BUUMI BWAMAKRISTU
Mutalubi Kukombela Bakwesu Baliikupenzegwa
MuBbayibbele, kwakasinsimwa kuti Saatani wakali kuyoopenzya bantu baLeza kuchitila kuti baleke mulimu wakukambawuka. (Joh 15:20; Ciy 12:17) Kujana twabagwasya biyeni bakwesu baliikupenzegwa kuli zimwi nyika? Tulakonzya kubakombela. Bbayibbele lyaamba kuti: “Kuli nguzu zinji loko kukomba kwakusinizya kwamuntu uululeme.”—Jak 5:16.
Nziizili zintu nzitukonzya kubakombela? Tulakonzya kukomba kuli Jehova kuti ape bakwesu abachizi aaba manguzu akuti abagwasye kuti batayoowi. (Is 41:10-13) Alubo, tulakonzya kukombela kuti bapati bamfumende batuzumizye kukambawuka katwaangunukide kuchitila kuti “buumi bwesu bube bwaluumuno akutontola.”—1Tim 2:1, 2.
Chiindi Paulo aPetro nibakali muntolongo, maKristu aamumwaanda wamunyaka wakusaanguna akabakombela, kabaamba mazina aabo. (Inc 12:5; Rom 15:30, 31) Nikuba kuti tatwaazi pe mazina aabakwesu baliikupenzegwa, tulakonzya kwaamba mbungano, naa nyika nkubazwa.