Dzi dongiseye gasi guta vbuluga ga litshigu la Jehovha

1. Ginani hi yedego gu gira gasi gu vbuluga ga litshigu la Jehovha?

TEPO Bhibhiliya yi ganeyago khu “litshigu la Jehovha,” ya gu thula tepo eyi Jehovha a na fuvisago valala vaye ni gu vbulugisa vathu vaye. Gale, Jehovha tsayiside mayigo nyo khaguri. (Isa. 13:1, 6; Ezek. 13:5; Sof. 1:8) Matshigoni yathu, “Litshigu la Jehovha” li na pheya tepo vathangeyi nya politika va na wugeyago Bhabhiloni nya Khongolo nigu hwane isoso yi na manega nyimbi nya Harimagedhoni. Hi yede gu dzi dongiseya olu gasi gu vbuluga ga “litshigu” leli. Jesu a gu hi hevbudza gu khuye kha hi yeli basi gu dzi dongiseya gasi gu emisana ni “tshanisa nya yikhongolo,” ganiolu hi yede gu khala na hi “dongide” na li si vbohi litshigu la Jehovha. — Mat. 24:21; Luka 12:40.

2. Hi nga phasega kharini khu lidangaliya edi Pawulo a lovedego Vatesalonika?

² Umo nya lidangaliya a lovedego Vatesalonika, Mupostoli Pawulo thumiside sipimaniso nya singi gasi gu phasa Makristo gu dzi dongiseya na li si vbohi litshigu la Jehovha. Pawulo a di gu dziti gu khuye litshigu la Jehovha li di hadzi gu mba vboha ga tepo yile. (2 Tes. 2:1-3) Ambari ulolo, a di kutsa vandriyathu gu khala na va dongide gasi guta emisana ni litshigu leli, a bwe a va phasa gu thumisa wusingalagadzi waye. Olu hongoleni hi wona edzi a nga tshamuseya khidzo: 1) gu vboha nya litshigu la Jehovha, 2) ava nya gu kha na nga vbuluga, ni 3) ni edzi hi nga dzi dongiseyago khidzo gasi guta vbuluga ga litshigu leli.

LITSHIGU LA JEHOVHA LI NA VBOHA KHU NDZIYA MUNI?

3. Litshigu la Jehovha li na vboha kharini nga mbafa? (Wona fotu.)

³ “Li nata wutshigu nga mbafa.” (1 Tes. 5:2) Ga sipimaniso siraru, egi khigyo nyo pheye mupostoli Pawulo a gi thumisidego gasi gu tshamuseya gu vboha nya litshigu la Jehovha. Dzitepo nya dzingi, dzimbafa dza gu oloveya guba wutshigu na dzi vbiredzide, nigu vathu nya vangi na va gu pfhade mwendro gu lala. Khu ndziya yayimweyo, litshigu la Jehovha li na vboha khu githugedza, vathu nya vangi na va gu pfhade. Ambari Makristo nya lisine adzina ma nga samadziswa khedzi silo soso si na giregago khu gu vbiredza. Ganiolu, guhambana ni vathu va vivbedwego khu monyo, ethu hi na vbuluga ga litshigu lolo.

4. Litshigu la Jehovha la gu fana kharini ni nyamayi a gu na ni mimba?

⁴ La gu fana ni “nyamayi a gu na ni mimba a lumwago.” (1 Tes. 5:3) Nyamayi a gu na ni mimba kha liti gwadi litshigu a na velegago, ganiolu kha kanakani gu khuye a na velega. Litshigu lolo, li na vboha nya mba si vireya. Uye a napwa ngudzu guvbisa nigu kha na nga vbuluga guvbisa gogo. Khu ndziya nyo fane, ethu kha hi dziti gwadi gu khethu lini li na vbohago litshigu la Jehovha, ganiolu hi ngu tiyisega gu khethu li na vboha. Nungungulu a na lamula ava va vivbedwego khu monyo, nigu avo kha va na nga vbuluga.

5. Khu ginani hi ganeyago gu khethu tshanisa nya yikhongolo ya gu fana ni gugya?

⁵ Gufana ni gugya. Gipimaniso nya wuraru, gi khumbugidwego khu Pawulo gya gu ganeya gambe khu dzimbafa dzi bago wutshigu. Ganiolu, khu gu landreya Pawulo a di manega ni mambe mawonelo, uye a di fananisa litshigu la Jehovha ni gugya. (1 Tes. 5:4) Dzimbafa dzibago wutshigu dza gu garadzega ngudzu nyo bwe dzi vetwa khu tepo nya mba si tugula. Nigu gwa gugya na dzi ngo guba, khu kharato si vbevbuga gu tugudwa. Khu ndziya nyo fane, avba nya tshanisa nya yikhongolo, hi na si kodza gu wona vathu hi nga va fananisago ni dzimbafa, va simamago mugidemani khu gu gira silo si gu mba tsakisa Nungungulu. Gu hambana navo, ethu hi nga dzi emiseya gu potsa satshavbo si gu mba tsakisa Jehovha, ganiolu hi vbwetedzeya “satshavbo nya sadi, gululama ni lisine.” (Efes. 5:8-12) Khu gu landreya, Pawulo a gu thumisa sipimaniso sivili si ganeyago khu vale nya gu kha va na nga vbuluga.

KHU VAMANI NYA GU KHA VA NA NGA VBULUGA?

6. Khu ginani hi ganeyago gu khethu vathu nya vangi va lade? (1 Vatesalonika 5:6, 7)

⁶ “Avo va lalago.” (Leri 1 Vatesalonika 5:6, 7.) Pawulo fananiside vale nya gu kha va na nga vbuluga ga litshigu la Jeovha ni vathu va ladego. Avo kha va siti esi si giregago tepo va ladego. Gya gu girega gilo nya lisima, avo kha va dziti gu khavo gi giregide tepo muni. Nigu avo va mwalo makodzelo nyo gire gilogyo. Vathu nya vangi muhuno va ngu fana ni vale va ladego. (Rom. 11:8) Avo kha va khodwi ga silo si yeyedzago gu khiso ha gu vbanya “matshigoni nyo hegise,” nigu tshanisa nya yikhongolo yomo vbafuvbi. Tepo gu giregago guvbindrugedza nyo khaguri mafuni momu, vathu va ngu yeyedza gu tsakeya mahungu nya Mufumo. Ambari ulolo, nya vangi va gu lala, wulangani nya gu khale na va khendzugide. Nigu vambe va gu khodwa gu khavo litshigu la Jehovha kha li na nga vboha olu. (2 Ped. 3:3, 4) Wusingalagadzi wu ganeyago khu gu khala na hi khendzugide, wa gu engedzeya gu khala nya lisima ngudzu tshigu ni tshigu.

7. Vathu va na fuviswago khu Nungungulu va gu fana kharini ni vale va levago?

⁷ ‘Vale va levago.’ Pawulo a di fananisa vathu va na fuviswago khu Nungungulu ni vale va levago. Vathu nya mba vadi va nga leva kha va siti esi si giregago, nigu va ngu hunga makungo nya mba yadi. Khu ndziya nyo fane, avo va vivbedwego khu monyo kha va dzumeyi sigengedzo sa Nungungulu. Avo va gu hatha ndziya yi yisago gufuvisani. Ganiolu, Makristo ma gu simama gu khala na ma gengede ma bwe va pimisa khu ndziya nya yadi. (1 Tes. 5:6) Gihevbuli nyo khaguri nya Bhibhiliya gi ganede gu khigyo muthu a pimisago khu ndziya nya yadi, “a gu simama na rude, a wona silo khu ndziya nya yadi nigu na tiyide. Khu kharato, isoso si ngu mu phasa gu hunga makungo nya yadi.” Khu ginani hi yedego gu simama na hi rude nigu na hi tiyide? Hi yede gu simama na hi rude nigu na hi tiyide gasi hi si pategi umo nya politika. Tepo litshigu la Jehovha li hidzimeyago, ethu hi nga gurumedzega gu hatha Mufumo hi wu seketeyago. Ambari ulolo, ethu kha hi yeli gu garadzega khesi hi na hlamulago. Liphuvbo nya guage li na hi phasa gu simama na hi rude, na hi tiyide hi bwe hi hunga makungo nya yadi. — Luka 12:11, 12.

HI NGA DZI DONGISEYA KHARINI NA LI SI VBOHI LITSHIGU LA JEHOVHA?

8. Makhalelo ma khumbugwago umo ga 1 Vatesalonika 5:8, ma na hi phasa kharini gu simama na hi khendzugide ni gu thumisa gwadi mapimo yathu? (Wona fotu.)

⁸ “Ambala givhikelo nya khana . . . ni . . . gihugo.” Pawulo a hi fananiside ni masotshwa ma khalago na ma dongide ni gu ambala sombo si na va vhikeyago tepo va hongolago vaya dwana. (Leri 1 Vatesalonika 5:8.) Vathu va gu vireya gu khavo lisotshwa nyo khaguri li khala na li dongide gasi gu dwana ni yevbini tepo. Ilo la gu fana ni ethu. Anethu ha gu simama na hi dongide na li si vbohi litshigu la Jehovha, khu gu ambala givhikelo nya khana, agu gukhodwa ni lihaladzo. Ni gihugo, a gu gutumba. Makhalelo yaya, ma nga hi phasa ngudzu.

9. Gukhodwa gwathu gu na hi vhikeya khu ndziya muni?

⁹ Givhikelo nya khana gi di gu vhikeya monyo nya lisotshwa. Gukhodwa ni lihaladzo si ngu vhikeya monyo wathu nya gu fananise. Makhalelo yaya, ma na hi phasa gu simama gu thumeya Nungungulu ni gu landreya Jesu. Gukhodwa, gwa gu hi tiyisegisa gu khugo Jehovha a na hi tshatshazeya ha gu mu vbwetedzeya khu monyo wathu watshavbo. (Hebh. 11:6) Ugo gu na hi phasa gu simama na hi tumbegide ga muthangeyi wathu Jesu, ambari ha gu tshangana ni sigaradzo. Hi nga tiyisa gukhodwa gwathu gasi hi si kodza gu timiseya sigaradzo hi tshanganago naso, khu gu hevbula khu siyeyedzo sa matshigoni yathu, sa vale va simamidego na va tumbegide tepo va nga tshangana ni gu wugedwa mwendro sigaradzo nya dzitsapawu. Nigu hi nga potsa mhango nyo gole ngudzu dzitsapawu, khu gu hi si vbwetedzeyi dzithomba, hi bwe hi pimedzeya siyeyedzo sa vale va vbevbugisedego womi wawe, gasi gu thangisa Mufumo wa Nungungulu womini gwawe.b

10. Lihaladzo hi gu nalo khu Nungungulu ni vathu, li nga hi phasa kharini gu timiseya?

¹⁰ Lihaladzo li na ni lisima gasi hi si kodza gu khala na hi khendzugide ni gu thumisa mapimo yathu khu ndziya nya yadi. (Mat. 22:37-39) Lihaladzo yi gu nalo khu Nungungulu, li ngu hi phasa gu timiseya tepo hi girago thumo nyo tshumayele ambari ha gu tshangana ni gevbini gigaradzo. (2 Thim. 1:7, 8) Khu kotani nya olu hi haladzago vale va gu mba thumeya Jehovha, ethu ha gu simama gu tshumayela khu ndranga ni ndranga, khu telefoni ni malangaliya. Ethu kha hi digi gutumba gu khethu litshigu limwedo vathu va na vbindrugedza va bwe va pheya gu gira silo nya sadi. — Ezek. 18:27, 28.

11. Lihaladzo hi gu nalo khu vandriyathu la gu hi phasa khu ndziya muni? (1 Vatesalonika 5:11)

¹¹ Ethu gambe hi ngu haladza vandriyathu. Ethu ha gu yeyedza lihaladzo lolo khu gu ‘tiyisana ni gu vbahana khu gyathu.’ (Leri 1 Vatesalonika 5:11.) Gufana ni masotshwa ma thumago gumogo nyimpituno, ethu hi ngu tiyisana khu gyathu. Khu lisine, masotshwa ma girago gipandre nya tsawa wa wumowo, ma nga tshuka ma bayisana, ganiolu nasiri khu nyagigwenye. Khu ndziya nyo fane, ethu gima kha hi na nga khunguvanyisa vandriyathu khu nyagigwenye mwendro gu phodza khu gu ba hi giredwe gilo nyo vivbe. (1 Tes. 5:13, 15) Ethu gambe hi ngu yeyedza lihaladzo lathu, khu gu yeyedza githawo vandriyathu va thangeyago libandlani. (1 Tes. 5:12) Tepo Pawulo a nga lovela lidangaliya leli Vatesalonika, libandla lawe li di nga si enedzi mwaga. Vama va hathidwego gasi gu thuma kha nga madhota, adzina saye kha ma nga ba ma vidzidwe nigu adzina ma di gu gira sihoso nyo khaguri. Ambari ulolo, ma di yedwe gu ningwa githawo. Ndrani nya tshanisa nya yikhongolo ethu hi na vbweta giphaso gya madhota, gasi ma hi ninga sileletelo guvbindra olu. Adzina saye, kha si na nga kodzega gu ningwa sileletelo khu vandriyathu va tshindza gwathu ga mafuni gwatshavbo ni bheteli. Khu kharato, si na ni lisima ngudzu gu haladza ni gu ninga githawo madhota yathu olu. Na si si khathadzisegi esi si na giregago, ethu hi yede gu simama gu pimisa khu ndziya nya yadi, hi si vegi gupima avba nya gu mba vbeleya gwawe, ganiolu khu hi vega gupima ga egi gi kutshidego Jehovha ni Kristo gu hatha vama vava nyo tumbege.

12. Gutumba gwathu gwa gu vhikeya kharini mapimo yathu?

¹² Kha nga olu gihugo gi vhikeyago hungo nya lisotshwa, gutumba gu nga vhikeya mapimo yathu. Gutumba hi gu nago gu ngu hi phasa gu tugula gu khethu, esi litigo li hi ningago kha si phasi gilo. (Filp. 3:8) Nigu gambe gutumba gwathu gu ngu hi phasa gu simama na hi tiyide ni gu rula. Wallace ni Laurinda va thumago Afrika va tugude gukhavo isoso lisine. Ndrani nya dzisemana dziraru, moyo wawe a di fedwa khu mamayi waye, mumbe khu papayi waye. Khu kotani nya tungu nya COVID-19, avo kha va si kodza gu bweleya gaya gwawe gasi vaya wuseya. Wallace lovide gu khuye: “Gutumba nyi gu nago nya gu wuswe ga vale vafudego, gu ngu nyi phasa gu drundrugeya khavo, ganiolu khu matshigu yawe nyo pheye mafuni nya maphya nasiri khu matshigu yawe nyo hegise mafuni momu. Gutumba gogu, gu ngu nyi phasa gu simama na nyi rude tepo nyi dzipwago na nyi vbede tshivba.”

13. Ginani hi nga girago gasi gu hakha liphuvbo nya guage?

¹³ “Mu nga himbedzeyi liphuvbo la Nungungulu gu thuma gwanu.” (1 Tes. 5:19) Pawulo a fananiside liphuvbo nya guage ni nilo wu dzurago ndrani gwathu. Ho ba hiri ni liphuvbo la Nungungulu, ethu hi na thuma khu sighingi, hi tsaka khu gu gira esi nya sadi ni gu tiyiswa gasi hi thumeya Jehovha. (Rom. 12:11) Ginani hi nga girago gasi gu hakha liphuvbo nya guage? Khu gu hi gombeya, hi leri Bhibhiliya ni gu gira gipandre nya hengeledzano ya Jehovha, yi gimbidziswago khu liphuvbo la Jehovha. Ha gu gira isoso, si na hi phasa gu haguleya “mihandro nya liphuvbo.” — Gal. 5:22, 23.

14. Ginani hi yedego gu gi potsa ha gu ba hi vbweta gu simama gu hakha liphuvbo nya guage? (Wona fotu.)

¹⁴ Hwane nya gu ba hi lombide liphuvbo nya guage, hi yede gu dzi woneya gasi hi si li ‘himbedzeyi gu thuma gwathu.’ Nungungulu a gu ninga basi liphuvbo laye nya guage vale va gu na ni mapimo ni mavbanyelo nya yadi. Ha gu simama ni mapimo nya mba yadi ni gu gira esi nyo vivbe, Jehovha kha na nga hi ninga liphuvbo laye nya guage. (1 Tes. 4:7, 8) Gasi hi simama gu hakha liphuvbo nya guage, ethu gambe kha hi yeli gu ‘yeyisa siprofeto.’ (1 Tes. 5:20) Avba lito “Siprofeto” go thudwa mahungu hi ningwgao khu Jehovha khu gu thumisa liphuvbo nya guage, gupata ni mahungu ma ganeyago khu litshigu la Jehovha ni esi si giregago muhuno. Ethu kha hi pimisi gu khethu, litshigu la Jehovha kha li na nga vboha dziteponi dzathu. Wulangani nya isoso, ha gu yeyedza gu khethu hi ngu dziti gu khethu litshigu la Jehovha lomo vbafuvbi, khu gu manega ni mavbanyelo nya yadi ni gu hi simama gu yeyedza gu khethu hi ngu ‘tumbega ga Nungungulu’ tshigu ni tshigu.— 2 Ped. 3:11, 12.

“TIYISEGANI KHU SILO SATSHAVBO”

15. Hi nga potsa kharini gu ndreyiswa khu mahungu ma na ganedwago khu madhemoni? (1 Vatesalonika 5:21)

¹⁵ Matshigoni yaya nyo hegise, vawugeyi va Nungungulu va na ganeya gukhavo: ‘Ho vbanya gurulani.” (1 Tes. 5:3) Vathu va na engisa mahungu nya malipha matago khiyo ga Madhemoni, ma bwe ma ndreyisa vathu nya vangi. (Gutu. 16:13, 14) Ethu ke? Kha hi na nga ndreyiswa ha gu ‘tiyisega khu silo satshavbo.’ (Leri 1 Vatesalonika 5:21.) Lito gu “tiyisega” li thumisidwe gasi gu yeyedza edzi vathu va nga ba va gira khidzo gasi gu tiyisega gu khavo oru mwendro prata yi diri yadi mwendro ne. Khu kharato, hi yede gu tiyisega gu khethu esi hi sipwago ni gu leri khyadi. Esi si diri ni lisima Tesalonika, nigu si na ni lisima gwathu ngudzu-ngudzu olu tshanisa nya yikhongolo yi gomogo vbafuvbi. Wulangani nyo dzumeledzeye esi vambe va ganeyago, ethu ha gu thumisa makodzelo hi nawo, khu gu fananisa esi hi leridego mwendro gu sipwa ni esi Bhibhiliya ni hengeledzano ya Jehovha yi ganeyago. Ha gu gira isoso, kha hi na nga ndreyiswa khu mahungu nya malipha ma na ganedwago khu madhemoni. — Mav. 14:15; 1 Thim. 4:1.

16. Gutumba muni hi gu nago, nigu hi yede gu dzi emiseya gu gira ginani?

¹⁶ Hi ngu dziti gu khethu vathu va Jehovha va na vbuluga litshigu la Jehovha. Ganiolu, ethu kha hi siti esi si na giregago mindru. (Jak. 4:14) Ambari ulolo, gani hi na wona tshanisa nya yikhongolo mwendro hi nafa na ha sa yi wona, ethu hi na mana womi nya mba vbeya ha gu simama na hi tumbegide. Ava va todzidwego va na ba va romo ndzadzini ni Kristo. Dzimbe dzinvuta dzi na vbanya paradhesini mafuni. Hatshavbo hi yede gu vega gupima avba nya gutumba gwathu nyo tsakise ni gu dzi dongiseya na li si vbohi litshigu la Jehovha.