Amosi
2 “Nzezi nzyaamba Jehova,
‘“Akaambo kamilandu iitatu yaMowabbu,* kwaamba choonzyo, milandu iine, tandizooleki pe kumusubula,
Nkaambo wakatenta zifuwa zyamwaami wa-Edomu kusikila zyaba dyota.
2 Nkinkaako, ndizootuma mulilo kuMowabbu,
Uzoonyonyoona ngazi zyakukwabilila zyakuKkeriyoti,
Mowabbu uzoofwa nikunooli lupyopyongano,
Amusindo wankondo, akulila kwamweembo.
3 Ndizoogwisya mweendelezi* aakati kakwe
Akujaya balupati-pati bakwe boonse, amweendelezi ooyo,” mbaamba Jehova.’
4 Nzezi nzyaamba Jehova,
‘Akaambo kamilandu iitatu yaJuda, kwaamba choonzyo, milandu iine, tandizooleki pe kubasubula,
Nkaambo bakakaka mulawu waJehova,
Alubo teebakaatobela pe malayilile aakwe.
Pesi manwa ngibakatobela masianyinakulu, ngingawo aapa kuti baleye.
5 Nkinkaako, ndizootuma mulilo muJuda,
Uzoonyonyoona ngazi zyakukwabilila zyamuJerusalema.’
6 Nzezi nzyaamba Jehova,
‘Akaambo kamilandu iitatu ya-Israyeli, kwaamba choonzyo, milandu iine, tandizooleki pe kubasubula,
Nkaambo bawuzya bantu baluleme kuti bajane nsiliva,
Abantu bafwaba kuti bajane manyatela.
7 Balyatuuka mitwe yabaabo balangilwaansi mulusuko lwaanyika,
Alubo basinka nzila yababombe myoyo.
Mwana awisi, boona aamusimbi uumwi,
Kabali kusofwaazya zina lyangu.
8 Boona kumbali aazipayililo zyoonse kabali aajulu aazigogo nzibabweza kuti zibe chijatisyo kuli baabo bali aazikwelete zyabo,
Alubo wayini njibanywa aang’anda yabaleza* babo, bakayijana kuli baabo mbibakabbadalisya.’
9 ‘Pesi ndime ndakanyonyoona mu-Amori kunembo lyabo,
Ooyo wakali mulamfu mbuli minsamu yamukkedari alubo wakasimide mbuli mi-okku,
Ndakanyonyoona michelo yakwe yakali mujulu, amiyanda yakwe yakali kunsi.
10 Ndakakugwisya munyika ya-Ijipita,
Alubo ndakapa kuti weende munkanda kwaminyaka iili 40,
Kuti ukaakubweze nyika yamu-Amori.
11 Ndakapa kuti bamwi bana banu babe bapolofita
Akuti bamwi baalumi bachiniini bali aakati kanu babe maNaziri.
Teembubo na, inywe nibantu bamu-Israyeli?’ mbaamba Jehova.
12 ‘Pesi mwakaliswini kupa maNaziri wayini kuti banywe,
Alubo mwakalayilila bapolofita kuti: “Tamweelede kupolofita pe.”
13 Nkinkaako, ndizoomukuya aandawu yanu,
Mbuli ngolo iizwide zilyo zyatebulwa mbiikuya zili kunsi lyayo.
14 Ooyo uuli aaluno uzoobula kwakuchijila,
Ooyo uuli aamanguzu uzoobula manguzu,
Alubo taakwe silumamba uutazoofutuke pe.
15 Muntu uubelesya daantambwa tazookonzyi pe kwiimikila,
Muntu uuli aaluno tazoofutuki pe,
Asikweenzya bbiza tazoofutuki pe.
16 Naba ooyo uuli aachibindi kwiinda bamwi basilumamba
Uzoochija katazweete pe mubuzuba oobo,’ mbaamba Jehova.”