Ina u dzi emisede gu “hodza thomba nya mafu”?
ETHU hi virede khu maho nyo fuviye gu tadzisega nya gitumbiso gya Jesu gi gu khigyo: “Va ngu tsaka va nya gurula, kholu va na hodza thomba nya mafu.” (Mat. 5:5) Ava va todzidwego va na hakha thomba nya mafu tepo khiyo va na fumago ni Jesu ndzadzini kha nga dzipfhumu. (Gutu. 5:10; 20:6) Makristo nya mangi muhuno, ma ngu vireya khu maho nyo fuviye gu ta vbanya kala gupindruga omu mafuni. Ayo ma na ba ma vbelede, ma tsakide ni gu ma na vbanya khu gurula. Gasi isoso si kodzega, ayo ma na ba ma yede gu gira thumo nya lisima. Khu giyeyedzo, ayo ma na phasedzeya avbo nya gu vbindrugedze mafu ma khala paradhesi, gu tiyisega gu khavo ava va na wuswago khu gufani va na mana esi va na si vbwetago ni gu va hevbudza. Dundrugeya khesi hi nga girago olu gasi gu yeyedza gu khethu hi ngu dzina guta gira silo soso tigoni nya guphya.
INA U DZI EMISEDE GU VBINDRUGEDZA MAFU MA KHALA PARADHESI?
Tepo Jehovha a nga embeya vathu gu “tadza mafu, [va bwe va] ma fumela,” a di gu yeyedza gu khuye mafu ma di yede gu khala paradhesi. (Gen. 1:28) Avo va na vbanyago kala gupindruga anavo va na ba va yede gu engisa gileletelo gegi. Khasi na nga kodzega gu mafu ma khala paradhesi gupheyani, kholu lithembwe la Edheni limwalo gambe. Hwane nya Harimagedhoni gu na manega thumo nya wungi nya gu agisele malanga yatshavbo ma nga tshungunuswa. Khu lisine wu na ba wu ri thumo nya wukhongolo ngudzu.
Esi sa gu hi dundrugisa thumo wu giridwego khu Vaisrayeli tepo va nga wuya khu wugumbini Bhabhiloni. A mwalo muthu a nga tshala a vbanya tigoni gwawe khu 70 myaga. Ganiolu, Isaya a ganede khuye khu kotani nya makategwa ya Jehovha va di hadzi gu si kodza gu wusedza litigo lile. Giprofeto gyari khigyo: “Giwula gyaye, a na gi gira gi fanana ni Edheni, marumbi yaye ma fanana ni lithembwe la PFHUMU Nungungulu.” (Isa. 51:3) Jehovha phaside Vaisrayeli gu vbindrugedza litigo lile li khala wulanga nya gu mbure. Khu ndziya nya gu fane, vale va na hakhago thomba nya mafu va na si kodza gu vbindrugedza mafu ma khala wulanga nyo mbure. Gu na ni silo u nga girago olu gasi gu yeyedza gu khuwe u ngu dzina gu patega avbo nya thumo wowu.
Mweyo nya ndziya, khu gu gira satshavbo u si kodzago gasi gu ndranga yago yi simama na yi gu agide u bwe u vegedzeya gwadi silo. U nga gira isoso ambari vavhizinyu vago va gu ba va si giri sasimweso. Uwe gambe u nga phasedzeya avba nya gu agise ni gu lungisa-lungisa silo nyo khaguri Salawuni nya Mufumo ni Salawuni nya Asembeleya. Abari gu giemo gyago gi ngu gu dzumeleya, adzina uwe u nga thuma kha nga vholuntaryu gasi gu phasedzeya ava va thegedwego khu dzimhango nya tumbunugo. Wa gu gira isoso, u na yeyedza gu khuwe u ngu tsakeya gu phasedzeya vandriyago tepo va vbwetago giphaso. U nga dzi wudzisa esi: ‘Ina nyi nga hevbuleya mithumo nyo khaguri nyi nga yi girago mafuni nya maphya Jehovha a gu nyi dzumeleya gu vbanya kala gupindruga?’
INA U DZI EMISEDE GU PHASA AVA VA NA WUSWAGO?
Hwanenyana nya gu ba Jesu a wuside gyanana gya Jayiru, uye a di va embeya gu va gi ninga guhodza. (Marko 5:42, 43) Khu lisine, gu khathaleya gyagadziyana gile nya 12 myaga kha sa nga ba si vbevbugide. Ganiolu, dundrugeya khu thumo wu na vbwetegago gu wu girwa tepo Jesu a na tadzisago gitumbiso gyaye gi gu khigyo: “Vatshavbo va fudego va gomogo marowoni va na pwago Iito Iaye, va wuga.” (Joh. 5:28, 29) Ambari olu Bhibhiliya yi gu mba ganeya satshavbo si pategago, ethu hi nga dundrugeya khu giphaso egi ava va na wuswago va na gi vbwetago gasi va mana gilo nya guhodze, wulanga nyo khale mwendro sombo nyo ambale. Ambari olu, uwe u nga yeyedza gu khuwe u ngu dzina guta va phasa.
Ginani u nga girago muhuno gasi gu yeyedza gu khuwe u dzi emisede gu hakha thomba nya mafu?
Tepo libandlani gwanu gu tiviswago gu pwane mu na hakha muwoneleyi nya gipandre, ina mu ngu va rana gasi guhodza gumogo navo? Tepo vandriyathu va thumago umo nya thumo nya tepo yatshavbo nya guhatege va rumedwago gasi gu ta thuma gipandreni gyanu gasi gu tshumayela mwendro tepo muwoneleyi nya gipandre thumo waye wu vbeyago, u ngu gira satshavbo u si kodzago gasi gu va phasa gu mana wulanga nyo khale? Abari gu wu na girega tshangano nya gu hathege gipandreni gyanu, ina uwe u ngu dzi ningedzeya kha nga vholuntaryu gasi gu phasedzeya mithumo nyo khaguri na wu nga si giregi tshangano mwendro hwane nya gu ba tshangano wu vbede? Mwendro ina u dzi emisede gu hakha vadheleghadhu?
INA U DZI EMISEDE GU HEVBUDZA AVA VA NA WUSWAGO?
Kha nga hi si hevbulago ga Mithumo 24:15, hi virede khu maho nyo fuviye gu wona mazanazana nya vathu na va wuswa. Nya vangi va diri mwalo lithomo nya gu muti Jehovha. Ganiolu, va na manega ni lithomo lolo hwane nya gu ba va wusidwe.a Sithumi nyo tumbege sa Nungungulu si na patega avbo nya thumo nya gu hevbudze. (Isa. 11:9) Charlotte oyu a tshumayedego Europa, América do Sul ni Afrika uye virede khu maho nyo fuviye gu gira isoso. Uye o ganeya gu khuye: “Eni nyi virede khu maho nyo fuviye gu bhuleya ava va na wuswago maningano khu Jehovha ni edzi womi wawe wu na tsakisago khidzo va gu mu thumeya.”
Ambari sithumi sa Jehovha si vbanyidego Jesu na si guti mafuni, aniso si yede guta hevbula nya singi. Olu dundrugeya khedzi hi na tsakago khidzo ni lithomo hi na manegago nalo nya gu tshamuseye Dhaniyeli gu tadzisega nya siprofeto a si lovidego na si sipwisisi. (Dhan. 12:8) Mwendro gu phasa Rute ni Nowemi gu pwisisa edzi situgulwana sawe si pategidego avbo nya gu velegwe ga Mesiya. Ethu hi na tsaka khu gu hevbudza vathu vatshavbo mafuni, kholu gi na ba giri mwalo gilo gi na hi tsolopeteyago.
Ginani hi nga girago olu gasi hi dzi emiseya gu hevbudza vale va na wuswago? Mweyo nya ndziya hi nga girago khiyo isoso khu gu khala muhevbudzi nya wadi u bwe u tshumayela tshigu ni tshigu. (Mat. 24:14) Abari gu si ngu gu garadzeya ngudzu khu kotani nya tanga ni simbe sighelo, u nga yeyedza khuwe u dzi emisede guta hevbudza ava va na wuswago khu gu gira satshavbo u si kodzago olu.
Khyadi gu pimisa khu lisima nya siwudziso sesi: Ina u virede khu maho nyo fuviye gu hakha thomba nya mafu? Ina u virede khu maho nyo fuviye gu fumeya mafu, gu khala umo u bwe u hevbudza ava va na wuswago? U na yeyedza gu khuwe u dzi emisede gu vbanya kala gupindruga umo mafuni khu gu gira mithumo nyo fani ni eyi u na girago tepo u na hakhago thomba nya mafu.
a Wona ndrima yi gu khiyo: “Nya vangi va reswa gululamani” umo nya Mukhedziseyi nya Setembro nya 2022.