Giphaso gasi gu hevbula semana ni semana
INA SI ngu gu garadzeya gu gira gihevbulo nya Bhibhiliya tepo yatshavbo? Hatshavbo dzimbe dzitepo hi ngu dzipwa khu ndziya nyo fane. Ganiolu, dundrugeya khu silo u girago tshigu ni tshigu, nya nga gu hamba. Gu hamba gu ngu dzega tepo nigu hi yede gu dzi garadza gasi gu gira isoso, ganiolu hwane nya gu gire isoso hi ngu dzipwa na hi gu pepa! Gihevbulo nya Bhibhiliya gi ngu fananiswa ni gu dzi “handza khu lito la Nungungulu.” (Efes. 5:26) Wona mawonelo nyo khaguri ma na gu phasago:
Gira longoloko nya wadi. Hi ngu dziti gu khethu gihevbulo gyathu nya Bhibhiliya gimwegyo “nya silo nya lisima ngudzu” hi yedego gu gira. (Filp. 1:10) Gasi gu gu phasa gu dundruga longoloko u giridego gasi gu hevbula, lova ga lidangaliya nyo khaguri mwendro gu namegedza longoloko wowo ga wulanga nyo khaguri si na gu vbevbugeyago gu wu wona. Mwendro u nga theya alarmi omu nya telefoni yago gasi yi gu dundrugisa na yi si vbohi tepo nya gu hevbule.
Dundrugeya khesi si na gu phasago gu vega gupima. Ina si ngu gu vbevbugeya gu vega gupima khu tepo nyo laphe mwendro khu tepo nyo role? Khuwe u sitigo esi si gu sadi gwago. Khu kharato, tepo u girago longoloko nya tepo u na hevbulago khiyo, dundrugeya khu isoso. Wa gu ba u si dzipwi gwadi gasi gu hevbula ga tepo u nga yi vegisa, u nga zama gu hevbula khu 10 dzimeneti basi. Gu hevbula khu 10 dzimeneti i tshukwana guvbindra gu mba hevbula gilo. Nigu wa gu si kodza gu pheya, si na gu kutsa gu simama. — Filp. 2:13.
Hunga esi u na hevbulago. Wa gu vireya kala yi vboha tepo nya gu hevbule gasi gu pimisa esi u na hevbulago, kha wu na nga ‘thumisa gwadi tepo yago khavba si kodzegago khavbo.’ (Efes. 5:16) Khu ginani u gu mba gira sasamedzo nya dzindrima ni mahungu u tsakeyago gu ma hevbula? Khu giyeyedzo, wa gu manega ni giwudziso u bwe u si gi pwisisi gwadi, lova giwudziso gyogyo avba nya longoloko u giridego. Nigu gu hegisani nya gihevbulo ni gihevbulo, u nga engedzeya simbe silo u tsakeyago gu hevbula avba nya longoloko wago.
Dzi vbevbugise. Esi si gu na ni lisima gu hevbula semana ni semana. Gasi si girega isoso, u yede gu vbindrugedza litshigu, ora, tepo u yi vbedzago na wu gu hevbula ni esi u hevbulago.
Ha gu hevbula semana ni semana, hi na mana mihandro nya yadi. Hi na tiyisa wupari wathu ni Jehovha, hi na hunga makungo nya yadi womini gwathu nigu hi na tiyiswa. — Jos. 1:8.