Mikka
5 “Lino ulikulinenguula aamubili,
O mwana musimbi nulikulwanwa,
Batusinkila.
Bawuma mubetesi wa-Israyeli aaseya akaponda.
2 Anduwe, O Bbetelehema Efrata,
Numuniini loko aakati kazyuulu zyaJuda,*
Mulinduwe muzoozwa ooyo uutazooyendelezye ma-Israyeli kayiminina ndime,
Matalikilo aakwe ngachiindi, kuzwa kumazuba aachiindi loko.
3 Nkinkaako, uzoobatakata
Kusikila chizoosike chiindi chakuti ooyo uuyanda kutumbuka, atumbuke.
Mpawo bamwi babbululu bakwe boonse bazoobweeda kuma-Israyeli.
4 Uzooyimikila ayembele butanga mumanguzu aaJehova,
Muzina pati lyaJehova Leza wakwe.
Alubo bazookkala kabalyiibide,
Nkaambo bupati bwakwe buzoosika kumagolelo aanyika.
5 Alubo uzooyeta luumuno.
Kuti ma-Asiriya banjila munyika yesu akulyatuuka ndawu zyesu zyakukwabilila,
Tuzoobikka beembeli bali musanu ababili kuti babalwane, kwaamba choonzyo, bazulwidi babantu bali musanu abatatu.
6 Bazooyembela nyika ya-Asiriya apanga,
Anyika yaNimurodi kumanjililo aayo.
Uzootuvuna kuzwa kuma-Asiriya,
Natazoonjile munyika yesu akulyatuuka chilawu chesu.
7 Basyeede bang’anda yaJakkobo bali mbuli lume* aakati kabantu biingi
Mbuli lume luzwa kuli Jehova,
Mbuli lunywaanywa aazilimwa
Zitalangilili chintu kumuntu
Nikuba kulindila bana babantu.
8 Basyeede bang’anda yaJakkobo bazooba aakati kazisi,
Aakati kabantu biingi,
Mbuli mulavu uuli aakati kabanyama bamusokwe,
Mbuli mulavu uuchili muniini* aakati kamatanga aambelele,
Ooyo uuzijata akuzizavuula nayinda,
Zyakuti taakwe uuzivuna pe.
9 Kuboko kwako kuzootandabikwa kuti kube aajulu aabasinkondonyokwe,
Alubo basinkondonyokwe boonse bazoonyonyoonwa.”
10 “Mubuzuba oobo,” mbaamba Jehova,
“Ndizoonyonyoona mabbiza aako, ndinyonyoone angolo zyako.
11 Ndizoonyonyoona myuunzi yanyika yako
Akudilisya ndawu zyako zyoonse zyakukwabilila.
12 Ndizoomaninsya kusonda nkuchita,*
Alubo taakwe muntu uuchita zyamasalamusi uutazoosyaale aakati kako.
13 Ndizoonyonyoona zikozyano zyako zibezedwe amapila aako aali aakati kako,
Alubo tuzooyikotamini lubo pe milimu yamaboko aako.
14 Ndizoonyukula zisamu zyako zisalala* zili aakati kako
Akunyonyoona myuunzi yako.
15 Zisi zyakataswiilila,
Ndizoozipa chisubulo kandinyemede alubo kandili aabukali.”