Hi nga vbanya kala gupindruga

1. Ginani gi giregago tepo hi dundrugeyago khu gitumbiso gya Jehovha nya gu vbanye kala gupindruga?

JEHOVHA a ngu tumbisa ava va mu engisago gu khuye va na mana “guvbanya nya gupindruge.” (Rom. 6:23) Tepo hi dundrugeyago khesi Jehovha a hi ningago, lihaladzo lathu khuye la gu engedzeya gu tiya. Dundrugeya khesi: Papayi wathu wa ndzadzini a ngu hi haladza ngudzu nya gu gima kha na nga hi diga.

2. Gutumba nya gu vbanye kala gupindruga gwa gu hi phasa kharini?

² Gutumba nya gu vbanye kala gupindruga ogu Nungungulu a hi ningago gu ngu hi phasa gu timiseya sigaradzo sathu. Tepo valala vathu va ganeyago gu khavo va na hi songa, ethu kha hi emi gu thumeya Jehovha. Khu ginani? Kholu gimwegyo nya gighelo khu gu ethu hi ngu dziti nya gu khethu ha gufa na hi tumbegide ga Jehovha uye a na hi wusa, nigu ethu hi na manega ni gutumba nya gu khethu gima kha hi na ngafa gambe. (Joh. 5:28, 29; 1 Kor. 15:55-58; Hebh. 2:15) Khu ginani hi nga tiyisegago gu khethu si nga kodzega guvbanya kala gupindruga? Hongoleni hi wona sighelo si landreyago.

JEHOVHA A GU VBANYA KALA GUPINDRUGA

3. Khu ginani hi tiyisegago gu khethu Jehovha a nga si kodza gu hi gira hi vbanya kala gupindruga? (Ndzimo 102:12, 24, 27)

³ Ethu hi ngu dziti gu khethu Jehovha a ngu si kodza guvbanya kala gupindruga kholu uye Gibuga nya womi, nigu uye a gu vbanya kala gupindruga. (Ndzi. 36:9) Avba momo mavhesi nyo khaguri nya Bhibhiliya ma yeyedzago gu khayo Jehovha womo gukhugeya gale nigu a na simama gu manega. Libhuku la Ndzimo 90:2 la gu ganeya gu khilo Jehovha, “Nungungulu kala gupindruga.” Ndzimo 102 aniyo yo ganeya silo sasimweso. (Leri Ndzimo 102:12, 24, 27.) Nigu Muprofeti Habhakuka a lovide esi khu Papayi wathu wa ndzadzini: “Uwe PFHUMU Nungungulu wangu, Gihathwa gyangu, gasi khu khugeli guhegulani kala gupindruga, gani? [Uwe kha wufi].” — Habh. 1:12.

4. Khu ginani hi gu mba yela gu garadzega abari gu kha hi pwisisi gwadi lisine nya gu khethu Jehovha tepo yatshavbo a manegide? Tshamuseya.

⁴ Ina si ngu gu garadzeya gu pwisisa lisine li gu khilo Jehovha a ngu manega kala “gupindruga?” (Isa. 40:28) Vathu nya vangi navo si ngu va garadzeya gu si pwisisa. Eliyu a ganede esi maningano khu Nungungulu: “Tengo nya myaga yaye a manegidego khiyo, mwalo a wu sayago.” (Joba 36:26) Ambari olu hi gu mba si kodza gu pwisisa gilo nyo khaguri isoso kha si thuli gu khiso khandri lisine. Khu giyeyedzo, ethu kha hi si kodzi gu wona phuvbo, ganiolu isoso kha si thuli gu khiso iyo yi mwalo. Khu ndziya nyo fane, kha nga vathu kha hi na nga si pwisisa khu gu vbeleya gu khethu Jehovha a manegide gukhugeya gale ni gu a na simama gu manega kala gupindruga. Gani hi ngu si pwisisa gani kha hi si pwisisi, Jehovha a na simama gu manega kala gupindruga. (Rom. 11:33-36) Uye manegide na gu si vangwi gilo mafuni ni ndzadzini gupata lihani ni dzinyeledzi. Jehovha a ngu hi tiyisegisa gu khuye: “Khuye a vangidego mafu khu tshivba yaye.” Nigu uye a manegide na si ‘vangi ndzadzi.’ (Jer. 51:15; Mith. 17:24) Khu gevbini gimbe gighelo gi nga hi girago hi tiyisega gu khethu si nga kodzega gu hi vbanya kala gupindruga?

ETHU HI VANGIDWE GASI HI VBANYA KALA GUPINDRUGA

5. Ginani egi patwa nyo pheye va nga hadzi gu gi mana nari khatshi va di gu engiside Jehovha?

⁵ Satshavbo esi Jehovha a si vangidego omu mafuni, a si vangide gasi si vbanya khu tepo nyo khaguri, vbavbandze nya vathu. Uye a va ningide gutumba nya gu gima va sifi. Khu kharato, Jehovha a gengedzide Adhamu gu khuye: “Handro nya simbo nya guti gu hambanisa silo nya sadi niso nyamba sadi, u nga wu hodzi. Kholu litshigu u na gu wu hodzago u nafa.” (Gen. 2:17) Nari khatshi Adhamu ni Evha va di gu engiside Jehovha, gima na va safa. Adzina saye khu gu gimbiya nya tepo, Jehovha na va dzumelede gu hodza “handro nya simbo nya womi.” Isoso so thula gu khiso va diri ni gitiyesegiso nya gu khavo va di hadzi “mana guvbanya nya gupindruge.”b — Gen. 3:22.

6-7. a) Ginani gambe gi yeyedzago gu khigyo vathu kha va vangwa gasi vafa? b) Ginani u dogoreyago guta gira mafuni nya maphya? (Wona dzifotu.)

⁶ Vasiyentista nyo khaguri va tugude silo si yeyedzago gu khiso wongo wathu wu ngu si kodza gu vegedza mahungu nya mangi ndrani nya womi wathu watshavbo. Khu 2010, revhista nyo khaguri yi ganeyago khu ciência yi di ganeya gu khiyo wongo wathu wu ngu si kodza gu vegedza mahungu nya mangi ma dinganago 3 dzimiliyoni nya dziora na dzi gu girwa dzigravasawu nya dzivhidhyu a gu 300 myaga ni gu vbindra. Nigu wongo wathu wu nga vegedza mahungu nya mangi guvbindra esi. Edzi wongo wathu wu nga girwa khidzo sa gu yeyedza gu khiso ethu hi giridwe gasi gu vbanya guvbindra 70 mwendro 80 myaga.— Ndzi. 90:10.

⁷ Jehovha a hi vangide na hiri ni gudogoreya nya gukhongolo nya gu vbanye kala gupindruga. Bhibhiliya yari khiyo Nungungulu, “vegide gambe myonyoni gwawe gu alakanya dzinango nyamba vbela.” (Muh. 3:11) Egi gimwegyo nya gighelo gi hi girago hi wona gufa kha nga nala. (1 Kor. 15:26) Ha gu tshuka hi dwala ngudzu, ina hi na vireya gufa hi diga gu gira gilogyo? Khu lisine ahihi. Ethu hi nga hongola ga dhokodheya mwendro gu seya mirendre gasi gu hawuluga. Khu lisine, ethu hi na gira satshavbo gasi hi sifi. Nigu a gu tshuka muthu hi mu golago afa, nari muphya mwendro na dandride khu tanga, ethu hi napwa guvbisa nya gukhongolo khu tepo nyo laphe. (Joh. 11:32, 33) Ethu hi na simama gu hevbula kala gupindruga, nigu hi na ni gudogoreya nyo tiye nya gu vbanye kala gupindruga kholu Muvangi wathu nya lihaladzo a hi ningide gudogoreya gogo. Somo guagani gu khiso uye a na gira satshavbo a si kodzago gasi gu hi vbanya kala gupindruga. Ganiolu, gu na ni sighelo nya singi si hi girago hi khodwa gu khethu hi nga vbanya kala gupindruga. Olu hongoleni hi wona esi Jehovha a giridego gale ni esi a girago olu gasi gu yeyedza gu khuye makungo yaye kha ma vbindrugedza.

MAKUNGO YA JEHOVHA KHA MA VBINDRUGEDZA

8. Ginani egi Isaya 55:11 a hi hevbudzago khu makungo ya Jehovha maningano khethu?

⁸ Ambari olu Adhamu ni Evha va nga ghoha va bwe va thaphedzisa gighoho ga sanana sawe, Jehovha kha vbindrugedza makungo yaye. (Leri Isaya 55:11.) Makungo yaye ma ngari ayo nya gu vathu va vbanya kala gupindruga. Ethu hi ngu tiyisega khu isoso kholu hi ngu wona silo esi Jehovha a ganeyago ni gu gira gasi gu tadzisa makungo yaye.

9. Ginani egi Nungungulu a tumbisidego? (Dhaniyeli 12:2, 13)

⁹ Jehovha tumbiside gu khuye a na wusa ava va fudego ni gu va ninga lithomo nya gu vbanye kala gupindruga. (Mith. 24:15; Tit. 1:1, 2) Mwama nyo tumbege Joba a di gu tiyisega gu khuye Jehovha a ngu dzina gu wusa vale va fudego. (Joba 14:14, 15) Muprofeti Dhaniyeli a di gu dziti gu khuye vathu va di hadzi gu wuswa ni lithomo nya gu vbanye kala gupindruga. (Ndzi. 37:29; leri Dhaniyeli 12:2, 13.) Vajudha va matshigoni ya Jesu va di gu dziti gu khavo Jehovha a na ninga sithumi saye nyo tumbege “guvbanya nya gupindruge?” (Luka 10:25; 18:18) Jesu khumbugide gitumbiso gegi dzitepo nya dzingi ni gu uye a wusidwe khu gufani khu Papayi waye. — Mat. 19:29; 22:31, 32; Luka 18:30; Joh. 11:25.

10. Matimo nya gu wuswe ga vale va fudego ma gu yeyedza ginani? (Wona fotu.)

¹⁰ Jehovha Muningi nya Womi, nigu a na ni tshivba nya gu wuse vathu va vbanya gambe. Uye a ningide tshivba Eliya gasi gu wusa gyanana gya noni mweyo ya Sarepita khu gufani. (1 Dzipf. 17:21-23) Khu gu landreya, khu gu phaswa khu Jehovha muprofeti Elizewu a wuside gyanana gya nyamayi moyo nya Musunami. (2 Dzipf. 4:18-20, 34-37) Matimo yaya ni mambe matimo nya gu wuswe nya vathu khu gufani, ma gu yeyedza gu khayo Jehovha a na ni tshivba nya gu wuse vathu va vbanya gambe. Tepo a nga ba a romo mafuni, Jesu a yeyedzide gu khuye Papayi waye a di gu mu ningide tshivba yoyo. (Joh. 11:23-25, 43, 44) Olu Jesu womo ndzadzini nigu ningidwe “wufumu watshavbo ndzadzini ni mafuni.” Uye a na si kodza gu tadzisa gitumbiso gi gu khigyo “vatshavbo va fudego va gomogo marowoni,” va na wuswa va vbanya gambe na vari ni lithomo nya gu vbanye kala gupindruga. — Mat. 28:18; Joh. 5:25-29.

11. Dzegiso wu hi tulede kharini ndziya nya gu vbanye kala gupindruga?

¹¹ Khu ginani Jehovha a nga dzumeleya gu khuye gyanana gyaye gifa khu ndziya nya gu vivbe? Jesu ningede hlamulo nya giwudziso gyegi tepo a nga khuye: “Kholu Nungungulu haladzide ngudzu litigo gu kala a ningela Mwanaye wa moyo, gasi ni wevbi a khodwago gwaye a si mbembi, aholu a mane guvbanya nya gupindruge.” (Joh. 3:16) Khu gu ningeya gyanana gyaye kha nga dzegiso, Nungungulu giride gu si kodzega gu hi mana womi nya mba vbeya. (Mat. 20:28) Mupostoli Pawulo a tshamusede gipandre gegi maningano ni makungo ya Nungungulu tepo a nga lova gu khuye: “Kha nga olu gufa gu manidego wulanga tigoni khu kota nya muthu moyo, guwuga ga va nya gufa gu bede tigoni khu kota nya muthu moyo. Khu kharato, vathu vatshavbo vamodwe khu gufa khu gu hengela ni Adhamu; olu khu gu hengela ni Kristo, vathu vatshavbo va na bweledzedwa gambe guvbanya.” — 1 Kor. 15:21, 22.

12. Jehovha a na thumisa kharini Mufumo waye gasi gu tadzisa makungo yaye khethu?

¹² Jesu a hevbudzide valandreyi vaye gasi gu gombeya khu guta nya Mufumo wa Nungungulu ni gu girega nya gugola ga Nungungulu omu mafuni. (Mat. 6:9, 10) Gipandre nya makungo ya Nungungulu khu gu vathu va vbanya omu mafuni kala gupindruga. Gasi si girega silo soso, Jehovha emiside gyanana gyaye kha nga Pfhumu nya Mufumo nya Wumesiya. Nungungulu hathide 144 000 vathu omu mafuni va thumago gumogo ni Jesu avbo nya gu tadzisi gugola ga Nungungulu. — Gutu. 5:9, 10.

13. Ginani egi Jehovha a girago olu, nigu uwe wa gu patega kharini?

¹³ Jehovha olu a ngu tshanganisa “mwandra nya wungi ngudzu nya vathu” ni gu wu trenari gasi wu ta vbanya vbavbatshi nya Mufumo waye. (Gutu. 7:9, 10; Jak. 2:8) Ambari olu vathu nya vangi va hambanisidwego khu kotani nya likhulo, dzinyimpi, ava nya gidzemo nya gikhongolo va gu dzi garadzeya gu dusa ni levbini likhulo ni gihatheya si gomogo monyoni gwawe. Sigiro sawe sa gu yeyedza gu khiso va gu dzega matshari yawe va ma gira mavbadza. (Mik. 4:3) Wulangani nya gu patege avba nya dzinyimpi dzi songeteyago vathu, avo va gu phasa vathu gu mana “guvbanya nya lisine” khu gu va hevbudza maningano khu Nungungulu ni makungo yaye. (1 Thim. 6:19) Adzina sivbango nya dzindranga dzawe si ngu va wugeya mwendro gu hamuga dzitsapawu kholu va seketeyago Mufumo wa Nungungulu, ganiolu Jehovha a ngu va ninga esi va si vbwetago. (Mat. 6:25, 30-33; Luka 18:29, 30) Silo sesi nya lisima, sa gu hi tiyisegisa gu khiso Mufumo wa Nungungulu lisine nigu uwo wu na simama gu tadzisa makungo ya Jehovha.

WUMINDRU NYO TSAKISE WOMO VBAFUVBI

14-15. Gitumbiso gya Jehovha nya gu fuvise gufa kala gupindruga gi na tadzisega kharini?

¹⁴ Jesu olu Pfhumu nya Mufumo wa Nungungulu ndzadzini, nigu uye a na tadzisa satshavbo esi Jehovha a si tumbisidego. (2 Kor. 1:20) Gukhugeya khu 1914, Jesu a gu fuma valala vaye. (Ndzi. 110:1, 2) Nya mba hweya, uye ni ava nya 144 000 va na fuvisa vathu vatshavbo nya guvivbe. — Gutu. 6:2.

¹⁵ Ndrani nya Mufumo wa Jesu nya mil myaga, uye a na wusa ava va fudego ni gu phasa vale va engisago Jehovha gu khala vathu nyo vbeleye. Hwane nya gu lingwa nyo hegise, vale va na lamudwago khu Jehovha kha nga va nya gululama “va na fumela litigo, va na vbanya umo kala gupindruga.” (Ndzi. 37:10, 11, 29) Egi gi tsakisago khu gu “nala nya guhegise a na padwago, khu gufa.” — 1 Kor. 15:26.

16. Khu gevbini gighelo nya lisima gi yedego gu hi kutsa gu thumeya Jehovha?

¹⁶ Kha nga hi si wonidego avba nya ndrima yeyi, gutumba hi gu nago nya gu vbanye kala gupindruga gwa gu dzi seketeya umo nya Lito la Nungungulu. Gutumba gogo gu na hi phasa gu simama na hi tumbegide matshigoni yaya nyo hegise. Ganiolu, ethu kha hi vbweti gu tsakisa Jehovha kholu hi vbwetago gu vbanya kala gupindruga. Gighelo gyathu nyo pheye khu gu ethu ha gu vbweta gu simama gu tumbega ga Jehovha ni Jesu kholu hi va haladzago ngudzu. (2 Kor. 5:14, 15) Lihaladzo lolo la gu hi kutsa gu va pimedzeya ni gu bhuleya vambe khu gutumba hi gu nago. (Rom. 10:13-15) Tepo hi hevbulago gu mba pimisa khethu vamune hi bwe hi khala vathu va gu na ni wuhindzi, Jehovha a na vbweta gu khala pari yathu kala gupindruga. — Hebh. 13:16.

17. Ginani egi moyo ni moyo wathu a yedego gu gira? (Matewu 7:13, 14)

¹⁷ Ina hi na manega vbakari ga vale va na vbanyago kala gupindruga? Jehovha a ngu hi ninga lithomo lolo. Olu moyo ni moyo wathu a yede gu hatha gu simama ndziyani yi yisago guvbanyani. (Leri Matewu 7:13, 14.) Womi wu na ba wu khade kharini tepo hi na vbanyago kala gupindruga? Giwudziso gegi hi na bhula khigyo ga ndrima yi landreyago.