Matshango

Yeyedza pweya-wusiwana

Litshigu limwedo ndriyathu nyo khaguri wa Nova Zelândia a di gu wona vhidhyu omu nya jw.org yi ganeyago gu khiyo Jehovha khandri o pweya wusiwana basi, ganiolu a ngu wu yeyedza. (Isa. 63:7-9) Uye a di hunga gu vbanya khesi a si hevbudego khu gu vbweta dzindziya nya gu phase vambe. Ga litshigu li nga landreya na gu renga silo nyo khaguri merkadhu, a di tshangana ni muvbanyi wa ruwani nigu a di mu rengeya gilo nyo hodze. Muvbanyi wule wa ruwani a di dzumeya. Tepo ndriyathu a nga mu ninga gilo nyo hodze a di londrola lithomo lolo gasi gu mu bhuleya khu Jehovha khu gu thumisa gidangaliyana gi gu khigyo, Gutshaniseka gu na Tshuka gu Vbeya Kamo?

Muvbanyi wule wa ruwani a di pheya gu liya. Uye a di tshamuseya gu khuye dandrisidwe kha nga Fakazi, ganiolu gale na digide lisine. Ga tepo yile a di gombeya ga Jehovha gasi a mu phasa gu bweleya gwaye. Ndriyathu wule a di mu ninga Bhibhiliya a bwe a gira malulamiselo nya gu mu gimbidziseye gihevbulo.a

Hi nga pimedzeya Jehovha khu gu yeyedza pweya-wusiwana valongo vathu, vandriyathu libandlani ni vambe. Nigu hi nga yeyedza pweya-wusiwana vambe khu gu vbwetedzeya lithomo nya gu va bhuleye khu Jehovha.