Kuti Wachiswa

“Nindakajatwa bulwazi bwakkensa yamumapunga, ndakabuka kulibuzya ndafwa kale. Nindakasika kung’anda ndakalibuzya kuti, ‘Teendali kulangilila pe kuti ndilajatwa bulwazi oobu pesi mbukunga nzizyo zyachitika ndeelede kulisimya.’”—Linda, ulaaminyaka iili 71.

“Ndilaabulwazi bupa kuti bbazu lyachimwensi kubusyu bwangu likkale kalichisa zitaambiki. Chimwi chiindi kuchisa ooku nga kwapa kuti ndikataazikane mumoyo. Chiindi chiingi ndakali kulendelelwa alubo ndakali kuyeeya kulijaya.”—Elise, ulaaminyaka 49.

Mwaalumi weenda aawheelchair uli abampuli yakwe

KUTI kuli wakajatwa bulwazi naakuti chibululu chako kachili chakajatwa bulwazi, ulakonzya kubonaanga buumi tabuchigwasyi pe. Kuyungizya kubulwazi mbulaabo, ulakonzya kuba aazimwi zintu zikukataazya. Zintu eezi ziswaanizya kuyeeya kuyoobona dokotela akubula mali yakulisilisya. Kukataazikana akaambo kakuchiswa kulakonzya kupa kuti muntu ayuminwe loko.

Kuli zintu zikonzya kugwasya bantu bali muchiimo chili boobu na? Bamwi bakagwasigwa akubala Bbayibbele akukomba kuli Leza. Alubo bamwi bakagwasigwa azibbululu abeenzinyina.

NIINZI CHAKAGWASYA BAMWI KUTI BALISIMYE?

Umwi mwaalumi uutegwa Robert ulaaminyaka iili 58 wakati: “Kusyoma Leza munsamu mupati wakulisimya kuti kulikuchiswa. Mubuzye zyoonse zikukataazya nkaambo uyookugwasya. Komba kulinguwe ukumbile kuti akupe muuya uusalala. Mukumbile kuti akugwasye kuti ube aamaboneno aalikabotu akuti agwasye bamumpuli yako kuti balisimye.

“Bamumpuli nga bandigwasya loko. Babbululu bangu nga bandifoonena kabayanda kumvwa kuti ndili biyeni. Alubo beenzuma nga bandibuzya majwi awumbulizya. Nzibachita zipa kuti ndilisimye akuti ndibone kuti buumi bulagwasya.”

Kuti kuyanda kuyoobona mweenzinyokwe uulikuchiswa ulakonzya kuyeeya majwi akaambwa aLinda aakuti: “Muntu uuchiswa uyanda kujatwa mbuuli bamwi alubo tayandi kuti mwaambuulisye atala abulwazi bwakwe. Nkinkaako weelede kwaambuula atala azimwi zintu.”

Kuti kulikuchiswa, Leza ulakonzya kukusimya alubo Magwalo alakonzya kukuumbulizya. Alubo beenzinyokwe abamumpuli balakonzya kukugwasya kubona kuti buumi bulagwasya.

Mavesi AamuBbayibbele Aakonzya Kukugwasya

Syoma Leza.

“Ndakayandaula Jehova, nkabela wakandivwiila, wandivuna kukuyoowa kwangu koonse. Oyu uupengede wakakwiila, lino Jehova wakaswiilila.”—Intembauzyo 34:4, 6.

Linda waambwa kumatalikilo wakati: “Teendakakombela kuti Jehova amaninsye bulwazi bwangu pesi ndakakombela kuti andigwasye kuti ndilisimye.”

Kubala Jwi lyaLeza kulakonzya kukusimya.

“Takukooyooba naba omwe akati kabantu banyika uuamba kuti, Ndaciswa.”—Isaya 33:24.

Kuyeeyesesya atala azisyomezyo zyaLeza zili muBbayibbele kulakonzya kukusimya.

Bamumpuli abeenzinyokwe balakonzya kukugwasya.

‘Muzolwani wachoonzyo utondeezya luyando chiindi choonse alubo mukwesu wakazyalilwa kugwasya muchiindi chamapenzi.’—Tusimpi 17:17.

Elise waambwa kumatalikilo wakati: “Chimwi chiindi ulakonzya kumvwa kuyanda kuba awulikke alubo ulakonzya kubonaanga taakwe muntu uukonzya kumvwisisisya zintu zilikukukataazya. Nikuba boobo, weelede kuyeeya kuti simweenda alikke kakamutola kalonga nkinkaako utakkali kuli awulikke pe zumina kuti beenzinyokwe bakugwasye.”