Josiya Wakalaa Beenzinyina Bali Kabotu

Ubonaanga nkuyumu na kucita zintu zili kabotu?— Bantu biingi bayeeya mbuboobo. IBbaibbele litwaambila kuti cakali ciyumu kumulombe uutegwa Josiya kuti acite zintu zili kabotu. Pesi wakalaa beenzinyina bali kabotu bakali kumugwasya. Atwiiye zyiingi atalaa Josiya abeenzinyina.

Ndeendaa Josiya wakali Amoni, wakali mwami mucisi caJuda. Amoni wakali kucita zintu zibi alimwi wakali kukomba mituni. Ciindi wisaa Josiya naakafwa, Josiya wakaba mwami mucisi caJuda. Pesi wakalaa minyaka iili musanu ayitatu yakuzyalwa! Ubonaanga wakacita zintu zibi na mbuli wisi?— Taakacita zintu zibi pe!

Nikuba kuti wakali muniini, Josiya wakali kuyanda kuswiilila Jehova. Nkinkaako wakasala beenzinyina bakali kuyanda Jehova. Alimwi bakali kumugwasya kuti acite zintu zili kabotu. Mbaani bakali beenzinyina baJosiya?

Umwi wabeenzinyina baJosiya wakali Zefaniya. Zefaniya wakali musinsimi wakacenjezya bantu bamuJuda kuti bakali kuyoosikilwaa ntenda, ikuti biinkilila kunembo kabakomba mituni. Josiya wakaswiilila Zefaniya alimwi wakakomba Jehova, ikutali kukomba mituni pe.

Awumwi mweenzinyina waJosiya wakali Jeremiya. Bakalisela limwi, alimwi ciindi nibakali kukomena bakali kukkala afwiifwi kuli umwi awumwi. Bakali beenzinyina bakali kabotu zyakuti ciindi Josiya naakafwa, Jeremiya wakalemba lwiimbo atalaa mbwakali kuyeeya Josiya. Jeremiya aJosiya bakali kugwasyanya kucita zintu zili kabotu akuswiilila Jehova.

Wiiyaanzi kuzwa kucikozyanyo caJosiya?— Nikuba kuti Josiya wakali mulombe muniini, wakali kuyanda kucita zintu zili kabotu. Wakalizi kuti weleede kubaa beenzinyina abantu bayanda Jehova. Ayebo weleede kusala beenzinyokwe bayanda Jehova alimwi batakugwasye kucita zintu zili kabotu!