetide gu khuye vathu vaye va di hadzi gu huweleya “mahungu nya yadi nya Mufumo [wa Nungungulu] mafuni gwatshavbo na ma si vbohi mahegiso.” (Mat. 24:14) Tepo avo va tshumayelago, va gu hakha giphaso nya dzingilozi mwendro tsawa nyo khaguri nya dzingilozi dzi gu na ni “mahungu nya yadi nya gupindruge, guta embela vathu va vbanyago mafuni, nya mafumbu, ni mahundzu, ni malimi yatshavbo.” — Gutu. 14:6.

19. Khu yavbini mambe mahungu ma yedego gu tshumayedwa khava va haladzago Jehovha?

¹⁹ Vathu va Nungungulu kha va yeli basi gu huweleya mahungu nya yadi nya Mufumo. Avo va yede gambe gu seketeya thumo wu girwago khu dzingilozi wu khumbugwago umo ga Gutuledwa sipimo 8-10. Dzingilozi dzedzi dza gu huweleya sigaradzo nyo khaguri si na thegeyago ava va gu mba seketeya Mufumo wa Nungungulu. Khu kharato, Dzifakazi dza Jehovha dzi na huweleya mahungu nya gu lamule ma fanago ni “maralala ni nilo,” nigu mahungu yaya ma gu ganeya khu gu lamula ga Nungungulu nya litigo leli nyo vivbe la Sathane. (Gutu. 8:7, 13) Vathu va yede guti gu khavo mahegiso momo vbafuvbi gasi va vbindrugedza silo nyo khaguri womini gwawe va bwe va ta vbuluga ga litshigu la Jehovha. (Sof. 2:2, 3) Ganiolu, mahungu yaya kha ma olovelega. Si na lomba gu hi tiya hwambo gasi hi ma huweleya. Ndrani nya tshanisa nya yikhongolo, mahungu nya gu lamule nya gu hegise ma na gorosa ngudzu vathu.— Gutu. 16:21.

ENGISA MAGANA NYA WUPROFETI

20. Ginani hi na gi wonago avba nya dzindrima dza dzimbili dzi landreyago?

²⁰ Khu lisine, ethu hi yede gu engisa ‘magana yaya nya wuprofeti’ kholu anethu hi ngu patega avba nya gu tadzisege nya giprofeto hi lerigo umo nya libhuku la Gutuledwa. (Gutu. 1:3) Ganiolu, hi nga simama kharini gu tshumayela mahungu yaya khu gu tiya hwambo? Hi nga tiyiswa khu silo sivili: Nyo pheye, khesi libhuko la Gutuledwa li ganeyago khu valala va Nungungulu ni nya wuvili, khu makategwa hi na ma manago ha gu simama gu tumbega. Silo sesi hi na si wona ga dzindrima dza dzimbili dzi landreyago.