U nga mana litsako nya lisine

1. Khu ginani hi vbwetago gu thangedwa khu Nungungulu?

LITSAKO nya lisine, khandri litsako nya gu hi lipwa muhuno, mindru li phalalega. Muthu a ngapwa litsako leli womini waye watshavbo. Khu ndziya muni? Jesu tshamusede avbo nya ganelo yaye ya gigomoni gu khuye: “Va ngu tsaka ava va dzitigo gu khavo va ngu vbweta gu thangedwa khu Nungungulu.” (Mat. 5:3) Jesu a di gu dziti gu khuye vathu va di giridwe ni gu dogoreya nya guti ni gu khozeya Muvangi wawe Nungungulu. Kha nga olu Jehovha a gu “Nungungulu nya gutsake,” vale va mu khozeyago anavo va nga tsaka. — 1 Thim. 1:11.

2-3. a) Guya khesi Jesu a ganedego, khu mani gambe a nga manago gutsaka? b) Ginani hi na bhulago khigyo avba nya ndrima yeyi, nigu khu ginani si vbwetegago?

² Ina hi nga tsaka basi ha gu mba tshangana ni sigaradzo? Ahihi. Avbo nya ganelo yaye ya gigomoni, Jesu ganede gilo nyo hlamadzise. Uye a di ganeya gu khuye: “Va ngu tsaka ava va liyago,” gani kholu va garadzegago khu kotani nya sighoho sawe mwendro sigaradzo nya womi. Jesu ganede gambe gu khuye: “Va ngu tsaka vale va tshaniswago khu kotani nya gu gire silo nyo lulame” mwendro vale va timiseyago ‘gu vadwa’ kholu va gu vapizani va Kristo. (Mat. 5:4, 10, 11) Ganiolu, sa gu kodzega kharini gu tsaka ga siemo sesi?

³ Jesu a di gu hi hevbudza gu khuye gutsaka kha gu manwi basi khu gu manega umo nya siemo nya sadi womini gwathu. Ganiolu, khu gu dzi hodzisa khu liphuvboni ni gu hidzimeya vbafuvbi ga Nungungulu. (Jak. 4:8) Hi nga si gira kharini isoso? Avba nya ndrima yeyi, hi na bhula khu silo siraru hi yedego gu gira gasi gu mana gutsaka nya lisine.

LERI NI GU HEVBULA BHIBHILIYA

4. Khu gevbini gilo nya gupheye hi yedego gu gira gasi hi mana litsako nya lisine? (Ndzimo 1:1-3)

⁴ GILO NYO PHEYE: Gasi hi tsaka khu lisine, hi yede gu dzi hodzisa khu liphuvboni. Sirengo ni vathu va yede gu dzi hodzisa khu nyamani. Ganiolu, vathu basi khavo va dzi hodzisago khu liphuvboni. Nigu avo va yede gu gira isoso. Khiso si giredego Jesu a ganeya gu khuye: “Muthu kha vbanyi khu guhodza basi, ganiolu, khu malito yatshavbo ma tago khiyo ga Jehovha.” (Mat. 4:4) Khu kharato, kha hi yeli gu dzumeya li vbindra litshigu nya mba leri lito la Nungungulu, a gu Bhibhiliya. Muembi nya dzindzimo a lovide khuye: ‘A ngu tsaka muthu wule a vegago gutsaka gwaye nayoni wa PFHUMU Nungungulu, a wu alakanyela wutshigu ni mihani.’ — Leri Ndzimo 1:1-3.

5-6. a) Ginani hi gi hevbudego umo nya Bhibhiliya? b) Gu leri Bhibhiliya gu nga hi phasa khu ndziya muni?

⁵ Khu kotani nya olu Jehovha a hi haladzago, uye a ngu hi yeyedza umo nya Bhibhiliya esi hi yedego gu gira gasi hi mana litsako nya lisine. Ethu hi hevbude gu khethu khu yavbi makungu a gu nawo khu womi wathu. Ethu hi hevbude edzi hi nga hidzimeyago khidzo vbafuvbi gwaye ni esi hi yedego gu gira gasi a hi divaleya sighoho sathu. Nigu hi hevbude khu gutumba nyo tsakise a hi tumbisago khu wumindru. (Jer. 29:11) Lisine hi li hevbulago umo nya Bhibhiliya, khu lisine li ngu tsakisa myonyo yathu.

⁶ Hi ngu dziti gu khethu Bhibhiliya yi na ni wusingalagadzi wu phasago hi nga wu thumisago womini gwathu tshigu ni tshigu. Tepo hi landrisago wusingalagadzi wowo hi na mana gutsaka. Tepo hi dzipwago na hi vbede tshivba khu kotani nya sigaradzo nya womi, zama gu vbedza tepo nyo khaguri na wu leri ni gudundrugeya khu Lito la Jehovha. Jesu a di khuye: “Va kategide avo va pwago magana ya Nungungulu, va ma landrisa.” — Luka 11:28.

7. Ginani gi nga gu phasago gasi u wuyedwa khu gu leri Lito la Nungungulu?

⁷ Tepo u lerigo Lito la Nungungulu, dzi ningi tepo nya gu dundrugeye khesi u lerigo. Khu giyeyedzo, u di nga tshangana ni giemo nya nga egi? Muthu nyo khaguri a phula guhodza u gu golago, ganiolu khu gu ba u vbiredzide mwendro khu gu ba u pimisa simbe silo u hodza khu gu vbiredza nyo bwe u si si kodzi gupwa gutshamba nya guhodza gogo. Hwane nyo ba u hodzide, uwe u dundruga gu khuwe u di ngo dzina gu hodza vbadugwana-vbadugwana gasi upwa matshambelo yakone. Isoso si ngu fana ni tepo hi lerigo Bhibhiliya. Dzimbe dzitepo, ethu hi nga leri khu gu vbiredza nyo bwe hi si tuguli mahungu ma gomogo umo nya Bhibhiliya. Dzi vegeye tepo nya gu hevbule Lito la Nungungulu, u dzi dundrugeya na wu romo avbo nya matimo u lerigo, u dundrugeya malito u bwe u dundrugeya esi u lerigo. Tepo u girago isoso, si na gu gira u tsaka.

8. “Githumi nya gutumbege ni nya gugengeye” gya gu tadzisa kharini thumo wagyo? (Wona gambe tshamuselo wa vbavbatshi.)

⁸ Jesu emiside “githumi nya gutumbege ni nya gugengeye” gasi gi dongiseya guhodza ga liphuvboni khu tepo yakone, ni gu ethu hi ngu hodziswa gwadi khu liphuvboni.b (Mat. 24:45) Guhodza gwatshavbo ga liphuvboni ogu githumi nya gutumbege ni nya gugengeye gi gu dongiseyago gya gu dzi seketeya umo nya Milowo yi lovidwego khu tshivba ya Nungungulu. (1 Tes. 2:13) Guhodza gwatshavbo ga liphuvboni gwa gu hi phasa guti mapimiselo ya Jehovha ma gomogo umo nya Bhibhiliya. Khiso si hi girago hi leri Mukhedziseyi ni Khendzugani! dzirevhista ni dzindrima dzi gomogo umo nya jw.org. Ethu hi ngu dzi dongiseya gu hongola mitshanganoni nya libandla ya vbakari nya semana ni gu vbeyani nya semana. Hi ngu wona longoloko nya ngima ni ngima nya JW Broadcasting^® sa gu kodzega. Ha gu tiyisega gu khethu hi ngu simama gu si kodza gu hevbula Bhibhiliya, hi na ba hi dongide gu gira gilo nya wuvili gasi hi kodza gu mana gutsaka nya lisine.

VBANYA KHU MILAYO YA JEHOVHA

9. Gilo muni nya wuvili gi na hi girago hi mana litsako nya lisine?

⁹ GILO NYA WUVILI: Gasi hi tsaka khu lisine ethu hi yede gu vbanya khu milayo ya Jehovha. Muembi nya dzindzimo lovide gu khuye: “Kategide uye a thavago PFHUMU Nungungulu, a gimbilago dzindzilani gwaye!” (Ndzi. 128:1) Guthava Jehovha sa gu thula gu mu ninga githawo hi bwe hi potsa gu gira esi si gu mba mu tsakisa. (Mav. 16:6) Khu kharato, ethu hi yede gu simama gu gira satshavbo hi si kodzago gasi gu landra milayo ya Jehovha nya esi nya sadi ni esi nyo vivbe kha nga a si tshamuseyago omu nya Bhibhiliya. (2 Kor. 7:1) Ethu hi na tsaka ha gu gira esi Jehovha a si golago hi bwe hi potsa gu gira esi a si nyenyago. — Ndzi. 37:27; 97:10; Rom. 12:9

10. Guya khu Varoma 12:2, ginani hi yedego gu gira?

¹⁰ Leri Varoma 12:2. Muthu nyo khaguri adzina a ngu dziti gu khuye Jehovha a ngu yedwa khu gu hunga esi si gu sadi ni esi nyo vivbe, ganiolu uye a yede gu dzumeya gu landrisa milayo ya Jehovha. Khu giyeyedzo, muthu nyo khaguri adzina a ngu dziti gu khuye mufumo wu ngu yedwa khu gu vega milayo nya vhelosidhadhi yi yedego gu thumiswa ruwani. Ganiolu, uye adzina a bomba gu engisa milayo yoyo. Kha nga handro wakone, uye a thumisa vhelosidhadhi yi gu mba dzumeledwa. Ethu hi na yeyedza khu mavbanyelo yathu gu hi ngu khodwa gu khethu gu vbanya khu milayo ya Jehovha khiyo ndziya nya yadi nya gu vbanye khiyo. (Mav. 12:28) Dhavidhe a dzipwide kharato tepo a nga khuye Jehovha: “U na nyi yeyedza ndzila nya guvbanye, nyi na tala khu gutsaka mbeli gwago, nyi napwa gutshamba nyamudye gwago kala gupindruga.” — Ndzi. 16:11.

11-12. a) Ha gu ba hi garadzega mwendro gu vbeya tshivba, ginani hi yedego gu dzi woneya gu gira? b) Malito ma gomogo umo ga Vafilipi 4:8 ma nga hi phasa kharini tepo hi hathago sivbungadzo?

¹¹ Tepo hi garadzegago mwendro gu vbeya tshivba, ethu adzina hi nga vbweta gu gira gilo nyo khaguri gasi hi ema gu garadzega khu kotani nya sigaradzo sathu. Isoso si ngu pwisisega. Ganiolu, ethu hi yede gu dzi woneya gasi hi si gire gilo gi nyenywago khu Jehovha. — Efes. 5:10-12, 15-17.

¹² Avbo nya malangaliya yaye a nga loveya Vafilipi, mupostoli Pawulo a kutside Makristo gu simama gu wona silo “nya gululame, . . . nya guagiswe, nya gugolege [nigu] nya ndruda.” (Leri Vafilipi 4:8.) Ambari olu Pawulo a nga mba lova mahungu ma ganeyago khu sivbungadzo, esi a lovidego si nga hi phasa gu hatha gwadi sivbungadzo. Zama gu gira esi: Avbo li gu romo lito “silo” mwendro “esi” li manegago avbo nya livhesi, zama gu tshikedza khu malito “dzindzimo,” “dzifilmi,” “dzinovhela” mwendro “dzivhidiyu ghemi.” Gu gira esi si na gu phasa guti esi si dzumelegago mahoni ga Nungungulu ni esi si gu mba dzumelega. Ethu ha gu vbweta gu landrisa milayo ya Jehovha. (Ndzi. 119:1-3) Khavbovbo, na hi ri ni livhalo li agidego hi na si kodza gu gira gimbe gilo gi landreyago, gi na hi phasago gu mana litsako nya lisine. — Mith. 23:1.

THANGISA WUKHOZEYI WA JEHOVHA

13. Gilo muni nya wuraru gi na hi phasago gu mana litsako nya lisine? (Johane 4:23, 24)

¹³ GILO NYA WURARU: Tiyisega gu khuwe u ngu thangisa wukhozeyi wa Jehovha womini gwago. Jehovha Muvangi wathu ni gu hi yede gu mu khozeya. (Gutu. 4:11; 14:6, 7) Khu kharato, egi gi yedego gu khala nya lisima womini wathu gu khozeya Jehovha khu ndziya yi mu tsakisago, a gu mu khozeya “khu Liphuvbo ni lisine.” (Leri Johane 4:23, 24.) Ethu ho vbweta liphuvbo nya guage la Nungungulu gasi li thangeya wukhozeyi wathu, gasi uwo wu pwanana ni lisine hi li manago umo nya Lito laye. Wukhozeyi wathu wu yede gu khala gilo nyo pheye womini gwathu, ambari ho ba hi vbanya ga litigo thumo wathu wu himbedzedwago. Olu 100 vandriyathu ni gu vbindra, va khothedwe khu kotani nya olu va gu Dzifakazi dza Jehovha.c Ambari ulolo, avo va ngu gira satshavbo va si kodzago gasi gu gombeya, gu hevbula ni gu bhuleya vambe maningano khu Nungungulu wathu ni mufumo waye. Tepo vathu va hi konaniseyago mwendro gu hi tshanisa, ethu ho tsaka kholu Jehovha a ngu hi phasa gu timiseya nigu hi ngu dziti gu khethu a na hi tshatshazeya. — Jak 1:12; 1 Ped. 4:14.

GIYEYEDZO GYA MATSHIGONI YATHU

14. Ginani gi dugeledego muphya moyo Tajikistão nigu khu ginani?

¹⁴ Vandriyathu nyo khaguri va emisanide ni sigaradzo nya sikhongolo, ganiolu avo va simamide gu mana litsako nya lisine kholu va giride silo sile sa siraru hi bhudego khiso. Wona esi si dugeledego ndriyathu Jovidon Bobojonov a gu na ni 19 myaga wa Tajikistão oyu a bombidego gu beleya wusotshwa. Khu 4 nya Outubro nya 2019 uye a di ta modwa gaya gwaye a bwe aya khothedwa pasoni khu migima nyo khaguri, va bwe va mu phara kha nga gighohi. Edzi va mu pharidego khidzo si yeyedzidwe omu nya dzinotisiya mayigoni nya mangi. Dzinotisiya dzodzo dzi di ganeya gu khidzo va di mu veta na va zama gu mu gira a sambanya gu khuye a na tumbega gwawe va bwe va mu gurumedza gu ambala sombo nya wusotshwa. Hwane nya isoso, tribhunali yi di mu embeya gu khiyo a diri ni nandru yi bwe yi mu rumeya umo gu nga ba gu thumeya umo sibotshwa kala prezidhenti a mu divaleya ni gu mu tshudzisa. Ga tepo yoyo, Jovidon a simamide gu tumbega ni gu tsaka. Khu ginani? Kholu tepo yatshavbo a di gu siti esi a nga ba a si vbweta khu liphuvboni.

15. Jovidon giride kharini gasi gu dzi hodzisa khu liphuvboni tepo a nga ba a khotedwe?

¹⁵ Tepo a nga khothedwa, Jovidon simamide gu hevbula khu Jehovha ambari olu a nga ba ari mwalo Bhibhiliya ni mabhuku yathu. Si kodzegide kharini isoso? Vandriyathu va gipandreni mule va di mu reseya guhodza va bwe va lova lowo nya litshigu avbo nya rava. Khu kharato, uye a di gu si kodza gu leri Bhibhiliya a bwe a dundrugeya khiyo tshigu ni tshigu. Hwane nya gu ba a dusidwe khu pasoni uye ningede wusingalagadzi ga vale va nga mba tshangana ni sigaradzo nya sikhongolo. Uye a di khuye: “Khyadi ngudzu gu u thumisa gu tshulega u gu nago olu gasi gu engedzeya guti u gu nago khu Jehovha khu gu leri Lito laye ni mabhuku yathu.”

16. Jovidon a di gu vega gupima avbo nya ginani?

¹⁶ Ndriyathu a di gu vbanya khu milayo ya Jehovha. Uye kha nga ba a khaleya gu pimisa silo nya mba sadi ni gu gira silo nyo vivbe, vbavbandze nya isoso uye a di gu vega gupima ga Jehovha ni esi Uye a si ningago lisima. Jovidon a di gu tsaka khu gu wona sivangwa nyo mbure sa Nungungulu. Matshigu yatshavbo vbadzimindrutuno, uye a di gu wuga khu gupwa sinyoni na si gu emba. Vbawutsigutuno uye a di gu khedziseya ngima ni dzinyeledzi. Uye wari khuye: “Siningwa satshavbo esi Jehovha a hi ningidego si di gu nyi gira nyi tsaka ni gu nyi tiyisa.” Tepo hi bongago khu guhodza ga nyamani ni ogu ga liphuvboni ni sihevbudzo nya Bhibhliya esi Jehovha a hi ningago, isoso si ngu hi tsakisa nigu si ngu hi phasa gu timiseya.

17. Malito ma gu romo umo ga 1 Pedro 1:6, 7, ma nga thumiswa kharini ga muthu a gomogo ga giemo nyo fane ni egi gya Jovidon?

¹⁷ Jovidon gambe thangiside wukhozeyi wa Jehovha. Uye a di gu dziti gu khuye si na ni lisima gu simama na tumbegide ga Nungungulu nya lisine. Jesu a di khuye: “U na khozela Pfhumu Nungungulu wago. Khuye basi u na gu mu [khozelago].” (Luka 4:8) Muthangeyi nya masotshwa ni masotshwa ma di gu vbweta gu khayo Jovidon a ema gu khala mweyo nya Dzifakazi dza Jehovha. Wulangani nya isoso, uye a di gombeya khu monyo waye watshavbo matshigu yatshavbo ni vbawutshigutunu a lomba Jehovha gasi a mu phasa gu simama na tumbegide. Ambari olu a nga pharwa khu ndziya nya mba yadi, Jovidon simamide gu tumbega. Kha nga handro wakone, olu a tsakide khu gu manega ni gilo a nga ba a ri mwalo nagyo tepo a nga modwa a vetwa a bwe a khotedwa, a gu gu ligwa gu khodwa gwaye. — Leri 1 Pedro 1:6, 7.

18. U nga simama kharini nu tsakide?

¹⁸ Jehovha a ngu dziti gu khuye ethu hi ngu dzina gu tsaka khu lisine. Wa gu landrisa silo sesi sa siraru hi hevbudego khiso si na hi phasago gu mana litsako nya lisine, u na simama gu mana litsako nya lisine ambari wo tsangana ni sigaradzo. Khavbovbo, u na si kodza gu ganeya gu khuwe: “Va kategide vathu va manago mathomo yaya, va kategide vathu Pfhumu, a gu Nungungulu wawe.” — Ndzi. 144:15.