“Amuswene kuli Leza, eelyo awalo ulaswena kulindinywe.”—Jakobo 4:8
Leza Ulaziswiilila Na Nkombyo Zyesu?
Kuli nunga wakomba na mpawo wabona kuti Leza talikuzisandula pe nkombyo zyako? Kuti kakuli boobo, tawuli aawulikke pe. Bantu biingi ngabakomba kuli Leza kuti abagwasye pesi mapenzi aabo taamani pe. Eezi zyaamba kuti Leza taziswiilili na nkombyo zyesu? Peepe, teembuzyaamba pe. Bbayibbele lyaamba kuti Leza ulaziswiilila nkombyo zyesu kuti twakomba munzila njayanda. Atumvwe nzilyaamba Bbayibbele.
LEZA ULASWIILILA.
“Yebo Ooswiilila mipailo, bantu bamisyobo yoonse bayooboola kulinduwe.”—Intembauzyo 65:2.
Bamwi balakomba kuchitila kuti balimvwe kabotu pesi tabakwe ndaba pe kuti kuli muntu uubaswiilila na. Makanze aankombyo tee aakuti tulimvwe kabotu luzutu chiindi nituli mubuyumu-yumu. Bbayibbele lyaamba kuti, “Jehovaa ulaafwaafwi abaabo boonse bamwiita, aabo boonse bamwiita mukasimpe. . . . Ulamvwa nobakwiilila lugwasyo.”—Intembauzyo 145:18, 19.
Eezi zitupa choonzyo chakuti, Jehova Leza ulaziswiilila nkombyo zyabakombi bakwe. Chaluyando, Leza utubuzya kuti: “Lino muyoondiita alimwi muyooboola akupaila kulindime, eelyo ndiyoomuswiilila.”—Jeremiya 29:12.
LEZA UYANDA KUTI TUKOMBE KULINGUWE.
“Amujatisye kupaila.”—Baroma 12:12.
Bbayibbele litusungwaazya kuti ‘tuzumanane kupaila ciindi coonse.’ Eezi zitondeezya kuti Jehova Leza uyanda kuti tukombe kulinguwe.—Matayo 26:41; Baefeso 6:18.
Nkamboonzi Leza nayanda kuti tukombe kulinguwe? Yeeya atala azeezi: Kuli muzyali na uutayandi kugwasya mwanaakwe chiindi naamukumbila lugwasyo? Nsandulo ilaantanganana, nikuba kuti muzyali nga ulizizi nzyayanda mwanaakwe pesi ulabotelwa chiindi mwana nasika kuzookumbila lugwasyo kulinguwe nkaambo nga wabona kuti mwanaakwe ulamusyoma akuti bali aabweenzinyina buli aafwiifwi. Munzila iikozyenie, chiindi nitukomba kuli Jehova Leza nga tulikutondeezya kuti tulamusyoma akuti tuyanda kuba aafwiifwi anguwe.—Tusimpi 15:8; Jakobo 4:8.
LEZA ULAANDABA ANDUWE.
“Kamuwaala makatazyo aanu oonse kulinguwe, nkaambo ulamubikkila maano.”—1 Petro 5:7.
Leza uyanda kuti tukombe kulinguwe nkaambo ulatuyanda alubo ulaandaba andiswe. Ulizizi nzituyanda mubuumi, ulaabona mapenzi ngituswaana alubo uyanda kutugwasya.
Kwabuumi bwakwe boonse, Mwaami Davida wakali kukomba kuli Jehova Leza kakumbila kuti amugwasye alubo wakali kumubuzya nzyaakali kuyeeya ambaakali kulimvwa. (Intembauzyo 23:1-6) Leza wakali kumubona biyeni Davida? Leza wakali kumuyanda Davida alubo wakali kuziswiilila nkombyo zyakwe. (Milimo 13:22) Munzila iikozyenie, Leza ulaziswiilila nkombyo zyesu nkaambo ulaandaba andiswe.
“NDILAMUYANDA JEHOVA NKAAMBO ULAMVWA JWI LYANGU”
Majwi aaya akaambwa aasintembawuzyo. Wakali aachoonzyo chakuti Leza ulazimvwa nkombyo zyakwe alubo kuziba eezi kwakamugwasya mubuumi bwakwe. Wakali aabweenzinyina busimide aLeza, eezi zyakamugwasya kuti alisimye naakali mumapenzi.—Intembauzyo 116:1-9.
Kuti twaba aachoonzyo chakuti Leza ulazimvwa nkombyo zyesu, zilapa kuti tuzumanane kukomba kulinguwe. Mvwa zyakachitikila Pedro wakuSpain. Wakafwidwa mwanaakwe mulombe wakali aaminyaka iili 19 moota niyakabbewuka. Pedro wakali kukkala kakomba kuli Leza kuti amuumbulizye. Zyakamugwasya na eezi? Pedro wakaamba kuti: “Jehova wakazisandula nkombyo zyangu nkaambo wakabelesya bakombima kuti batuumbulizye ime amwanakazaangu.”
Leza usandula nkombyo zyesu kabelesya beenzuma
Nikuba kuti kukomba teekwakapa kuti mwana waPedro abuke pesi kwakabagwasya loko mumpuli yabo. Mwanakazi wakwe uutegwa María Carmen wakati: “Kukomba kwakandigwasya kuti ndilisimye muchiindi eechi chiyumu. Ndakalizi kuti Jehova wakali kundiswiilila chiindi nindakali kukomba, eezi zyakapa kuti ndikkalikane mumizeezo.”
Bbayibbele azintu zyakachitikila bamwi zitondeezya kuti Leza ulaziswiilila nkombyo zyesu. Pesi kuli makani aatondeezya kuti Leza tazisanduli pe nkombyo zyoonse. Nkamboonzi Leza nasandula zimwi nkombyo pesi zimwi katazisanduli?
a Jehova ndizina lyaLeza.—Intembauzyo 83:18.