Dziteponi nya nyimbi ni dzitepo nya gurule, Jehovha a ngu hi ninga tshivba

Paul: Hi di gu tsakide ngudzu! Gu diri Novembro nya 1985, nigu hi di gu romo ndziyani nya gu hongole ga thumo wathu nyo pheye kha nga vamisiyonariyo Libéria, África Ocidental. Avhiyawu hi nga ba hi romo ga iyo yi di ema Senegal. Anne a di khuye: “Hwane nya ora mweyo hi na ba hi romo Libéria!” Khu gu landreya hi dipwa gitiviso gi nga ganeya gu khigyo: “Enu mu hongolago Libéria, mu yede gu tshiga khomu nya Avhiyawu. Gu wugedwa nya mufumo, gu ngu hi himbedzeya gu vboha Libéria.” Ga 10 matshigu ma nga landreya, hi di ya khala ni vamisiyonariyo va Senegal, hi dipwa mahungu nya mangi ma nga ba ma ganeya gu khayo vathu va di gu songwa, mufumo kha wa nga ba wu dzumeleya gu vathu va duga khu mudzindrangani gwawe, nigu a gu tshuka muthu a duga a di yede gu songwa.

Anne: Ethu hi vathu hi zamago gu gira silo khu wugengeyi. Gasi gu ganeya lisine, gu khugeya na nyi ngari gyanana nya gu tidwa kha nga muthu a gu mba hweya gu garadzega. Eni nyi ngu garadzega ambari tepo nyi tshatugago ruwa. Ganiolu, ethu hi di dzi emisede gu hongola ga thumo hi nga ba hi ningidwe.

Paul: Eni ni Anne hi velegidwe Oeste ga Inglaterra ni gu dzindranga dzathu dzi di gu hambaniswa khu pfhuka nya 8 dzikilometru. Ethu hi di pheya gu thuma kha nga vapiyonero hwane nya gu ba hi vbedzide gu hevbula, nigu hi di kutswa ngudzu khu vavelegi vangu ni mamayi wa Anne gu gira isoso. Khu lisine, avo va hi seketede ngudzu ga misuwo yathu nya gu beleye thumo nya tepo yatshavbo. Tepo nyi nga ba yiri ni 19 myaga, nyi manide lithomo nya gu hongole Bheteli, nigu Anne phede gu thuma nuye Bheteli tepo hi nga tshadha khu 1982.

Anne: Ethu hi tsakide ngudzu khu gu thumeya Bheteli, ganiolu hi di ngari ni gudogoreya nya gu thumeye omu gu nga ba gu vbwetega giphaso. Gu thuma ni vandriyathu va nga ba vari vamisiyonariyo Bheteli, si engedzede gudogoreya hi nga ba hiri nago. Hi di gu gombeya ngudzu khu mahungu yoyo wutshigu watshavbo khu tanga nya 3 myaga, nigu khu 1985, hi tsakide ngudzu tepo hi nga hakha konvhite gasi guya kursari Xikola ya Gileyadhi turma numeru 79. Nigu hi hongode hiya thuma Libéria, África Ocidental.

HI TIYISIDWE KHU LIHALADZO LA VANDRIYATHU

Paul: Ethu hi di beya ga Avhiyawu nya gupheye yi nga ba yi bweleya Libéria. Vathu va di gu thava ngudzu, nigu kha va nga ba va dzumeledwa gu duga khu mudzindrangani dzawe wutshigutuno. Va di thava ngudzu nyo bwe tepo khiyo movha nyo khaguri yi nga gira ligwaha nya likhongolo, va di tutuma na va gu womba dzihuwa. Gasi hi simama na hi rude, ethu hi di gu leri gipandre nya libhuku la Dzindzimo matshigu yatshavbo vbawutshigutuno. Ambari olu gu nga ba guri ni sigaradzo tigoni mule, ethu hi wu gode ngudzu thumo hi nga ba hi ningidwe. Anne a diri misiyonariya nigu a di gu tshumayela matshigu yatshavbo. Eni nyi di romo Bheteli na nyi gu thuma gumogo ni John Charuk. Nyi hevbude nya singi naye, kholu uye a di gu vbanya Libéria khu tepo nya yingi ni gu uye a di gu siti gwadi silingo ni sigaradzo esi vandriyathu va nga ba va tshangana naso.

Anne: Khu ginani hi nga dzegeya gu wu gola thumo owu hi nga ba hi ningidwe Libéria? Khu kotani ya vandriyathu. Avo va hi yeyedzide lihaladzo ni gu avo va diri ni gukhodwa nya gukhongolo. Ethu hi di khala dzipari nigu hi dzipwide na hiri gaya. Malito yawe ni wusingalagadzi wawe, si hi tiyiside khu liphuvboni. Gu tshumayela eyi, si di gu tsakisa ngudzu. Vathu kha va nga ba va tsaka ha gu dzega tepo nya yidugwana mudzindrangani gwawe. Vathu nya vangi va di gu bhula khu siwudziso nya Bhibhiliya ni ga wevbini wulanga. Si di gu vbevbuga gu patega ga mabhulo yawe. Gi diri gipandre nya gu tsakise ngudzu.

HI TIYISIDWE KHU JEHOVHA TEPO HI NGA BA HIPWA HWANGA

Paul: Khu 1989, hwane nya 4 myaga nya gurule, gu di manega gu vbindrugedza nya khavba ni avba. Khu 2 nya Julho nya 1990, vawugeyi va di wandra gipandre gile Bheteli yi nga ba yi romo ga igyo. Hi vbedzide migima nya yingi nya mba ganeya ni valongo vathu ambari kamo ni tsindza yathu ya mafuni gwatshavbo. Gu di gu tade ngudzu khu maghilivindra, gu diri mwalo guhodza nya gu eneye nigu vanyamayi nya vangi va di gu pfinywa. Nigu sigaradzo sesi si simamide khu tanga nya 14 myaga tigoni ga Libéria.

Anne: Simbe sivbango nya mambe mafumbo si di gu dwana ni gu songana khu gyawe ni mambe mafumbo. Gu diri ni masotshwa malangani gwatshavbo, avo va diri ni siphisa nya singi nigu va di gu ambade sombo nya gu thise. Avo va di gu beya ni ga yevbini ndranga, va dzega ni gevbini va nga ba va gi vbweta. Gwawe, gu songa vathu si di gu gira nga khatshi va gu songa dzikhugu. Vawugeyi va di gu sega dziruwa. Ni wevbini a nga ba a zama gu vbindra a di gu songwa. Hwane nya isoso, avo va di gu handzega sirumbi vbatshani nya simbe sirumbi, nigu isoso si giregide vbafuvbi ni Bheteli. Dzifakazi nya gutumbege dzi di songwa gu pata ni vamisiyonariyo vavili.

Vandriyathu va sihide vambe vandriyathu nya mambe mafumbo va nga ba va sotwa gasi gu songwa khu vawugeyi. Vamisiyonariyo ni Vabhetelita va giride sasimweso. Eyi Bheteli, vandriyathu va nga ba va tutuma nyimbi va di gu lala ga andhari ya vbavbatshi, nigu vambe va di gu khala ni ethu mudzikwartunu gwathu ga andhari ya vbatshani. Kwartunu gwathu hi khade ni ndranga mweyo yi nga ba yiri ni 7 vathu.

Paul: Tshigu ni tshigu vawugeyi va di gu zama gu beya Bheteli, gasi gu wona umo hi nga ba hi siha vathu. Tepo si nga ba si girega isoso, vavili avba gwathu va di hongola vbamwanyatunu ga Bheteli gasi guya ganeya ni vawugeyi, nigu vavili va di gu khedziseya khavba nya janela. Vandriyathu vava va vavili va nga hongola vbamwanyatunu, va gu vega mawogo frenti, si di gu yeyedza gu khiso yi diri mwalo mhango, ganiolu va gu vega mawogo hwane si di gu thula gu khiso vawugeyi va di gu gorogide ngudzu. Khu kharato, vale va nga ba va khedziseya khavba nya janela, va di gu tutuma khu gu vbiredza gasi vaya siha dzipari dzathu.

Anne: Litshigu limwedo, vandriyathu kha va si kodza gu himbedzeya tsawa nyo khaguri nya vawugeyi gu beya Bheteli. Eni ni ndriyathu moyo nya nyamayi hi di ya sihala petoni, umo yi nga ba yi romo gwardhafatu yi nga ba yi si wonegi gwadi. Ndriyathu nya nyamayi a di beya umo nya gwardhafatu gasi gu sihala. Vawugeyi va di nyi landra kala ga andhari ya vbatshani, na va pharide siphisa. Avo va di ta veta lidimba lathu khu tshivba. Paul a di va lomba gasi va si beyi mule, khu gu ganeya gu khuye: “Mwangadzi wangu womo petoni.” Tepo nyi nga sega gwardhafatu, omu a nga ba a romo ndriyathu nya nyamayi nyi di gira ligwaha, khavbovbo nyi di yede gu vegedzeya satshavbo edzi si nga ba si romo khidzo ni gu isoso si hwedenyana. Eni nyi di gu tiyisega gu kheni vawugeyi vale va di hadzi gu nyi wudzisa gu khavo ginani nyi nga ba nyi gira, nigu nyi di gu ndrendremeya. Eni nyi di gu dziti gu kheni nyi di yede gu rula na nyi si gu tule lidimba, kholu vawugeyi va di hadzi tugula esi nyi nga ba nyi gira. Nyi di gira nombelo khu monyoni gasi Jehovha a nyi phasa. Eni nyi di tula lidimba nyi bwe nyi va losa khu ndziya nya gurule. Moyo wawe, a di nyi txovha a bwe a hongola a ya tuleteya dzi ghavheta nya gwardhafatu. Uye kha khodwa gu khuye kha mana gilo. Uye ni tsawa waye va di simama gu khedziseya umo nya dzikwartu ni mambe malanga. Avo gambe kha va mana gilo.

LISINE LI SIMAMA GU WENENGEDZA

Paul: Hi khade migima nya yingi na hiri ni guhodza nya gudugwana. Ganiolu, guhodza ga liphuvboni gu hi phaside ngudzu. Wukhozeyi wa vbadzimindrutunu wa Bheteli, wu diri “guhodza” gwathu ga litshigu ni litshigu, nigu ugo gu hi ningide tshivba.

Ethu hi di gu dziti gu khethu, ha gu duga gasi guya vbwetedzeya guhodza mwendro mati, hi di hadzi gu mba si kodza gu vhikeya vale va nga ba va sihade ni gu avo va di hadzi gu songwa. Dzimbe dzitepo, Jehovha a hi ningide esi hi nga ba hi si vbweta khu tepo yakone nigu khu ndziya nya gu hlamadzisi. Jehovha a hi khathalede, nigu a hi phaside gu simama gurula.

Giemo gya tigoni mule gi di engedzeya gugaradza, ganiolu lisine li hi ningide gutumba. Vandriyathu nya vangi va di yede gu tutuma dzitepo nya dzingi gasi gu vbulugisa womi wawe, ganiolu avo va di simama ni gu khodwa gwawe nyo tiye va bwe va simama gurula ambari olu va nga ba va tshangana ni sigaradzo. Vambe va ganede gu khavo, gu emisana ni sigaradzo sile, si va dongisede gasi gu ta emisana “ni tshanisa nya yikhongolo.” Madhota ni vandriyathu nya vaphya, khu gu tiya hwambo va giride satshavbo va nga si kodza gasi gu phasa vandriyathu. Vandriyathu va nga thaveya ga mambe malanga, va di gu phasana nigu va di pheya gu tshumayela ga malanga yoyo. Avo va di gu thumisa ni gevbini va nga ba va gi mana gasi gu gira Dzisalawu nya Mufumo nya gitepwana, gasi gu gireya umo mitshangano. Ga dzitepo dzodzo nyo garadze, gu hongola mitshanganoni ni gu tshumayela vambe, si tiyiside ni gu ninga gutumba vandriyathu. Tepo hi nga ba hi kabaniseya guhodza, sombo ni simbe silo, vandriyathu va di gu lomba dzipasta nya gu tshumayele khidzo gu vbindra sombo. Nigu isoso si hi kuhide ngudzu. Vathu nya vangi va nga ba va wonide ni gu vbanya silo nya gu thise, va di gu dzi emisede gu engiseya mahungu nya yadi. Avo va di gu hlamadzisidwe khu litsako ni lihaladzo va nga ba vari nalo Dzifakazi dza Jehovha, nigu vandriyathu va di gu fana ni wenengedzo vbakari nya gidema. (Mat. 5:14-16) Khu kotani nya olu vandriyathu va nga ba va dzigaradza, vawugeyi nyo khaguri va khade navo vandriyathu.

JEHOVHA A HI NINGIDE TSHIVBA TEPO HI NGA BA HI YEDE GU DIGA VANDRIYATHU

Paul: Dzimbe dzitepo, hi di gu duga khu dhoropani mule dzitepo dziraru nya mba hweya ni guvili khu mwaga. Ndriyathu moyo nya nyamayi nya misiyonariya, a tshamusede edzi hi nga ba hi dzipwa khidzo tepo hi nga duga khu dhoropani mule: “Gileyadhi va di hi hevbudza gu haladza vandriyathu ni gu gola thumo wathu, khiso kamo hi giridego. Khu kharato, tepo hi nga diga vandriyathu ga giemo gile nyo garadze, si hi garadzede ngudzu.” Ganiolu, hi tsakide ngudzu khu gu simama gu seketeya vandriyathu ni thumo nya gu tshumayele Libéria, na hi romo ga mayigo ya vbafuvbyana mule.

Anne: Khu Maio nya 1996, hi diri 4 tepo khiyo hi nga endra khu movha ya Bheteli, yi nga ba yiri ni malangaliya nya mangi nya lisima. Hi di yede gu gimbidzisa 16 dzikilometru kala hi vboha ga wulanga nyo vhikelege vbavbandze nya lidhoropa. Ga tepo yeyi, hi di dzegeya gu wugedwa. Vawugeyi va di vbophosa dzibhala, va hi emisa, va dusa vararu gwathu vbavbandze va bwe va dzega movha, Paul a di romo nuye movhani mule. Hi di dzegeya gu banga khu hwanga. Nya mba hweya, hi di wona Paul na gu gimbiya vbakari nya vathu nya vangi nari ni novba vbagiwombotunu. Gupheyani hi di gu pimisa gu khethu a di vbophoswa, khu gu landreya hi di pwisisa gu khethu nari khatsi isoso si di gu giregide na si gimbiyi. Muwugeyi moyo a di mu bayisa tepo khiyo a nga ba a mu ndrindra gasi a duga khu movhani. Egi gi tsakisago khu gu gi diri gilondra nya gidugwana.

Vbafuvbyana gwathu, gu diri ni movha nya masotshwa, yi nga ba yi tade khu vathu va nga ba va thava ngudzu nigu va nga ba va dzi emisede gu duga khu mule. Ethu hi di hunga gu beya movhani mule, ganiolu gu diri mwalo wulanga ndrani nya movha, khu kharato hi di hunga gu tsopeya. Mugimbidzisi nya movha a di vhula ngudzu nyo bwe hi vbweta gu thega. Hi di mu lomba gasi a ema, ganiolu a di gu thava ngudzu. Hi pharedzede gwadi gasi hi si thegi. Ganiolu, tepo movha yi nga vboha avbo yi nga ba yi hongola avbo, hi di gu garade ngudzu nigu hi di gu ndrendremeya.

Paul: Khu gu landreya, hi di khedza edzi sombo sathu si nga ba si tsundzide khidzo ni gu pferugeya, hi bwe hi dzi wudzisa gu khethu hi vbulugide kharini. Vbafuvbyana gwathu yi di romo elekopiteru yi nga ba yi podwe khu dzibhala, nigu na yi gu gira khatshi yi na fanyegeya. Iyo yi di hadzi gu hi dzega gasi hi hongola Serra Leoa, ga litshigu li nga hadzi gu landreya. Khu kharato, hi di lala vbafuvbyana vbale. Hwane nya gu ba hi vbohide Serra leoa, hi bongide ngudzu khu gu ba hi vbohide ni womi, ganiolu hi di gu garadzega ngudzu khu vandriyathu va Libéria.

JEHOVHA A NYI NINGIDE TSHIVBA GASI GU TIMISEYA SIMBE SIGARADZO

Anne: Hi vbohide na hi vhikelegide Bheteli ya Freetown, eyi vandriyathu va nga hi khataleya gwadi. Ganiolu, nyi di pheya gu dundrugeya khesi si giregidego. Matshigu yatshavbo nyi di gu thava gu kheni gi girega gilo nyo khaguri nyi bwe nyi si kodzi gu pimisa khu ndziya nya yadi. Satshavbo nyi nga ba nyi si vbanya si di gu gira khatsi khandri lisine. Vbawutshigutunu nyi di gu khendzuga na nyi gu thava gu kheni gi na girega gilo nya mba gyadi. Si di gu nyi garadzeya gu hefemula. Paul a di nyi abrasari a bwe a gombeya ni eni. Hi di embeleya dzindzimo nya Mufumo kala nyi ema gupwa hwanga. Nyi di gu dzipwa nga khatshi nyo vbweta gu pheya gu handruga nyi bwe nyi pimisa gu kheni nyi di hadzi gu mba si kodza gu thuma kha nga misiyonariya.

Gima kha nyi na nga divala esi si nga girega khu gu landreya. Ga semana yoyo yayimweyo hi di hakha dzirevhista dzimbili, mweyo yakone yi diri Khendzugani! nya 8 nya Junho nya 1996. Khendzugani! wowo wu diri ni ndrima yi gu khiyo “Wu nga gira ginani wa gu ba uri ni hwanga nya wu khongolo”. Nyi di pwisisa gu kheni khu ginani nyi nga ba nyi dzipwa khu ndziya yeyi. Nya wuvili gu diri Mukhedziseyi nya 15 nya Maio nya 1996, wu nga ba wuri ni ndrima yi gu khiyo “Avo va di yi mana hayi tshivba va gu nayo.” Mukhedziseyi wu diri ni fotu nya nyapupwe wu nga dzi bayisa. Ndrima yoyo, yi di tshamuseya gu khiyo gu fana ni nyapupwe wu si kodzago gu hodza ni gu vbuvba ambari na wu bayisidwe mambapi yawo, anethu khu gu phaswa khu liphuvbo la Jehovha hi nga simama gu phasa vambe ambari na hi tshanganide ni silo nya singi nya mba sadi womini gwathu. Khu gu thumisa dzindrima dzedzi dza dzimbili, Jehovha a di nyi ninga esi nyi nga ba nyi si vbweta khu tepo yakone. (Mat. 24:45) Nyi di gevisisa dzimbe dzindrima nya gufane ni edzi, nyi bwe nyi dzi vega wulanga nyo khaguri, idzo dzi nyi phaside ngudzu. Khu gu gimbiya nya tepo, kha nya tshaniseka khu gu dundrugeya esi si nyi giregidego gale.

JEHOVHA A HI NINGIDE TSHIVBA GASI GU DZUMEYA THUMO NYA WUPHYA

Paul: Tepo yatshavbo hi nga ba hi bweleya gaya gwathu Libéria, hi di gu tsaka ngudzu. Guhegisani nya mwaga nya 2004, hi di gu enedza 24 myaga na hi romo thumoni gwathu. Nigu nyimbi yi di gu vbede. Vandriyathu va diri ni makungo nya gu vbahe Bheteli. Ganiolu, hi di dzegeya gu ningwa thumo nya wuphya.

Isoso si hi garadzede ngudzu. Ethu hi di gu haladza ngudzu vandriyathu va Libéria. Avo va di gira nga khatshi valongo vathu ni gu ethu kha ha nga ba hi vbweta gu va diga. Ganiolu, ethu hi di wonide edzi Jehovha a hi kategisidego khidzo tepo hi nga diga dzindranga dzathu hi hongola Gileyadhi, khu kharato hi di dzumeya thumo wowu nya wuphya. Hi di gu rumedwa gasi guya thuma Gana, a gu litigo la vbafuvbyana mule.

Anne: Ethu hi lide ngudzu tepo hi nga fuluga khu Libéria. Hi hlamadzisidwe ngudzu tepo ndriyathu moyo a dandridego khu tanga, nigu a gu na ni guti nyo pwani khu Frank, a nga hi embeya gu khuye: “Enu mu yede gu hi divala.” Khavbovbo, a tshamuseya gu khuye: “Ethu hi ngu dziti gu khethu enu gima kha mu na nga hi divala, ganiolu enu mu yede gu vega gupima ga thumo wanu nya wuphya. I thumo mu nga ningwa khu Jehovha, khu kharato mu yede gu vega gupima ga vandriyathu va eyi.” Esi ndriyathu yoyo a ganedego si hi tiyiside, kholu hi di yede gu gira dzipari nya dziphya tigoni hi nga ba hi si tidwi khu muthu ni omu silo satshavbo si nga ba siri siphya gwathu.

Paul: Ganiolu, vandriyathu va Gana kha va hweya gasi gu khala valongo vathu nya vaphya. Gu diri ni Dzifakazi dza Jehovha nya dzingi eyi. Hi hevbude ngudzu khu gu tumbega ni gukhodwa nya gutiye gu nga ba guri ni dzipari dzathu nya dziphya. Khu gu landreya, hwane nya gu ba hi thumide Gana khu 13 myaga hi di hakha gimbe giningwa. Hi di lombwa gasi guya thuma Bheteli ya África Oriental Quénia. Ambari olu hi nga ba hi suva vandriyathu va Gana ni Libéria, hi di dzegeya gupwanana ni vandriyathu va Quénia, nigu gufana ni Gana ni Libéria, anugo Quénia gu diri ni thumo nya wungi gasi gu wu gira.

ESI HI SI HEVBUDEGO GA YATSHAVBO MITHUMO HI GIRIDEGO

Anne: Womini gwangu nyi tshanganide ni sigaradzo nya singi ni gu dzimbe dzitepo nyi di gu thava ngudzu. Ha gu ba hi vbanya ga malanga gu gu na ni mhango hi bwe hi emisana ni dzitepo nya gu garadze, isoso si nga hi gira hi dwala, hi thava hi bwe hi dzipwa na hi garade. Ethu kha hi vireyi gu khethu Jehovha a hi vhikheya ga isoso. Olu, tepo nyipwago siphisa na si gu vbophoswa, ndrani gwangu go vbisa nyi gira gu khatsi nyi na gosa nigu mawogo yangu ma gu gira khatshi ma mwalo tshivba. Ganiolu, nyi hevbulede gu tumba giphaso gya Jehovha a hi ningago gupata ni giphaso hi ningwago khu vandriyathu. Nigu nyi ngu wona gu khethu Jehovha a ngu hi phasa gu simama thumoni gwathu khu gu simama gu hevbula, gu gombeya, gu hongola mitshanganoni ni gu tshumayela.

Paul: Dzimbe dzitepo vathu va ngu hi wudzisa gu khavo: “Mu ngu wu gola thumo wanu?” Mayigo ma nga mbura, ganiolu dzimbe dzitepo ma nga khala malanga nya dzimhango. Khu kharato, ginani hi gi golago ngudzu gu vbindra mayigo yoyo? Vandriyathu nyo hathege, a gu ndranga yathu. Ambari olu hitago khu malanga nyo hambane-hambane, ethu hi ngu pimisa nga edzi Jehovha a pimisago khidzo. Hi di gu pimisa gu khethu hi di rumedwa gasi guya va tiyisa, ganiolu ethu khethu hi nga tiyiswa.

Vandriyathu va mafuni gwatshavbo siningwa si tago khiyo ga Jehovha. Ethu hi na ni valongo ni wevbini wulanga. Na hi ngo gira gipandre nya hengeledzano ya Jehovha, ethu hi na ni valongo ni ndranga. Ethu hi ngu tiyisega gu khethu ha gu simama gu tumba Jehovha, uye a na hi ninga tshivba gasi gu timiseya ni gevbini gigaradzo. — Filp. 4:13.