Samiyele Wakusaanguna
5 MaFilisiti nibakabweza Bbokesi lyaLeza wakasimpe, bakalyeeta ku-Ashidodi kabazwaalyo ku-Ebbeneza. 2 MaFilisiti bakabweza Bbokesi lyaLeza wakasimpe balinjizya mung’anda yaDagoni* mpawo bakalibikka kumbali aaDagoni. 3 Mubuzuba bwakatobela, bantu baku-Ashidodi nibakafuma kuseeni, bakajana Dagoni kawide, busyu kabulangide aansi kunembo lyaBbokesi lyaJehova. Nkinkaako, bakabweza Dagoni bamubweedezya aandawu yakwe. 4 Nibakabuka kuseeni-seeni mubuzuba bwakatobela, bakajana Dagoni kawide, busyu kabulangide aansi kunembo lyaBbokesi lyaJehova. Mutwe waDagoni amaboko aakwe zyakalidyunkwidwe alubo zyakali kumulyango. Chipanzi chakwe chili mbuli muswi, nchicho chakasyaala kachijisini.* 5 Eezi nzizyo zipa kuti kusikila sunu, bapayizi baDagoni abaabo boonse banjila mung’anda yaDagoni batalyati aamulyango wang’anda yaDagoni ku-Ashidodi.
6 Jehova wakabapa chisubulo chipati bantu baku-Ashidodi alubo wakabapa chisubulo kwiinda mukupa kuti bantu bakkala mu-Ashidodi amuzilawu zyayo babe aazilonda.* 7 Baalumi bamu-Ashidodi nibakabona zyakali kuchitika, bakati: “Mutalekeli Bbokesi lyaLeza wa-Israyeli kuti lyiinkilile kunembo kalili aandiswe, nkaambo watupa chisubulo chalunya iswe aleza wesu Dagoni.” 8 Nkinkaako, bakatuma bantu kuti bakayite baami bamaFilisiti alubo bakababunganizyaamwi mpawo bakababuzya kuti: “Tweelede kuchitaanzi atala aBbokesi lyaLeza wama-Israyeli?” Bakabasandula kuti: “Bbokesi lyaLeza wama-Israyeli alitolwe kuGati.” Nkinkaako, bakatola Bbokesi lyaLeza wa-Israyeli nkukooko.
9 Nibakalitola nkukooko, kuboko kwaJehova kwakasikila muunzi ooyo alubo bantu bakasaanguna kuyoowa loko. Wakapa bantu bamumuunzi ooyo chisubulo, kuzwa kumuniini kusika kumupati alubo bakaba aazilonda. 10 Kuzwa waawo, bakatola Bbokesi lyaLeza wakasimpe ku-Ekkironi, pesi Bbokesi lyaLeza wakasimpe mbulyakasika biyo ku-Ekkironi, bantu baku-Ekkironi bakasaanguna kulila kabati: “Beeta Bbokesi lyaLeza wa-Israyeli ookuno kuti bazootujaye iswe abantu besu!” 11 Kuzwa waawo, bakatuma bantu kuti bakayite baami boonse bamaFilisiti alubo bakababunganizyaamwi mpawo bakati: “Amugwisye Bbokesi lyaLeza wama-Israyeli, mulibweedezye kundawu yalyo kuchitila kuti iswe abantu besu tutajayigwi pe.” Nkaambo bantu boonse bamumuunzi bakali baabuyoowa kujayigwa, mbukunga Leza wakali weeta chisubulo chakwe nkukooko 12 alubo bantu bakatafwa bakaba aazilonda. Mukuyungizya, kulilila lugwasyo kwabantu bamumuunzi ooyu kwakasika kujulu.