CHIIYO 11
Niinzi Nzweelede Kuchita Kuti Ugwasigwe Akubala Bbayibbele?
Kuli nwaakali wayanda kuchita chintu chipati na mpawo wabula kuti ulasaangunina aali? Kuti kukuubile kuchichita, kweelede kuti wakachipambuula mutupanzi tuniini. Eezi nzizyo nzukonzya kuchita chiindi nuyanda kubala Bbayibbele. Ulakonzya kulibuzya kuti, ‘Ani ndilasaangunina aali?’ Muchiiyo eechi, tulabona zimwi zintu zyuuba zikonzya kukugwasya kuti kubala Bbayibbele kukunoneezye.
1. Nkamboonzi nitweelede kukkala katubala Bbayibbele?
Muntu uukkala kabala Bbayibbele naakuti “mulawo wa Jehova” ulabotelwa akuzwidilila. (Bala Intembauzyo 1:1-3.) Ulakonzya kusaanguna aakubala kwamaminiti mache abuzuba. Kuti waba achiindi chiingi kubala Bbayibbele, kulibala kuyookunoneezya.
2. Niinzi chikonzya kukugwasya kuti umvwisisisye Bbayibbele?
Kuti tugwasigwe aakubala Bbayibbele, tweelede kuyeeyesesya atala anzitubala. Tweelede kulibala alubo tweelede “kuzinzibala kuyeeya zili mumo.” (Joshua 1:8, makani aamunsi) Nulikubala, weelede kulibuzya mibuzyo mbuli yakuti: ‘Eezi zindiyiisyaanzi atala aJehova Leza? Kujana ndazibelesya biyeni mubuumi bwangu? Kujana mavesi aaya ndaabelesya biyeni kugwasya bamwi?’
3. Ubonaanga ndiilili nukonzya kujana chiindi chakubala Bbayibbele?
Kulakuyumina na kujana chiindi chakubala Bbayibbele? Biingi besu kulatuyumina. Bbayibbele lyaamba kuti: “Kamucibelesya kabotu ciindi coonse ncomujisi.” (Baefeso 5:16) Ulakonzya kuzichita eezi kwiinda mukusala chiindi chakubala Bbayibbele buzuba abuzuba. Bamwi bakasala kuti kababala Bbayibbele kuseeni. Bamwi bakasala kuti kabalibala sikati. Alubo bamwi bakasala kuti kabalibala goko. Aniwe uyanda kulibala chiindiinzi?
YIYA ZYIINGI
Bona nzweelede kuchita kuti kukunoneezye kubala Bbayibbele. Alubo bona mbukukonzya kukugwasya kulibambila kabotu kuti umvwisisisye nzulikubala.
Mbukunga toonse nga twabelekela biya kuti chizoosike mpuchitunonena chakulya nchitutajayide, mbukubede akubala Bbayibbele
4. Nzweelede kuchita kuti kubala Bbayibbele kukunoneezye
Kulakonzya kukuyumina kusaanguna kubala Bbayibbele. Nikuba boobo, ulakonzya kuyandisya kubala Bbayibbele mbuli mbukonzya kuyandisya kulya chakulya nchuwakatazibide pe. Bala 1 Petro 2:2, mpawo musandule mubuzyo uutobela:
Ubonaanga kuti wasaanguna kubala Bbayibbele kuyookunonezya na zyakuti ukakachilwe kuleka kulibala?
Mweebele VIDIYO iitamugwasye kubona kuti niinzi chakagwasya bamwi kuti banoneezegwe akubala Bbayibbele. Kuzwa waawo, musandule mibuzyo iitobela.
Mbuubuli buyumu-yumu mbubakaswaana bachikula mbitwabona muvidiyo?
Niinzi chakabagwasya kuti bakkale kababala Bbayibbele?
Niinzi chakabagwasya kuti kubala Bbayibbele kubanoneezye?
Nzezi zikonzya kukugwasya kuti usaangune kubala Bbayibbele:
Belesya Bbayibbele lisandululwidwe munzila iimvwisisika. Yezya kubelesya Bbaibbele lya Busanduluzi Bwanyika Mpya naakuti lyawumwi mulaka ngumvwisisisya.
Saanguna kubala mavesi nguyandisya loko. Kuti ubone mbukonzya kuzichita langa chaati ilaamutwe uuti, “Kubala Bbayibbele.”
Alembaansi mavesi ngwaabala. Belesya chaati itii, “Mavesi Ngwaakabala” iili mubbuku eeli.
Belesya JW Library®. Ulakonzya kudawuniloda Bbayibbele naakuti kuswiilila mavesi aakalekkodwa kubelesya fooni.
Belesya Makani Aayungizyidwe aajanika muBbaibbele lya Busanduluzi Bwanyika Mpya. Liswaanizya mamepu, machaati abupanduluzi bwamabala. Zintu eezi zilakonzya kukugwasya kuti unoneezegwe akubala Bbayibbele.
5. Libambile chiiyo
Bala Intembauzyo 119:34, mpawo musandule mubuzyo uutobela:
Nkamboonzi nweelede kukomba kutanabala Bbayibbele naakuti nuyanda kulibambila chiiyo?
Niinzi chikonzya kupa kuti ugwasigwe achiiyo chimwi achimwi? Yezya kuchita zintu zitobela chiindi nwanoolibambila chiiyo:
Bala mapalagilafu aali kumasaangunino achiiyo chimwi achimwi.
Bala mavesi woonse, mpawo ubone kuti ayendelana biyeni achiiyo.
Yengela nsandulo zyamibuzyo; eezi zilakugwasya kuti kukuubile chiindi nimwanooyiya.
Walizi na?
Bakamboni baJehova bakabelesya maBbayibbele aasiyene-siyene. Pesi lino tuvuzya kubelesya Bbaibbele lya Busanduluzi Bwanyika Mpya nkaambo lilaamakani achoonzyo, lilamvwisisika alubo libelesya zina lyaLeza.—Langa chiiyo chijanika aaIntaneti chitii, “Bakamboni baJehova Bali aBbayibbele Lyabo Na?”
BAMWI BAAMBA KUTI: “Bbayibbele talimvwisisiki pe. Tandikwe chiindi pe chakulibala.”
Aniwe utyeni?
CHIFWIINSYO
Kuti kuyanda kumvwisisisya Bbayibbele, jana chiindi chakulibala, komba kuli Jehova kuti akugwasye kuti ulimvwisisisye mpawo ulibambile chiiyo chimwi achimwi.
Mibuzyo Yakwiindulula
Niinzi chikonzya kukugwasya kuti umvwisisisye Bbayibbele?
Ubonaanga ndiilili nukonzya kujana chiindi chakubala Bbayibbele?
Nkamboonzi nikuyandikana kulibambila chiiyo chimwi achimwi?
YANDUULISISYA
Bona zimwi zikonzya kukugwasya kuti ulimvwisisisye Bbayibbele.
“Nzweelede Kuchita Kuti Ugwasigwe Akubala Bbayibbele” (Ngaziyakulinda No. 1 2017)
Nzila zitatu nzukonzya kubelesya nulikubala Bbayibbele.
Bona zikonzya kukugwasya kuti unoneezegwe akubala Bbayibbele.
Kumbila lugwasyo kuli bamwi baba aachiindi chilamfu kababala Bbayibbele.