Twaambo Tupa Kuti Tube Aabulangilizi Mu2023—Bbayibbili Lyaambaanzi?

Mbukunga munyaka wa2023 ulikusaanguna, tulangilila kuti zintu zibotu zizoochitika kulindiswe kuswaanizya abamumpuli zyesu. Nkamboonzi nitweelede kuba aabulangilizi?

Bbayibbili Litupa Bulangilizi

Bbayibbili lilaamakani mabotu aakuti mapenzi ngituswaana ngakayindi kaniini alubo azoomana lino-lino. Mulaamwi majwi, zintu zilembedwe muBbayibbili zyakalembelwa kuti ‘tuyiisigwe, kuchitila kuti kwiinda. . . muluumbulizyo luzwa muMagwalo, tube aabulangilizi.’—Baroma 15:4.

• Kuti wiiye zyiingi atala azisyomezyo zili muBbayibbili, bala chiiyo chitii “Bulangizi Bwini-bwini Bwabuumi Bubotu Kumbele.”

Bulangilizi Bukonzya Kukugwasya Lino

Bulangilizi bwamuBbayibbili buli “mbuli ngobyo yiimika bwato yabuumi bwesu.” (Mahebberu 6:19, makani aamunsi) Bulangilizi oobu bulatusimya. Bulatugwasya kuti tulisimye kumapenzi ngituswaana lino, tube aamaboneno aalikabotu akuti tukkale katubotelwa. Muchikozyano:

• Bona bulangilizi bujanika muBbayibbili mbubwakagwasya mwaalumi wakali sibukande. Yebela vidiyo itii Teendakachili Kwiiyanda Pe Nzila Njindakali Kuponaayo.

• Bona bulangilizi buli muBbayibbili mbubukonzya kutugwasya kuti twafwidwa aawumwi wamumpuli. Yebela kavidiyo kati Zikonzya Kuumbulizya Aabo Balila.

Simya Bulangilizi Bwako

Bantu biingi balangilila kuti zintu zibotu zichitike, pesi tabakwe choonzyo pe kuti zintu nzibalangilila zizoozuzikizigwa. Bbayibbili litusyomezya zintu zisiyene. Nkamboonzi? Nkaambo zisyomezyo zili muBbayibbili zizwa kuli Jehova Lezaa “uutabeji.” (Tito 1:2) Jehova alikke nguwe ulaanguzu zyakuzuzikizya zisyomezyo zyakwe; “ulacita zintu zyoonse nzyayanda kucita.”—Intembauzyo 135:5, 6.

Tukutamba kuti ugwasigwe aabulangilizi bwachoonzyo buli muBbayibbili. Ulakonzya kusimya bulangilizi bwako kwiinda ‘mukulanga-langa Magwalo buzuba abuzuba.’ (Milimo 17:11) Jana zyiingi kwiinda mukwiiya Bbayibbili kutabbadali. Saanguna munyaka wa2023 kuli aabulangilizi!