Mibuzyo Yabasikubala

Majwi aakuti “amumuchenjelele” aapandulwidwe muli 2 Batesalonikka 3:14 abuzigwa baalu na naakuti muKkristu umwi awumwi nguwe uulisalila zyakuchita?

Mwaapostoli Pawulu wakalembela maKkristu bakuTesalonikka majwi aakuti: “Kuti kakuli muntu uutaswiilili jwi lyesu kwiinda mulugwalo oolu, amumuchenjelele.” (2 Tes. 3:14) Chiindi, twakali kwaamba kuti malayilile aaya akali kubuzigwa baalu. Kuti umwi muntu wayinkilila kunembo katali kuswiilila malayilile aamuBbayibbili nikuba kuti wagwasigwa kwaziindi zyiingi, baalu bakali kupa nkani yakuchenjezya kumbungano. Kuzwa waawo, basikupupulula bakali kukonzya kuliswaanizya aamuntu ooyo muzintu zyabukombi kupela.

Nikuba oobo, nkani eeyi yakeelede kubambululwa. Lino twaabumvwisisisya kuti malayilile ngaakaamba Pawulu aamba kusala nkwayelede kuchita muKkristu umwi awumwi kweendelana azyiimo. Nkinkaako, baalu tabeelede kupa nkani yakuchenjezya pe. Nkamboonzi nikuli kuchincha ooku? Atubone nzyaakali kwaamba Pawulu naakapa lulayo oolu.

Pawulu wakabona kuti bamwi mumbungano teebakali kweenda “bweelede” pe. Teebakali kuswiilila malayilile aazwa muJwi lyaLeza. Naakabaswayide, wakabalayilila kuti: “Kuti muntu katayandi kubeleka, aleke kulya.” Nikuba oobo, bamwi teebakali kuyanda pe kubeleka kuchitila kuti bajane nzibayandikana nikuba kuti bakali kukonzya kuchita oobo, alubo bakali kunjilila makani aatali aabo pe. MaKkristu bakeelede kubajata biyeni aabo bakatali kweenda “bweelede”?—2 Tes. 3:​6, 10-12.

Pawulu wakaamba kuti: “Amumuchenjelele.” Bbala eeli muchiGrikki lyaamba kuti weelede kumubikkila maanu muntu ooyo akumuchenjelela. Pawulu wakali kubuzya bamumbungano yoonse malayilile aaya, kutali baalu kupela. (2 Tes. 1:1; 3:6) Nkinkaako, muKkristu umwi awumwi wakali kubona mukombinyina wakatali kuswiilila malayilile aamuBbayibbili, wakali kulisalila “kuleka kuliswaanizya aanguwe.”

Eezi zyakali kwaamba kuti muntu ooyo wakeelede kujatwa mbuli muntu wakagwisigwa mumbungano na? Inee. Pawulu wakayungizya kuti: “Amwiinkilile kunembo kumulaya mbuli mukombinyokwe.” Alubo muKkristu umwi awumwi wakali kukonzya kuliswaanizya aamuntu ooyo kumiswaangano yambungano amumulimu wakukambawuka. Pesi teebakali kuliswaanizya pe amuntu ooyo nibakali kulikondelezya. Nkamboonzi? Pawulu wakaamba kuti, “kuchitila kuti abe aabweeme.” Eezi zyakali kukonzya kupa kuti muKkristu wakatali kweenda “bweelede” achinche maponeno aakwe.—2 Tes. 3:​14, 15.

MaKkristu mazubaano kujana baabelesya biyeni malayilile aaya? Chakusaanguna, tweelede kuba aachoonzyo chakuti muntu ooyo talikweenda “bweelede” mbuli Pawulu mbaakaamba. Taakali kwaamba bantu bachita zintu zitazuminani aamyoyo yesu iiyiisidwe aaBbayibbili, pesi zintu eezyo kazitakazyani pe aBbayibbili naakuti kusiyana muzintu nzitusala. Alubo taakali kwaamba aabo pe bakatuchitila zintu zyakatuchisa. Pesi Pawulu wakali kwaamba aabo bakapegwa lulayo luzwa muJwi lyaLeza alubo bakasala kutaluswiilila achaali.

Mazubaano, kuti twabona mukwesu naakuti muchizi uulikwiinkilila kunembo kataswiilili malayilile aamuJwi lyaLeza,a tulakonzya kusala kutaliswaanizya aamuntu ooyo chiindi nitulikondelezya. Mbukunga kusala ooku nkusala kwawumwi awumwi, tatweelede kubuzya bantu batali bamumpuli. Pesi tunoochiliswaanizya aamuntu ooyo kumiswaangano yambungano akumulimu wakukambawuka. Kuti wabambulula michito yakwe tulakonzya kuliswaanizya lubo anguwe chiindi nituli kulikondelezya.