Samiyele Wakusaanguna
6 Bbokesi lyaJehova lyakali muchilawu chamaFilisiti kwamyeezi iili musanu ayibili. 2 MaFilisiti bakayita bapayizi abasondi, bababuzya kuti: “Tweelede kuchitaanzi atala aBbokesi lyaJehova? Amutubuzye mbutukonzya kulibweedezya kundawu yalyo.” 3 Bakabasandula kabati: “Kuti kamuyanda kubweedezya bbokesi lyachizuminano chaJehova Leza wa-Israyeli, tamweelede kulibweedezya kamutakwe chipo. Mweelede kuba aachoonzyo chakuti mwalibweedezya kamuli aachipo chamulandu. Kuti mwachita oobo, mulapona alubo mulaziba kuti nkamboonzi kuboko kwakwe nikwatali kugwisigwa aalindinywe.” 4 Nkinkaako, bakabuzya kuti: “Tumupeenzi kuti chibe chipo chamulandu?” Bakati: “Amutumizye zikozyano zyazilonda* zyangolida zili musanu azikozyano zyambeba zyangolida zili musanu kweendelana amweelwe wabaami bamaFilisiti, nkaambo penzi likozyenie lyakasikila umwi awumwi wanu abaami banu. 5 Mweelede kupanga zikozyano zyazilonda azikozyano zyambeba zilikweeta lunyonyooko munyika yanu alubo mweelede kulemeka Leza wa-Israyeli. Amwi ulagwisya chisubulo chakwe chili aalindinywe akuli leza wanu akunyika yanu. 6 Nkamboonzi nimweelede kuyumya myoyo yanu, mbuli ma-Ijipita aFaro mbubakayumya myoyo yabo? Naakabasubula chalunya, mpimpawo mpubakazumizya ma-Israyeli kuti beende mpawo bakeenda. 7 Lino amubambe ngolo mpya ang’ombe zibili zinyonsya alubo zitanasungwa aajokwe. Mpawo musunge ng’ombe eezyo aangolo, pesi bana bazyo mubabweedezye kumuunzi kule anzizyo. 8 Amubweze Bbokesi lyaJehova mulibikke mungolo mpawo mubikke zibumbwa zyangolida nzimuli kutumizya kulinguwe kazili chipo chamulandu mubbokesi lili aafwiifwi andilyo. Kuzwa waawo, mwiileke yeende 9 mpawo mulangisisye eezi: Kuti ngolo yeenda kayitobela mugwagwa uuya kuBbeti-shemeshi muchilawu chalyo, nkukwaamba kuti unooli nguwe wakapa kuti tuchitikilwe zintu eezi zibi. Pesi kuti teeyatozya nkukooko, tunooli twaziba kuti teekuboko kwakwe pe kwakatweetela mapenzi, nga ndipenzi biyo lyatusikila.”
10 Baalumi aaba bakachita mbuboobo. Bakabweza ng’ombe zibili zyakali aabana, bazisunga aangolo alubo bana bazyo bakabasiya kabajalilidwe kumuunzi. 11 Mpawo bakabikka Bbokesi lyaJehova mungolo abbokesi lyakali aazikozyano zyambeba zyangolida azikozyano zyazilonda zyabo. 12 Ng’ombe eezyo zyakasaanguna kweenda mumugwagwa kaziya kuBbeti-shemeshi. Zyakeenda aamugwagwa nguyooyo kaziya bulila. Taakwe nizyakaleya kuchilisyo naakuti kuchimweensi. Aachiindi eecho, baami bamaFilisiti bakali kuyabuzitobela kusika kumugaano waBbeti-shemeshi. 13 Bantu bakuBbeti-shemeshi bakali kutebula wiiti mukkuti.* Nibakatambya meso akubona Bbokesi, bakabotelwa loko. 14 Ngolo yakasika mumuunda waJoshuwa wakuBbeti-shemeshi mpawo yakayimikila aafwiifwi abbwe pati. Nkinkaako, bakagonka zisamu zyangolo mpawo ng’ombe bakazipa kazili chipo chitentwa kuli Jehova.
15 MaLevi bakaselusya Bbokesi lyaJehova abbokesi lyakalaamwi andilyo, lyakali aazintu zyangolida mpawo bakaabikka aajulu aabbwe pati. Mubuzuba mbuboobo, baalumi bakuBbeti-shemeshi bakapa zipo zitentwa azipayizyo kuli Jehova.
16 Baami bamaFilisiti bali musanu nibakabona zyakachitika, bakabweeda ku-Ekkironi mubuzuba mbuboobo. 17 Nzezi zikozyano zyazilonda zyangolida baami bamaFilisiti nzibakatumizya kazili chipo chamulandu kuli Jehova: chimwi chakali cha-Ashidodi, chimwi chakali chaGaza, chimwi chakali cha-Ashikkeloni, chimwi chakali chaGati alubo chimwi chakali cha-Ekkironi. 18 Mweelwe wazikozyano zyambeba zyangolida wakeelene aamweelwe wamyuunzi yoonse yamaFilisiti yabaami bali musanu, nkukwaamba myuunzi yakakwabilidwe atuunzi twakatakwabilidwe pe.
Alubo bbwe pati aawo mpubakabikka Bbokesi lyaJehova mumuunda waJoshuwa wakuBbeti-shemeshi, ngukamboni kusika sunu. 19 Pesi Leza wakajaya bantu bakuBbeti-shemeshi akaambo kakuti bakalanga Bbokesi lyaJehova. Wakajaya bantu bali 50 070* aakati kabo alubo bantu bakasaanguna kulila, nkaambo Jehova wakali wajaya bantu biingi loko. 20 Nkinkaako, baalumi bakuBbeti-shemeshi bakabuzya kuti: “Ngwani uukonzya kwiimikila kunembo lyaJehova Leza ooyu uusalala alubo ulaya kulini kuti wazwa kulindiswe?” 21 Nkinkaako, bakatuma batumwa kubantu bakuKkiriyati-jeyarimu kabati: “MaFilisiti baboozya Bbokesi lyaJehova. Amuze muzoolibweze mwiinkaalyo.”