Leza Ulazitambula Na Zikombelo Zyoonse?

1. Kweendelana aBbayibbele nziizili nzila zibili zyakukomba Leza?

JESU wakati: “Amunjile mumulyango uumanikide, nkaambo mulyango uukwazeme anzila impati njiitola kukunyonyooka, nkabela abo banjila mulinjiyo mbanji-banji. Mulyango uumanikide anzila iipatide njiitola kubuumi, nkabela abo biijana mbace.” (Matayo 7:13, 14) Kweendelana azijanika muJwi lyaLeza kuli nzila zibili zyabukombi: imwi njakasimpe imwi njakubeja, imwi ilikabotu imwi tiili kabotu pe, imwi itola kubuumi, imwi itola kulufu.

2. Magwalo atondeezya biyeni kuti Leza tazitambuli pe zikombelo zyoonse?

² Bamwi bantu bayeeya kuti zikombelo zyoonse zilatambulika kuli Leza. Magwalo aatobela atondeezya kuti ooku nkubeja:

• “Bantu ba-Israyeli bakaboola alimwi kubisya kumeso aa-Jehova, bakali kukomba ba-Baala aba-Asitaroti, mizimu yaba-Aramu, mizimu yaba-Sidoni, mizimu yaba-Moabu, mizimu yaba-Amoni, amizimu yaba-Filisti. Bakaleka Jehova, teebakali kumumanina milimo pe. Mpawo bukali bwa-Jehova bwakabukila ba-Israyeli.” (Babetesi 10:6, 7) Ikuti twakomba mituni naa bamwi baleza, tatukooyootambulika pe kuli Jehova, Leza wakasimpe.

• “Aba bantu balandilemeka [Leza] amilomo yabo, pele myoyo yabo ili kule kulindime. Kundikomba kwabo nkwabuyo, nkaambo zifundo nzibafunda njimilazyo yabantu buyo.” (Marko 7:6, 7) Ikuti bantu balyaamba kuti bakomba Leza kabayiisya mizeezo yabo kutali ziyiisigwaa Bbayibbele, chaamba kuti bukombi bwabo mbwabuyo. Bukombi bwabo tabutambuliki pe kuli Leza.

• “Leza ngo-Muuya, eno abamukomba balyeelede kumukomba mumuuya amubwini.” (Johane 4:24) Bukombi bwesu bweelede kweendelana akasimpe kajanika muJwi lyaLeza.

Michelo Yabukombi Bwakubeja

3. Kujana twaziba biyeni kuti chikombelo nchakasimpe naa kuti nchakubeja?

³ Kujana twaziba biyeni kuti chikombelo nchakasimpe naa kuti nchakubeja? Jesu wakati: “Musamu umwi aumwi mubotu ulazyala micelo mibotu, alimwi musamu uusampukide ulazyala micelo mibi . . . Aboobo micelo yabo njiiti muzibye mbubabede.” Muliimwi nzila, ikuti chikombelo kachili chaLeza, chichita zintu zili kabotu pesi kuti kachili chaSaatani chichita zintu zibi.—Matayo 7:15-20.

4. Mbuubuli bube bubotu butondeezegwa abakombi baJehova?

⁴ Bukombi bwakasimpe bulaabantu batondeezyania luyando ababikkila maanu kuli bamwi bantu. Eezi zilachitika akaambo kakuti Jehova nguLeza siluyando. Jesu wakati: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.” Zikombelo zichita biyeni kunkani yakutondeezya luyando?—Johane 13:35; Luka 10:27; 1 Johane 4:8.

5. Limwi bbuku lya Encyclopædia lyakakupandulula biyeni kuuzigwa kwabantu bamuAfrica mubuzike?

⁵ Yeeya atalaa kuuzigwa kwabantu mubuzike kwakali kuchitwa muAfrica. Bbuku litegwa The New Encyclopædia Britannica lyakaamba kuti mumunyaka wa 650 a 1905, bantu bamu Africa basika ku 18 000 000 bakatolwa kubuzike kuSahara naa kumasena azyungulukide Indian Ocean. Alubo, “akati-kati kaminyaka yamumwaanda wachi15, bantu baku Europe bakasaanguna zyabbizinesi kunyika zili kuWest Africa, alimwi mumunyaka wa 1867 bantu bakkala muAfrica balaakati ka 7 000 000 a10 000 000 bakali batolwa kubuzike kuNyika Mpya.”

6. Bukombi bwakaswaanizigwa biyeni mukupa kuti bantu babe bazike?

⁶ Zikombelo zyakachita biyeni chiindi bantu bakkala muAfrica nibakali mumapenzi aswaanizya kwaanzanisigwa ampuli zyabo, kusungwa anketani, kudindwa ansimbi iipya anibakali kuuzigwa mbuli ng’ombe? Mupepatwaambo litegwa Daily Nation lyaku Nairobi, Kenya, Bethwell Ogot wakalemba kuti: “MaKristu amaMozilemu bayiisya kuti bantu beelede kujatana pesi bakapa kuti bantu babe bazike akuti kube kusalulana lukanda. . . . Tweelede kuzumina mulandu wakachitwaa maKristu amaMozilemu, abantu bakkala kunyika Zyamakuwa zili kuKumbo akuKujwe Iilaakati akaambo kakutabikkila maanu kuzintu zyakeeta mapenzi kubantu bamu Africa.”

Bukombi aNkondo

7. Bapati bazikombelo bakaswaanizigwa biyeni mumakani aankondo?

⁷ Bukombi bwakubeja bwatondeezya michelo mibi munzila zisiyene-siyene. Muchikozyano, Bbayibbele lyaamba kuti “yanda mweenzinyoko” pesi munyika yoonse, bapati bazikombelo baliikusumpula akusungwaazya nkondo.—Matayo 22:39.

8. (a) Bapati bazikombelo bakakusungwaazya biyeni kujayana chiindi nikwakali kutamvwanana muzisi zili muAfrica? (b) Umwi mupati wachikombelo wakatyeni atala abamwi bapati bazikombelo chiindi bantu nibakabukilana kuNigeria?

⁸ Mumunyaka wa 1994, amwi masiite (ma nun) abapati bazikombelo bakaswaanizigwa mukujaya bantu kuRwanda. Alubo, bukombi bwaswaanizigwa loko mukutamvwanana kwazisi zili muAfrica. Muchikozyano, nikwakafwa bantu biingi akaambo kakubukilana kwabantu kuNigeria, zikombelo zyakasungwaazya bantu kuti balwane. Chiindi chankondo eeyi, umwi mupati wachikombelo wakaamba kuti bamwi bapati bazikombelo “bakabikka ambali” mulimu waLeza. Wakayungizya kati: “Iswe nitulyaamba kuti tuli babelesi baLeza twaba babelesi baSaatani.”

9. Bbayibbele lityeni atalaa babelesi baSaatani?

⁹ Bbayibbele lyaamba kaambo kakozyene akaaka kaliti: “Saatani mwini alakwe ulalisandula mbuli angelo wamumuni. Aboobo tacili cintu cipati na balanda bakwe abalo balalisandula mbuli balanda babululami.” (2 BaKorinto 11:14, 15) Mbuli mbubachita bantu biingi bachita zintu zibi pesi bayanda kubonekaanga balikabotu, alakwe Saatani ulikweena bantu kwiinda mukubelesya bapati bazikombelo babonekaanga bachita zintu zilikabotu kakuli milimu yabo amichelo yabo mibi.

10. Bapati bazikombelo baliikukutondeezya biyeni kutalemeka Leza?

¹⁰ Munyika yoonse, bapati bazikombelo baliikukambawuka atala aluyando, luumuno, kuchita zintu zili kabotu pesi baliikusumpula lusulo, nkondo akuchita zintu zitayandwaa Leza. Bbayibbele libapandulula kabotu. Lyaamba kuti: “Balalyaamba kuti, Tulizi Leza, anu kumilimo yabo balamukazya.”—Tito 1:16.

Amuzwe mu “Babuloni Mupati”

11. Bbayibbele libupandulula biyeni bukombi bwakubeja?

¹¹ Tulakonzya kuziba mbwayeeya Jehova atala abukombi bwakubeja kwiinda mukubala bbuku lyaCiyubunuzyo lijanika muBbayibbele. MuBbayibbele, bukombi bwakubeja bukozyanisigwa amwanankazi utegwa “Babuloni Mupati.” (Ciyubunuzyo 17:5) Bona kuti Leza umupandulula biyeni:

• “Sikuvuula mupati . . . ngubakacita awe bumambi bami baansi.” (Ciyubunuzyo 17:1, 2) Kulaakuti zisyomeke kuli Leza, zikombelo zyakubeja zilikuswaanizigwa mumakani atwaambo twachisi alimwi zibuzya beendelezi kuti beelede kuchitaanzi.

• “Mulinguwe mwakajanwa bulowa bwabasinsimi abwabasalali, abulowa bwabantu boonse ibakajayigwa ansi.” (Ciyubunuzyo 18:24) Zikombelo zyakubeja zyakapenzya akujaya babelesi baLeza basyomeka alimwi zilaamulandu akaambo kabantu biingi bakafwa munkondo.

• ‘Wakalilemya akulitakaazya loko.’ (Ciyubunuzyo 18:7) Zikombelo zyakubeja zilaalubono lwiingi alimwi bapati bazyo babelesya lubono oolu kuti balichitile kufumbwa nchibayanda kuti baliboteezye.

• “Masi oonse akeenwa kumalozi aako.” (Ciyubunuzyo 18:23) Wapa kuti bantu basyome bulozi akusonda, bayoowe bafwide akuti bakombe mizimu kwiinda munjiisyo yakwe yakubeja yakuti kuli chintu chisyaala kachipona kuti muntu wafwa.

12. Bbayibbele lichenjezya kutyeni atala abukombi bwakubeja?

¹² Bbayibbele lipa nchenjezyo mpati yakuti bantu beelede kwaanzanaa bukombi bwakubeja. Lyaamba kuti: “Kamuzwa nobantu bangu, kuti mutavwelanizigwi azibi zyakwe, mutapenzegwi azipenzyo zyakwe.”—Ciyubunuzyo 18:4, 5.

13. Niinzi chiyoochitika kubukombi bwakubeja akuli baabo babutobelezya?

¹³ Lino-lino, Babuloni Mupati, bukombi bwakubeja buli munyika yoonse buyoonyonyoonwa chakumaninina. Bbayibbele lyaamba kuti: “Zipenzyo zyakwe zilamusikila mubuzuba bomwe buyo, lufu akulila anzala. Ncobeli uyooumpisigwa amulilo, nkaambo ngusinguzu Mwami Leza Mubetesi wakwe.” (Ciyubunuzyo 18:8) Ikuti tutapenzegwi antoomwe anguwe, tweelede kulyaanzania abukombi bwakubeja akutaswaanizigwa mumichito, mumapobwe akunjiisyo zyoonse zitayandwaa Leza. Tweelede kubweza ntaamu chakufwambaana nkaambo chaamba buumi bwesu!—2 BaKorinto 6:14-18.