Kusalutila Fuleegi, Kuvota Amulimu Uutali Wabusilumamba

Kusalutila fuleegi. Bakamboni baJehova basyoma kuti kukotamina naa kusalutila fuleegi kakuli kwiimbwa nyimbo yanyika, michito yabukombi iitondeezya kuti beendelezi baChisi mbabo bakonzya kweeta lufutuko kutali Leza. (Isaya 43:11; 1 BaKorinto 10:14; 1 Johane 5:21) Umwi mweendelezi uliboobo, wakali Mwami Nebukadinezara, wakuBabuloni. Kuti abotezye bantu akutondeezya manguzu aakwe, wakachita chikozyano chipati changolida alimwi wakalayilila bantu mbaakali kweendelezya kuti bachikotamine chiindi nokuli kwiimbwa nyimbo. Nikuba boobo, balombe bachiHebrayo batatu bategwa Sadrake, Mesaki, aAbedinego tebakachikotamina pe chikozyano eecho nikuba kuti bakali kuyoojayigwa.—Daniele chaandano 3.

Umwi sikulemba makani aachiindi uutegwa Carlton Hayes wakaamba kuti “kusyoma fuleegi akwiisalutila nchitondezyo chipati chakusumpula chisi. Baalumi balagwisya ngwaani zyabo chiindi nokwiinzigwa fuleegi, basitupeto balalemba tupeto kabalumbayizya fuleegi alimwi bana kabali kwiimba nyimbo.” Wakayungizya kuti bantu basumpula chisi balaa “mazuba aasalala” aali mbuli buzuba bwa 4 July kuchisi chaku United States, alimwi kuli “basanta abantu mbibalemeka,” naa “matempele.” Kupobwe pati lyakachitwa kuBrazil, mweendelezi mupati wampi wakaamba kuti: “Fuleegi ilalemekwa akukombwa . . . mbuli mbubalemeka Nyika yabo.”Bbuku litegwa The Encyclopedia Americana lyakaamba kuti, “fuleegi ilasalala mbuli chiingano.”

Bbuku eeli lyakayungizya kuti nyimbo yanyika iiyimbwa “itondeezya kuti bantu baliiyanda nyika yabo alimwi balangilila kujana lukwabililo kuzwa kubeendelezi babo.” Nkinkaako, babelesi baJehova tababisyi pe kuti kababona mapobwe aaswaanizya kusalutila fuleegi akwiimba nyimbo yanyika mbuli bukombi. Nilyakali kupandulula atalaa kukaka kwabana baBakamboni baJehova kusalutila fuleegi akukaka kukonka muzikolo zyaku America, bbuku litegwa The American Character, lyakaamba kuti: “Nkuta Mpati yakuAmerica yakazumina kuti michito eeyi njabukombi chiindi nibakali kulanga-langa milandu ili mbuli eeyi.”

Nikuba kuti tabajatikizigwi mumichito njibabona kuti tiyeendelanaa Magwalo, babelesi baJehova balizi kuti muntu umwi awumwi weelede kulisalila zyakuchita munkani eeyi. Alubo, balaalemeka mafuleegi aanyika kabaabona mbuli zintu zyiiminina alimwi zyeelede kupegwa mfulumende mbuli “maami aacisi” abeleka mbuli “balanda ba-Leza.” (BaRoma 13:1-4) Aboobo, Bakamboni baJehova balaluswiilila lulayo lwakukombela “bami abaabo boonse bali mubwami.” Nikuba boobo, tuyanda “kuti buumi bwesu bube bwaluumuno akutontola, tukale kabotu akulemeka Leza.”—1 Timoteo 2:2.

Kuvota mutwaambo twachisi. MaKristu aachoonzyo alalulemeka lwaangunuko lwabamwi lwakuvota. Tabakasyi bamwi kutola lubazu mutwaambo twachisi alimwi balabalemeka bantu basalwa kuba beendelezi. Nikuba boobo, maKristu aachoonzyo asala kutatola lubazu mutwaambo twachisi. (Matayo 22:21; 1 Petro 3:16) MaKristu ayelede kuchita biyeni ikuti nkubakkala kabaangilwa kuvota naa kuti bapenzegwa akaambo kakutayanda kuya kubusena nkubavootela bantu? Ikuti manjezeezya aamuKristu kamuzumizya, ulakonzya kusala kwiinka kubusena bwakuvootela kayeeya kuti Sadrake, Mesaki, aAbedinego bakiinka mugundu lya-Dura. Nikuba boobo, muKristu ooyo weelede kuchenjelela kutatola lubazu. MuKristu ooyo weelede kuyeeyesesya atalaa malayilile aali musanu awumwi aatobela:

1. Basikutobela Jesu ‘tabali bayeeyi nyika.’—Johane 15:19.

2. MaKristu ayiminina Kristu aBwaami bwakwe.—Johane 18:36; 2 BaKorinto 5:20.

3. Bantu bali mumbungano yachiKristu balijisini muzintu nzibasyoma alimwi balaaluyando luli mbuli lwaKristu.—1 BaKorinto 1:10; BaKolose 3:14.

4. Aabo bavotela mweendelezi balajatikizigwa muzintu nzyachita.—Langa malayilile ajanika mulugwalo lwa 1 Samuele 8:5, 10-18 alwa 1 Timoteo 5:22.

5. Chiindi maIsrayeli nakayanda kweendelezegwaa muntu, Jehova wakabona kuti bakali bamukaka.—1 Samuele 8:7.

6. MaKristu ayelede kwaangunuka kwaambuula atalaa mfulumende yaBwami bwaLeza kubantu batola lubazu mutwaambo twachisi.—Matayo 24:14; 28:19, 20; BaHebrayo 10:35.

Mulimu uutali wabusilumamba. Kuli zimwi nyika, mfulumende zyaamba kuti aabo bakaka kuchita mulimu wabusilumamba beelede kuchita imwi milimu iitali yabusilumamba. Ikuti twaswananaa zyiimo zili boobo, tweelede kukomba naa kwaambulaa muntu uusimide kuzintu zyabukombi, kuti tukonzye kusala kweendelanaa manjezeezya ayiisidwe kabotu.—Tusimpi 2:1-5; BaFilipi 4:5.

Jwi lyaLeza litubuzya kuti tweelede ‘kuchita choonse nchotwaambilwa babetesi abami akuchita chintu chili luzi choonse, . . . tube batontozi.’ (Tito 3:1, 2) Katulaa muzeezo ooyu, tweelede kulibuzya kuti: ‘Ino kuzumina mulimu uutali wabusilumamba kuyoopa kuti nditole lubazu na, naa kuti ndijatikizigwe mubukombi bwakubeja?’ (Mika 4:3, 5; 2 BaKorinto 6:16, 17) ‘Ino kuchita mulimu ooyu, kuyoopa kuti kundiyumine na kuzuzikizya mikuli yachiKristu naa ndikachilwe kwiichita?’ (Matayo 28:19, 20; BaEfeso 6:4; BaHebrayo 10:24, 25) ‘Kuli lumwi lubazu, kuchita mulimu ooyu kuyoopa kuti ndiyungizye milimu yangu yamumbungano na, naa kuti nditole lubazu mumulimu wachiindi choonse?’—BaHebrayo 6:11, 12.

Ikuti manjezeezya aamuKristu kamuzumizya kuchita umwi mulimu mubusena bwakuti atolwe kuntolongo, maKristunyina ayelede kulemeka kusala kwakwe. (BaRoma 14:10) Alubo ikuti wasala kutanjila mulimu ooyo, bamwi beelede kulemeka kusala kwakwe.—1 BaKorinto 10:29; 2 BaKorinto 1:24.