‘Va ngu tsaka ava va simamago na va gu tumbegide’ ga Jehovha

1-2. a) Mifumo nyo khaguri ya gu wugeya kharini vathu va Jehovha, ganiolu ginani egi vathu vaye va girago? b) Khu ginani hi nga tsakago ambari tepo hi wugedwago? (Tshamuseya gambe fotu ya avba nya kapa.)

OLU THUMO wathu wu ngu himbedzedwa mwendro gu emiswa omu nya 30 mayigo ni guvbindra mafuni gwatshavbo. Omu nya mayigo nyo khaguri, vathangeyi va ngu khotheya vandriyathu. Ginani va nga ghoha vandriyathu vava? Ga Jehovha gimwalo gilo nyo vivbe va nga gira. Avo basi va gu leri Bhibhiliya, va tshumayela ni gu khozeya Jehovha gumogo ni vandriyawe. Avo gambe va bombide gu seketeya mwendro gu ema ni esi si hungwago khu politika. Ambari olu si wugedwago khu tshivba, sithumi sesi nyo tumbege sa Nungungulu si ngu simama na si tumbegideb — iso si thulago gu khiso sa gu yeyedza gu tumbega ga Jehovha ambari gyo girega ginani. Nigu iso si ngu tsaka khu gu gira isoso!

² Adzina u di nga wona dzifotu dza vandriyathu nya Dzifakazi va tiyidego hwambo u bwe u wona gu khuwe avo va di gu tsakide. Avo va gu tsaka kholu va ngu dziti gu khavo Jehovha a ngu va tsakeya khu kotani nya olu va simamago gu tumbega gwaye. (Ndzi. 15:1, 2) Jesu ganede gu khuye: “Va ngu tsaka vale va tshaniswago khu kotani nya gu gire silo nyo lulame . . . Tsakani mu nengeya, kholu tshatshazelo wanu wukhongolo.” — Mat. 5:10-12.

GIYEYEDZO HI VEGEDWEGO

3. Kha nga si khumbugidwego omu ga Mithumo 4:19, 20, ginani egi vapostoli va lizana myaga nyo pheye va giridego tepo va nga wugedwa, nigu khu ginani?

³ Sigaradzo vandriyathu va tshanganago naso muhuno khiso sasimweso vapostoli va lizana myaga nyo pheye va tshaganidego naso, khu kotani nya olu va nga ba va tshumayela maningano ni Jesu. Dzitepo nya dzingi, valamuli nya tribhunali nya yikhongolo nya Gijudha va di “va laya gumba ganela gambe khu lina la Jesu.” (Mith. 4:18; 5:27, 28, 40) Ginani egi vapostoli va giridego? (Leri Mithumo 4:19, 20.) Avo va di gu dziti gu khavo muthu nyo khaguri a gu na ni fanelo nya guthangeye a di gu ‘rumide gu gimbila hi tivisa Ivhangeli ga vathu ni gu fakaza’ maningano ni Kristo. (Mith. 10:42) Pedro ni Johane, ava va nga ba vari vathangeyi vawe, khu gu tiya hwambo va di ganeya gu khavo va di hadzi gu engisa Nungungulu guvbindra valamule vale, va bwe va ganeya gu khavo kha va na nga ema gu ganeya khu Jesu. Khu kharato, esi va ganedego si di gu fana ni gu wudzisa valamuli gu khavo: ‘Ina mwa gu pimisa gu khenu mu ngu ninganedwa gu engiswa guvbindra Nungungulu?’

4. Kha nga si khumbugidwego omu ga Mithumo 5:27-29, giyeyedzo muni vapostoli va vegedego yatshavbo Makristo nya lisine, nigu hi nga va pimedzeya kharini?

⁴ Vapostoli va vegede giyeyedzo nya gyadi yatshavbo Makristo nya lisine ma gi landrisago gukhugeya gale a gu “gu yingela Nungungulu guvbindra gu yingela vathu.” (Leri Mithumo 5:27-29.) Hwane nya gu ba va vetidwe khu kotani nya gu tumbege gwawe, vapostoli va di duga khu tribhunali nya yikhongolo nya Gijudha “na va tade khu gunengela, kholu Nungungulu a di va ningide wuhigo nya gusaniswe khu kotani nya lina la Jesu,” nigu avo va di simama gu tshumayela. — Mith. 5:40-42.

5. Siwudziso muni hi yedego gu hlamula?

⁵ Giyeyedzo hi vegedwego khu vapostoli gi nga wusa siwudziso nyo khaguri. Khu giyeyedzo, gu dzi emiseya gwawe nya gu hunge gu engisa Nungungulu guvbindra vathu, gwa gu yelana kharini ni gileletelo gi gu khigyo: “Yingela vathangeli va vegidwego khu nayo?” (Rom. 13:1) Muhuno hi nga “yingela mufumo ni vafumeli” khu ndziya muni, kha nga edzi a ganedego mupostoli Pawulo hi bwe hi simama na hi tumbegide ga Nungungulu kha nga mufumeli wathu nya khongolo? — Tit. 3:1.

“VATHANGELI VA VEGIDWEGO KHU NAYO”

6. a) Kha nga si khumbugidwego ga Varoma 13:1, khu vamani “vathangeyi va vegidwego khu nayo” nigu ethu hi yede gu va phara kharini? b) Ginani hi gitigo khu wuthangeyi wa vatshavbo vafumeli nya vathu?

⁶ Leri Varoma 13:1. Avba nya livhesi leli lito “vathangeli va vegidwego khu nayo” la gu thula vathangeyi nya vathu va fumeyago vambe vathu. Makristo ma yede gu engisa vafumeli vovo nya vathu. Vafumeli vovo va ngu vega milayo ni gu tiyisega gu khavo vathu va ngu yi landrisa, ni gu dzimbe dzitepo va ngu vhikeya vathu va Jehovha. (Gutu. 12:16) Khu kharato, hi ngu rumwa gu livba mikhuphu, gu va ninga githawo ni wuzundzu va wu vbwetago. (Rom. 13:7) Vatshavbo vafumeli vovo nya vathu, va na ni wuthangeyi kholu Jehovha ava dzumeleyago gu va manega nawo. Jesu vegide litshina lolo guagani tepo a nga thethiswa khu mufumeli wa Roma Pontiyo Pilato. Tepo Pilato a nga ganeya gu khuye uye a nga hunga gu vbulugisa womi wa Jesu mwendro gu mu songa, Jesu a di khuye: “U diri mwalo tshivba yoyo nari pwani khwa ningwa khu Babe wangu.” (Joh. 19:11) Muhuno, wuthangeyi wa vatshavbo vafumeli nya vathu ni politika wu ngu hegedwa gufana ni wuthangeyi wa Pilato wu nga ba wu hegedwa.

7. Ga siemo muni hi gu mba yela gu engisa vafumeli nya vathu, ni gu ginani avo va yedego gu gi dundruga?

⁷ Makristo ma yede gu engisa milayo yatshavbo nya mifumo nya vathu yi gu mba dwanisana ni milayo ya Nungungulu. Ganiolu, ethu kha hi yeli gu engisa vafumeli nya vathu tepo va hi embeyago gasi gu gira gilo gi gu mba tsakedwa khu Nungungulu mwendro tepo va hi himbedzeyago gu gira gilo egi Jehovha a vbwetago gu khuye hi yede gu gira. Khu giyeyedzo, avo va nga embeya muphya nyo khaguri gasi gu para giphisa a bwe a hongola nyimbituno.c Mwendro avo va nga hi himbedzeya gu thumisa Bhibhiliya, mabhuku ma seketedwago umo nya Bhibhiliya ni gu himbedzeya gu tshumayela ni gu khozeya Jehovha gumogo ni vandriyathu. Tepo vafumeli va thumisago wuthangeyi wawe khu ndziya nya mba yadi khu gu wugeya vapizane va Kristo avo va yede gu dzi hlamuleya ga Nungungulu, kholu Jehovha a ngu wona satshavbo.— Muh. 5:8.

8. Khu gwevbini gu hambana ga “vathangeyi va vegidwego khu nayo” ni owu wa “Wule a Khusegidego ngudzu?”

⁸ “Vathangeyi va vegidwego khu nayo” va nga thangeya, va zama gu gira gwadi thumo wawe va bwe vafumela vambe. Ganiolu, isoso kha si thuli gu khiso avo va vbelede mwendro va khugegide ngudzu guvbindra vatshavbo. Kholu womo oyu a vbeledego a khugegidego guvbindra vathu vatshavbo, a gu Jehovha Nungungulu. Omu nya Bhibhiliya Jehovha a gu ranwa 4 nya ugo pwani: “Wule a Khusegidego ngudzu.” — Dhan. 7:18, 22, 25, 27.

‘OYU A KHUGEGIDEGO’

9. Ginani egi muprofeti Dhaniyeli a gi wonidego umo nya siwoniso saye?

⁹ Siwoniso si wonidwego khu muprofeti Dhaniyeli siyeyedzide khu lisine gu khiso Jehovha khongolo guvbindra vathangeyi nya vathu. Dhaniyeli gupheya a di wona 4 sirengo nya likhabi si emeyago mifumo nya tshivba ya gale ni ya muhuno, a gu Bhabhiloni, Medo-Pérsia, Grécia, Roma ni mufumo nya tshivba a gu Anglo-América. (Dhan. 7:1-3, 17) Khavbovbo, Dhaniyeli a di wona Jehovha na khade vbagikhalutuno gwaye ndzadzini. (Dhan. 7:9, 10) Esi Muprofeti yoyu nyo tumbege a si wonidego khu gu landreya si di hadzi gu thuma kha nga gigengedzo ga vafumeli muhuno.

10. Guya khu Dhaniyeli 7:13, 14, 27, Nungungulu a emiside mani gasi gu khala mufumeli avba mafuni, nigu isoso sa gu yeyedza ginani Khuye?

¹⁰ Leri Dhaniyeli 7:13, 14, 27. Nungungulu a na fuvisa yatshavbo mifumo nya tshivba yi fumwago khu vathu, a yi ningeya vale va gu na ni fanelo ni tshivba nya yikhongolo. Khu va mani? Khu “moyo nya gufanane ni mwamana wa muthu,” a gu Jesu Kristo ni “sihathwa sa oyu a Khusegidego ngudzu,” a gu ava nya 144 000 va na fumago naye kala “gupindruga ni gupindruga.” (Dhan. 7:18) Isoso somo guagani gu khiso Jehovha oyu a “Khusegidego ngudzu,” khuye basi a gu na ni fanelo nya gu emise oyu a na fumago.

11. Ginani gambe Dhaniyeli a lovidego gi yeyedzago gu khigyo Jehovha a khugegide guvbindra vafumeli nya vathu?

¹¹ Esi Dhaniyeli a si wonidego omu nya giwoniso si ngu pwanana ni esi a ganedego gupheyani. Dhaniyeli a di khuye: “Nungungulu wa ndzadzini . . . uye a ngu dusa vafumeli ni gu tiyisa vafumeli.” Uye a di lova gambe gu khuye: “Uye a Khusegidego ngudzu a ngu fuma mifumo yatshavbo nya vathu ni gu ninga ni wevbini a mu golago.” (Dhan. 2:19-21; 4:17) Ina Jehovha a di nga dusa ni gu emisa vafumeli? Vbavbandzi nyo kanakani ina!

12. Ninga giyeyedzo nya edzi Jehovha a dusidego khidzo dzipfhumu khavbo nya sikhalo sadzo nya wufumu gale? (Wona fotu.)

¹² Jehovha yeyedzide gu khuye khu lisine a na ni tshivba guvbindra “vanthangeyi va vegidwego khu nayo.” Wona siyeyedzo siraru. Faro mufumeli wa Egipito giride dzigumbi vathu va Jehovha, a bwe a bomba gu va tshula khu gu phindra phindra. Ganiolu, Jehovha a va tshudziside a bwe a fuvisa Faro avbo nya Yiphwa nyo Fuviye. (Dhan. 5:22, 23) Pfhumu ya Bhabhiloni Bhalitazari yi di gira festa yi bwe ‘[yi] wugela Pfhumu ya ndzadzini, bwelo khavbo yi rungudza vanungungulu nya parata ni nya ndralama’ wulangani ga Jehovha. (Dhan. 5:22, 23) Ganiolu, Nungungulu a di tshonegisa mwama yoyo nya gu dzi khusedze. “Khu wutshigu wowo kamwe,” Bhalitazari a di songwa nigu mufumo waye wu di ningedwa mandzani ga va Medi ni Persiya. (Dhan. 5:28, 30, 31) Pfhumu Herodhi Agiripa nyo Pheye, ya Palestina a di ruma gasi mupostoli Jakobe a songwa a bwe a khotheya mupostoli Pedro nari ni makungo nyo mu songe. Ganiolu, Jehovha a di himbedzeya gu gira esi a nga ba a si vbweta. Uye “a di vetwa khu ngilozi ya Pfhumu,” khavbovbo afa.— Mith. 12:1-5, 21-23.

13. Ninga giyeyedzo nya edzi Jehovha a fuvisidego khidzo pwanano wu nga ba wuri ni vafumeli.

¹³ Jehovha yeyedzide gu khuye na ni tshivba khu gu fuvisa pwanano wu nga ba wu giridwe khu vafumeli vatshavbo. Uye dwanede Vaisrayeli ni gu va phasa gu fuvisa pwanano wu nga ba wuri ni 31 dzipfhumu dza Khanani va bwe va dzega sipandre nya sikhongolo nya litigo nya gitumbiso. (Jos. 11:4-6, 20; 12:1, 7, 24) Jehovha gambe phaside Vaisrayeli khu gu fuvisa khu gu vbeleya pfhumu Bheni-Hadhadhi ni 32 vafumeli va Siriya va nga ba va dwana ni Israyeli.— 1 Dzipf. 20:1, 26-29.

14-15. a) Silo muni si ganedwego khu pfhumu Nebhukadhenezari ni Dhariyo maningano ni Mufumo wa Jehovha? b) Gilo muni egi muembi nya dzindzimo a lovidego maningano ni Jehovha ni vathu vaye?

¹⁴ Hwane nya tepo nyo khaguri gambe, Jehovha a yeyedzide gu khuye Uye a Khugegide guvbindra vatshavbo. Tepo pfhumu ya Bhabhiloni Nebhukadhenezari yi nga dzi khusedza khu kotani nya ‘tshivba yaye ni gu dhumiswa nya wugulu waye’ vbavbandze nya gu dzi nogise ga Jehovha, oyu a nga ba a muti gu khuye khuye a yedego gu dhumiswa, Nungungulu a di mu gira a handruga. Hwane nya gu ba Nebhukadhenezari, uye a di “bonga oyu a Khusegide ngudzu” a bwe a dzumeya gu khuye mufumo wa Jehovha wu na simama kala gupindruga. Uye a engedza gambe gu khuye: “Mwalo a ndreyisago gyandza gyaye.” (Dhan. 4:30, 33-35) Hwane nya gu ba gu tumbega ga Dhaniyeli gu lingidwe ni gu ba Jehovha a mu vbulugiside phalani nya dzingala, pfhumu Dhariyo yi di khiyo: “Vathu va na ndrendremele va thava Nungungulu wa Dhaniyeli. Kholu uye Nungungulu a vbanyago a ngu simama kala gupindruga; mufumo waye wu mwalo mahegiso, gufuma gwaye gwa gu simama kala gupindruga.” — Dhan. 6:7-10, 19-22, 26, 27.

¹⁵ Muembi nya dzindzimo ganede gu khuye: “PFHUMU Nungungulu a ngu pfhungumula gikungo gya va nya mayigo ni gu thesa vbavbatshi mipimiso nya mayigo.” A bwe a engedzeya, khuye: “Li kategide litigo lile Nungungulu [wawe] a gu [Jehovha], ni vathu a va hathidego gu khala thomba yaye.” (Ndzi. 33:10, 12) Egi gighelo nya gyadi gi na hi phasago gu simama na hi tumbegide ga Jehovha.

NYIMBI NYO HEGISE

16. Ginani hi tiyisegago gu khethu gi na girega ndrani nya “tshanisa nya yikhongolo” nigu khu ginani? (Wona fotu.)

¹⁶ Hi ngu hevbula silo nya singi khesi Jehovha a giridego gale. Ganiolu, ginani gi na giregago mindru wa tshigu? Kha hi kanakani gu khethu Jehovha a na vbulugisa sithumi saye nyo tumbege ndrani nya “tshanisa nya yikhongolo” yi tago. (Mat. 24:21; Dhan. 12:1) Uye a na gira isoso tepo mayigo ma na girago pwanano, wu tidwago gu pwani i Goge wa Magoge, gasi gu wugeya sithumi nyo tumbege sa Jehovha. Ambari pwanano wowo wa gu pata sivbango satshavbo nya 193 sa Nações Unidas, iso kha si na nga si kodza gu dwana ni mabutho ya ndzadzini. Jehovha a gu tumbisa gu khuye: “Eni nyi na yeyedza wugulu ni gu aga gwangu, nyi na tidwa mahoni ga va nya mayigo; khavbo mu na nyitigo gukhenu Eni kheni [Jehovha].” — Ezek. 38:14-16, 23; Ndzi. 46:10.

17. Ginani egi Bhibhiliya yi ganeyago khu wumindru nya dzipfhumu dza mafuni momu ni vale va na simamago na va tumbegide ga Jehovha?

¹⁷ Gu saseya ga Goge wa Magoge gu na phedzisa nyimbi nya Harimagedhoni, a gu iyo Jehovha a na yi thumisago gasi gu fuvisa “vafumeli vatshavbo va mafuni.” (Gutu. 16:14, 16; 19:19-21) Ganiolu, “vathu va lulamidego, va na vbaha mafuni momu, ni vale va vbeledego, va na khala umo.” — Mav. 2:21.

HI YEDE GU SIMAMA NA HI TUMBEGIDE

18. Ginani egi Makristo nya mangi ma dzi emiseyago gu gira nigu khu ginani? (Dhaniyeli 3:28)

¹⁸ Myaga nya yingi, Makristo nya mangi ma vegide mhangoni gutshulega gwawe ambari ni womi wawe khu kotani nya olu va nga ba va haladza Jehovha kha nga mufumeli wawe nya khongolo. Makristo yoyo nya lisine, ma di dzi emisede gu simama na ma tumbegide ga Jehovha. Avo va di gu fana ni Vahebheru vale va vararu va nga simama na va tumbegide ga Oyu a khugegidego, oyu a nga va vbulugisa omu nya nilo. — Leri Dhaniyeli 3:28.

19. Jehovha a gu lamula vathu vaye na gu dzi seketeya avbo nya ginani nigu isoso so hi kutsa gu gira ginani?

¹⁹ Muembi nya dzindzimo Dhavhidhe lovide maningano ni gutumbega ga Nungungulu. Uye a di khuye: “PFHUMU Nungungulu a na lamula mayigo; nyi lamule PFHUMU Nungungulu, gukhedza khu fanelo yangu, kholu eni nyi muthu nya gululame, nyi mwalo nandru.” (Ndzi. 7:8) Dhavhidhe a di engedza gambe, khuye: “Lisine ni gululama si na nyi sayise.” (Ndzi. 25:21) Ndziya nya yadi nya guvbanye khiyo gu simama gutumbega ga Jehovha. Hi sayisa gutumbega gwathu ambari go girega ginani. Ethu hi na dzipwa nga edzi a dzipwidego khidzo muembi nya dzindzimo a lovidego gu khuye: “Va kategide vale va gimbilago khu ndzila nya gululame, avo va landrisago milayo ya PFHUMU Nungungulu.”— Ndzi. 119:1.