Kugwasilizya Kwakachitika Mapenzi mu2021—Tatubalekelezyi pe Bakwesu aBachizi

Mumunyaka wamulimu wamu2021,a nyika yoonse yakachili kuswaanana amapenzi akaambo kaKkorona. Kweendelana azyakapandululwa muchiiyo chiti “Kugwasya Bakwesu Abachizi Bali Munyika Yoonse Chiindi Chacorona,” mamiliyoni amalib akabelesegwa muchiindi chaKkorona alubo kwakapangwa maKkomiti Aagwasilizya Kwakachitika Mapenzi ayinda ku950.

Nikuba kuti kkorona yakeeta mapenzi mapati, mapenzi alichitikila aamwi abawo akaambo kazichitwa abantu akali kupenzya bakwesu abachizi munyika yoonse. Kuti bagwasilizye mapenzi ayinda ku200 akali achitika, baKkomiti yaBalangizi yamuKabunga Keendelezya bakapa mvumo yakuti kubelesegwe mali isika $8 miliyoni kuyungizya kumali yakali kugwasilizya muchiindi chakkorona. Atubone mbuzyakabelesegwa zintu nzimusanga kugwasilizya mapenzi aabili akazwa kuchitika lino lino.

Kudubuka kwaChilundu Chitegwa Nyiragongo

Mu22 May 2021, Chilundu chaNyiragongo, chili kuDemocratic Republic of the Congo chakasaanguna kudubuka. Mulilo wakazwa achilundu eecho wakanyonyoona maanda, zikolo, akuyuminizya tusensa toonse twamaanzi. Pesi mulilo ooyu teenguwo kupela wakeeta mapenzi. Nikwakayinda mazuba mache biyo chilundu kachili chadubuka, kwakaba lusuko lujeya mudolopo lyaGoma amizuzumo yanyika. Bantu biingi bamudolopo eelyo bakalayililwa kuti balonge. Bamwi bakachijila kunyika ilaafwiifwi, kuRwanda.

Akati kabantu bakalonga, kwakali Bakamboni baJehova bali 5 000. Bamwi bakasweekelwa amaanda aabo akaambo kakudubuka kwachilundu pesi bamwi akaambo kabantu bakabweza zintu zitali zyabo. BaKkomiti iigwasilisya bakuRwanda akuDemocratic Republic of the Congo bakabelekelaamwi. Kabaambuula atala akkomiti eeyi, bamutabi wakuCongo (Kinshasa) bakati: “Nikuba kuti zintu zyakalinyongene mudolopo eelyo alubo malayilile akuti bantu balonge takalinapegwa pe, bakkomiti iigwasilizya bakali basaanguna kale kugwasilizya achakulya, maanzi, mibbeda azyakuzwaata. Muli limwi dolopo, oomo bakwesu abachizi bayinda ku 2 000 mubakalibungene, bakkomiti eeyi bakabayakila matente akukkala, bakabapa mamasikki akuzwaata akubapandwida nzibeelede kuchita kuti batajatwi abulwazi bwakkorona abwakkolela.

Mumyeezi iitatu biyo kuzwa nikwakachitika mapenzi, bakwesu bakali bagwasilizya a6 000kg yarayisi, 6 000kg yafulawa, malita amafuta akujikisya ayinda ku8 000 alubo malita ayinda ku8 000 amaanzi. Kuti babelesye mali kabotu, bakumutabi bakabamba kuti chakulya chiwulwe kachili chiingi munyika mubakkala kwiinda kuti chiwulwe kachidula kuzwa kuli zimwi nyika.

Uumwi muchizi ulaang’anda yakanyonyoonwa akudubuka kwachilundu wakaamba kuti, “Eezi zyakatumana manguzu alubo zyakatuchisa loko.” Pesi we abamumpuli yakwe bakapegwa zintu zyakulisanina alubo bakasimisigwa mubukombi. Waamba kuti: “Katugwasigwa aaJehova, tulaazintu nzituyanda mubuumi. Twakabona kuti Jehova ulanyampula mikuli yesu akupa kuti itatulemeni loko.”

Kubulika Kwazintu Ziyandikana kuVenezuela

Kwaba aaminyaka miingi loko kakubulika zintu ziyandikana kuVenezuela. Bakombima bali kupona muzyiimo ziyumu loko, kuli kubulika kwachakulya alubo bantu batyola milawu bali kuyungizya. Nikuba oobo, mbunga yaJehova tibalekelezyi pe.

Mumunyaka wamulimu wayinda, kwakabelesegwa mali iyiinda ku$1.5 miliyoni kuti kuwulwe chakulya ansipa yakali kuzoopegwa mpuli zyakali kuyanda lugwasyo. Bakumutabi wakuVenezuela bakati: “Teekuuba kusisya matani ali 130 achakulya kumbazu zine zyanyika mweezi amweezi akubona kuti bakombima bajana lugwasyo luyandikana.” Kuti chakulya chisike kubakombima kachili kabotu, bakwesu bawula chakulya chitafwambaani kubola. Bakumutabi bakati: “Tuchita nzitukonzya kuti tuwule chakulya chiingi kachili kuzwa kutebulwa alubo achiindi nichitaduli loko. Alubo tulachitumizya katubelesya moota zitaduli pe.”

Leonel, wamuKkomiti Iigwasilizya Nikwabuka Mapenzi yakuVenezuela, uuyanda loko mulimu wakwe. Wakaamba kuti, “Mulimu wakugwasilizya uyandikana loko. Mulimu ooyu uli kundisimya loko kuzwa naakafwa mwanakazi wangu akaambo kakkorona. Ndikkala kandijisikini alubo ndibona kandiyandikana loko kubakwesu abachizi bayanda lugwasyo. Ndabona chatongola meso kuti Jehova uuzuzikizya chisomezyo chakuti tabalekelezyi pe bantu bakwe.”

Umwi mukwesu wakagwasigwa nikwakabuka mapenzi, wakali kubeleka mukkomiti yakugwasilizya chiindi. Wakaamba kuti, “Chakali chaba chiindi chakuti andime ndigwasigwe. Teetwakagwasigwa aziyandikana zyakumubili kupela pesi bakwesu bakatugwasya ime amwanakazi wangu kuti tubatame. Bakatulangania, kutuumbulizya alubo bakatusungwaazya.”

Amwi mapenzi alachitika chakufwambaana alubo kakutakwe chenjezyo pe. Nikuba oobo, mbunga yaJehova iyanduula akutumizya zintu ziyandikana chakufwambaana akaambo kazipo nzimusanga munyika yoonse. Zimwi nzila zibelesegwa kusanga zijanika awebbusayiti itii donate.jw.org. Tulazilumba loko zipo nzimusanga.