Nkamboonzi Leza Natasanduli Nkombyo Zyoonse?
Taateesu wakujulu, Jehova Leza ulaziswiilila nkombyo zyesu. Pesi kuli tumwi twaambo tupa kuti ataswiilili nkombyo zyesu. Ntuutuli twaambo ooto alubo niinzi nzitweelede kukkala katuyeeya chiindi nituli kukomba?Ntotu tumwi twaambo.
“Ciindi nomupaila, mutanikwaambi majwi ngoonya cakwiinduluka-induluka.”—Matayo 6:7.
Jehova taziswiilili pe nkombyo nzitwakajata aamutwe naakuti kutobelezya nkombyo nzitwakalemba mukabbuku. Pesi uswiilila nkombyo zizwa aansi aamoyo. Kujana wamvwa biyeni kuti mweenzinyokwe kakubuzya chintu chimwi buzuba abuzuba? Bantu bamvwanana babuzyania zintu zizwa aansi aamoyo. Chimwi biyo akulindiswe, chiindi nitukomba kuli Taateesu wakujulu, tweelede kumubuzya zili aansi aamyoyo yesu.
“Nomulomba, tamupegwi pe akaambo kakuti mulalomba kamujisi makanze mabi.”—Jakobo 4:3.
Leza tazisanduli pe nkombyo zyesu kuti katuli kukumbila chintu nchituzi kuti tachiyandi pe. Muchikozyano, Jehova tazisanduli pe nkombyo zyasikubbeja nkaambo Bbayibbele litondeezya kuti Leza tabayandi pe bantu batangala abasikubbeja. (Isaya 65:11; Luka 12:15) Jehova tazisanduli pe nkombyo zili boobu. Kuti Leza asandule nkombyo zyesu, nzitukumbila zyeelede kweendelana akuyanda kwakwe.
“Ooyo uukaka kumvwa mulawo, nouba mupailo wakwe ulasesemya.”—Tusimpi 28:9.
Chiindi, Leza taakali kuzisandula pe nkombyo zyabantu bakatali kuswiilila milawu yakwe. (Isaya 1:15, 16) Leza tanachincha pe. (Malaki 3:6) Kuti katuyanda kuti Leza asandule nkombyo zyesu, tweelede kupona kweendelana amilawu yakwe. Leza ulaziswiilila na nkombyo zyabantu bakachita zibi chiindi? Iiyi ulaziswiilila. Leza ulatulekelela kuti twachincha maponeno eesu akupona kweendelana akuyanda kwakwe.—Milimo 3:19.