CHIIYO 20

Nzilyaamba Bbuku lyaCiyubunuzyo Atala Aziyoochitikila Basinkondonyina baLeza

‘Bakababunganya antoomwe kubusena butegwa Amagedoni mu Chihebrayo.’—CIY. 16:16.

LWIIMBO 150 Amumuyandaule Leza Kutegwa Mukafwutuke

ZITAYIIGWEa

1. Niinzi nzilyaamba bbuku lyaCiyubunuzyo atala azilikuchitikila bakombi baLeza?

BBUKU lyaCiyubunuzyo litondeezya kuti Bwaami bwaLeza bwakasaanguna kweendelezya kujulu akuti Saatani wakatandwa kujulu. (Ciy. 12:1-9) Kutandwa ooko kwakapa kuti kujulu kube luumuno. Pesi aanyika kwakaba mapenzi. Nkamboonzi? Nkaambo Saatani ulinyemede alubo ulikulwana bakombi baJehova bali aanyika.—Ciy. 12:12, 15, 17.

2. Niinzi zikonzya kutugwasya kuti tukkale katusyomeka nikuba kuti Saatani ulikutulwana?

² Niinzi zikonzya kutugwasya kuti tukkale katusyomeka kuli Jehova nikuba kuti Saatani ulikutulwana? (Ciy. 13:10) Chimwi nkuziba atala azintu ziyoochitika kunembo. Muchikozyano, mubbuku lyaCiyubunuzyo, mwaapostolo Johane wakaamba atala azimwi zilongezyo nzituyoojana kunembo. Aakati kazilongezyo eezyo, wakaamba kuti basinkondonyina baLeza bayoonyonyoonwa. Lino atulange-lange nzilyaamba bbuku lyaCiyubunuzyo atala abasinkondonyina baLeza aziyoobachitikila.

BASINKONDONYINA BALEZA BAAMBIDWE “MUZITONDEZYO”

Chaati iitondeezya muzoka kalikubapa manguzu banyama baambidwe mubbuku lyaDaniele alyaCiyubunuzyo. Banyama bapati bali 4 baambidwe muli Daniele 7 balikuzwa mulwizi, alubo balikuzulwida kumunyama uuli aamitwe iili 7, uulikuzwa mulwizi anguwo. Mutwe wachi7 wamunyama uuli aamitwe iili 7, uzulwida kumunyama ulaameja aabili, ooyo uuzulwida kumunyama uusalala pyu uugadidwe aamuwuule. Muzoka, munyama ulaameja aabili amunyama uusalala pyu, zyoonse ziyoojinka zyawaalilwa mubbibi lyamulilo. Zifanikisyo eezi, ziliindulwidwe muchiiyo eechi mumafuka 4, 6, 9, 10, a19.

3. Nziizili zimwi zitondeezyo zyaambidwe mubbuku lyaCiyubunuzyo?

³ Muvesi yakusaanguna, bbuku lyaCiyubunuzyo lyaamba kuti makani ngitwabuyanda kulanga-langa aambidwe “muzitondeezyo” naakuti munzila yakukozyanisya. (Ciy. 1:1) Basinkondonyina baLeza bayimininwa aabanyama basiyene-siyene. Muchikozyano, kwakaboneka “munyama kazwa mulwizi.” Munyama ooyu wakali ‘aameja aali kkumi amitwe iili 7.’ (Ciy. 13:1) Kwakazooboneka “munyama uumbi kazwa munyika.” Munyama ooyu wakali kwaambuula mbuli simwaaba alubo upa kuti “mulilo ulokele anyika kuzwa kujulu.” (Ciy. 13:11-13) Kwakazooboneka munyama uusiyene, “uusalala pyu” wakatantidwe aamuwuule. Banyama aaba batatu bayiminina basinkondonyina baLeza baliikukazyania aaJehova Leza aBwaami bwakwe kwachiindi chilamfu. Nkinkaako, kulayandikana kuti tubazibe.—Ciy. 17:1, 3.

Banyama bapati bali 4 baambidwe muli Daniele 7 balikuzwa mulwizi. Munyama wakusaanguna, uli mbuli mulavu kali aamababa aali mbuli aagumbe. Wachibili, uli mbuli munyama uutegwa bbeya alubo ulumide tumpango. Wachitatu, uli mbuli siluwe, ulaamababa aali 4 amitwe iili 4. Wachi4, munyama uusimide loko, ulaameno aansimbi ameja aali kkumi. — **BANYAMA BAPATI BALI 4**

Bakazwa “mulwizi.”(Dan. 7:1-8, 15-17) Bayiminina bweendelezi bwanyika buli aanguzu bujatikizya bakombi baLeza kuzwa muchiindi chakapona Daniyele (Langa mafuka 4 a7)

4-5. Bupolofita buli muli Daniele 7:15-17 butugwasya biyeni kuti tumvwisisisye kuti zitondeezyo eezi zyiimininaanzi?

⁴ Katutanaziba kuti basinkondonyina baLeza mbaani, atusaangune kuziba kuti banyama aaba amuwuule bayimininaanzi. Kuti tukonzye kuzimvwisisisya eezi, atulekele Bbayibbele kuti litugwasye. Zitondeezyo zyiingi zili mubbuku lyaCiyubunuzyo zipandulwidwe mulaamwi mabbuku aamuBbayibbele. Muchikozyano, mupolofita Daniyele wakalota chiloto chakali ‘aabanyama bapati bone bakazwa mulwizi.’ (Dan. 7:1-3) Daniyele wakaamba kuti banyama aaba bayiminina ‘baami’ naakuti mfulumende zili 4. (Bala Daniele 7:15-17.) Bupanduluzi oobu butugwasya kumvwisisisya kuti banyama baambidwe muli Ciyubunuzyo beelede kuti ambabo bayiminina mfulumende.

⁵ Lino atulange-lange zimwi zitondeezyo zyaambidwe muli Ciyubunuzyo. Tulabona Bbayibbele mbulitugwasya kuti tuzibe kuti zitondeezyo eezyo zyiimininaanzi. Tulasaanguna kulanga-langa atala abanyama. Tulabona kuti mbaani mbibayiminina mpawo tuzoobona kuti niinzi zitazoobachitikile. Kumamanino, tulabona kuti zitondeezyo eezi zitugwasya biyeni.

KUYUBUNUNWA KWABASINKONDONYINA BALEZA

Munyama ulaamitwe iili 7 waambidwe muli Ciyubunuzyo, ulikuzwa mulwizi. Ulaameja aali kkumi amisini iili kkumi kumutwe alubo uli mbuli siluwe, mawulu aakwe ali mbuli aamunyama uutegwa bbeya alubo ulaamulomo uuli mbuli wamulavu. — **MUNYAMA UULI AAMITWE IILI 7**

Wakazwa “mulwizi” alubo ulaamitwe iili 7, meja aali 10 amisini iili 10. (Ciy. 13:1-4) Uyiminina beendelezi banyika boonse balaanguzu balikweendelezya bantu kusikila sunu. Mitwe iili 7 yiiminina beendelezi banyika balaanguzu bali 7 balikujatikizya bakombi baLeza munzila njibeendelezyaayo (Langa mafuka 6-8)

6. Munyama uuli aamitwe iili 7 waambidwe muli Ciyubunuzyo 13:1-4 wiimininaanzi?

⁶ Munyama uuli aamitwe iili 7 wiimininaanzi? (Bala Ciyubunuzyo 13:1-4.) Mbuli mbukwaambidwe muvesi eeyi, munyama ooyu uli mbuli siluwe, uli aamawulu aamunyama uutegwa bbeya, uli aamulomo wamulavu alubo uli aameja aali 10. Zintu zyoonse eezi zilajanika mubanyama bali 4 baambidwe muli Daniele chaandaano 7. Pesi mubbuku lyaCiyubunuzyo, zintu eezi zijanika aamunyama umwi luzutu kutali kubanyama bali 4 kabasiyene. Munyama ooyu tawuyiminini mfulumende iimwi naakuti bweendelezi bumwi bulaanguzu. Johane wakaamba kuti munyama ooyu ulikweendelezya “misyobo yoonse, mikowa yoonse, milaka yoonse alimwi amasi oonse.” Nkinkaako, munyama ooyu weelede kuti wiiminina bweendelezi bupati alubo buli aanguzu kwiinda mfulumende iimwi. (Ciy. 13:7) Eezi zyaamba kuti munyama ooyu wiiminina mfulumende zyoonse zili aanguzu zili kweendelezya bantu kuzwa chiindi kusikila sunu.b—Muk. 8:9.

7. Mutwe umwi awumwi wamitwe iili 7 yamunyama wiimininaanzi?

⁷ Mutwe umwi awumwi wamunyama ooyu wiimininaanzi? Makani aajanika muli Ciyubunuzyo chaandaano 17 aali atala achikozyano chamunyama ooyu waambidwe muli Ciyubunuzyo chaandaano 13 alakonzya kutugwasya. Lugwalo lwa Ciyubunuzyo 17:10, lwaamba kuti: “Kuli bami bali ciloba: Bosanwe bakawa, omwe nkwali lino, ooyo uumbi tanasika pe; pele aakusika uyookkala buyo kwakaindi kaniini.” Aakati kamfulumende zyoonse zyakabelesegwa aaSaatani, zili 7 zyaambwa kuti “mitwe” nkaambo zili aanguzu. Nzila njizyeendelezyaayo ilabajatikizya bakombi baLeza. Muchiindi chamwaapostolo Johane, zili 5 zyakali zyeendelezya kale. Mfulumende eezi ziswaanizya Egepita, Asiriya, Bbabbiloni, Mede aPersiya aGreece. Mfulumende yachi6 chaamba Roma, yakachili kweendelezya chiindi Johane naakatambula chiyubunuzyo eechi. Ani ngwani mutwe wachi7 naakuti mfulumende yamamanino iili aanguzu?

8. Mutwe wachi7 wamunyama wiimininaanzi?

⁸ Mbuli mbututabone, bupolofita buli mubbuku lyaDaniele bulatugwasya kuziba mutwe wachi7 wamunyama. Njiili mfulumende iili aanguzu iilikweendelezya kumazuba aano aakumamanino naakuti “mubuzuba bwa Mwami”? (Ciy. 1:10) Nimfulumende yaBritain a-America iilikweendelezya muchiindi eechino. Nkinkaako, kuleelela kwaamba kuti mfulumende eeyi ngumutwe wachi7 wamunyama waambidwe muli Ciyubunuzyo 13:1-4.

Munyama ulaameja aabili aali mbuli aamwanaambelele, waambidwe muli Ciyubunuzyo. Uzwa kumutwe wachi7 wamunyama ulaamitwe iili 7, uzoojinka wawaalilwa mubbibi lyamulilo. — **MUNYAMA UULI AAMEJA AABILI AALI MBULI AAMWANAAMBELELE**

Wakazwa “munyika” alubo waambuula “mbuli simwaaba.” Upa kuti “mulilo ulokele anyika kuzwa kujulu” alubo uchita zitondeezyo mbuli ‘musinsimi wakubeja.’ (Ciy. 13:11-15; 16:13; 19:20) Bweendelezi bwaBritain a-America bwiimininwa aamunyama uuli aameja aabili alubo bwaambwa kuti mupolofita wakubeja nkaambo bulikweena bantu bali munyika alubo bubabuzya kuti “bapange cikozyanyo camunyama” uuli aamitwe iili 7 ameja aali 10 (Langa fuka 9)

9. Munyama uuli ‘aameja obilo aali mbuli aamwanaambelele’ wiimininaanzi?

⁹ Ciyubunuzyo chaandaano 13 chitondeezya kuti mutwe ooyu wachi7 chaamba mfulumende yaBritain a-America, uchita mbuli munyama uuli ‘aameja obilo aali mbuli aamwanaambelele, pesi wakatalika kwaambaula mbuli simwaaba.’ Munyama ooyu “ucita zitondezyo zipati, nokuba kupa kuti mulilo ulokele anyika kuzwa kujulu bantu kabalangilila.” (Ciy. 13:11-15) Ciyubunuzyo chaandaano 16 a19 chitondeezya kuti munyama ooyu ‘musinsimi wakubeja.’ (Ciy. 16. 16:13; 19:20) Daniyele wakaamba makani aakozyenie atala abweendelezi bwaBritain a-America kuti bwakali ‘kuyoonyonyoona munzila iigambya.’ (Dan. 8:19, 23, 24) Eezi nzizyo biya zyakachitika muNkondo Yachibili Yanyika Yoonse. Bazyasayensi bakuBritain a-America bakajatana kuti bapange mabbomba aabili ngibakawaala akapa kuti nkondo eeyi imane. Mulaamwi majwi, bweendelezi bwaBritain a-America bwakapa kuti “mulilo ulokele anyika kuzwa kujulu.”

Muwuule ulikkede aajulu aamunyama uusalala pyu ulaamitwe iili 7 ameja aali kkumi. Muuwule amunyama bazoojinka bawaalilwa mubbibi lyamulilo. — **MUNYAMA UUSALALA PYU**

Utantidwe aamuwuule, Bbabbiloni Mupati. Munyama ooyu waambwa kuti mwaami wachi8. (Ciy. 17:3-6, 8, 11) Kumasaangunino, muwuule ooyu weendelezya munyama, mukuya kwachiindi munyama ooyo ulamunyonyoona muwuule. Muwuule uyiminina mbunga zyabukombi bwakubeja. Munyama uyiminina mbunga yaUnited Nations, iisumpula zintu ziyandwa aabeendelezi banyika (Langa mafuka 10, 14-17)

10. “Cikozyanyo camunyama” chiimininaanzi? (Ciyubunuzyo 13:14, 15; 17:3, 8, 11)

¹⁰ Kuchili uumwi munyama. Munyama ooyu wakachibe mbuli munyama uuli aamitwe iili 7 pesi ooyu ulasalala pyu. Munyama ooyu wiitwa kuti “cikozyanyo camunyama” alubo waambwa kuti ‘mwami wachi8.’c (Bala Ciyubunuzyo 13:14, 15; 17:3, 8, 11.) “Mwami” ooyu waambwa kuti wakabawo, wazoobulika mpawo wazoobawo lubo. Eezi zileendelana ambuyakabawo mbunga yaUnited Nations iisumpula ziyandwa aabeendelezi banyika. Kumasaangunino, yakabawo kayitegwa League of Nations mpawo yakamana manguzu muNkondo Yachibili Yanyika Yoonse. Mukuya kwachiindi, yakazoobawo lubo kayitegwa United Nations alubo mpiichili ambulisunu.

11. Niinzi nzibali kuchita banyama alubo nkamboonzi nituteelede kubayoowa?

¹¹ Banyama naakuti mfulumende zilikubelesya makani aakubeja ngibali kupupulula kuti basungwaazye bantu kuti bakazye Jehova abakombi bakwe. Johane wakaamba kuti, kuli mbuli kuti babungania ‘bami bamunyika yoonse’ kunkondo yaArmagedoni, chaamba ‘buzuba bupati bwa Leza Singuzuzyoonse.’ (Ciy. 16:13, 14, 16) Pesi iswe tatweelede kuyooyoowa pe. Leza wesu Singuzuzyoonse, Jehova, uyoofwambaana kulwanina aabo basumpula bweendelezi bwakwe.—Ezk. 38:21-23.

12. Niinzi zizoochitika kubanyama boonse?

¹² Niinzi zizoochitika kubanyama boonse? Ciyubunuzyo 19:20 yaamba kuti: “Munyama wakajatwa, antoomwe amusinsimi wakubeja ooyo wakali kucita zitondezyo kumbele lyakwe eezyo nzyaakali kubelesya kweena baabo bakatambula caando camunyama abaabo bakomba cikozyanyo cakwe. Kabacili baumi, boonse bobilo bakawaalwa muzyiba lyamulilo liyaka asulufa.” Kabacheendelezya, basinkondonyina baLeza aaba boonse bayoonyonyoonwa chakumaninina.

13. Mbuubuli buyumu-yumu mbubaswaana maKristu bweetwa aamfulumende?

¹³ Makani aaya atugwasya biyeni? Akaambo kakuti tuli maKristu, tweelede kusyomeka kuli Leza akuBwaami bwakwe. (Joh. 18:36) Kuti tukonzye kuchita oobo, tatweelede kutola lubazu mutwaambo twanyika. Pesi kuchita oobo, kulakonzya kupa kuti zintu zituyumine loko nkaambo mfulumende ziyanda kuti tube kubbazu lyazyo kwiinda muzintu nzituchita anzitwaambuula. Aabo bazumina kusungilizigwa aamfulumende, babikkwa makki yamunyama. (Ciy. 13:16, 17) Kufumbwa muntu uuzumina kubikkwa makki taakatambuliki pe kuli Jehova alubo taakabujani pe buumi butamani. (Ciy. 14:9, 10; 20:4) Nkinkaako, kulayandikana kuti umwi awumwi wesu atatoli lubazu mutwaambo twanyika. Alubo nikuba kuti mfulumende zyeezya biyeni kutusungilizya, iswe tweelede kukkala katusyomeka kuli Jehova.

MAMANINO AAWUSISYA AAMUWUULE MUPATI

14. Kweendelana alugwalo lwa Ciyubunuzyo 17:3-5, mwaapostolo Johane wakabonaanzi?

¹⁴ Mwaapostolo Johane wakaamba kuti ‘wakagambwa kapati’ achintu nchaakabona. Niinzi eecho? Wakabona mwanakazi katantide umwi wabanyama aaba bayoosya. (Ciy. 17:1, 2, 6) Mwanakazi ooyu waambwa kuti ‘muvwuule imupati’ alubo wiitwa kuti “Babuloni Mupati.” Uchita “bwaamu” ‘abami bamunyika.’—Bala Ciyubunuzyo 17:3-5.

15-16. Ngwani “Babuloni Mupati” alubo tuzizi biyeni?

¹⁵ Ngwani “Babuloni Mupati”? Mwanakazi ooyu takonzyi pe kwaambwa kuti mbweendelezi bwanyika nkaambo Bbayibbele lyaamba kuti ulikuchita bwaamu abeendelezi banyika. (Ciy. 18:9) Alubo mwanakazi ooyu kutanta nkwaachitide munyama kutondeezya kuti ulikweendelezya beendelezi aaba banyika. Alubo takonzyi pe kwaambwa kuti wiiminina basikuuzizyania batangala bali munyika eeyi yeendelezegwa aaSaatani nkaambo basikuuzizyania aaba bayitwa kuti “basambazi bamunyika.”—Ciy. 18:11, 15, 16.

¹⁶ MuBbayibbele, bbala lyakuti “muvwuule” lilakonzya kwaamba bantu balyaamba kuti bakomba Leza pesi kumwi kabaliswaanizya mubukombi bwakubeja naakuti kabamvwanana aanyika. (1 Mak. 5:25; Jak. 4:4) Kusiyana azeezi, aabo bakomba Leza kabasyomeka baambwa kuti ‘balasalala’ naakuti “mbaanakalindu.” (2 Kor. 11:2; Ciy. 14:4) Kumuunzi waBbabbiloni lyachiindi nkuko kwakali kuchitilwa bukombi boonse bwakubeja. Nkinkaako, kuleelela kwaamba kuti Bbabbiloni Mupati wiiminina bukombi boonse bwakubeja. Alubo Bbabbiloni Mupati ooyu nimbunga yabukombi bwakubeja.—Ciy. 17:5, 18; langa chiiyo chiti, “Ino Babuloni Mupati Nguni?”

17. Niinzi zizoochitikila Bbabbiloni Mupati?

¹⁷ Niinzi zizoochitikila Bbabbiloni Mupati? Ciyubunuzyo 17:16, 17 yaamba kuti: “Imeja aali kkumi ngoobona alimwi amunyama uulya, eezyi ziyoomusulaika muvwuule alimwi ziyoomusaala akumusiya mantanda, alimwi ziyoolya nyama yamubili wakwe akumuumpa amulilo cakumaninina. Nkaambo Leza wakacibikka mumyoyo yabo kuti bazwidilizye muzeezo wakwe.” Jehova uyoopa kuti zisi zikabelesye munyama uusalala pyu, chaamba United Nations, kuti ikabukile mbunga yabukombi bwakubeja akwiinyonyoona chakumaninina.—Ciy. 18:21-24.

18. Niinzi nzitweelede kuchita kuti tutaliswaanizyi pe muzintu zichitwa aaBbabbiloni Mupati?

¹⁸ Makani aaya atugwasya biyeni? Tweelede kukkala katuli ‘mubukombi busalala alimwi butasofweede mumeso aa Leza.’ (Jak. 1:27) Tatweelede kuliswaanizya mubukombi bwakubeja, kusekelela mapobwe aatazwi muMagwalo, kusumpula michito yakutalijata akuchita zyamizimu zichitwa aaBbabbiloni Mupati. Alubo tweelede kukkala katubuzya bantu kuti ‘bazwe mulinguwe’ kuchitila kuti bataliswaanizyi muzibi zyakwe.—Ciy. 18:4.

KUBETEKWA KWASINKONDONYINA WALEZA MUPATI

Simwaaba mupati uusalala pyu mbuli mulilo ulaamitwe iili 7, meja aali kkumi amisini iili 7, ulikubapa manguzu banyama baambidwe mubbuku lyaDaniele alyaCiyubunuzyo. Muzoka uzoojinka wawaalilwa mubbibi lyamulilo. — **SIMWAABA MUPATI UUSALALA PYU MBULI MULILO**

Saatani wakapa munyama manguzu. (Ciy. 12:3, 9, 13; 13:4; 20:2, 10) Mbukunga Saatani nguusinkondonyina mupati waJehova, uyoowalwa mumulindi uutagoli kwaminyaka iili 1 000. Kuzwa waawo, uyoowalilwa “muzyiba lyamulilo asulufa.” (Langa mafuka 19-20)

19. Ngwani “simwaaba mupati uusalala pyu mbuli mulilo”?

¹⁹ Bbuku lyaCiyubunuzyo lyaambuula atala ‘asimwaaba mupati uusalala pyu mbuli mulilo.’ (Ciy. 12:3) Simwaaba ooyu ulikulwana aaJesu abangelo bakwe. (Ciy. 12:7-9) Ulikulwana bakombi baLeza alubo ulikupa mfulumende zyanyika manguzu. (Ciy. 12:17; 13:4) Ngwani simwaaba ooyu? ‘Muzoka ooyo wakaindi, uutegwa Diabolosi a Saatani.’ (Ciy. 12:9; 20:2) Nguwe ulikweendelezya basinkondonyina baJehova boonse.

20. Niinzi zizoochitikila simwaaba?

²⁰ Niinzi zizoochitikila simwaaba? Ciyubunuzyo 20:1-3 itondeezya kuti mungelo uzoowala Saatani mumulindi uutagoli. Kuzooba mbuli kuti Saatani uli mujele. Chiindi nanooli mumulindi, Saatani takakonzyi kweena “limbi masi kusikila mane ikamane eeyo myaka iili 1,000.” Kumamanino, Saatani amadimoni aakwe bayoowaalilwa “muzyiba lyamulilo asulufa.” Eezi zyaamba kuti bazoonyonyoonwa chakumaninina. (Ciy. 20:10) Yeeyela kuti kunooli biyeni aanyika kakutakwe Saatani amadimoni aakwe. Eechi chinooli chiindi chibotu loko.

21. Nkamboonzi nitweelede kubotelwa atala azintu nzitubala mubbuku lyaCiyubunuzyo?

²¹ Kulabotezya kumvwisisisya nchizyiiminina zitondeezyo eezi zili mubbuku lyaCiyubunuzyo. Twabona kuti basinkondonyina baLeza mbaani alubo twabona zizoobachitikila. Nisimpe, “ulikkomene ooyo waabala cakupozya alimwi abaabo bamvwa majwi aabusinsimi oobu”! (Ciy. 1:3) Pesi basinkondonyina baLeza nibazoogwisigwa, nziizili zilongezyo nzibazoojana aabo basyomeka? Tuzoosandula mubuzyo ooyu muchiiyo chamamanino chazyiiyo eezi zitatu.

LWIIMBO 23 Jehova Watalika Kulela

a Bbuku lyaCiyubunuzyo libelesya zitondeezyo chiindi nilyaamba atala abasinkondonyina baLeza. Bbuku lyaDaniele litugwasya kumvwisisisya kuti zitondeezyo eezyo zyiimininaanzi. Muchiiyo eechi, tulalanga-langa bumwi bupolofita buli mubbuku lyaDaniele bukozyenie aabupolofita buli mubbuku lyaCiyubunuzyo. Kuchita oobo kulatugwasya kuziba basinkondonyina baLeza. Alubo tulabona kuti niinzi ziyoobachitikila.

b Chimwi chitondeezya kuti munyama uuli aamitwe iili 7 wiiminina mfulumende zyoonse zili aanguzu nchakuti ulaameja aali 10. Chiindi chiingi muBbayibbele, namba yakuti 10 yiiminina kumaninina.

c Kusiyana amunyama wakusaanguna, chikozyano chamunyama tachikwe “musini” aameja aacho. (Ciy. 13:1) Zili boobo akaambo kakuti munyama ooyu ‘uzwa kuli baabo bali 7’ chaamba bamwi baami alubo upegwa manguzu ambabo.—Langa chiiyo chijanika aa jw.org chiti, “Ino Wiiminina Nzi Munyama Uusalala Pyu Waambwa mu Ciyubunuzyo Caandaano 17?”